Juan 7

Rá ñaniꞌ Jesús ntu ínúꞌ iniꞌ ráa re̱ꞌ

1Jee sáá njia̱ꞌa rá yaꞌá, jee Jesús jíkanuun re̱ꞌ ichi ñuunꞌ Galilea, chi ntu̱ví kuíni re̱ꞌ kakanuun re̱ꞌ ñuunꞌ Judea. Chi rá te̱e kúñáꞌnú nu̱u̱nꞌ rá ñɨvɨ Israel níꞌvɨ́ꞌ iniꞌ ráa kaꞌniꞌ ráa re̱ꞌ. 2Jee va̱kuyatin koo viko ya̱ saꞌá rá ñɨvɨ Israel, ya̱ saꞌá ráa veꞌi sayo jee nééꞌ ráa maa ɨɨn semana. #7:2 Naní viko yaꞌá Tabernáculos, ya̱ sáꞌá rá ñɨvɨ Israel sáva naku̱ꞌun iniꞌ ráa rá vi̱xiko (40) kui̱ya̱ꞌ nikanuun rá tátáꞌ jííꞌ ráa yanaꞌán nu̱u̱nꞌ ñu̱ꞌún saɨn, sáá nsi̱káku Ndiosíꞌ ráa nu̱u̱nꞌ ñuunꞌ Egipto. 3Jee nkachiꞌ rá ñaniꞌ Jesús nu̱u̱nꞌ re̱ꞌ:

―Kene nú nu̱u̱nꞌ ñuunꞌ yaꞌá, jee kuáꞌán nú nu̱u̱nꞌ ñuunꞌ Judea, sáva rá ñɨvɨ ya̱ súkuáꞌa nú ráa kuniꞌ ráa rá tiñu sáꞌá nú. 4Chi retú núkú ɨɨn ñɨvɨ ya̱ tu̱vi nijinꞌ‑i nu̱u̱nꞌ nɨꞌɨ, jee ntu̱ví sáꞌá yuꞌuꞌ‑u tiñu sáꞌá‑a. Jee retú sáꞌá nú rá tiñu sukuán, jee stúvi nú maánú nu̱u̱nꞌ nɨꞌɨ ñɨvɨ ñɨ̱vɨ́.

5Nkachiꞌ rá ñaniꞌ Jesús sukuán, chi ntu̱ví ínúꞌ iniꞌ ráa re̱ꞌ. 6Saájee nkachiꞌ Jesús nu̱u̱nꞌ ráa:

―Ntiáꞌan kantaꞌ tiempúꞌ kɨ̱ꞌɨ̱nꞌ ni̱ꞌ, soo na̱ni tiempúꞌ íyó tiempúꞌ rán kɨ̱ꞌɨ̱nꞌ rán viko. 7Chi rá ñɨvɨ íyó ñɨ̱vɨ́ yaꞌá, jee ntu̱ví kúvi kuꞌun táꞌvi iniꞌ ráa kune̱ꞌyá ráa ránoꞌó. Soo nuꞌuꞌ chi ñúꞌún táꞌvi iniꞌ ráa néꞌyá ráa nuꞌuꞌ, chi jiáꞌa ni̱ꞌ ya̱ naáꞌ jie̱ꞌe̱ꞌ ráa chi stúvi ni̱ꞌ ya̱ niváꞌa kúvi rá tiñu sáꞌá ráa. 8Kuáꞌán ránoꞌó viko vá. Nuꞌuꞌ chi ntiáꞌan kenta kɨ̱ꞌɨ̱nꞌ ni̱ꞌ viko vá, chi ntiáꞌan kantaꞌ sikúnkuvi tiempúꞌ ni̱ꞌ.

9Jee sáá nkachiꞌ re̱ꞌ yaꞌá, jee nkino̱o re̱ꞌ nu̱u̱nꞌ ñuunꞌ Galilea.

