Lucas 9

Chúichí Jesús ni u̱xu̱ꞌ u̱vi̱ꞌ (12) rá te̱e kútáꞌán jín re̱ꞌ súkuáꞌa re̱ꞌ ya̱ kɨ̱stekútu̱ꞌún ráa Tu̱ꞌun Ndiosíꞌ

(Mateo 10:5-15; Marcos 6:7-13)

1Nkana Jesús nastútú re̱ꞌ ni uxúꞌ u̱vi̱ꞌ (12) rá te̱e kútáꞌán jín re̱ꞌ súkuáꞌa re̱ꞌ ráa, jee njia̱ꞌa re̱ꞌ fuersáꞌ ííꞌ níꞌin nu̱u̱nꞌ ráa jín tiñu tatúníꞌ ráa sáva tavaꞌ ráa rá kui̱ꞌna̱ꞌ yɨ́ꞌɨ́ iniꞌ rá ñɨvɨ, jín suni sáva xinúvi ráa rá ñɨvɨ kúꞌvíꞌ. 2Jee nchu̱ichí re̱ꞌ ráa kɨ̱kachitu̱ꞌún ráa tu̱ꞌun na̱ja ki̱vɨ ñɨvɨ xi̱ntíín Ndiosíꞌ jín ya̱ xinúvi ráa rá ñɨvɨ. 3Jee nkachiꞌ re̱ꞌ nu̱u̱nꞌ ráa:

―Koto na̱ nantíñú ínaꞌá rán ya̱ kuvi ichi, ni karútíꞌ, ni ñunu, ni ya̱ yájíꞌ, ni xu̱ꞌún, ni inka ka̱ꞌ saꞌma naku̱ꞌun rán. 4Jee néni ɨɨn veꞌi nu̱u̱nꞌ kenta rán ki̱vɨ rán, jee kino̱o rán kuneeꞌ rán veꞌi vá ne̱ kene rán ñuunꞌ yukuán. 5Jee retú néni ɨɨn nu̱u̱nꞌ ntu íyó maniꞌ ráa tɨɨn ráa ránoꞌó, jee sáá kene rán ñuunꞌ vá, jee kisɨ rán ti̱ka̱cha̱a̱ꞌ jie̱ꞌe̱ꞌ rán, sáva nastúvi rán ya̱ íyó si̱kɨ̱ꞌ ráa ―nkachiꞌ re̱ꞌ.

6Saájee nke̱chí ráa kua̱ꞌa̱nꞌ ráa ntáká rá ñuunꞌ ta ñuunꞌ jíkónúun ráa stékútu̱ꞌún ráa tu̱ꞌun váꞌa Ndiosíꞌ, jee suni ntáká nu̱u̱nꞌ kua̱ꞌa̱nꞌ ráa xínúvi ráa rá ñɨvɨ kúꞌvíꞌ.

Ni̱ꞌi̱ꞌ Juan te̱e síkuánuté

(Mateo 14:1-12; Marcos 6:14-29)

7Jee Herodes, te̱e tátúníꞌ, chi nku̱káꞌnú iniꞌ re̱ꞌ jie̱ꞌe̱ꞌ ntáká tiñu sáꞌá Jesús. Jee nku̱naan nku̱suꞌva re̱ꞌ, chi sava rá ñɨvɨ káchíꞌ ya̱ Juan ví‑i ya̱ nna̱tekuꞌ i̱i̱ꞌ‑i ya̱ níꞌiꞌ‑i, 8jee sava ráa ka̱ꞌ káchíꞌ ya̱ nnenta Elías te̱e nna̱kani tu̱ꞌun nkene yuꞌú máá maá Ndiosíꞌ yanaꞌán nasɨ́kuitɨꞌ, jee sava ráa ka̱ꞌ káchíꞌ ya̱ kúvi‑i ɨɨn rá inka te̱e nna̱kani tu̱ꞌun nkene yuꞌú máá maá Ndiosíꞌ yanaꞌán, jee nkenta nna̱tekuꞌ‑u. 9Jee nkachiꞌ Herodes:

―Nuꞌuꞌ nta̱jí ni̱ꞌ ya̱ kuachi ráa xi̱ni̱ꞌ Juan, jee saáva, ¿né ɨɨn kúvi te̱e yaꞌá jie̱ꞌe̱ꞌ ya̱ tésóꞌo ni̱ꞌ ya̱ sáꞌá re̱ꞌ rá tiñu sukuán rúja? ―nkachiꞌ re̱ꞌ, jee núkú re̱ꞌ na̱ja kuvi kuniꞌ re̱ꞌ Jesús.

