Zis 2

Lespri Sin desann zour Lapantkot

1Kan zour Lapantkot ti arive, tou bann krwayan ti reyni ansam dan mem landrwa. 2Enn sel kout enn son terib ti sorti depi lesiel parey kouma enn divan violan ki pe soufle, e sa ti ranpli lakaz kot zot ti reyni. 3Lerla zot ti trouv seki paret kouma bann ti laflam dan form lalang, ki separe ek repoz lor sakenn parmi bann krwayan. 4Zot tou ti ranpli ar Lespri Sin e zot koumans koz dan lezot langaz dapre seki Lespri ti pe donn zot pou exprime.

5Dan Zerizalem ti ena bann Zwif ki ti bien devoue pou Bondie, e ki ti sorti partou lor later. 6Enn gran lafoul ti rasanble letan ti finn tann sa tapaz la. Zot ti res bet parski sakenn ti tann bann krwayan pe koz dan langaz zot pei. 7Dan zot etonnman ek admirasion zot koumans dimande, “Tou sa bann dimoun ki pe koze la, pa bann Galileen? 8Abe kouma sakenn parmi nou pe tann zot koz dan langaz nou prop pei? 9Nou sorti pei Part, Medi ek Elam. Ena bann abitan Mezopotami, Zide e Kapados, ena sorti Pon ek provins Lazi, 10Frizi e Panfili, Lezip ek rezion Sirenn dan Libi, ek ena ki vinn depi Rom, 11Kret ek Arabi; ena ki finn ne Zwif, ena ki finn konverti dan relizion Zwif - me pourtan nou tou tann zot pe rakont mervey Bondie sakenn dan nou bann langaz!” 12Zot ti telman etone e dan konfizion, ki zot ti pe dir ant zot, “Kisavedir, sa?”

13Me lezot ti pe boufonn bann krwayan; zot ti pe dir, “Divin ki pe koze.”

Diskour Pier

14Pier ti diboute avek lezot onz apot e avek enn lavwa bien-bien for li ti koz ar lafoul, “Mo bann kamarad Zwif e zot tou ki abitan Zerizalem, les mo explik zot, ekout mo parol avek atansion. 15Non, sa bann dimoun la pa finn soule zot, li zis nev-er gramatin la. 16Me seki profet Zoel ti anonse, samem ki pe realize asterla:

17‘Ala seki pou arive dan dernie zour, Bondie dir,

Mo pou repann mo Lespri lor tou dimoun.

Zot garson, zot tifi pou anons mo mesaz;

zot bann zenes pou trouv vizion,

zot bann vie dimoun pou fer bann rev.

18Wi, lor mo bann serviter, ki li zom ki li fam,

mo pou vers mo Lespri sa zour la;

e zot pou profetize.

19Mo pou fer bann mervey dan lesiel lao

e bann sign mirak anba lor later,

pou ena disan, dife, ek niaz lafime,

20soley pou rant dan fernwar, lalinn vinn disan

avan ki zour Lesegner arive dan grander, dan laglwar.

21Lerla, ninport ki dimoun ki kriye sekour Lesegner, li pou sove.’ #2:21 Zoel 2.28-32

22Mo bann kamarad Izraelit, ekout seki mo ena pou dir zot: Zezi ki sorti Nazaret, ti enn dimoun ki ena lotorite Bondie, ki finn prouve devan zot par mirak, mervey ek sign, kouma zotmem zot kone. 23Dapre konesans ki Bondie ena davans, ek dapre so plan, sa zom la finn livre dan zot lame, e zot finn touy li avek led bann move dimoun; zot finn krisifie li. 24Me Bondie finn resisit li, finn tir li dan douler lamor, parski li ti inposib ki lamor tini li dan so pouvwar. 25Ala seki David dir lor li:

‘Mo toultan trouv Lesegner devan mwa;

Li pre ar mwa, koumsa mo pa tranble.

26Akoz sa mo ranpli ar boner,

mo parol ranpli ar lazwa.

Mo lekor pou repoz dan lesperans

27parski to pa pou abandonn mwa dan landrwa kot bann mor ale

to pa pou les to serviter pouri dan tonbo.

28To finn montre mwa sime ki donn lavi,

e to prezans ranpli mwa ar lazwa.’ #2:28 Psom 16.8-11.

29Mo bann kamarad Izraelit, mo kapav dir zot avek lasirans ki nou anset David ti mor e ti anter li. So tom ankor la avek nou zordi. 30Parski li ti enn profet, li ti kone ki Bondie ti promet li par enn serman ki enn zour enn so desandan pou asiz lor so tronn. 31David ti trouve anavans seki Bondie pou fer enn zour, alor li ti koz lor rezireksion Lemesi letan li ti dir:

‘Pa ti abandonn li dan landrwa kot bann mor ale,

e so lekor pa ti pouri dan tonbo.’

32Bondie ti resisit Zezi depi lamor e nou bann temwin ki sa ti arive. 33Bondie ti plas li dan so kote drwat, e li finn resevwar promes Lespri Sin par so Papa; e Zezi finn repann saki zot pe trouve ek tande. 34David pa ti mont dan lesiel, me pourtan li ti dir:

‘Lesegner Bondie finn dir mo Segner:

asiz la lor mo drwat,

35ziska ki mo fer to bann lennmi to marspie.’

36Tou lepep Izrael bizin kone avek lasirans: sa Zezi ki zot finn krisifie la, limem ki Bondie finn fer Segner e Mesi!”

Bann premie konverti

37Letan bann dimoun tann sa zot ti boulverse dan zot leker, zot dir Pier e lezot apot, “Frer, ki nou bizin fer?” 38Pier reponn, “Repanti, e resevwar batem dan nom Zezi Kris pou zot gagn pardon pou zot pese; e zot pou resevwar don ki Bondie done, Lespri Sin. 39Sa promes la li pou zot e zot zanfan, e pou tou seki lwin - pou tou seki Lesegner nou Bondie pou apele.”

40Pier kontign ankouraz bannla ar boukou lezot temwagnaz pou konvink zot; li dir zot, “Sov zotmem depi pinision ki pe vinn lor sa bann move dimoun ki dan perdision.” 41Boukou seki finn krwar sa mesaz la ti pran batem, e sa zour la anviron trwa-mil dimoun ti azoute ar group bann krwayan.

Lavi premie kominote krwayan

42Zot ti devoue zot letan pou ekout lansegnman bann apot e kominion fraternel, zot ti partaz repa lakominion e lapriyer. 43Boukou mirak ek sign ti pe akonpli par bann apot, e tou dimoun ti inpresione. 44Tou bann krwayan ti ini e ti pe partaz tou zot dibien ansam. 45Zot ti vann zot dibien e seki zot posede, pou zot distribie li dapre seki sakenn ti bizin. 46Zour apre zour zot ti rasanble kouma enn group dan Tanp, zot ti kas dipin ansam dan lakaz, e ti pran zot repa ansam avek enn leker sinser e ranpli ar lazwa. 47Zot ti loue Bondie e ti gagn lestim tou bann dimoun. Toulezour Lesegner ti pe sov dimoun ki li ti pe azout dan zot group.

Currently Selected:

Zis 2: NTKM2009

Highlight

Copy