Kua̱ꞌa̱nꞌ Jesús viko veꞌi sayo

10Soo sáá kua̱ꞌa̱nꞌ rá ñaniꞌ re̱ꞌ, saájee suni kua̱ꞌa̱nꞌ re̱ꞌ viko vá, soo nsáꞌ kuáꞌánꞌ nijinꞌ re̱ꞌ, chi kua̱ꞌa̱nꞌ yuꞌuꞌ re̱ꞌ. 11Jee rá te̱e kúñáꞌnú nu̱u̱nꞌ rá ñɨvɨ Israel nna̱nukú ráa re̱ꞌ viko, jee sava ráa nkachiꞌ:

―¿Né núꞌ íyó te̱e yukuán rúja? ―nkachiꞌ ráa.

12Jee káꞌánꞌ yuꞌuꞌ víꞌí rá ñɨvɨ kue̱ꞌe̱ꞌ si̱kɨ̱ꞌ Jesús nteñu ráa. Sava ráa káchíꞌ: “Te̱e va̱ꞌa kúvi re̱ꞌ.” Soo sava ráa ka̱ꞌ káchíꞌ: “Ntu̱ví, chisaꞌ xínáꞌví re̱ꞌ rá ñɨvɨ kue̱ꞌe̱ꞌ”, káchíꞌ ráa.

13Soo ni ɨɨn ráa ntu káꞌánꞌ nijinꞌ ráa xi̱ni̱ꞌ re̱ꞌ, chi yúꞌví ráa néꞌyá ráa rá te̱e kúñáꞌnú nu̱u̱nꞌ rá ñɨvɨ Israel. 14Soo sáá nku̱sáva íyó viko, jee nki̱vɨ Jesús chíkéꞌi iniꞌ veñu̱ꞌun káꞌnú jee xínéꞌénꞌ re̱ꞌ rá ñɨvɨ. 15Jee nti̱vɨ́ xíniꞌ rá ñɨvɨ Israel, jee káchíꞌ ráa:

―¿Na̱ja chi jíníꞌ víꞌí te̱e yaꞌá rá tu̱ꞌun níchí, chi ntu̱ví nsúkuáꞌa víꞌí re̱ꞌ? ―nkachiꞌ ráa.

16Jee nna̱xiníkó Jesús nu̱u̱nꞌ ráa:

―Rá tu̱ꞌun ya̱ xínéꞌénꞌ ni̱ꞌ ránoꞌó, jee nsú tu̱ꞌun kéne iniꞌ maáníꞌ ví‑i, chisaꞌ va̱ji ne̱ nu̱u̱nꞌ maáréꞌ ya̱ nchu̱ichí re̱ꞌ nuꞌuꞌ. 17Jee retú na̱ni ñɨvɨ kuíni‑i saꞌá‑a tiñu ya̱ kuíni máá Ndiosíꞌ, jee kuniꞌ ñɨvɨ vá jie̱ꞌe̱ꞌ tu̱ꞌun káchíꞌ ni̱ꞌ, chi kuniꞌ‑i retú va̱ji ne̱ nu̱u̱nꞌ Ndiosíꞌ tu̱ꞌun káchíꞌ ni̱ꞌ, áxí retú va̱ji ne̱ nu̱u̱nꞌ nuꞌuꞌ. 18Chi ɨɨn ñɨvɨ ya̱ káꞌánꞌ‑a rá tu̱ꞌun ya̱ jiáni iniꞌ maáa, jee ñɨvɨ vá nukú‑u ya̱ nakuetúꞌún ñɨvɨ maa. Soo ɨɨn ñɨvɨ ya̱ nánukú‑u ya̱ nakuetúꞌún rá ñɨvɨ maáréꞌ ya̱ nchu̱ichí maa, ñɨvɨ na̱a̱ꞌ kúvi‑i, jee ntu yɨ́ꞌɨ́ tu̱ꞌun túꞌún iniꞌ‑i. 19¿Á ntu ntaji Moisés tu̱ꞌun ley ya̱ nta̱túníꞌ Ndiosíꞌ nu̱u̱nꞌ rán rúja? Jee ni ɨɨn rán ni ntu̱ví síkúnkuvi rán ya̱ tátúníꞌ tu̱ꞌun ley vá. ¿Na̱ kuvi chi níꞌvɨ́ꞌ iniꞌ rán kaꞌniꞌ rán nuꞌuꞌ? ―nkachiꞌ Jesús.

