Juan 10
10
Tu̱ꞌun káꞌánꞌ jie̱ꞌe̱ꞌ náka Jesús ñɨvɨ re̱ꞌ kuéntáꞌ rá lanchi
1Jee nkachiꞌ Jesús:
―Máá na̱a̱ꞌ vá káchíꞌ ni̱ꞌ nu̱u̱nꞌ rán ya̱ retú ɨɨn te̱e jee ntu̱ví kívɨ re̱ꞌ nu̱u̱nꞌ kúvi yuvéꞌí ɨɨn kuráꞌ rá lanchi, chisaꞌ inka ichi nu̱u̱nꞌ kúvi i̱ka̱ꞌ kuráꞌ nava re̱ꞌ ki̱vɨ re̱ꞌ, jee te̱e vá te̱e kuíꞌná kúvi re̱ꞌ. 2Soo te̱e ya̱ kívɨ re̱ꞌ yuvéꞌí kuráꞌ lanchi, jee te̱e ya̱ saꞌá sukuán, jee maáréꞌ kúvi i̱toꞌoꞌ xí rá lanchi vá ya̱ náka‑a rátíꞌ. 3Jee te̱e ya̱ kúmí yuvéꞌí kuráꞌ lanchi, jee jíne re̱ꞌ yuvéꞌí sáva ki̱vɨ te̱e vá. Jee nákuniꞌ rá lanchi re̱ꞌ ta̱chi̱ꞌ káꞌánꞌ re̱ꞌ, jee sáá nákana re̱ꞌ rá lanchi maáréꞌ jee káꞌánꞌ re̱ꞌ súví ta ɨɨn rátíꞌ, jee táváꞌ re̱ꞌ rátíꞌ iniꞌ kuráꞌ. 4Jee sáá ya̱ ntavaꞌ re̱ꞌ ntáká rá lanchi maáréꞌ, jee yósóꞌ re̱ꞌ ichinúúnꞌ rátíꞌ, jee níkɨ́nꞌ rátíꞌ ya̱ta̱ꞌ re̱ꞌ kua̱ꞌa̱nꞌ rátíꞌ, chi nákuniꞌ rátíꞌ ta̱chi̱ꞌ káꞌánꞌ re̱ꞌ. 5Soo ɨɨn ñɨvɨ ya̱ ntu̱ví jíníꞌ rátíꞌ maa jee ntu̱né níkɨ́nꞌ rátíꞌ maa, chisaꞌ kene kunu rátíꞌ nu̱u̱nꞌ ñɨvɨ vá, chi ntu̱ví nákuniꞌ rátíꞌ ta̱chi̱ꞌ káꞌánꞌ ñɨvɨ vá ya̱ ntu jíníꞌ rátíꞌ.
6Jee tu̱ꞌun yaꞌá nkachiꞌ Jesús nu̱u̱nꞌ ráa ya̱ kúnkunuún káꞌánꞌ‑a jie̱ꞌe̱ꞌ [maáréꞌ jín rá ñɨvɨ re̱ꞌ]. Soo ni ntu̱ví ñáku̱ꞌun iniꞌ ráa na̱ jie̱ꞌe̱ꞌ kúvi ya̱ nkachiꞌ re̱ꞌ nu̱u̱nꞌ ráa.
Kúvi Jesús kuéntáꞌ I̱toꞌoꞌ xín rá lanchi ya̱ náka va̱ꞌa‑a rátíꞌ
7Saájee tukuni nkachiꞌ Jesús:
―Máá na̱a̱ꞌ vá káchíꞌ ni̱ꞌ nu̱u̱nꞌ rán ya̱ nuꞌuꞌ kúvi ni̱ꞌ kuéntáꞌ yuvéꞌí kuráꞌ nu̱u̱nꞌ nene nívɨ rá lanchi. 8Nta̱ká rá te̱e ya̱ nkiji ráa ne̱ xíꞌna ka̱ꞌ sáá ntiáꞌan kiji ni̱ꞌ, jee nkachiꞌ ráa ya̱ nkuvi ráa i̱toꞌoꞌ xín rá ñɨvɨ ni̱ꞌ, jee nta̱ká ráa kúvi te̱e kuíꞌná. Soo rá ñɨvɨ ni̱ꞌ ya̱ kúvi ráa kuéntáꞌ lanchi ni̱ꞌ, jee ntu ntɨ́ɨn kuéntáꞌ ráa ya̱ nkachiꞌ rá te̱e vá. 9Soo nuꞌuꞌ chi kúvi ni̱ꞌ kuéntáꞌ ɨɨn yuvéꞌí. Jee retú ki̱vɨ néni ɨɨn ñɨvɨ naꞌá Ndiosíꞌ jie̱ꞌe̱ꞌ ni̱ꞌ, jee natavaꞌ re̱ꞌ maa nu̱u̱nꞌ kua̱chi‑i jee nanitáꞌvíꞌ‑i. Kúvi‑i kuéntáꞌ lanchi ni̱ꞌ ya̱ néne nívɨ jee ni̱ꞌi̱nꞌ ti̱ꞌ iteꞌ kajiꞌ ti̱ꞌ.
