Génesis 19
19
Xínáánꞌ Ndiosíꞌ rá ñuunꞌ Sodoma jín Gomorra
1Jee rá uvíꞌ najiáꞌáꞌ ííꞌ Ndiosíꞌ jee sáá kua̱kunéñuꞌun jee nkenta ráa nu̱u̱nꞌ ñuunꞌ Sodoma. Jee Lot chi ña̱kuneeꞌ re̱ꞌ yuꞌú nu̱u̱nꞌ kívɨ rá ñɨvɨ nu̱u̱nꞌ ñuunꞌ Sodoma vá. Jee sáá niniꞌ re̱ꞌ ráa, jee nna̱kuiñɨꞌ re̱ꞌ ña̱taꞌanꞌ re̱ꞌ ráa, jee ña̱kui̱ñɨ̱ꞌ ítɨ́ re̱ꞌ nu̱u̱nꞌ ráa ne̱ ña̱xin nei re̱ꞌ nu̱u̱nꞌ re̱ꞌ nu̱u̱nꞌ ñuꞌún. 2Jee nkachiꞌ re̱ꞌ:
―Ránoꞌó tátáꞌ, kova̱ꞌa xá iniꞌ rán kɨ̱kino̱o rán yakuááꞌ veꞌi nuꞌuꞌ ya̱ kúvi ni̱ꞌ musúꞌ rán. Jee yukuán kuvi nakete rán rá jie̱ꞌe̱ꞌ rán, jee neꞌenꞌ xteñu̱ꞌún kuvi kɨ̱ꞌɨ̱nꞌ rán ichi kɨ̱ꞌɨ̱nꞌ rán ―nkachiꞌ re̱ꞌ nu̱u̱nꞌ ráa.
Soo nkachiꞌ ráa:
―Ntu̱ví chi sú iniꞌ ichi chíkéꞌi ni kino̱o ránꞌ yakuááꞌ ―nkachiꞌ ráa nu̱u̱nꞌ re̱ꞌ.
3Soo nyɨ̱tuvi víꞌí re̱ꞌ nkaꞌanꞌ re̱ꞌ jín ráa, jee ña̱ꞌa̱nꞌ ráa jín re̱ꞌ veꞌi re̱ꞌ. Jee sáá nkenta ráa jín re̱ꞌ jee nsa̱ꞌá stákoo re̱ꞌ ɨɨn xíní ya̱ kuxíní ráa jín i̱xta̱tíláꞌ ya̱ ntu yɨ́ꞌɨ́ levadura ya̱ nsa̱ꞌá re̱ꞌ maa, jee nyajiꞌ ráa maa. 4Jee ne̱ ntiáꞌan ka̱ꞌ kikava ráa kusuꞌ ráa, jee nta̱ká rá te̱e ñuunꞌ vá, ne̱ rá súchí jín ne̱ rá te̱e ñáꞌnú, jee nchu̱ti̱yu̱ꞌ ráa maáráa ya̱ta̱ꞌ veꞌi Lot, 5Jee nka̱najíín ráa xi̱ni̱ꞌ Lot jee nkachiꞌ ráa:
―¿Né núꞌ íyó rá te̱e ntiaaꞌ nu̱u̱nꞌ nú yakuááꞌ vitan? ¡Tavaꞌ ráa!, sáva tɨɨn xe̱e̱nꞌ ránꞌ ráa ―nkachiꞌ ráa. 6Saájee nkene Lot yuvéꞌí nu̱u̱nꞌ ráa, jee nna̱kasɨꞌ re̱ꞌ yuvéꞌí ya̱ta̱ꞌ re̱ꞌ. 7Jee nkachiꞌ re̱ꞌ:
―Rá ñaniꞌ ni̱ꞌ, kova̱ꞌa xá iniꞌ rán koto sáꞌá niva̱ꞌa rán. 8Kova̱ꞌa iniꞌ rán íyó u̱vi̱ꞌ se̱ꞌya sɨ́ꞌɨ́ ni̱ꞌ yaꞌá ya̱ ni ntiáꞌan kusuꞌ ráa jín ni ɨɨn te̱e. Jee kova̱ꞌa iniꞌ rán tavaꞌ ni̱ꞌ ráa nu̱u̱nꞌ rán jee saꞌá rán sáni kuniꞌ maárán jín ráa, soo rá te̱e yaꞌá chi koto na̱ sáꞌá rán jín ráa, chi njia̱ꞌa ni̱ꞌ veꞌi ni̱ꞌ kino̱o ráa jee íyó nama ni̱ꞌ ráa ―nkachiꞌ Lot.