Síkájíꞌ Jesús u̱ꞌu̱nꞌ mil (5000) rá ñɨvɨ

(Mateo 14:13-21; Marcos 6:30-44; Juan 6:1-14)

10Jee sáá nni̱kó rá te̱e najiáꞌáꞌ re̱ꞌ ya̱ níso ráa tiñu apóstol ya̱ nchu̱ichí re̱ꞌ ráa, jee nna̱kani ráa nu̱u̱nꞌ re̱ꞌ nɨꞌɨ rá tiñu nsa̱ꞌá ráa, jee nkeꞌen re̱ꞌ ráa kua̱ꞌa̱nꞌ sɨ́ɨ́n re̱ꞌ jín ráa nu̱u̱nꞌ ñuunꞌ naní Betsaida. 11Jee sáá nku̱káꞌnú iniꞌ rá ñɨvɨ kue̱ꞌe̱ꞌ jee kua̱ꞌa̱nꞌ ráa yukuán, jee ni̱yo ma̱ni̱ꞌ re̱ꞌ nna̱tɨɨn re̱ꞌ ráa, jee káchíꞌ re̱ꞌ nu̱u̱nꞌ ráa na̱ja tatúníꞌ Ndiosíꞌ nu̱u̱nꞌ rá ñɨvɨ ki̱vɨ xi̱ntíín Ndiosíꞌ. Jee suni ñɨvɨ kúꞌvíꞌ ya̱ jíniñúꞌún ráa ya̱ nuvi ráa jee nxi̱núvi re̱ꞌ ráa. 12Jee sáá kuáini, jee ña̱kuyatin rá ni uxúꞌ u̱vi̱ꞌ rá te̱e kútáꞌán jín re̱ꞌ súkuáꞌa re̱ꞌ ráa jee nkachiꞌ ráa nu̱u̱nꞌ re̱ꞌ:

―Nachuichí nú rá ñɨvɨ kɨ̱ꞌɨ̱nꞌ rá nu̱u̱nꞌ rá ñuunꞌ jín rá kuaríáꞌ káá ti̱yu̱ꞌ yatin, sáva kɨ̱nukú ráa nu̱u̱nꞌ kino̱o ráa jín ya̱ kajiꞌ ráa, chi nu̱u̱nꞌ íyó‑ó yaꞌá, jee nu̱u̱nꞌ ñu̱ꞌún sáɨn nu̱u̱nꞌ ntu nééꞌ ñɨvɨ ví yaꞌá ―nkachiꞌ ráa.

13Soo nkachiꞌ Jesús nu̱u̱nꞌ ráa:

―Ku̱ꞌva rán kajiꞌ ráa ―nkachiꞌ re̱ꞌ.

Soo nkachiꞌ ráa:

―Ntu̱náꞌ kue̱ꞌe̱ꞌ íyó ínaꞌá ránꞌ chi kua̱chi u̱ꞌu̱nꞌ i̱xta̱tíláꞌ ni jín u̱vi̱ꞌ tia̱ká ni íyó. Áxí soo nika̱ꞌ retú ki̱ke̱ꞌen ránꞌ ya̱ kajiꞌ ntáká rá ñɨvɨ kue̱ꞌe̱ꞌ yaꞌá rúja ―nkachiꞌ rá te̱e kútáꞌán jín re̱ꞌ sukuáꞌa re̱ꞌ ráa.

