Lucas 10

Nchu̱ichí Jesús u̱ni̱xiko u̱ji̱ꞌ (70) rá ñɨvɨ

1Jee sáá njia̱ꞌa rá yukuán, jee ñani I̱toꞌoꞌ‑ó inka u̱ni̱xiko u̱ji̱ꞌ (70) #10:1 Sava tutuꞌ káchíꞌ u̱ni̱xiko u̱xu̱ꞌ u̱vi̱ꞌ (72). ka̱ꞌ rá te̱e jee nchu̱ichí re̱ꞌ ni uvíꞌ ni uvíꞌ ráa kua̱ꞌa̱nꞌ xíꞌna ka̱ꞌ ntáká rá ñuunꞌ ntáká nu̱u̱nꞌ ya̱ íyó kɨ̱ꞌɨ̱nꞌ re̱ꞌ. 2Jee nkachiꞌ re̱ꞌ nu̱u̱nꞌ ráa:

―Máá nááꞌ nijia ya̱ kue̱ꞌe̱ꞌ víꞌí ñɨvɨ ki̱vɨ nu̱u̱nꞌ Ndiosíꞌ ya̱ kúvi ráa tataꞌ sáꞌá re̱ꞌ. Soo íyó yakuꞌ ni rá musúꞌ kɨ̱stékútu̱ꞌún ráa Tu̱ꞌun Ndiosíꞌ sáva kɨ̱nastútú rá ñɨvɨ vá. Saáva ka̱ka̱nꞌ táꞌvíꞌ rán nu̱u̱nꞌ Ndiosíꞌ I̱toꞌoꞌ xí tataꞌ sáꞌá vá, ya̱ chuichí re̱ꞌ ka̱ꞌ rá musúꞌ kɨ̱ꞌɨ̱nꞌ ráa nastútúꞌ ráa maa.

3’Kuáꞌán ránú, kune̱ꞌyá rán, chi chúichí ni̱ꞌ ránoꞌó kuéntáꞌ kua̱ꞌ lanchi lúlí nteñu rá ñɨvɨ ya̱ kúvi ráa kuéntáꞌ váꞌúꞌ xéénꞌ. 4Jee koto ínaꞌá rán ñɨɨn xu̱ꞌún rán, ni ñunu ñúꞌún ya̱ kajiꞌ rán, ni inka ka̱ꞌ ni̱jia̱nꞌ rán, jee ni koto jiákui̱ñɨ̱ꞌ rán ichi kaꞌanꞌ rán rá tu̱ꞌun káva̱ꞌa kukuéntú rán jín ni ɨɨn ñɨvɨ.

5’Jee néni ɨɨn veꞌi nu̱u̱nꞌ kenta rán ki̱vɨ rán, jee xíꞌna ka̱ꞌ kachiꞌ rán nu̱u̱nꞌ ráa ya̱ na̱ ka̱ꞌ kuneeꞌ va̱ꞌa ñunkúún ñɨvɨ veꞌi yaꞌá. 6Jee retú kúvi ráa ñɨvɨ ma̱ni̱ꞌ iniꞌ jee kino̱o jín ráa ya̱ va̱ꞌa ñunkúún ráa sáni nkachiꞌ rán. Soo retú ntu kúvi ráa ñɨvɨ ma̱ni̱ꞌ iniꞌ, jee nsáꞌ ni̱ꞌi̱nꞌ ráa ya̱ kino̱o jín ráa ya̱ va̱ꞌa ñunkúún ráa sáni nkachiꞌ rán. 7Jee suni veꞌi yukuán kino̱o rán kuneeꞌ rán, jee kajiꞌ rán koꞌo rán ya̱ taji rá ñɨvɨ veꞌi vá nu̱u̱nꞌ rán. Chi ɨɨn ñɨvɨ ya̱ sátíñú‑u jee íyó níꞌin‑i ya̱ꞌvi‑i jie̱ꞌe̱ꞌ tiñu sáꞌá‑a. Jee koto jíka rán ta veꞌi ta veꞌi kuneeꞌ rán.