9Soo nna̱xiníkó ráa:
―¡Kuiyo yukuán! ―jee nkachiꞌ ráa ka̱ꞌ―, to̱ꞌo̱ꞌ yaꞌá nkenta re̱ꞌ nééꞌ re̱ꞌ nteñu‑ó, jee vitan sáꞌá re̱ꞌ kuéntáꞌ juez jee jiéꞌnéꞌ re̱ꞌ kua̱chi‑ó. Saájee saꞌ víꞌí káꞌ saꞌá kini ránꞌ jín noꞌó nsú káꞌ suviráa ―nkachiꞌ rá te̱e vá nu̱u̱nꞌ Lot, jee nchi̱nátáꞌán ráa Lot, ña̱kuyatin ráa yuvéꞌí sáva ka̱ꞌnu̱ꞌ ráa maa.
10Soo rá te̱e ya̱ kino̱o veꞌi re̱ꞌ vá nsi̱kááꞌ ráa naꞌá ráa jee nna̱xtá ráa Lot nxi̱nívɨ ráa re̱ꞌ iniꞌ veꞌi jín ráa jee nna̱kasɨꞌ ráa yuvéꞌí. 11Jee nsa̱ꞌá kuáá ráa nchinúún rá te̱e íñɨ́ yuvéꞌí ne̱ rá máá súchí ka̱ꞌ, jín ne̱ rá te̱e ñáꞌnú ka̱ꞌ, nku̱kuáá ráa, jee ne̱ njia̱ví ráa nánukú kuáá ráa yuvéꞌí. 12Saájee nkachiꞌ ni núvíꞌ rá te̱e íñɨ́ jín Lot:
―¿Á íyó ka̱ꞌ rá táꞌán veꞌi nú yaꞌá?, ¿á ɨɨn se̱ꞌya ka̱sá nú, jín rá se̱ꞌya yɨ́ɨ́ nú, jín rá se̱ꞌya sɨ́ꞌɨ́ nú, jín ntáká ya̱ kúmí nú ñuunꞌ yaꞌá? Jee tavaꞌ ráa nu̱u̱nꞌ ñuunꞌ yaꞌá. 13Chi xináánꞌ ránꞌ yaꞌá, chi ntántúníꞌ íyó tu̱ꞌun kákua̱chi si̱kɨ̱ꞌ rá ñɨvɨ rá ñuunꞌ yaꞌá nu̱u̱nꞌ I̱toꞌoꞌ, saáva nta̱jí I̱toꞌoꞌ ránuꞌuꞌ sáva xináánꞌ ránꞌ maa ―nkachiꞌ ráa nu̱u̱nꞌ Lot.
14Saájee nkene re̱ꞌ kua̱kaꞌanꞌ re̱ꞌ jín rá te̱e ya̱ kuvi rá se̱ꞌya ka̱sá re̱ꞌ ya̱ káá náꞌviꞌ ráa jín rá se̱ꞌya sɨ́ꞌɨ́ re̱ꞌ jee nkachiꞌ re̱ꞌ:
―¡Nako̱o rán jee kene rán kuáꞌán rán yaꞌá, chi sa̱néꞌ íyó xináánꞌ I̱toꞌoꞌ ñuunꞌ yaꞌá! ―nkachiꞌ Lot.