20Jee nna̱xiníkó rá ñɨvɨ kue̱ꞌe̱ꞌ vá nu̱u̱nꞌ Jesús, jee nkachiꞌ ráa:

―Ta̱chi̱ꞌ kíni yɨ́ꞌɨ́ noꞌó. ¿Né ɨɨn níꞌvɨ́ꞌ iniꞌ‑i kaꞌniꞌ‑i noꞌó?

21Jee nna̱xiníkó Jesús jee nkachiꞌ re̱ꞌ nu̱u̱nꞌ ráa:

―Ɨɨn tiñu nsa̱ꞌá ni̱ꞌ, jee nta̱ká rán nti̱vɨ́ xíniꞌ rán. 22Soo Moisés ntaji re̱ꞌ ñujiínꞌ ya̱ íyó keꞌneꞌ ti̱yu̱ꞌ rán ntíꞌ yuꞌú ñɨɨn násɨ́ꞌ xi̱ni̱ꞌ nu̱u̱nꞌ ííꞌ te̱e jee siíyo rán maa sáva koo seña circuncisión. (Soo ntu váji‑i ne̱ nu̱u̱nꞌ Moisés, chisaꞌ va̱ji ne̱ nu̱u̱nꞌ ráa tátáꞌ jííꞌ‑ó yanaꞌán tiñu ya̱ sáꞌá circuncidar‑ó), jee sáꞌá circuncidar rán ɨɨn te̱e asúnika̱ꞌ kúvi‑i ki̱vɨ̱ꞌ nájiáví. 23Jee retú níꞌínꞌ ɨɨn te̱e ya̱ saꞌá circuncidar rán maa ki̱vɨ̱ꞌ nájiáví, sáva ntu jiáꞌa rán nu̱u̱nꞌ tu̱ꞌun ley vá ya̱ nta̱túníꞌ Ndiosíꞌ ya̱ njia̱ꞌa re̱ꞌ nu̱u̱nꞌ Moisés, ¿na̱ kúvi chi kítɨ́ꞌ iniꞌ rán néꞌyá rán nuꞌuꞌ, chi nxi̱núvi nɨ́ɨ́n ni̱ꞌ ɨɨn te̱e ki̱vɨ̱ꞌ nájiáví? 24Jee koto sánáaꞌ rán si̱kɨ̱ꞌ nuꞌuꞌ sánikua̱ꞌ jiáni iniꞌ rán. Chisaꞌ na̱a̱ꞌ sanáaꞌ rán sáni ya̱ naáꞌ ―nkachiꞌ Jesús.

Káꞌánꞌ Jesús jie̱ꞌe̱ꞌ né núꞌ va̱ji re̱ꞌ

25Saájee sava rá ñɨvɨ Jerusalén káchíꞌ ráa nu̱u̱nꞌ táꞌán ráa:

―¿Á nsú te̱e yaꞌá ví ya̱ nánukú rá te̱e kúñáꞌnú kaꞌniꞌ ráa maa? 26Jee kune̱ꞌyá rán, chi nu̱chitú káꞌánꞌ re̱ꞌ, jee ni ntu̱náꞌ káchíꞌ ráa nu̱u̱nꞌ re̱ꞌ. ¿Á vansáꞌ sa̱naanꞌ jíníꞌ nijia rá te̱e nísotíñú ya̱ kúvi te̱e yaꞌá Cristo? #7:26 Cristo kuíni káchíꞌ maá te̱e ya̱ chuichí Ndiosíꞌ tatúníꞌ‑i ñɨ̱vɨ́ jee sikáku‑u ñɨvɨ ñɨ̱vɨ́ jie̱ꞌe̱ꞌ kua̱chi ráa. 27Soo te̱e yaꞌá, chi jíníꞌ‑ó né núꞌ va̱ji re̱ꞌ. Soo Cristo chi sáá kiji‑i jee ni ɨɨn ñɨvɨ nsáꞌ kuniꞌ ráa né núꞌ kiji‑i ―nkachiꞌ rá ñɨvɨ vá.