10’Te̱e kuíꞌná kiji re̱ꞌ sáva kua̱chi máá saꞌá kuíꞌná re̱ꞌ, kaꞌniꞌ re̱ꞌ, jee xináánꞌ re̱ꞌ. Soo nuꞌuꞌ va̱ji ni̱ꞌ sáva kúvi ni̱ꞌi̱nꞌ rá ñɨvɨ ni̱ꞌ ya̱ kutekuꞌ ráa jín Ndiosíꞌ nɨ́ɨ́nkání jee na̱ ka̱ꞌ viiꞌ ka̱ꞌ kueꞌnu ráa jín Ndiosíꞌ ichi re̱ꞌ ñɨ̱vɨ́ yaꞌá.
11’Jee nuꞌuꞌ chi kúvi ni̱ꞌ kuéntáꞌ I̱toꞌoꞌ va̱ꞌa xí rá lanchi, ya̱ náka va̱ꞌa ni̱ꞌ rátíꞌ. Chi te̱e ya̱ náka va̱ꞌa re̱ꞌ rá lanchi re̱ꞌ asúnika̱ꞌ ne̱ kuviꞌ re̱ꞌ jie̱ꞌe̱ꞌ rátíꞌ ya̱ náka va̱ꞌa re̱ꞌ rátíꞌ. 12Soo musúꞌ ya̱ íyó ya̱ꞌvi re̱ꞌ jee kúmí re̱ꞌ rátíꞌ, jee nsú i̱toꞌoꞌ xí rá lanchi vá kúvi re̱ꞌ, chi nsú lanchi maáréꞌ kúvi rátíꞌ. Sáá jíníꞌ re̱ꞌ ya̱ va̱ji ɨɨn váꞌúꞌ jee xínóo re̱ꞌ rá lanchi jee jínu re̱ꞌ kua̱ꞌa̱nꞌ re̱ꞌ. Jee váꞌúꞌ vá chi tɨ́ɨn ti̱ꞌ rá lanchi, jee síkúténuun ti̱ꞌ rátíꞌ. 13Jee sukuán jínu re̱ꞌ chi kúvi re̱ꞌ musúꞌ ya̱ íyó ya̱ꞌvi, jee ntu̱náꞌ ítú iniꞌ re̱ꞌ néꞌyá re̱ꞌ rá lanchi.
14’Jee nuꞌuꞌ chi kúvi ni̱ꞌ kuéntáꞌ I̱toꞌoꞌ va̱ꞌa xí rá lanchi, ya̱ náka va̱ꞌa ni̱ꞌ rátíꞌ. Jee jíníꞌ va̱ꞌa ni̱ꞌ iniꞌ rá ñɨvɨ maáníꞌ, ya̱ kúvi ráa kuéntáꞌ lanchi ni̱ꞌ, jee suni jíníꞌ va̱ꞌa rá ñɨvɨ maáníꞌ iniꞌ nuꞌuꞌ. 15Kuéntáꞌ Tátáꞌ ni̱ꞌ, chi jíníꞌ va̱ꞌa re̱ꞌ iniꞌ nuꞌuꞌ, jee suni jíníꞌ ni̱ꞌ iniꞌ Tátáꞌ ni̱ꞌ. Jee ku̱ꞌva ni̱ꞌ maáníꞌ kuviꞌ ni̱ꞌ sáva sikáku ni̱ꞌ rá ñɨvɨ ni̱ꞌ ya̱ kúvi ráa kuéntáꞌ lanchi ni̱ꞌ. 16Jee suni íyó ñɨvɨ inka nación ya̱ kúvi ráa lanchi ni̱ꞌ ya̱ ntu yɨ́ꞌɨ́ rátíꞌ kuráꞌ yaꞌá. Jee suni íyó kinake̱ꞌen ni̱ꞌ ráa ni̱vɨ ráa xi̱ntíín ni̱ꞌ. Jee teso̱ꞌo ráa ta̱chi̱ꞌ káꞌánꞌ ni̱ꞌ. Jee ɨɨn ni métúꞌún ñɨvɨ ni̱ꞌ nunkáꞌnú koo. Jee métúꞌún ni xí I̱toꞌoꞌ ráa koo kunaka ni̱ꞌ ráa. 17Jee saáva ñúnúunꞌ Tátáꞌ ni̱ꞌ nuꞌuꞌ, chi ku̱ꞌva ni̱ꞌ maáníꞌ kuviꞌ ni̱ꞌ sáva xinátekuꞌ i̱i̱ꞌ tuku ni̱ꞌ maáníꞌ. 