Génesis 18
18
Chisóyuꞌú Ndiosíꞌ nu̱u̱nꞌ Abraham ya̱ koo se̱ꞌya yɨ́ɨ́‑ɨ
1Jee ntu̱vi I̱toꞌoꞌ‑ó nu̱u̱nꞌ Abraham nteñu rá tu̱ya̱á káꞌnú kúmí Mamré, ni nééꞌ Abraham yuvéꞌí vesayo saꞌma re̱ꞌ, máá hora sááꞌ. 2Jee nna̱kune̱ꞌyá nichi re̱ꞌ jee niniꞌ íká re̱ꞌ ya̱ u̱ni̱ꞌ te̱e íñɨ́ nichiꞌ ichinúúnꞌ re̱ꞌ. Jee sáá niniꞌ re̱ꞌ ráa, jee ninu re̱ꞌ nkene re̱ꞌ yuvéꞌí jee ña̱taꞌanꞌ re̱ꞌ ráa, jee ña̱kui̱ñɨ̱ꞌ ítɨ́ re̱ꞌ nu̱u̱nꞌ ráa jee ne̱ ña̱xin nei re̱ꞌ nu̱u̱nꞌ re̱ꞌ nu̱u̱nꞌ ñuꞌún. 3Jee nkachiꞌ re̱ꞌ:
―I̱toꞌoꞌ ni̱ꞌ, retú kúváꞌa iniꞌ nú néꞌyá nú nuꞌuꞌ, kova̱ꞌa xá iniꞌ rán nkɨ̱ꞌɨ́nꞌ rán ntañúꞌún jee kino̱o rán ɨɨnúún jín nuꞌuꞌ ya̱ kúvi ni̱ꞌ musúꞌ rán. 4Jee kiji rá musúꞌ ni̱ꞌ jín nute nakete ráa jie̱ꞌe̱ꞌ rán jee najia̱ví rán nu̱u̱nꞌ kátɨ́ jie̱ꞌe̱ꞌ yutun. 5Jee jie̱ꞌe̱ꞌ ya̱ ntiaaꞌ rán nu̱u̱nꞌ ni̱ꞌ ya̱ kúvi ni̱ꞌ musúꞌ rán jee kikeꞌen ni̱ꞌ ntíꞌ ya̱ kajiꞌ rán sáva nakei iniꞌ rán jee kuíre nakuꞌun rán ichi kɨ̱ꞌɨ̱nꞌ rán ―nkachiꞌ Abraham nu̱u̱nꞌ ráa.
Jee nkachiꞌ ráa:
―Saꞌá suꞌva sánikua̱ꞌ nkachiꞌ nú.
6Saájee ni̱nu̱kuáchí Abraham nni̱vɨ re̱ꞌ iniꞌ veꞌi saꞌma nu̱u̱nꞌ nééꞌ Sara jee nkachiꞌ re̱ꞌ nu̱u̱nꞌ ña:
―¡Ya̱chi̱ꞌ nú! Sakaꞌ o̱ko̱ꞌ litro yuchi harina váꞌa jee saꞌá i̱xta̱tíláꞌ ―nkachiꞌ re̱ꞌ.
7Jee ninu re̱ꞌ kua̱ꞌa̱nꞌ re̱ꞌ nu̱u̱nꞌ íñɨ́ rá xi̱ni̱kɨ̱ꞌ re̱ꞌ, jee nkeꞌen re̱ꞌ ɨɨn chelu yúté jiáá máá va̱ꞌa, jee njia̱ꞌa re̱ꞌ maa nu̱u̱nꞌ ɨɨn musúꞌ re̱ꞌ, sáva saꞌá stákoo‑o vá. 8Jee suni nkeꞌen re̱ꞌ ñujien xu̱kui jín xu̱kui jín ku̱ñu chelu ya̱ nsa̱ꞌá stákoo‑o, jee ñani re̱ꞌ maa nu̱u̱nꞌ rá te̱e vá, jee íñɨ́ re̱ꞌ nu̱u̱nꞌ ráa jie̱ꞌe̱ꞌ yutun, jee nyajiꞌ ráa. 9Jee ni̱ka̱tu̱ꞌún ráa re̱ꞌ:
―¿Né núꞌ íyó ñasɨ́ꞌɨ́ nú Sara? ―nkachiꞌ ráa nu̱u̱nꞌ re̱ꞌ.
Jee nna̱xiníkó re̱ꞌ:
―Nééꞌ ña iniꞌ veꞌi saꞌma yaꞌá ―nkachiꞌ re̱ꞌ nu̱u̱nꞌ ráa.