Soo nkaꞌvi iniꞌ rá se̱ꞌya ka̱sá re̱ꞌ ya̱ kási̱kɨ́ re̱ꞌ.
15Jee sáá kua̱kunijin jee nxi̱nániꞌvɨꞌ rá najiáꞌáꞌ ííꞌ vá iniꞌ Lot jee nkachiꞌ ráa:
―¡Nako̱o, jee keꞌen ñasɨ́ꞌɨ́ nú jín ni núvíꞌ rá se̱ꞌya sɨ́ꞌɨ́ nú ya̱ nééꞌ ráa yaꞌá, jee kuáꞌán jín ráa, sáva ntu naanꞌ nú sáá xinóꞌo I̱toꞌoꞌ Ndiosíꞌ ñuunꞌ yaꞌá! ―nkachiꞌ rá najiáꞌáꞌ ííꞌ vá nu̱u̱nꞌ Lot.
16Soo sáá kúkáɨɨn iniꞌ Lot, jee ntɨɨn rá te̱e naꞌá re̱ꞌ jín naꞌá ñasɨ́ꞌɨ́ re̱ꞌ, jín rá naꞌá ni núvíꞌ rá se̱ꞌya sɨ́ꞌɨ́ re̱ꞌ, chi jie̱ꞌe̱ꞌ nika̱ꞌ íyó tu̱ꞌun náꞌví iniꞌ I̱toꞌoꞌ néꞌyá re̱ꞌ Lot, jee ntavaꞌ ráa rává ñani ráa rává yuñúúnꞌ vá. 17Jee sáá ya̱ nsiíyo ráa rává nu̱u̱nꞌ yuñúúnꞌ vá, jee ɨɨn ráa nkachiꞌ:
―¡Kuáꞌán, sikáku nú maánú! Jee koto nakune̱ꞌyá yátá nú ya̱ta̱ꞌ nú, jee ni koto jiákui̱ñɨ̱ꞌ nú ni ɨɨn nu̱u̱nꞌ ñunúꞌvéꞌ ne̱kua̱ꞌ kenta rán rá yuku, sáva ntu naanꞌ nú ―nkachiꞌ ɨɨn rá najiáꞌáꞌ ííꞌ vá nu̱u̱nꞌ Lot.
18Soo nkachiꞌ re̱ꞌ nu̱u̱nꞌ ráa:
―¡Ntu̱ví!, tátáꞌ, kova̱ꞌa iniꞌ nú, 19chi ya̱ íyó mániꞌ iniꞌ nú néꞌyá nú nuꞌuꞌ ya̱ kúvi ni̱ꞌ musúꞌ nú, jee ntántúníꞌ kúváꞌa iniꞌ nú néꞌyá nú nuꞌuꞌ jie̱ꞌe̱ꞌ ya̱ nsa̱ꞌá nú jín nuꞌuꞌ, chi nsi̱káku nú nuꞌuꞌ, soo nkúvi kaku ni̱ꞌ ne̱ rá yuku chi sa̱naanꞌ kitaꞌanꞌ ya̱ xináa vá nuꞌuꞌ jee kuviꞌ ni̱ꞌ. 20Kova̱ꞌa iniꞌ nú, kune̱ꞌyá, káá ɨɨn ñuunꞌ yatin yaꞌá, jee ñuunꞌ lúlí ví‑i. Kova̱ꞌa iniꞌ nú, taji kɨ̱ꞌɨ̱nꞌ ni̱ꞌ yukuán sáva ka̱ku ni̱ꞌ. ¿Á máá lúlí kúvi nijia ñuunꞌ vá sáva ka̱ku ni̱ꞌ yukuán résa? ―nkachiꞌ Lot nu̱u̱nꞌ najiáꞌáꞌ ííꞌ vá.