18Chi ni ɨɨn ñɨvɨ ntu̱ví kuvi kaꞌniꞌ ráa nuꞌuꞌ, chisaꞌ maáníꞌ ví ya̱ jiáꞌayuꞌú ni̱ꞌ ya̱ kuviꞌ ni̱ꞌ. Chi níso ni̱ꞌ tiñu ñáꞌnú ííꞌ ni̱ꞌin ya̱ jiáꞌayuꞌú ni̱ꞌ ya̱ kuviꞌ ni̱ꞌ, jee suni níso ni̱ꞌ tiñu ñáꞌnú ííꞌ ni̱ꞌin ya̱ xinátekuꞌ i̱i̱ꞌ tuku ni̱ꞌ maáníꞌ. Chi sukuán nta̱túníꞌ Tátáꞌ ni̱ꞌ nu̱u̱nꞌ ni̱ꞌ ya̱ saꞌá ni̱ꞌ ―nkachiꞌ Jesús nu̱u̱nꞌ ráa.
19Jee tukuni sɨ́ɨ́n sɨ́ɨ́n íñɨ́ ɨɨn inka rá te̱e kúñáꞌnú nu̱u̱nꞌ Israel jie̱ꞌe̱ꞌ rá tu̱ꞌun yaꞌá ya̱ nkachiꞌ Jesús. 20Jee kue̱ꞌe̱ꞌ ráa nkachiꞌ:
―Ta̱chi̱ꞌ kini yɨ́ꞌɨ́ iniꞌ re̱ꞌ, jee sáná xíniꞌ re̱ꞌ vá káꞌánꞌ re̱ꞌ sukuán. ¿Na̱ kuvi chi tésóꞌo rán nu̱u̱nꞌ káꞌánꞌ re̱ꞌ? ―nkachiꞌ ráa.
21Soo sava ráa ka̱ꞌ nkachiꞌ:
―Rá tu̱ꞌun yaꞌá nsú tu̱ꞌun káꞌánꞌ ɨɨn te̱e ya̱ yɨ́ꞌɨ́ kui̱ꞌna̱ꞌ ví‑i. ¿Á kúvi nasaꞌá kui̱ꞌna̱ꞌ nunijinꞌ nchinúún ɨɨn te̱e kuáá rúja? ―nkachiꞌ ráa.
Rá te̱e kúñáꞌnú nu̱u̱nꞌ Israel kúníichiꞌ ráa néꞌyá ráa Jesús
22Máá tiempúꞌ kúvíjin,#10:22 Invierno jee nsa̱ꞌá rá ñɨvɨ viko nu̱u̱nꞌ ñuunꞌ káꞌnú Jerusalén, ya̱ nákúꞌun iniꞌ ráa ki̱vɨ̱ꞌ nna̱saꞌá ráa ya̱ nna̱kuatiñu ííꞌ veñu̱ꞌun káꞌnú nu̱u̱nꞌ Ndiosíꞌ ya̱ ííꞌ nkuvi tuku‑u. 23Jee jíkanuun Jesús chíkéꞌi iniꞌ veñu̱ꞌun vá ma̱ꞌñú yúvéꞌi nu̱u̱nꞌ naní yúvéꞌi Salomón. 24Jee rá te̱e kúñáꞌnú nu̱u̱nꞌ Israel nkuti̱yu̱ꞌ ráa nu̱u̱nꞌ Jesús, jee nkachiꞌ ráa:
―¿Na̱sa ka̱ꞌ tiempúꞌ vá íyó chuꞌun níní nú iniꞌ ránꞌ? Retú noꞌó ví máá Cristo, jee kachiꞌ kájí maa nu̱u̱nꞌ ránꞌ.
