Zis 19

Pol ariv Efez

1Letan Apolos ti Korint, Pol ti travers bann provins dan montagn pou al Efez. Laba li ti zwenn detrwa disip. 2Li dimann zot, “Eski zot ti resevwar Lespri Sin kan zot ti vinn krwayan?”

Zot reponn, “Non, nou pa finn mem tande ki ena enn Lespri Sin.”

3Lerla Pol dir, “Abe ki batem zot finn resevwar?” Zot reponn, “Batem Zan.”

4Pol dir, “Batem Zan enn batem repantans. Zan ti dir bann dimoun krwar dan Sa Enn ki pe vinn apre li la, setadir, Zezi.” 5Apre ki zot tann sa bann koze la, zot resevwar batem dan nom Lesegner Zezi. 6Letan Pol inpoz lame lor zot, Lespri Sin desann lor zot e zot koumans koz anlang e profetize. 7Ti ena anviron douz zom.

8Apre sa Pol al dan sinagog. Pandan trwa mwa Pol diskit ar bannla e li ti rod konvink zot lor Rwayom Bondie. 9Me detrwa latet-dir pa ti le krwar e zot koz dimal lor Sime Lesegner devan la foul. Pol kit zot, li amenn bann disip enn kote e li kontign ansegne toulezour dan lasal lekol Tiranos. 10Sa ti ale koumsa pandan de-zan kot tou bann abitan Lazi, ki li Zwif ki li Grek, ti tann parol Lesegner.

Bann garson Skeva

11Par lame Pol, Bondie ti fer bann mirak extraordiner, 12ki mem bann malad ti geri e move lespri ti kit zot kan zot ti gagn bann mouswar ek linz ki Pol ti finn touse.

13Lerla detrwa Zwif ti pe al dan plizir landrwa e zot ti pe sey tir move lespri lor bann dimoun. Zot ti servi nom Zezi lor bann posede, zot dir, “Lor nom Zezi ki Pol proklame, mo dir zot sorti ale.” 14Set garson enn sef pret Zwif ki ti apel Skeva ti pe fer sa. 15Enn zour move lespri ti reponn zot, “Zezi mo kone, e Pol osi mo kone; me zot ki zot ete?” 16Dimoun ki ti posede la tom lor zot e li donn zot enn koreksion ziska zot senie, zot ti bizin sove kit lakaz, touni.

17Letan bann Zwif ek bann Grek ki ti res Efez tann sa, enn laper trap zot; lerla nom Lesegner Zezi ti glorifie. 18Boukou ki ti deza krwayan ti vinn konfese piblikman seki zot ti pratike avan. 19Enn kantite bann pratikan lamazi-nwar ti amenn tou zot liv e ti bril zot devan tou dimoun. Letan kalkil valer sa bann liv la, li fer antou sinkant mil pies larzan. 20Koumsamem parol Lesegner ti fann partou e ti pe grandi avek lafors.

Rayot dan Efez

21Apre tou sa bann evennman la, Lespri Sin gid Pol pou pas par Masedwann ek Akai pou al Zerizalem. Li dir, “Kan mo sorti laba, mo bizin al Rom.” 22Pandan ki Pol ti res ankor inpe letan Lazi, li ti avoy Timote ek Erast, de parmi bann ki ti travay ar li, pou al Masedwann. 23Sa lepok la ti ena enn gran dezord lor size Sime Lesegner. 24Enn bizoutie ki apel Demetri ti fabrik bann tanp Artemis; sa ti raport boukou larzan bann artizan. 25Li ti rasanble bann artizan, avek lezot ki fer mem metie e li dir, “Bann kamarad, zot kone ki nou ti pe gagn boukou lamone ar sa biznes la. 26Zot pe trouve ek zot pe tande kouma sa boug ki apel Pol la finn konvink ek detourn boukou dimoun, pa selma dan Efez me dan tou Lazi. Li dir ki stati fabrike ar lame, pa Bondie sa. 27Pou ena enn danze ki pa selma pou fer ditor nou lindistri, me osi tanp gran dees Artemis pou perdi tou so repitasion; e dees la limem ki adore partou dan Lazi ek dan lemonn antie, pou perdi so grander.”

28Letan bannla tann sa zot ankoler e zot kriye, “Artemis bann Efezien li vremem gran!” 29Site la net ti ranpli ar konfizion. Bann dimoun ti trenn Gais ek Aristark, de Masedonien ki ti kamarad Pol dan so vwayaz, e zot galoupe al dan teat. 30Pol ti anvi prezant li devan lafoul, me so bann disip ti anpes li. 31Detrwa sef provins Lazi ki ti so kamarad ti avoy li enn mesaz pou konsey li pa rant dan teat.

32Ti ena gran konfizion dan lasanble. Sakenn ti pe kriy enn zafer. E laplipar pa ti kone mem kifer zot ti rasanble. 33Bann Zwif pous Alexand devan; detrwa dan lafoul donn li konsey. Li signal dimoun pou res trankil, pouki li defann limem devan zot. 34Letan zot remarke ki li enn Zwif zot tou kriye pandan de zer-tan avek enn sel lavwa, “Artemis bann Efezien li vremem gran!”

35Sekreter lavil fer lepep res trankil, li dir, “Abitan Efez, tou dimoun kone ki site Efez limem gardien tanp Artemis e ki so stati finn tom depi lesiel. 36Sa, pa kapav diskite sa. Alor, zot bizin gard zot kalm e pa fer nanye san bien reflesi. 37Zot finn amenn sa bann dimoun la isi, ki pourtan pa ni voler tanp, ni blasfemater ki finn koz kont nou dees. 38Alors, si Demetri ar so artizan ena akizasion kont enn parmi bannla, lakour ouver e ena bann ziz; laba zot kapav met sarz ki zot anvi. 39Si ena ankor lot kiksoz, tou bizin regle dan lakour. 40Kouma sa pe deroule la, ena risk vinn akiz nou ki nou finn fer enn dezord akoz tou seki finn pase zordi. Nou pena okenn rezon ki zistifie sa atroupman la.” 41Apre sa parol la li ranvway lafoul.

Currently Selected:

Zis 19: NTKM2009

Highlight

Copy