14Chi jie̱ꞌe̱ꞌ nika̱ꞌ íyó u̱ꞌu̱nꞌ mil (5000) rá te̱e, saájee nkachiꞌ Jesús nu̱u̱nꞌ rá te̱e kútáꞌán jín re̱ꞌ súkuáꞌa re̱ꞌ:

―Kachiꞌ rán nu̱u̱nꞌ ráa ya̱ kikuneeꞌ kua̱ꞌ ta u̱vi̱xiko u̱ji̱ꞌ (50) ta u̱vi̱xiko u̱ji̱ꞌ ráa ―nkachiꞌ re̱ꞌ.

15Jee sukuán nsa̱ꞌá ráa, jee ña̱kuneeꞌ kua̱íyó rá ñɨvɨ vá. 16Jee ntɨɨn Jesús ni úꞌúnꞌ rá i̱xta̱tíláꞌ vá jín ni núvíꞌ rá tia̱ká vá, jee ni néꞌyá re̱ꞌ súkún, jee njia̱ꞌa re̱ꞌ ya̱ kútaꞌviꞌ re̱ꞌ nu̱u̱nꞌ Ndiosíꞌ. Jee ña̱ꞌnu̱ꞌ re̱ꞌ maa njia̱ꞌa re̱ꞌ maa nu̱u̱nꞌ rá te̱e kútáꞌán jín re̱ꞌ súkuáꞌa re̱ꞌ, sáva siáꞌa ráa maa nu̱u̱nꞌ rá ñɨvɨ. 17Jee nyajiꞌ rá ñɨvɨ ne̱ nkuvi iniꞌ kua̱íyó ráa, jee nna̱stútú ráa u̱xu̱ꞌ u̱vi̱ꞌ (12) chikívɨ́ꞌ rá léfé nkino̱o ka̱ꞌ nu̱u̱nꞌ ya̱ nyajiꞌ ráa.

Sáꞌá náaꞌ Pedro ya̱ Jesús ví Cristo

(Mateo 16:13-20; Marcos 8:27-30)

18Ɨɨn ki̱vɨ̱ꞌ nku̱sɨ́ɨ́n Jesús káꞌánꞌ re̱ꞌ jín Ndiosíꞌ, jee rá te̱e súkuáꞌa re̱ꞌ ráa nééꞌ ráa jín re̱ꞌ jee ni̱ka̱tu̱ꞌún re̱ꞌ ráa:

―¿Né ɨɨn káchíꞌ rá ñɨvɨ ya̱ kúvi nuꞌuꞌ? ―nkachiꞌ re̱ꞌ.

19Jee nna̱xiníkó ráa:

―Káchíꞌ sava rá ñɨvɨ kúvi nú Juan ya̱ nsi̱kuánuté, jee sava ráa ka̱ꞌ káchíꞌ ya̱ kúvi nú Elías, jee sava ráa ka̱ꞌ káchíꞌ ya̱ kúvi nú ɨɨn rá te̱e ya̱ nna̱kani ráa tu̱ꞌun nkene yuꞌú máá maá Ndiosíꞌ tióꞌ chíji nasɨ́kuitɨꞌ jee vitan nna̱tekuꞌ tuku‑u, káchíꞌ rá ñɨvɨ ―nkachiꞌ ráa nu̱u̱nꞌ Jesús.

20Jee nkachiꞌ re̱ꞌ nu̱u̱nꞌ ráa:

―Soo ránoꞌó, ¿né ɨɨn káchíꞌ rán ya̱ kúvi nuꞌuꞌ?

Saájee nna̱xiníkó Pedro jee nkachiꞌ re̱ꞌ:

―Noꞌó kúvi Cristo ya̱ ñani Ndiosíꞌ noꞌó ―nkachiꞌ‑i.

21Soo nta̱túníꞌ ni̱ꞌin ñáꞌnú Jesús nu̱u̱nꞌ ráa ya̱ ni ɨɨn nu̱u̱nꞌ nkáchíꞌ ráa maa.