28Saájee sáá súkuáꞌa Jesús rá ñɨvɨ chíkéꞌi iniꞌ veñu̱ꞌun káꞌnú, jee nkaꞌanꞌ ni̱ꞌin re̱ꞌ:

―¿Á jíníꞌ nijia rán nuꞌuꞌ, jee á jíníꞌ nijia rán ne̱ núꞌ va̱ji ni̱ꞌ rúja? Soo nsáꞌ kúvi iniꞌ maáníꞌ ya̱ va̱ji ni̱ꞌ ñɨ̱vɨ́ yaꞌá. Chi maáréꞌ ya̱ nchu̱ichí re̱ꞌ nuꞌuꞌ jee na̱a̱ꞌ víꞌí re̱ꞌ. Jee ni̱ꞌ ntu̱ví jíníꞌ rán iniꞌ re̱ꞌ. 29Soo nuꞌuꞌ chi jíníꞌ ni̱ꞌ iniꞌ re̱ꞌ, chi né núꞌ maáréꞌ va̱ji ni̱ꞌ, jee maáréꞌ nchu̱ichí nuꞌuꞌ va̱ji ni̱ꞌ ―nkachiꞌ Jesús nu̱u̱nꞌ ráa.

30Saájee nniꞌvɨꞌ ka̱ꞌ iniꞌ ráa ya̱ tɨɨn ráa re̱ꞌ. Soo ni ɨɨn ráa ni ntu̱ví ntɨ́ɨn ráa re̱ꞌ, chi ni ntiáꞌan kantaꞌ hora re̱ꞌ. 31Jee kue̱ꞌe̱ꞌ rá ñɨvɨ ni̱nu̱ꞌ iniꞌ ráa ya̱ kúvi re̱ꞌ Cristo, jee nkachiꞌ ráa:

―Jee sáá kiji máá maá Cristo, ¿á saꞌá re̱ꞌ ka̱ꞌ seña a̱nasɨ́ nsú káꞌ te̱e yaꞌá rúja? ¡Ntu̱ví!, [saáva íyó kúvi re̱ꞌ Cristo].

Rá te̱e fariseo chi nta̱jí ráa rá te̱e kúmí veñu̱ꞌun káꞌnú sáva tɨɨn ráa Jesús

32Sáá nteso̱ꞌo rá te̱e fariseo tu̱ꞌun yaꞌá ya̱ káchíꞌ rá ñɨvɨ jee nchu̱ichí rá su̱tu̱ꞌ kúñáꞌnú jín rá fariseo vá rá te̱e kúmí yukuán sáva tɨɨn ráa Jesús. 33Saájee nkachiꞌ Jesús:

―Yakuꞌ ni ka̱ꞌ tiempúꞌ íyó kuneeꞌ ni̱ꞌ jín rán, jee kɨ̱noꞌonꞌ ni̱ꞌ nu̱u̱nꞌ maáréꞌ ya̱ nta̱jí nuꞌuꞌ va̱ji ni̱ꞌ. 34Jee nanukú rán nuꞌuꞌ, soo ni nsáꞌ naniꞌinꞌ rán nuꞌuꞌ, chi nu̱u̱nꞌ kɨ̱ꞌɨ̱nꞌ ni̱ꞌ kuneeꞌ ni̱ꞌ, jee nkúvi kɨ̱ꞌɨ̱nꞌ rán kuneeꞌ rán yukuán ―nkachiꞌ Jesús nu̱u̱nꞌ ráa.

35Saájee rá te̱e kúñáꞌnú nu̱u̱nꞌ rá ñɨvɨ Israel jíkátu̱ꞌún táꞌán ráa, jee káchíꞌ ráa:

―¿Né núꞌ kúvi nu̱u̱nꞌ kɨ̱ꞌɨ̱nꞌ te̱e yaꞌá, ya̱ nsáꞌ naniꞌinꞌ‑ó maa rúja? ¿Á nsáꞌ kɨ̱ꞌɨ̱nꞌ re̱ꞌ nu̱u̱nꞌ nééꞌ rá táꞌán ñuunꞌ‑ó ya̱ kua̱ꞌa̱nꞌ ráa ñe̱te̱nuun ráa nééꞌ ráa rá ñuunꞌ Grecia? Jee, ¿á kɨ̱ꞌɨ̱nꞌ re̱ꞌ sukuáꞌa re̱ꞌ rá ñɨvɨ ñuunꞌ Grecia vá? 36¿Ná kuíni káchíꞌ tu̱ꞌun yaꞌá ya̱ nkachiꞌ re̱ꞌ: “Nanukú rán nuꞌuꞌ, soo ni nsáꞌ naniꞌinꞌ rán nuꞌuꞌ, chi nu̱u̱nꞌ kɨ̱ꞌɨ̱nꞌ ni̱ꞌ kuneeꞌ ni̱ꞌ, jee nkúvi kɨ̱ꞌɨ̱nꞌ rán kuneeꞌ rán yukuán”, rúja? ―nkachiꞌ rá te̱e vá.

Ta̱chi̱ꞌ Ííꞌ Ndiosíꞌ kúvi kuéntáꞌ ntekáꞌnú ya̱ sáꞌá‑a kutekuꞌ ñɨvɨ nɨ́ɨ́nkání jín Ndiosíꞌ

37Ki̱vɨ̱ꞌ nu̱u̱nꞌ nɨ́ꞌɨ viko vá ya̱ kúvi ki̱vɨ̱ꞌ ñáꞌnú ka̱ꞌ, jee nnakui̱ñɨ̱ꞌ nichiꞌ Jesús jee nkachiꞌ re̱ꞌ:

―Retú né ni̱ꞌ ɨɨn rán kuéntáꞌ jíchíꞌ iniꞌ ánímaꞌ‑a nute, jee natuꞌva nu̱u̱nꞌ ni̱ꞌ jee koꞌo [ya̱ taji ni̱ꞌ nu̱u̱nꞌ nú]. 38Chi ñɨvɨ kúneí iniꞌ ráa nuꞌuꞌ jee kene iniꞌ ñɨvɨ vá kuéntáꞌ nute káꞌnú ya̱ sáꞌá‑a ya̱ kutekuꞌ ñɨvɨ vá nɨ́ɨ́nkání jín Ndiosíꞌ, sáni káchíꞌ nu̱u̱nꞌ Tutuꞌ Ííꞌ ―nkachiꞌ Jesús.

39Soo nkachiꞌ Jesús rá tu̱ꞌun yaꞌá jie̱ꞌe̱ꞌ Ta̱chi̱ꞌ Ííꞌ Ndiosíꞌ, chi rá ñɨvɨ ya̱ kúneí iniꞌ ráa re̱ꞌ, jee ni̱ꞌi̱nꞌ ráa Ta̱chi̱ꞌ Ííꞌ Ndiosíꞌ kɨꞌɨ‑ɨ iniꞌ ánímaꞌ ráa. Chi ni ntiáꞌan taji Ndiosíꞌ Ta̱chi̱ꞌ Ííꞌ re̱ꞌ, chi jie̱ꞌe̱ꞌ ntiáné kɨ̱naa Jesús antivɨ́ súkún nu̱u̱nꞌ kúñáꞌnú re̱ꞌ.

Sɨ́ɨ́n sɨ́ɨ́n jiáni iniꞌ rá ñɨvɨ jie̱ꞌe̱ꞌ Jesús

40Saájee sava rá ñɨvɨ kue̱ꞌe̱ꞌ ya̱ íñɨ́ yukuán nkachiꞌ ráa:

―Te̱e yaꞌá máá naáꞌ nijia kúvi re̱ꞌ máá te̱e ya̱ íyó kiji nakani tu̱ꞌun kene yuꞌú Ndiosíꞌ.

41Jee sava ka̱ꞌ rá ñɨvɨ vá nkachiꞌ:

―Te̱e yaꞌá kúvi máá Cristo ―nkachiꞌ rá ñɨvɨ vá.