21Saájee nkachiꞌ najiáꞌáꞌ ííꞌ vá nu̱u̱nꞌ re̱ꞌ:
―Va̱tu̱ni, yɨ́netuꞌ ni̱ꞌ yaꞌá ya̱ jíkánꞌ nú nu̱u̱nꞌ ni̱ꞌ jee nsáꞌ xináánꞌ ni̱ꞌ ñuunꞌ vá ya̱ nkachiꞌ nú. 22Ya̱chi̱ꞌ nú, ka̱ku nú yukuán, chi ni ntu̱náꞌ kúvi saꞌá ni̱ꞌ nekuaꞌ kenta nú yukuán ―nkachiꞌ najiáꞌáꞌ ííꞌ vá nu̱u̱nꞌ Lot. (Saáva nsi̱kúnání re̱ꞌ súví ñuunꞌ yukuán Zoar, [ya̱ kuíni káchíꞌ lúlí].)
23Sáá ya̱ nku̱nijinꞌ jee nkenta Lot nki̱vɨ re̱ꞌ ñuunꞌ Zoar, 24jee nsa̱ꞌá Ndiosíꞌ ya̱ kuun yu̱u̱ꞌ sufríꞌ káyúꞌ‑u jín ñuꞌunꞌ itaꞌ ne̱ súkún ne̱ rá ñuunꞌ Sodoma jín Gomorra, 25jee nxi̱náánꞌ re̱ꞌ rá ñuunꞌ vá, jín nɨꞌɨ rá íyó sánitɨ́ɨn yukuán, jín nɨꞌɨ rá ñɨvɨ nééꞌ rá ñuunꞌ yukuán, jín nɨꞌɨ ya̱ jiáꞌnu nu̱u̱nꞌ ñuꞌun vá. 26Jee ñasɨ́ꞌɨ́ Lot, ya̱ níkɨ́nꞌ ña ya̱ta̱ꞌ re̱ꞌ, nna̱kune̱ꞌyá ña yátá ña, jee yukuán nnuvi ña ñunéꞌyúꞌ yu̱u̱ꞌ ñɨ̱ɨ̱nꞌ.
27Jee neꞌenꞌ nnako̱o Abraham jee ña̱ꞌa̱nꞌ re̱ꞌ nu̱u̱nꞌ ni̱ñɨ re̱ꞌ nkaꞌanꞌ re̱ꞌ jín I̱toꞌoꞌ. 28Jee nna̱kune̱ꞌyá‑a nu̱u̱nꞌ káá rá ñuunꞌ Sodoma jín Gomorra, jín ntáká ichinúúnꞌ káá ñuꞌun ñuunꞌ vá, jee niniꞌ‑i ya̱ kéne ñu̱ꞌma̱ꞌ ñuꞌun vá kuéntáꞌ retánꞌ kua̱ꞌ ɨɨn i̱tu̱nꞌ.
29Jee suꞌva nkuvi sáá nxi̱náánꞌ Ndiosíꞌ rá ñuunꞌ káá nu̱u̱nꞌ nuꞌveꞌ vá, soo ñúꞌún xíniꞌ Ndiosíꞌ néꞌyá re̱ꞌ Abraham jee ntavaꞌ‑a Lot nu̱u̱nꞌ nxi̱náánꞌ‑a, sáá nxi̱náánꞌ‑a rá ñuunꞌ nu̱u̱nꞌ nééꞌ Lot.
Lot jín rá se̱ꞌya sɨ́ꞌɨ́ re̱ꞌ
30Soo nkene Lot ñuunꞌ Zoar jee kua̱ꞌa̱nꞌ re̱ꞌ yuku jee nééꞌ re̱ꞌ yukuán jín ni núvíꞌ rá se̱ꞌya sɨ́ꞌɨ́ re̱ꞌ, chi nyu̱ꞌví re̱ꞌ kino̱o re̱ꞌ kuneeꞌ re̱ꞌ ñuunꞌ Zoar. Jee nkino̱o re̱ꞌ nneeꞌ re̱ꞌ iniꞌ ɨɨn yaviꞌ kava jín ni núvíꞌ rá se̱ꞌya sɨ́ꞌɨ́ re̱ꞌ.