10Saájee nkachiꞌ ɨɨn rá te̱e vá:
―Máá nááꞌ nijia inka kui̱ya̱ꞌ kiji ichinúúnꞌ nikó tuku ni̱ꞌ kine̱ꞌyá ni̱ꞌ noꞌó, jee nɨ́ tiempúꞌ saá koo ɨɨn se̱ꞌya ñasɨ́ꞌɨ́ nú Sara ―nkachiꞌ ɨɨn rá te̱e vá nu̱u̱nꞌ re̱ꞌ.
Jee nééꞌ Sara yuvéꞌí ichi iniꞌ veꞌi saꞌma ya̱ nééꞌ ichi ya̱ta̱ꞌ nu̱u̱nꞌ íñɨ́ re̱ꞌ jee tésóꞌo ña rá tu̱ꞌun káꞌánꞌ ráa. 11Abraham jín Sara ya̱ nyɨɨ ráa, jee Sara chi ya̱ ntu̱ví ka̱ꞌ nátanɨ ya̱ta̱ꞌ ña ta yo̱o̱ꞌ. 12Saáva ñakuꞌ yuꞌuꞌ Sara, jee nkaꞌvi iniꞌ maáña: “Kua̱nɨꞌɨ ni̱ꞌ jee, ¿á kuvi ka̱ꞌ kusɨ̱ɨ̱ꞌ iniꞌ ni̱ꞌ ya̱ koo se̱ꞌya ni̱ꞌ rúja jee ya nyɨɨ yɨɨ́ ni̱ꞌ i̱toꞌoꞌ ni̱ꞌ rúja?” ñaniꞌ iniꞌ ña.
13Saájee nkachiꞌ I̱toꞌoꞌ nu̱u̱nꞌ Abraham:
―¿Na̱ kuvi chi ñakuꞌ Sara jee káchíꞌ ña?: “¿Á máá naáꞌ nijia ya̱ kuvi koo ɨɨn se̱ꞌya ni̱ꞌ ya̱ nyɨɨ ni̱ꞌ chiꞌ?” 14¿Á íyó ná kuvi ya̱ víjí nasɨ́kuitɨꞌ ya̱ saꞌá I̱toꞌoꞌ résa? Tiempúꞌ ñani ni̱ꞌ kui̱ya̱ꞌ kiji tukuni nikó ni̱ꞌ kine̱ꞌyá ni̱ꞌ noꞌó, saájee koo ɨɨn se̱ꞌya yɨ́ɨ́ Sara ―nkachiꞌ Ndiosíꞌ nu̱u̱nꞌ Abraham.
15Soo ntu̱ví nkachiꞌ Sara:
―Ntu ñákúꞌ ni̱ꞌ ―nkachiꞌ ña yaꞌá chi nyu̱ꞌví ña.
Jee nna̱xiníkó re̱ꞌ:
―Ntu̱ví chisaꞌ ñakuꞌ nú ―nkachiꞌ Ndiosíꞌ.
Jíkánꞌ táꞌvíꞌ Abraham nu̱u̱nꞌ Ndiosíꞌ jie̱ꞌe̱ꞌ ñuunꞌ Sodoma
16Jee kuíre nnakui̱ñɨ̱ꞌ nichiꞌ rá te̱e vá, jee nne̱ꞌyá ráa nu̱u̱nꞌ ñuunꞌ Sodoma, jee nna̱keꞌen ráa kua̱ꞌa̱nꞌ ráa ichi kua̱ꞌa̱nꞌ ñuunꞌ Sodoma, jee kútáꞌán Abraham jín ráa kua̱ꞌa̱nꞌ sáva kaꞌanꞌ re̱ꞌ ka̱ꞌ jín ráa jee kɨ̱ꞌɨ̱nꞌ ráa. 17Jee nkachiꞌ I̱toꞌoꞌ:
“¿Á chise̱ꞌí ni̱ꞌ nu̱u̱nꞌ Abraham ya̱ ná kuvi ya̱ saꞌá ni̱ꞌ? 18Chi íyó nijia ya̱ Abraham vá kuvi re̱ꞌ tátáꞌ ɨɨn nación máá kúñáꞌnú jín koo fesáꞌ‑a. Jee kuatíñú ni̱ꞌ maáréꞌ sáva saꞌá ni̱ꞌ ya̱ netuꞌ kuvi ntáká rá nación ñɨ̱vɨ́ yaꞌá. 19Chi nka̱ji ni̱ꞌ re̱ꞌ sáva tatúníꞌ re̱ꞌ nu̱u̱nꞌ rá se̱ꞌya re̱ꞌ jín nu̱u̱nꞌ rá ichiyúkúnꞌ re̱ꞌ kiji tiempúꞌ ichinúúnꞌ sáva chuꞌun re̱ꞌ ráa ichi I̱toꞌoꞌ kunikɨnꞌ ráa maa sáva saꞌá ráa nɨꞌɨ ya̱ kúvi ya̱ váꞌa jín ya̱ íyó na̱a̱ꞌ sáva sikúnkuvi ni̱ꞌ ya̱ nkachiꞌ ni̱ꞌ saꞌá ni̱ꞌ nu̱u̱nꞌ re̱ꞌ, ya̱ kúvi ni̱ꞌ I̱toꞌoꞌ.”