8’Jee néni ɨɨn ñuunꞌ nu̱u̱nꞌ kenta rán kívɨ rán jee nakuatáꞌví ráa ránoꞌó, jee kajiꞌ rán na̱ni kúvi ya̱ taji ráa nu̱u̱nꞌ rán. 9Jee xinúvi rán rá ñɨvɨ kúꞌvíꞌ íyó yukuán, jee kachiꞌ rán nu̱u̱nꞌ ráa ya̱: “Nku̱yatin nu̱u̱nꞌ rán ya̱ kuvi ki̱vɨ rán naꞌá Ndiosíꞌ nu̱u̱nꞌ tatúníꞌ re̱ꞌ nu̱u̱nꞌ ránoꞌó”, kachiꞌ rán. 10Soo néni ɨɨn ñuunꞌ nu̱u̱nꞌ kenta rán kívɨ rán, jee retú ntu íyó maniꞌ ráa tɨɨn ráa ránoꞌó yukuán, jee sáá kene rán yukuán kuiñɨ rán iniꞌ ichi, jee kachiꞌ rán: 11“Ne̱ tíka̱cha̱a̱ꞌ ñuunꞌ rán yaꞌá, ya̱ ntɨ́ɨn jie̱ꞌe̱ꞌ ráníꞌ, jee kísɨ ránꞌ maa sáva nastúvi ránꞌ ya̱ íyó si̱kɨ̱ꞌ ránú.” Soo íyó kukáꞌnú iniꞌ ránú yaꞌá, ya̱ ya nku̱yatin ya̱ kuvi ki̱vɨ ñɨvɨ xi̱ntíín Ndiosíꞌ nu̱u̱nꞌ tátúníꞌ re̱ꞌ nu̱u̱nꞌ ráa. 12Jee káchíꞌ ni̱ꞌ nu̱u̱nꞌ ránoꞌó ya̱ ki̱vɨ̱ꞌ kiji keꞌneꞌ Ndiosíꞌ kua̱chi ñɨvɨ, sú kunoꞌo nasɨ́kuitɨꞌ rá ñɨvɨ ñuunꞌ Sodoma soo yakuꞌ ka̱ꞌ kunoꞌo ráa nsú káꞌ kua̱ꞌ xe̱e̱nꞌ nasɨ́kuitɨꞌ ntántúníꞌ ka̱ꞌ kunoꞌo rá ñɨvɨ ñuunꞌ vá ―nkachiꞌ Jesús.

Tu̱ꞌun káꞌánꞌ Jesús jie̱ꞌe̱ꞌ sava rá ñuunꞌ rá ñɨvɨ ni̱ꞌin iniꞌ

(Mateo 11:20-24)

13Jee nkachiꞌ Jesús:

―¡Na̱ ka̱ꞌ náꞌví ka̱ꞌ ránoꞌó ñɨvɨ ñuunꞌ Corazín! ¡Na̱ ka̱ꞌ náꞌví ka̱ꞌ ránoꞌó ñɨvɨ ñuunꞌ Betsaida! Chi retánꞌ sukuán jee nu̱u̱nꞌ ñuunꞌ Tiro jín ñuunꞌ Sidón nsa̱ꞌá ni̱ꞌ rá tiñu a̱nasɨ́ ya̱ nsa̱ꞌá ni̱ꞌ nu̱u̱nꞌ rá ñuunꞌ ránú, jee ma̱káꞌ ya̱ nna̱kani iniꞌ ráa ya̱ nxi̱nóo ráa kua̱chi ráa yanaꞌán víꞌí jee kuꞌun ráa saꞌma nayɨ́ jee chisó ráa ya̱a̱ꞌ xi̱ni̱ꞌ ráa ya̱ stúvi‑i ya̱ kukúeká iniꞌ ráa jie̱ꞌe̱ꞌ kua̱chi nsa̱ꞌá ráa nékúvi. 14Jee saáva ki̱vɨ̱ꞌ kiji keꞌneꞌ Ndiosíꞌ rá kua̱chi, sú kunoꞌo nasɨ́kuitɨꞌ rá ñɨvɨ ñuunꞌ Tiro jín Sidón soo kunoꞌo ráa yakuꞌ ka̱ꞌ nsú káꞌ kua̱ꞌ xe̱e̱nꞌ nasɨ́kuitɨꞌ ka̱ꞌ kunoꞌo ránoꞌó ñɨvɨ ñuunꞌ Corazín jín Betsaida. 15Jee ránoꞌó ñɨvɨ ñuunꞌ Capernaum, ¿á kúñáꞌnú nasɨ́kuitɨꞌ rán ka̱ꞌ ne̱ kusúkún rán kua̱nkaa rán ne̱ súkún rúja? Soo ntu̱ví, chisaꞌ kɨ̱núún nú ne̱ nu̱u̱nꞌ nútútú ánímaꞌ rá ni̱yɨ ―nkachiꞌ Jesús.