25Jee nna̱xiníkó Jesús nu̱u̱nꞌ ráa:
―Ya nkachiꞌ ni̱ꞌ maa nu̱u̱nꞌ rán, soo ntu̱ví jínúꞌ iniꞌ rán maa. Jee rá tiñu va̱ꞌa a̱nasɨ́ ya̱ sáꞌá ni̱ꞌ nu̱u̱nꞌ súví Tátáꞌ ni̱ꞌ, jee rá yaꞌá jiáꞌa ya̱ naáꞌ jie̱ꞌe̱ꞌ nuꞌuꞌ. 26Soo ránoꞌó chi ntu̱ví ínúꞌ iniꞌ rán maa, chi nsú ñɨvɨ ni̱ꞌ kúvi rán, ya̱ kúvi kuéntáꞌ lanchi ni̱ꞌ. 27Chi rá ñɨvɨ ni̱ꞌ ya̱ kúvi ráa kuéntáꞌ lanchi ni̱ꞌ, jee suviráa vá tésóꞌo ráa ta̱chi̱yuꞌú ni̱ꞌ. Jee jíníꞌ va̱ꞌa ni̱ꞌ iniꞌ ráa. Jee níkɨ́nꞌ ráa nuꞌuꞌ. 28Jee ku̱ꞌva ni̱ꞌ nu̱u̱nꞌ ráa ya̱ kutekuꞌ ráa nɨ́ɨ́nkání jín nuꞌuꞌ, soo ni nsáꞌ kuviꞌ ánímaꞌ ráa chi koo ráa jín Ndiosíꞌ nɨ́ɨ́nkání, jee ni ɨɨn ntu̱náꞌ kaneeꞌ‑e rá ñɨvɨ vá naꞌá ni̱ꞌ. 29Chi máá Tátáꞌ ni̱ꞌ ya̱ nna̱tají re̱ꞌ rá ñɨvɨ vá nu̱u̱nꞌ ni̱ꞌ, jee maáréꞌ ví ya̱ kúñáꞌnú nasɨ́kuitɨꞌ ka̱ꞌ nu̱u̱nꞌ nta̱ká, jee ni ɨɨn ntu kúvi nakaneeꞌ‑e rá ñɨvɨ vá naꞌá re̱ꞌ. 30Chi nuꞌuꞌ jín Tátáꞌ ni̱ꞌ, jee ɨɨn ni̱ꞌ kúvi ránꞌ ―nkachiꞌ Jesús.
31Saájee rá te̱e kúñáꞌnú nu̱u̱nꞌ ñuunꞌ Israel nna̱keꞌen tuku ráa yu̱u̱ꞌ sáva kuun ráa maa Jesús. 32Jee nna̱xiníkó Jesús nu̱u̱nꞌ ráa:
―Ya nstúvi ni̱ꞌ kue̱ꞌe̱ꞌ víꞌí tiñu va̱ꞌa nu̱u̱nꞌ rán, ya̱ ntaji Tátáꞌ ni̱ꞌ nu̱u̱nꞌ ni̱ꞌ saꞌá ni̱ꞌ. Jee, ¿jie̱ꞌe̱ꞌ né ɨɨn rá tiñu váꞌa yaꞌá kúvi ya̱ kuun rán yu̱u̱ꞌ nuꞌuꞌ rúsa? ―nkachiꞌ Jesús.
33Jee rá te̱e kúñáꞌnú nu̱u̱nꞌ ñuunꞌ Israel nna̱xiníkó ráa nu̱u̱nꞌ Jesús:
―Nsú jie̱ꞌe̱ꞌ ɨɨn tiñu va̱ꞌa nsa̱ꞌá nú kúvi ya̱ kuun ránꞌ yu̱u̱ꞌ noꞌó, chisaꞌ jie̱ꞌe̱ꞌ ya̱ káꞌánꞌ nú tu̱níváꞌa jie̱ꞌe̱ꞌ Ndiosíꞌ kúvi ya̱ kuun ránꞌ yu̱u̱ꞌ noꞌó. Chi noꞌó ya̱ kúvi nú te̱e, jee káchíꞌ nú ya̱ kúvi nú Ndiosíꞌ ―nkachiꞌ ráa.