20Jee nkachiꞌ I̱toꞌoꞌ Ndiosíꞌ:
―Ntántúníꞌ íyó tu̱ꞌun kákua̱chi si̱kɨ̱ꞌ rá ñɨvɨ rá ñuunꞌ Sodoma jín Gomorra ya̱ kúkánéꞌén víꞌí ráa ka̱ꞌ, jee níviniꞌ ka̱ꞌ rá kua̱chi sáꞌá ráa. 21Jee yukuán kɨ̱ꞌɨ̱nꞌ ni̱ꞌ sáva kune̱ꞌyá ni̱ꞌ retú ya̱ naáꞌ ví nijia ya̱ máá na̱sɨ ví ya̱ niváꞌa sáꞌá ráa kuéntáꞌ kua̱ꞌ íyó tu̱ꞌun kákua̱chi ya̱ tésóꞌo ni̱ꞌ. Jee retú ntu̱ví jee kuniꞌ ni̱ꞌ maa ―nkachiꞌ Ndiosíꞌ.
22Jee ni̱kóyátá u̱vi̱ꞌ rá te̱e vá yukuán nna̱kechí ráa, jee kua̱ꞌa̱nꞌ ráa ichi ñuunꞌ Sodoma, soo Abraham nkino̱o i̱i̱ꞌ re̱ꞌ ka̱ꞌ íñɨ́ re̱ꞌ nu̱u̱nꞌ I̱toꞌoꞌ. 23Jee ña̱kuyatin ka̱ꞌ Abraham nu̱u̱nꞌ Ndiosíꞌ jee nkachiꞌ‑i:
―¿Á máá naáꞌ nijia xináánꞌ nkáá nú rá ñɨvɨ na̱a̱ꞌ jín rá ñɨvɨ niváꞌa rúja? 24Jee sa̱naanꞌ íyó u̱vi̱xiko u̱ji̱ꞌ (50) ñɨvɨ na̱a̱ꞌ nu̱u̱nꞌ ñuunꞌ vá, jee, ¿á máá naáꞌ nijia ya̱ xináánꞌ nú ñuunꞌ vá jee nkúnekáꞌnú iniꞌ nú rá ñɨvɨ ñuunꞌ vá jie̱ꞌe̱ꞌ rá u̱vi̱xiko u̱ji̱ꞌ (50) ñɨvɨ na̱a̱ꞌ vá résa? 25¡Máá nááꞌ nijia ya̱ nsáꞌ saꞌá nú sukuán! Nkúvi kaꞌniꞌ nkáá nú rá ñɨvɨ na̱a̱ꞌ jín rá ñɨvɨ niváꞌa, ya̱ nuún koo jín rá ñɨvɨ na̱a̱ꞌ kuéntáꞌ rá ñɨvɨ niváꞌa. ¡Nsa̱ꞌá nú sukuán! Noꞌó ya̱ kúvi nú ya̱ jiéꞌnéꞌ nú kua̱chi nɨꞌɨ ñɨvɨ ñɨ̱vɨ́ yaꞌá, ¿á ntu sú na̱a̱ꞌ keꞌneꞌ nú kua̱chi résa? ―nkachiꞌ Abraham.
26Jee nkachiꞌ I̱toꞌoꞌ:
―Retú naniꞌinꞌ ni̱ꞌ u̱vi̱xiko u̱ji̱ꞌ (50) ñɨvɨ na̱a̱ꞌ nu̱u̱nꞌ ñuunꞌ Sodoma, jee jie̱ꞌe̱ꞌ ráa jee kunekáꞌnú iniꞌ ni̱ꞌ kune̱ꞌyá ni̱ꞌ nta̱ká rá ñɨvɨ nééꞌ yukuán ―nkachiꞌ Ndiosíꞌ.