16[Jee nkachiꞌ re̱ꞌ ka̱ꞌ nu̱u̱nꞌ rá te̱e ya̱ nchu̱ichí re̱ꞌ kɨ̱ꞌɨ̱nꞌ:]

―Ñɨvɨ ya̱ tésóꞌo‑o rá tu̱ꞌun káchítu̱ꞌún ránú, jee suni tésóꞌo‑o tu̱ꞌun káchítu̱ꞌún ni̱ꞌ. Jee ñɨvɨ ya̱ kúíchi iniꞌ‑i ránoꞌó, jee suni kúíchi iniꞌ‑i nuꞌuꞌ ranika̱ꞌ. Jee ñɨvɨ ya̱ kúíchi iniꞌ‑i nuꞌuꞌ, jee suni kúíchi iniꞌ‑i Ndiosíꞌ ranika̱ꞌ ya̱ nchu̱ichí‑i nuꞌuꞌ va̱ji ni̱ꞌ ―nkachiꞌ Jesús.

Nni̱kó rá te̱e ya̱ nchu̱ichí Jesús ráa

17Jee nni̱kó ni uníxiko u̱ji̱ꞌ (70) #10:17 Sava tutuꞌ káchíꞌ u̱ni̱xiko u̱xu̱ꞌ u̱vi̱ꞌ (72). rá te̱e ya̱ nchu̱ichí Jesús ráa jee kúsɨ́ɨꞌ nasɨ́kuitɨꞌ iniꞌ ráa, jee nkachiꞌ ráa:

―I̱toꞌoꞌ, ne̱ rá ta̱chi̱ꞌ kíni káníjiá ráa ránuꞌuꞌ ya̱ káꞌánꞌ ráníꞌ nu̱u̱nꞌ súví nú ―nkachiꞌ ráa.

18Jee nkachiꞌ Jesús nu̱u̱nꞌ ráa:

―Niniꞌ ni̱ꞌ nkininkava Satanás kui̱ꞌna̱ꞌ kúñáꞌnú ne̱ antivɨ́ kuéntáꞌ nkuun ɨɨn nuva tajia. 19Kune̱ꞌyá rán, ntaji ni̱ꞌ nu̱u̱nꞌ ránoꞌó tiñu ñáꞌnú ííꞌ níꞌin níso ni̱ꞌ ya̱ kuvi kua̱ñu̱ꞌ ránú ko̱o̱ꞌ jín ti̱suꞌmaꞌ, jín ya̱ suni kuneí rán nu̱u̱nꞌ nɨꞌɨ fuersáꞌ rá kui̱ꞌna̱ꞌ ya̱ nkenta si̱kɨ̱ꞌ Ndiosíꞌ jee ni ɨɨn ntu̱náꞌ kúvi xtufíꞌ ránoꞌó. 20Soo koto kúsɨ́ɨꞌ iniꞌ ránú jie̱ꞌe̱ꞌ ya̱ rá ta̱chi̱ꞌ kíni káníjiá ráa ránoꞌó, chisaꞌ kusɨ̱ɨ̱ꞌ iniꞌ rán jie̱ꞌe̱ꞌ ya̱ ya yɨ́ꞌɨ́ súví rán ne̱ antivɨ́ xi̱ntíín Ndiosíꞌ ―nkachiꞌ Jesús.

Kúsɨ́ɨꞌ iniꞌ Jesús

(Mateo 11:25-27; 13:16-17)

21Jee máá hora yukuán jee nnusɨ̱ɨ̱ꞌ iniꞌ Jesús nsa̱ꞌá Ta̱chi̱ꞌ Ííꞌ, jee nkachiꞌ re̱ꞌ:

―Nákuetúꞌún ni̱ꞌ noꞌó, Tátáꞌ ni̱ꞌ, ya̱ kúvi nú I̱toꞌoꞌ tátúníꞌ nu̱u̱nꞌ antivɨ́ jín nu̱u̱nꞌ iniꞌ ñɨ̱vɨ́ yaꞌá, chi nchise̱ꞌí nú tiñu ñáꞌnú nú yaꞌá nu̱u̱nꞌ rá ñɨvɨ tu̱ꞌva jín rá ñɨvɨ níchí ya̱ ntu njiáꞌa nú ya̱ ki̱ku̱ꞌun iniꞌ ráa maa, chisaꞌ nstúvi nú maa nu̱u̱nꞌ rá ñɨvɨ ñúláꞌví iniꞌ ya̱ kúvi ráa kuéntáꞌ rá súchí lúlí. Va̱tu̱ni, Tátáꞌ ni̱ꞌ, chi kúváꞌa iniꞌ nú ya̱ sukuán koo.