Soo sava ráa ka̱ꞌ nkachiꞌ:

―Ntu̱ví chi nsú nu̱u̱nꞌ ñuunꞌ Galilea kiji Cristo. 42Chi, ¿á ntu káchíꞌ nu̱u̱nꞌ Tutuꞌ níso Tu̱ꞌun Ndiosíꞌ ya̱ kaku Cristo nu̱u̱nꞌ tataꞌ ichiyúkúnꞌ váji ne̱ nu̱u̱nꞌ David, jee te̱e ñuunꞌ Belén kuvi re̱ꞌ, nu̱u̱nꞌ kúvi ñuunꞌ nu̱u̱nꞌ nneeꞌ David ne̱ yanaꞌán rúja? ―nkachiꞌ rá ñɨvɨ vá.

43Jee sɨ́ɨ́n sɨ́ɨ́n íñɨ́ ɨɨn inka ráa jie̱ꞌe̱ꞌ Jesús. 44Jee sava rá ñɨvɨ vá kuíni ráa tɨɨn ráa Jesús, soo ni ɨɨn ráa ntu̱ví ntɨ́ɨn ráa re̱ꞌ.

Rá te̱e nísotíñú ntu̱ví jínúꞌ iniꞌ ráa Jesús

45Saájee rá te̱e kúmí veñu̱ꞌun káꞌnú nni̱kó ráa nu̱u̱nꞌ rá su̱tu̱ꞌ kúñáꞌnú jín nu̱u̱nꞌ rá fariseo. Jee ni̱ka̱tu̱ꞌún ráa rá te̱e vá jee nkachiꞌ ráa:

―¿Na̱ kuvi chi ntu̱ví va̱ji rán jín Jesús? ―nkachiꞌ ráa.

46Jee nkachiꞌ rá te̱e kúmí veñu̱ꞌun káꞌnú vá:

―Ni ntu̱ví nkáꞌánꞌ ni ɨɨn te̱e kua̱ꞌ káꞌánꞌ te̱e yaꞌá ―nkachiꞌ ráa.

47Saájee nna̱xiníkó rá fariseo:

―¿Á suni nxi̱náꞌví re̱ꞌ ránoꞌó ranika̱ꞌ? 48¿Á íyó néni ɨɨn rá te̱e nísotíñú áxí rá fariseo ya̱ jínúꞌ iniꞌ ráa re̱ꞌ réja? ¡Ntu̱ví! 49Soo rá ñɨvɨ kue̱ꞌe̱ꞌ vá ya̱ ntu̱ví jíníꞌ ráa ná káchíꞌ tu̱ꞌun ley nta̱túníꞌ Ndiosíꞌ, jee yósóni̱nu ráa.

50Jee Nicodemo (ya̱ ñáꞌanꞌ re̱ꞌ nu̱u̱nꞌ nééꞌ Jesús ɨɨn yakuááꞌ, jee suni kúvi re̱ꞌ ɨɨn rá fariseo) jee nkachiꞌ re̱ꞌ nu̱u̱nꞌ ráa:

51―¿Á nsáꞌ káchíꞌ tu̱ꞌun ley nta̱túníꞌ Ndiosíꞌ ya̱ nkúvi sanáaꞌ‑ó si̱kɨ̱ꞌ ɨɨn te̱e, retú ntu xíꞌna ka̱ꞌ teso̱ꞌo‑ó rá tu̱ꞌun káꞌánꞌ‑a, sáva kukáꞌnú iniꞌ‑ó ná kúvi ya̱ nsa̱ꞌá‑a? ―nkachiꞌ Nicodemo.

52Jee nna̱xiníkó rá te̱e vá jee nkachiꞌ ráa:

―¿Á suni te̱e ñuunꞌ Galilea kúvi nú ya̱ káꞌánꞌ nú sukuán? Nanukú kávii va̱ꞌa nú nu̱u̱nꞌ Tutuꞌ níso Tu̱ꞌun Ndiosíꞌ jee kuniꞌ nú ya̱ Galilea ntu kene nu̱u̱nꞌ ñuunꞌ vá ɨɨn te̱e ya̱ nakani‑i tu̱ꞌun kene yuꞌú Ndiosíꞌ ―nkachiꞌ rá te̱e vá.

53[Saájee ta ɨɨn ɨɨn ráa kua̱noꞌonꞌ ráa ta veꞌi ráa.]

Currently Selected:

Juan 7: meh

Highlight

Copy