Gyenesis 26
26
Isak kɔ Gerar
1 #
Gye 12.10; 20.2 Na ɔkɔm baa asase no so, ɛsono ɔkɔm a ɛbae Abraham bere so no. Na Isak kɔɔ Filistifo hene Abimelek nkyɛn wɔ Gerar.
2Na AWURADE yii ne ho kyerɛɛ no sɛ: Nsian nkɔ Misraim, tena asase a mɛkyerɛ wo yi so. 3#Gye 12.7; 22.16 Tena asase yi so sɛ, ɔhɔho, na medi w'akyi mahyira wo, efisɛ wo ne w'asefo na mede nsaase yi nyinaa mɛma mo, na mama ntam a mekaa w'agya Abraham no agyina. 4#Gye 15.5; 12.3 Na mɛma w'asefo adɔ sɛ ɔsoro nsoromma, na mede nsaase yi nyinaa mama w'asefo, na w'asefo mu na wobehyira asase so amanaman nyinaa, 5efisɛ Abraham tiee me nne, na odii me nsiesiei, me mmara nsɛm, m'ahyɛde, ne me mmara so.
6Na Isak tenaa Gerar. 7#Gye 12.13; 20.2 Na ɛhɔfo no bisaa no ne yere ho asɛm no, ɔkae sɛ: Me nua ne no. Na osuroe sɛ, ɔbɛka sɛ: Me yere ne no, efisɛ ose: anyɛ saa a, Rebeka nti ɛhafo bekum me; efisɛ ne ho yɛ fɛ. 8#Mmb 5.18 Na ɔkyɛɛ hɔ no, Filistifo hene Abimelek hwɛɛ mfɛnsere mu hui, na hwɛ, Isak ne ne yere Rebeka rewewe. 9Na Abimelek frɛɛ Isak sɛ: Hwɛ, ampa ara ɔyɛ wo yere, na ɛyɛɛ dɛn na wuse: Ɔyɛ me nua? Na Isak ka kyerɛɛ no sɛ: Efisɛ mise: anyɛ saa a, ne nti mewu. 10Na Abimelek se: Ɛdɛn na woayɛ yɛn yi? Ɛkaa kumaa bi na anka ɔman yi muni bi ne wo yere dae, na anka wode mmusu aba yɛn so. 11Na Abimelek hyɛɛ ne nkurɔfo nyinaa sɛ: Nea ɔbɛka ɔbarima yi anaa ne yere no, owu na obewu.
12 #
Mmb 10.22
Na Isak duaa mfude wɔ asase no so, na onyaa nnɔbae mmɔho ɔha afirihyia no ara mu, na Awurade hyiraa no. 13Na Isak nyaa ne ho, na ɔkɔɔ so ara nyaa ne ho na ɔyɛɛ kɛse kosii sɛ ɔyɛɛ kɛse pa ara. 14Na onyaa nguankuw, ne anantwikuw, ne nkoa pii. Na Filistifo ani beree no. 15#Gye 21.25 Na nsubura a n'agya Abraham nkoa tutui n'agya bere so no, Filistifo sisiw ne nyinaa de dɔte hyehyɛɛ no mama. 16Na Abimelek ka kyerɛɛ Isak sɛ: Fi yɛn nkyɛn kɔ, na wowɔ tumi dodo sen yɛn. 17Na Isak siim fii hɔ kosisii ne ntamadan wɔ Gerar bon mu, na ɔtenaa hɔ.
18Na Isak san titii nsubura a n'agya Abraham bere so wotutui a Abraham wu akyi Filistifo sisiwii no mu, na ɔtotoo no din sɛnea n'agya totoe no ara. 19Na Isak nkoa funuu obon no mu, na wohuu nsupa abura wɔ hɔ. 20Na Gerar mmoahwɛfo ne Isak mmoahwɛfo dii so aperepere kae sɛ: Nsu no yɛ yɛn dea! Enti ɔfrɛɛ abura no din Esek, ase ne: ɔham, efisɛ wɔne no hamee. 21Na wotuu asubura foforo, na ɛno ho nso wɔpereperee, enti ɔfrɛɛ no Sitna, ase ne: Apereperedi. 22Na wotutuu hɔ kotuu abura foforo, na ɛno de, wɔampere, enti ɔtoo no din Rehobot, ase ne: Prama so, na ose: Afei de Awurade atrɛw mu ama yɛn, na yɛadɔ wɔ asase yi so. 23Na ofii hɔ kɔɔ Beer-seba. 24Na Awurade yii ne ho kyerɛɛ no anadwo no ara kae sɛ: Mene w'agya Abraham Nyankopɔn, nsuro, na medi w'akyi mehyira wo, na m'akoa Abraham nti mɛma w'asefo adɔ. 25#Gye 12.8 Na osii afɔremuka wɔ hɔ, na ɔfrɛɛ Awurade din, na osii ne ntamadan wɔ hɔ. Na Isak nkoa tuu asubura wɔ hɔ.
26 #
Gye 21.22
Na Abimelek ne n'adamfo Ahusat ne ne safohene titiriw Pikol fi Gerar baa ne nkyɛn. 27Na Isak ka kyerɛɛ wɔn sɛ ɛdɛn nti na moba me nkyɛn yi? Sɛ motan me, na moapam me afi mo nkyɛn. 28Na wose: Yɛahu pefee sɛ: Awurade di w'akyi. Na yese: Ma ntam nna yɛn, ɛne wo ntam, na ma yɛne wo mpam, 29sɛ worenyɛ yɛn bɔne bi; sɛnea yɛanka wo, na yɛayɛ wo papa nko, na yɛagya wo kwan asomdwoe mu no. Afei wone nea Awurade ahyira no. 30Na ɔtow wɔn pon, na wodidi nomee. 31Na wɔsɔree anɔpatutu kekaa ntam kyerɛkyerɛɛ wɔn ho, na Isak gyaa wɔn kwan, na wɔde asomdwoe fii ne nkyɛn kɔe. 32Na da no ara Isak nkoa bae bɛkaa no abura a wotui no ho asɛm sɛ: Yɛato nsu. 33#Gye 21.31 Na ɔfrɛɛ no Siba. Enti kurow no din de Beer-seba de besi nnɛ yi ara.
34 #
Gye 36.2-3
Na Esau dii mfirihyia aduanan no, ɔwaree Hetini Beeri babea Yudit ne Hetini Elon babea Basmat. 35Na wɔhyɛɛ Isak ne Rebeka awerɛhow.
Currently Selected:
Gyenesis 26: ATWDB
Highlight
Share
Copy
Want to have your highlights saved across all your devices? Sign up or sign in
Revised Akuapem Twi DC Bible © Bible Society of Ghana, 2017.