22’Maá Tátáꞌ ni̱ꞌ nna̱taji re̱ꞌ ntáká ya̱ íyó nu̱u̱nꞌ nuꞌuꞌ. Jee ni ɨɨn ñɨvɨ ntu jíníꞌ ráa iniꞌ ni̱ꞌ né ɨɨn kúvi nuꞌuꞌ ya̱ kúvi Se̱ꞌya re̱ꞌ, chisaꞌ métúꞌún Tátáꞌ ni̱ꞌ Ndiosíꞌ ví ya̱ jíníꞌ re̱ꞌ iniꞌ ni̱ꞌ né ɨɨn kúvi ni̱ꞌ. Jee suni ni ɨɨn ntu̱náꞌ jíníꞌ iniꞌ Tátáꞌ ni̱ꞌ né ɨɨn kúvi re̱ꞌ, chisaꞌ nuꞌuꞌ ya̱ kúvi ni̱ꞌ Se̱ꞌya re̱ꞌ jíníꞌ ni̱ꞌ iniꞌ re̱ꞌ né ɨɨn kúvi re̱ꞌ, jee néni ɨɨn ñɨvɨ ya̱ kuíni ni̱ꞌ stúvi ni̱ꞌ maa nu̱u̱nꞌ ráa jee jíníꞌ ráa iniꞌ Ndiosíꞌ né ɨɨn kúvi re̱ꞌ, chi nuꞌuꞌ ya̱ kúvi ni̱ꞌ Se̱ꞌya re̱ꞌ stúvi ni̱ꞌ maa nu̱u̱nꞌ ráa ―nkachiꞌ Jesús.

23Saájee nna̱kune̱ꞌyá re̱ꞌ nu̱u̱nꞌ rá te̱e kútáꞌán jín re̱ꞌ súkuáꞌa re̱ꞌ ráa, jee nkachiꞌ re̱ꞌ nu̱u̱nꞌ sáni maáráa:

―Na̱ ka̱ꞌ netuꞌ ka̱ꞌ kúvi nchinúún rá ñɨvɨ ya̱ néꞌyá jínúunꞌ ráa rá tiñu ya̱ néꞌyá ránoꞌó. 24Chi káchíꞌ ni̱ꞌ nu̱u̱nꞌ rán ya̱ kue̱ꞌe̱ꞌ rá te̱e ya̱ nna̱kani tu̱ꞌun nkene yuꞌú máá maá Ndiosíꞌ yanaꞌán jín rá te̱e tátúníꞌ nñu̱ꞌun iniꞌ ráa kune̱ꞌyá ráa rá tiñu ya̱ néꞌyá ránoꞌó vitan, soo ntu níníꞌ ráa maa, jee nñu̱ꞌun iniꞌ ráa teso̱ꞌo ráa rá tu̱ꞌun ya̱ tésóꞌo ránoꞌó vitan, soo ntu̱ví ntésóꞌo ráa maa.

Tu̱ꞌun kúnkunuún jie̱ꞌe̱ꞌ te̱e ñuunꞌ Samaria

25Saájee ɨɨn te̱e ya̱ súkuáꞌa tu̱ꞌun nta̱túníꞌ Ndiosíꞌ, nna̱kuiñɨꞌ re̱ꞌ sáva kototúníꞌ re̱ꞌ Jesús jee ni̱ka̱tu̱ꞌún re̱ꞌ:

―Mestrúꞌ, ¿ná kúvi ya̱ saꞌá ni̱ꞌ sáva ni̱ꞌi̱nꞌ ni̱ꞌ ya̱ kutekuꞌ ni̱ꞌ nɨ́ɨ́nkání jín Ndiosíꞌ? ―nkachiꞌ‑i.