34Jee nna̱xiníkó Jesús nu̱u̱nꞌ ráa:
―Yɨ́ꞌɨ́ xi̱ntíín rán tutuꞌ ya̱ níso tu̱ꞌun ley Ndiosíꞌ. ¿Á nsú nu̱u̱nꞌ tutuꞌ vá káchíꞌ Ndiosíꞌ: “Nkachiꞌ ni̱ꞌ ndiosíꞌ kúvi rán”, rúja? 35(Jee nkúvi sijíta‑ó Tu̱ꞌun Ndiosíꞌ níso nu̱u̱nꞌ Tutuꞌ Ííꞌ.) Jee njia̱ꞌa Ndiosíꞌ tu̱ꞌun re̱ꞌ nkenta tu̱ꞌun vá nu̱u̱nꞌ rá ñɨvɨ, jee nu̱u̱nꞌ nkachiꞌ Ndiosíꞌ ya̱ kuéntáꞌ ndiosíꞌ kúvi rá ñɨvɨ nu̱u̱nꞌ nkenta tu̱ꞌun re̱ꞌ, 36soo nu̱u̱nꞌ nkachiꞌ re̱ꞌ sukuán jie̱ꞌe̱ꞌ ráa, saájee jie̱ꞌe̱ꞌ nuꞌuꞌ, ya̱ Tátáꞌ ni̱ꞌ Ndiosíꞌ chi nsa̱ꞌá sɨ́ɨ́n re̱ꞌ nuꞌuꞌ kɨtíñú ni̱ꞌ saꞌá ni̱ꞌ tiñu re̱ꞌ jee nchu̱ichí re̱ꞌ nuꞌuꞌ va̱ji ni̱ꞌ iniꞌ ñɨvɨ yaꞌá, jee ránoꞌó, ¿na̱ja kúvi káchíꞌ rán ya̱ káꞌánꞌ niva̱ꞌa ni̱ꞌ jie̱ꞌe̱ꞌ Ndiosíꞌ, jie̱ꞌe̱ꞌ ya̱ nkachiꞌ ni̱ꞌ: “Kúvi ni̱ꞌ Se̱ꞌya Ndiosíꞌ”, rúja? 37Retú ntu̱ví sáꞌá ni̱ꞌ rá tiñu sáꞌá Tátáꞌ ni̱ꞌ, jee koto jínúꞌ iniꞌ rán nuꞌuꞌ. 38Soo retú sáꞌá ni̱ꞌ tiñu re̱ꞌ, asúꞌ ntu̱ví jínúꞌ iniꞌ rán nuꞌuꞌ, íyó i̱nu̱ꞌ iniꞌ rán ya̱ tiñu Tátáꞌ ni̱ꞌ ví rá tiñu sáꞌá ni̱ꞌ, sáva kukáꞌnú iniꞌ rán jee xiníꞌin rán kuniꞌ rán ya̱ yɨ́ꞌɨ́ Tátáꞌ ni̱ꞌ iniꞌ ni̱ꞌ jín ya̱ yɨ́ꞌɨ́ ni̱ꞌ iniꞌ Tátáꞌ ni̱ꞌ ―nkachiꞌ Jesús.
39Saájee tukuni nnu̱kú ráa tɨɨn ráa Jesús, soo nka̱ku re̱ꞌ xi̱ntíín ráa, jee kua̱ꞌa̱nꞌ re̱ꞌ.
40Jee kua̱ꞌa̱nꞌ tuku Jesús kua̱noꞌonꞌ re̱ꞌ íyo ka̱ꞌ ichi yúntekáꞌnú Jordán, nu̱u̱nꞌ nsi̱kuánuté Juan rá ñɨvɨ ne̱ xíꞌnañúꞌún nékúvi. Jee nkino̱o Jesús nneeꞌ re̱ꞌ yukuán. 41Jee kue̱ꞌe̱ꞌ rá ñɨvɨ kenta nu̱u̱nꞌ nééꞌ re̱ꞌ, jee nkachiꞌ ráa jín ɨɨn inka ráa:
―Máá nááꞌ kúvi nijia ya̱ Juan jee ni ntu̱ví nsáꞌá re̱ꞌ ni ɨɨn seña a̱nasɨ́, soo nɨꞌɨ rá tu̱ꞌun ya̱ nkachiꞌ re̱ꞌ jie̱ꞌe̱ꞌ te̱e yaꞌá kúvi ya̱ naáꞌ nijia ―nkachiꞌ ráa.
42Jee nu̱u̱nꞌ íñɨ́ re̱ꞌ yukuán kue̱ꞌe̱ꞌ rá ñɨvɨ nkenta kuneí iniꞌ ráa Jesús.
Currently Selected:
Juan 10: meh
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