Káchíꞌ Jesús jie̱ꞌe̱ꞌ ya̱ kuviꞌ re̱ꞌ

(Mateo 16:21-28; Marcos 8:31—9:1)

22Jee nkachiꞌ re̱ꞌ:

―Nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee íyó kunoꞌo nasɨ́kuitɨꞌ ni̱ꞌ. Jee rá te̱e kúñáꞌnú jín rá su̱tu̱ꞌ kúñáꞌnú jín rá te̱e xinéꞌénꞌ tu̱ꞌun nta̱túníꞌ Ndiosíꞌ kuichi iniꞌ ráa kune̱ꞌyá ráa nuꞌuꞌ. Jee kaꞌniꞌ ráa nuꞌuꞌ. Soo ki̱vɨ̱ꞌ uníꞌ jee natekuꞌ i̱i̱ꞌ ni̱ꞌ kene ni̱ꞌ nteñu rá ni̱yɨ.

23Saájee nkachiꞌ re̱ꞌ nu̱u̱nꞌ ntáká rá ñɨvɨ:

―Retú néni ɨɨn ñɨvɨ kuíni‑i kunikɨnꞌ‑ɨ nuꞌuꞌ jee xináánꞌ‑a iniꞌ‑i rá níyo iniꞌ maáa, jee ta ki̱vɨ̱ꞌ ɨɨn ni koo iniꞌ‑i kunoꞌo‑o jie̱ꞌe̱ꞌ nuꞌuꞌ kuéntáꞌ ɨɨn ya̱ níso‑o kurúsiꞌ sáva kuviꞌ‑i nu̱u̱nꞌ vá, jee kunikɨnꞌ‑ɨ nuꞌuꞌ. 24Chi néni ɨɨn ya̱ ntu níkɨ́nꞌ nuꞌuꞌ chi níyo iniꞌ‑i kutekuꞌ va̱ꞌa‑a jín ya̱ ka̱ku‑u nu̱u̱nꞌ tu̱nóꞌó kiji nu̱u̱nꞌ‑u jie̱ꞌe̱ꞌ níkɨ́nꞌ‑ɨ nuꞌuꞌ, sukuíta‑a ya̱ kutekuꞌ‑u jín Ndiosíꞌ. Soo néni ɨɨn ñɨvɨ ya̱ níkɨ́nꞌ‑ɨ nuꞌuꞌ súka̱ꞌ nóꞌo‑o tu̱nóꞌó ne̱ kuviꞌ‑i jie̱ꞌe̱ꞌ níkɨ́nꞌ‑ɨ nuꞌuꞌ, jee ka̱ku nijia‑a chi ni̱ꞌi̱nꞌ‑i ya̱ kutekuꞌ‑u nɨ́ɨ́nkání jín Ndiosíꞌ saꞌá re̱ꞌ. 25Chi, ¿na̱ nu̱u̱nꞌ íyótiñu nu̱u̱nꞌ ɨɨn ñɨvɨ retú ni̱ꞌi̱nꞌ‑i kua̱íyó ñɨ̱vɨ́ nɨ́ɨ́n yaꞌá rúja, retú sukuíta‑a maáa áxí retú xínáánꞌ‑a maáa ya̱ nsáꞌ nanitáꞌvíꞌ‑i nu̱u̱nꞌ Ndiosíꞌ rúja? 26Chi néni ɨɨn ñɨvɨ ya̱ kúkanuun‑u jie̱ꞌe̱ꞌ nuꞌuꞌ jín jie̱ꞌe̱ꞌ tu̱ꞌun ni̱ꞌ, jee suni maáníꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee kukanuun ni̱ꞌ jie̱ꞌe̱ꞌ ñɨvɨ vá, sáá niji ni̱ꞌ va̱ne̱ꞌ tu̱u̱nꞌ nasɨ́kuitɨꞌ ya̱ maa viiꞌ kúñáꞌnú ni̱ꞌ jín Tátáꞌ ni̱ꞌ Ndiosíꞌ, jín rá najiáꞌáꞌ ííꞌ re̱ꞌ. 27Soo nuꞌuꞌ jee máá naáꞌ vá káchíꞌ ni̱ꞌ nu̱u̱nꞌ rán ya̱ sava rá ñɨvɨ ya̱ íñɨ́ yaꞌá, ni nsáꞌ kuviꞌ ráa ne̱kua̱ꞌ kuniꞌ ráa tiñu ñáꞌnú níso Ndiosíꞌ ya̱ tatúníꞌ re̱ꞌ ―nkachiꞌ Jesús.