27Jee nna̱xiníkó Abraham:
―Vitan jee nkiji iniꞌ ni̱ꞌ kaꞌanꞌ ni̱ꞌ jín I̱toꞌoꞌ ni̱ꞌ suꞌva, sú nuꞌuꞌ chi kua̱chi kúvi ni̱ꞌ ti̱ka̱cha̱a̱ꞌ jín ya̱a̱ꞌ. 28Sa̱naanꞌ kúmániꞌ u̱ꞌu̱nꞌ ñɨvɨ na̱a̱ꞌ sáva kenta ni úvíxiko u̱ji̱ꞌ (50) ñɨvɨ na̱a̱ꞌ résa. ¿Á xináánꞌ nú nɨꞌɨ ñuunꞌ vá jie̱ꞌe̱ꞌ ya̱ kúmániꞌ u̱ꞌu̱nꞌ ñɨvɨ na̱a̱ꞌ résa? ―nkachiꞌ Abraham.
Jee nna̱xiníkó Ndiosíꞌ:
―Nsáꞌ xináánꞌ ni̱ꞌ ñuunꞌ vá retú naniꞌinꞌ ni̱ꞌ u̱vi̱xiko u̱ꞌu̱nꞌ (45) ñɨvɨ na̱a̱ꞌ ―nkachiꞌ I̱toꞌoꞌ‑ó Ndiosíꞌ.
29Jee tukuni nkaꞌanꞌ Abraham jín re̱ꞌ jee nkachiꞌ‑i:
―Sa̱naanꞌ naniꞌinꞌ nú u̱vi̱xiko (40) ñɨvɨ na̱a̱ꞌ yukuán ―nkachiꞌ Abraham.
Jee nkachiꞌ re̱ꞌ:
―Nsáꞌá ni̱ꞌ maa jie̱ꞌe̱ꞌ rá u̱vi̱xiko (40) ñɨvɨ na̱a̱ꞌ vá.
30Jee nkachiꞌ Abraham:
―I̱toꞌoꞌ ni̱ꞌ, kova̱ꞌa iniꞌ, koto kítɨ́ꞌ iniꞌ nú kune̱ꞌyá nú nuꞌuꞌ jie̱ꞌe̱ꞌ kaꞌanꞌ ni̱ꞌ. Sa̱naanꞌ naniꞌinꞌ nú o̱ko̱ꞌ u̱ji̱ꞌ (30) ñɨvɨ na̱a̱ꞌ yukuán ―nkachiꞌ Abraham.
Jee nkachiꞌ re̱ꞌ:
―Nsáꞌ saꞌá ni̱ꞌ maa retú naniꞌinꞌ ni̱ꞌ o̱ko̱ꞌ u̱ji̱ꞌ (30) ñɨvɨ na̱a̱ꞌ yukuán ―nkachiꞌ Ndiosíꞌ.
31Jee nkachiꞌ Abraham:
―Kova̱ꞌa iniꞌ, kíji iniꞌ ni̱ꞌ kaꞌanꞌ ni̱ꞌ jín I̱toꞌoꞌ ni̱ꞌ. Sa̱naanꞌ naniꞌinꞌ nú o̱ko̱ꞌ (20) ñɨvɨ na̱a̱ꞌ yukuán ―nkachiꞌ Abraham.
Jee nkachiꞌ I̱toꞌoꞌ:
―Nsáꞌ xináánꞌ ni̱ꞌ maa jie̱ꞌe̱ꞌ rá ókóꞌ ñɨvɨ na̱a̱ꞌ ―nkachiꞌ Ndiosíꞌ.
32Jee nkachiꞌ Abraham:
―Kova̱ꞌa iniꞌ I̱toꞌoꞌ ni̱ꞌ, koto kítɨ́ꞌ iniꞌ nú kune̱ꞌyá nú nuꞌuꞌ jie̱ꞌe̱ꞌ kaꞌanꞌ ni̱ꞌ ɨɨn íchí ka̱ꞌ. Sa̱naanꞌ naniꞌinꞌ nú u̱ji̱ꞌ (10) ñɨvɨ na̱a̱ꞌ ―nkachiꞌ Abraham.
Jee nkachiꞌ‑i:
―Nsáꞌ xináánꞌ ni̱ꞌ maa jie̱ꞌe̱ꞌ rá ujíꞌ vá ―nkachiꞌ Ndiosíꞌ.
33Jee sáá nkuvi nɨꞌɨ nkaꞌanꞌ I̱toꞌoꞌ jín Abraham, jee kua̱ꞌa̱nꞌ‑a, jee Abraham chi nni̱kó‑o nu̱u̱nꞌ nééꞌ‑e.
Currently Selected:
Génesis 18: meh
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