26Jee nkachiꞌ Jesús nu̱u̱nꞌ‑u:

―¿Na̱ tu̱ꞌun níso nu̱u̱nꞌ Tutuꞌ Ííꞌ níso tu̱ꞌun nta̱túníꞌ Ndiosíꞌ? ¿Ná káꞌvi nú yukuán rúja? ―nkachiꞌ re̱ꞌ. 27Jee nna̱xiníkó te̱e vá jee nkachiꞌ‑i:

―Íyó kunu̱u̱nꞌ nú I̱toꞌoꞌ nú ya̱ kúvi Ndiosíꞌ nú jín nɨꞌɨ ne̱ ánímaꞌ nú, jín nɨꞌɨ iniꞌ nú, jín nɨꞌɨ kua neí iniꞌ nú, jín nɨꞌɨ antúníꞌ nú, jee íyó kunu̱u̱nꞌ nú rá ñanitáꞌán nú kuéntáꞌ kua̱ꞌ ñúnúunꞌ nú maánú, káchíꞌ Tu̱ꞌun vá ―nkachiꞌ te̱e vá.

28Jee nkachiꞌ Jesús nu̱u̱nꞌ‑u:

―Va̱tu̱ꞌ nkachiꞌ nú. Saꞌá sukuán jee ni̱ꞌi̱nꞌ nú ya̱ kutekuꞌ nú nɨ́ɨ́nkání ―nkachiꞌ Jesús.

29Soo nkuini te̱e vá stúvi re̱ꞌ ya̱ kúvi re̱ꞌ te̱e na̱a̱ꞌ jee nkachiꞌ re̱ꞌ nu̱u̱nꞌ Jesús:

―¿Né ɨɨn kúvi ñanitáꞌán ni̱ꞌ? ―nkachiꞌ‑i.

30Jee nna̱xiníkó Jesús, jee nkachiꞌ re̱ꞌ:

―Ɨɨn te̱e nkene re̱ꞌ ñuunꞌ Jerusalén jee kua̱ꞌa̱nꞌ re̱ꞌ ñuunꞌ Jericó. Jee nkininkava re̱ꞌ xi̱ntíín rá te̱e kuíꞌná, jee nka̱neeꞌ ráa rá nantíñú re̱ꞌ, jín ne̱ saꞌma ñúꞌún re̱ꞌ jee njia̱ꞌa ráa re̱ꞌ, jee ne̱ nkuni̱yɨ re̱ꞌ káá re̱ꞌ nxi̱nóo ráa re̱ꞌ, jee kua̱ꞌa̱nꞌ ráa. 31Jee kua̱ꞌa̱nꞌ sa̱naanꞌ ɨɨn su̱tu̱ꞌ ichi yukuán, jee sáá niniꞌ‑i káá te̱e vá, jee ni̱kóiyo‑o íyo ka̱ꞌ yuíchí jee kua̱ꞌa̱nꞌ‑a. 32Jee suni sukuán nkenta ɨɨn te̱e yukuán ya̱ kúvi ichiyúkúnꞌ va̱ji nu̱u̱nꞌ Leví, jee sáá niniꞌ‑i káá te̱e vá, jee ni̱kóiyo‑o íyo ka̱ꞌ yuíchí jee kua̱ꞌa̱nꞌ‑a. 33Soo ɨɨn te̱e ñuunꞌ Samaria, ya̱ suni ichi yukuán kua̱ꞌa̱nꞌ re̱ꞌ, jee nkenta re̱ꞌ nu̱u̱nꞌ káá te̱e vá, jee sáá niniꞌ re̱ꞌ maa jee nku̱náꞌví iniꞌ re̱ꞌ maa. 34Jee ña̱kuyatin re̱ꞌ nu̱u̱nꞌ káá te̱e vá, jee nsa̱tátán re̱ꞌ rá nu̱u̱nꞌ ntu̱fi̱ꞌ te̱e vá jín nixiꞌ nu̱xi uva níso re̱ꞌ, jee nsu̱kún re̱ꞌ rá nu̱u̱nꞌ ntu̱fi̱ꞌ vá. Jee nna̱neꞌen re̱ꞌ te̱e vá nchi̱só re̱ꞌ maa ya̱ta̱ꞌ burrúꞌ yósóꞌ re̱ꞌ, jee kua̱ꞌa̱nꞌ re̱ꞌ jín‑i ɨɨn veꞌi nu̱u̱nꞌ kínóo rá ñɨvɨ, jee nku̱mí re̱ꞌ maa. 35Jee ki̱vɨ̱ꞌ steñu̱ꞌún [sáá nkenta kɨ̱ꞌɨ̱nꞌ re̱ꞌ], jee ntavaꞌ re̱ꞌ u̱vi̱ꞌ xu̱ꞌún ka̱a ya̱ kúvi ya̱ꞌvi ɨɨn ñɨvɨ u̱vi̱ꞌ ki̱vɨ̱ꞌ jee njia̱ꞌa re̱ꞌ maa nu̱u̱nꞌ te̱e xín veꞌi vá, jee nkachiꞌ re̱ꞌ nu̱u̱nꞌ‑u: “Kumí nú te̱e yaꞌá, jee xu̱ꞌún ya̱ ka̱xi̱nꞌ nú ka̱ꞌ jín re̱ꞌ, jee sáá nikó ni̱ꞌ jee nachunáán ni̱ꞌ maa nu̱u̱nꞌ nú”, nkachiꞌ‑i. 36¿Né ɨɨn ni núníꞌ rá te̱e vá káꞌvi iniꞌ nú ya̱ nsa̱ꞌá re̱ꞌ kuéntáꞌ ɨɨn ñanitáꞌán nu̱u̱nꞌ te̱e nkininkava‑a xi̱ntíín rá te̱e kuíꞌná? ―nkachiꞌ Jesús.

