Zis 18

Pol dan Korint

1Apre sa Pol kit Atenn e li al Korint. 2Laba li ti zwenn enn Zwif ki ti apel Akila, ki finn ne dan enn landrwa ki apel Pon. Li ti fek vinn Itali avek so madam Prisil, parski lanperer Klod ti donn lord tou bann Zwif pou kit Rom. Pol ti al get zot, 3e parski li ti fer mem metie ki zot, li ti res kot zot pou travay ansam. Zot ti bann fabrikan latant. 4Sak saba Pol ti pran laparol dan sinagog, li ti rod konvink bann Zwif ek bann Grek.

5Kan Silas ek Timote ti vinn depi Masedwann, Pol ti devoue tou so letan zis pou pres laparol ek dir bann Zwif ki Zezi limem Lemesi. 6Bann Zwif ti opoz Pol ek zot ti insilte li, lerla Pol sakouy so linz e li dir, “Si zot al dan perdision, zotmem antor! Mo pa responsab. Asterla mo pou al kot bann payin.”

7Lerla Pol kit sinagog e li al kot Tityis Zistis enn dimoun ki ti ador Bondie, ki so lakaz ti akote sinagog. 8Krispis ki ti sef sinagog ek tou so fami ti krwar dan Lesegner. Boukou bann abitan Korint osi ki ti tann Pol prese, ti krwar ek zot ti batize.

9Enn swar dan enn vizion Lesegner dir Pol, “Pa bizin gagn per, me kontign koze, napa res trankil; 10parski mo ar twa e personn pa pou atak twa pou bles twa; ena boukou mo bann dimoun dan sa site la.” 11Pol ti pas enn-an sis-mwa dan Korint pou ansegn zot parol Bondie.

12Me kan Galyon ti gouverner Akai bann Zwif ti marye pike kont Pol ek zot ti amenn li devan lakour. 13Zot dir koumsa, “Sa zom la pe fer bann dimoun ador Bondie dan enn manier ki kont lalwa.” 14Zis kouma Pol ti pou koze, Galyon dir bann Zwif, “Si sa ti enn ofans oubien enn krim orib mo ti pou ena enn rezon pou pran letan ekout zot, bann Zwif; 15me parski sa zafer la konsern bann parol ek bann nom, ek zot prop lalwa, debrouy zot; mo refiz ziz sa bann zafer la.” 16Li ranvway zot depi lakour. 17Zot tou trap Sostenn, sef sinagog, zot bat li devan lakour. Me Galyon pa ti pran zot kont.

Pol retourn Antios

18Pol ti kontign res Korint e apre li ti pran bato pou al Lasiri, akonpagne par Prisil ek Akila. Avan so depar Pol ti fer raz so latet dan enn lavil ki apel Sankre, parski li ti finn fer enn promes. 19Letan zot ariv Efez, Pol kit Akila ek Prisil, li al dan sinagog kot li koumans diskit ar bann Zwif. 20Kan zot ti dir li res pli lontan, li ti refize, 21me kan ti vinn moman pou dir orevwar, li dir zot, “Mo pou retourne si li dan volonte Bondie.” Lerla li pran bato li al Efez. 22Letan li ti ariv Sezare, li ti monte pou al Zerizalem pou salye bann manm legliz, avan ki li al Antios.

23Pol ti pas inpe letan Antios, lerla li ti al vizit diferan landrwa dan rezion Galasi ek Frizi, pou konsolid lafwa bann krwayan.

Apolos dan Efez ek Korint

24Enn Zwif ki ti apel Apolos, e ki sorti Aleksandri, ti vinn Efez. Li ti enn gran orater, e li ti ena enn gran konesans Lekritir. 25Li ti finn gagn instriksion konsernan Sime Lesegner, e li ti ena boukou lantousias. Li ti ansegne ek anons laparol lor Zezi avek boukou presizion. Me selma li ti konn zis batem Zan. 26Li ti koumans koz avek boukou lasirans dan sinagog. Letan Prisil ek Akila ti tann li, zot finn invit li kot zot, lerla zot finn ansegn li sime Bondie dan enn fason pli korek.

27Letan Apolos ti le al Akai, bann frer ti ankouraz li e zot ti ekrir bann disip laba pou akeyir li bien. Kan li ariv laba, li ti enn gran sekour pou bann ki ti finn krwar par lagras Bondie. 28Li ti prezant bann argiman solid kont bann Zwif dan deba piblik, parski li ti prouve par Lekritir ki Zezi, limem Lekris.

Currently Selected:

Zis 18: NTKM2009

Highlight

Copy