31Jee nkachiꞌ se̱ꞌya sɨ́ꞌɨ́ xíꞌnañúꞌún re̱ꞌ nu̱u̱nꞌ se̱ꞌya sɨ́ꞌɨ́ súchí re̱ꞌ ka̱ꞌ:
―Ya kúvi tátáꞌ‑ó ɨɨn te̱e ñáꞌnú jee ntu̱ví íyó ni ɨɨn te̱e nu̱u̱nꞌ ñuꞌun yaꞌá ya̱ tana̱ꞌá jín‑ó, sánikua̱ꞌ sáꞌá nɨꞌɨ ñɨvɨ ñɨ̱vɨ́ yaꞌá. 32Saáva sikóꞌo‑ó re̱ꞌ nu̱xi nixiꞌ jee sikúni‑ó re̱ꞌ jee kikava‑ó nakusuꞌ‑ó jín re̱ꞌ sáva saꞌá‑ó ya̱ koo ichiyúkúnꞌ‑ó jín re̱ꞌ ―nkachiꞌ se̱ꞌya sɨ́ꞌɨ́ xíꞌnañúꞌún re̱ꞌ.
33Jee yakuááꞌ yukuán nsi̱kóꞌo ráa nu̱xi nixiꞌ tátáꞌ ráa jee ña̱kava se̱ꞌya sɨ́ꞌɨ́ xíꞌnañúꞌún re̱ꞌ jín re̱ꞌ, soo ni ntu̱ví niniꞌ re̱ꞌ sáá ña̱kava ña jín re̱ꞌ ni sáá nnako̱o ña. 34Jee ki̱vɨ̱ꞌ steñu̱ꞌún, jee se̱ꞌya sɨ́ꞌɨ́ xíꞌnañúꞌún re̱ꞌ nkachiꞌ‑i nu̱u̱nꞌ se̱ꞌya sɨ́ꞌɨ́ súchí re̱ꞌ ka̱ꞌ:
―Yakuááꞌ iku ña̱kava ni̱ꞌ jín tátáꞌ ni̱ꞌ, jee suni sikóꞌo‑ó re̱ꞌ yakuááꞌ vitan jee kikava nú nakusuꞌ nú jín re̱ꞌ sáva saꞌá‑ó ya̱ koo ichiyúkúnꞌ‑ó jín re̱ꞌ ―nkachiꞌ‑i.
35Jee yakuááꞌ yukuán suni nsi̱kóꞌo ráa tátáꞌ ráa nu̱xi nixiꞌ, jee nna̱kuiñɨ́ꞌ se̱ꞌya sɨ́ꞌɨ́ súchí re̱ꞌ ka̱ꞌ ña̱kava‑a nna̱kusuꞌ‑u jín re̱ꞌ, jee ni ntu̱ví niniꞌ re̱ꞌ sáá ña̱kava ña jín re̱ꞌ ni sáá nnako̱o ña. 36Jee nna̱nise̱ꞌya ni núvíꞌ rá se̱ꞌya sɨ́ꞌɨ́ Lot jín tátáꞌ ráa. 37Jee ni̱yo ɨɨn se̱ꞌya yɨ́ɨ́ se̱ꞌya sɨ́ꞌɨ́ xíꞌnañúꞌún re̱ꞌ ka̱ꞌ, jee nsi̱kúnání ña súví se̱ꞌya vá Moab, ya̱ kúvi tátáꞌ ichiyúkúnꞌ rá ñɨvɨ ñuunꞌ Moab ne̱ vitan. 38Jee suni ni̱yo ɨɨn se̱ꞌya yɨ́ɨ́ se̱ꞌya sɨ́ꞌɨ́ súchí re̱ꞌ ka̱ꞌ ranika̱ꞌ, jee nsi̱kúnání súví se̱ꞌya vá Ben‑ammí, ya̱ kúvi tátáꞌ ichiyúkúnꞌ rá ñɨvɨ ñuunꞌ Amon ne̱ vitan.
Currently Selected:
Génesis 19: meh
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