37Jee nkachiꞌ te̱e súkuáꞌa jie̱ꞌe̱ꞌ tu̱ꞌun nta̱túníꞌ Ndiosíꞌ:

―Te̱e ya̱ nku̱náꞌví iniꞌ‑i te̱e ntúfiꞌ vá ―nkachiꞌ‑i.

Jee nkachiꞌ Jesús nu̱u̱nꞌ‑u:

―Kuáꞌán jee suni sukuán saꞌá nú ―nkachiꞌ Jesús.

Kua̱ꞌa̱nꞌ Jesús veꞌi Marta jín María

38Jee sáá kua̱ꞌa̱nꞌ Jesús ichi jín rá te̱e kútáꞌán jín re̱ꞌ súkuáꞌa re̱ꞌ ráa, jee nki̱vɨ ráa ɨin ñuunꞌ lúlí, jee ɨɨn ñaꞌan naní Marta njia̱ꞌa ña veꞌi ña kino̱o ráa. 39Jee íyó ɨɨn ku̱ꞌvi̱ꞌ ñaꞌan yaꞌá ya̱ naní María, jee ña̱kuneeꞌ María xiín jie̱ꞌe̱ꞌ Jesús, jee tésóꞌo ña tu̱ꞌun ya̱ káchíꞌ re̱ꞌ. 40Soo Marta jee níꞌvɨ́ꞌ iniꞌ ña sáꞌá ña kue̱ꞌe̱ꞌ rá tiñu iniꞌ veꞌi ya̱ kajiꞌ ráa jín nu̱u̱nꞌ kino̱o ráa. Jee ña̱kuyatin ña nu̱u̱nꞌ I̱toꞌoꞌ‑ó jee nkachiꞌ ña nu̱u̱nꞌ re̱ꞌ:

―I̱toꞌoꞌ, ¿á ntu jítú iniꞌ nú ya̱ ku̱ꞌvi̱ꞌ ni̱ꞌ nxi̱nóo métúꞌún ña nuꞌuꞌ nu̱u̱nꞌ ntáká tiñu sáꞌá ni̱ꞌ yaꞌá? Kachiꞌ nú xá nu̱u̱nꞌ ña chineí ña nuꞌuꞌ ―nkachiꞌ Marta.

41Jee nna̱xiníkó I̱toꞌoꞌ‑ó jee nkachiꞌ re̱ꞌ nu̱u̱nꞌ ña:

―Marta, Marta, na̱ ka̱ꞌ nániꞌvɨꞌ nániꞌvɨꞌ iniꞌ nú jee ñúníní iniꞌ nú jie̱ꞌe̱ꞌ kue̱ꞌe̱ꞌ rá tiñu íyó nu̱u̱nꞌ nú. 42Soo íyó métúꞌún ɨɨn jie̱ꞌe̱ꞌ jíniñúꞌún ñɨvɨ, chi María jee nka̱ji ña máá tiñu váꞌa ka̱ꞌ máá ñáꞌnú ka̱ꞌ, jee ntu̱náꞌ yó kaneeꞌ maa nu̱u̱nꞌ ña ―nkachiꞌ Jesús.

Currently Selected:

Lucas 10: meh

Highlight

Copy