Sɨ́ɨ́n nsama nnatu̱vi sáá íyó Jesús

(Mateo 17:1-8; Marcos 9:2-8; 2 Pedro 1:16-17)

28Jee sáá njia̱ꞌa yatin u̱na̱ꞌ ki̱vɨ̱ꞌ ya̱ nkachiꞌ re̱ꞌ rá tu̱ꞌun yukuán, jee nkeꞌen re̱ꞌ Pedro jín Juan jín Jacobo, jee kua̱ꞌa̱nꞌ re̱ꞌ jín ráa nu̱u̱nꞌ yuku kua̱kaꞌanꞌ re̱ꞌ jín Ndiosíꞌ. 29Jee ni káꞌánꞌ Jesús jín Ndiosíꞌ, jee sɨ́ɨ́n nsama nnatu̱vi nu̱u̱nꞌ re̱ꞌ, jee saꞌma re̱ꞌ nnuvi‑i máá kuíjín nijia ne̱ jiánu̱te̱ꞌ‑e. 30Jee nkitu̱vi u̱vi̱ꞌ rá te̱e kúkuéntú ráa jín re̱ꞌ, suvi kúvi Moisés jín Elías, 31Jee ne̱ ñúnuva ráa jíánu̱te̱ꞌ ráa íñɨ́ ráa káꞌánꞌ ráa jín re̱ꞌ jie̱ꞌe̱ꞌ ya̱ kene re̱ꞌ ñɨ̱vɨ́ yaꞌá ya̱ sikúnkuvi re̱ꞌ maa nu̱u̱nꞌ ñuunꞌ Jerusalén. 32Jee Pedro jín rá kútáꞌán jín re̱ꞌ ne̱ kúvéi ráa ma̱ꞌná jee ne̱ nunito ráa, jee niniꞌ ráa nuva viiꞌ jiánu̱te̱ꞌ Jesús jín rá u̱vi̱ꞌ te̱e vá ya̱ íñɨ́ ráa jín re̱ꞌ. 33Jee sáá nku̱sɨ́ɨ́n ni nuví rá te̱e vá nu̱u̱nꞌ Jesús, jee nkachiꞌ Pedro nu̱u̱nꞌ Jesús:

―¡Mestrúꞌ! ¡Na̱ ka̱ꞌ va̱ꞌa ka̱ꞌ ya̱ íyó‑ó yaꞌá! Saꞌá ráníꞌ u̱ni̱ꞌ vesayo, ɨɨn kuvi nú, jee ɨɨn kuvi Moisés, jee ɨɨn kuvi Elías ―nkachiꞌ Pedro sukuán, súnika̱ꞌ ni maá Pedro ntu jíníꞌ re̱ꞌ na̱ jie̱ꞌe̱ꞌ nkachiꞌ re̱ꞌ sukuán.

34Jee ni káꞌánꞌ i̱i̱ꞌ re̱ꞌ ka̱ꞌ, jee nkenta ɨɨn vi̱ko̱ꞌ jee nna̱kasɨꞌ‑ɨ ráa, jee nyu̱ꞌví ráa sáá nki̱vɨ ráa nteñu vi̱ko̱ꞌ vá. 35Saájee nu̱u̱nꞌ vi̱ko̱ꞌ vá nkene ɨɨn nusuyuꞌú ya̱ káchíꞌ‑i:

―Yaꞌá ví Se̱ꞌya yɨ́ɨ́ ni̱ꞌ, [jee ñúnúunꞌ ni̱ꞌ re̱ꞌ], ya̱ nkáji ni̱ꞌ maa. Tɨɨn kuéntáꞌ ñáꞌnú rá tu̱ꞌun káchíꞌ re̱ꞌ ―nkachiꞌ‑i.

36Jee sáá ña̱kui̱ñɨ̱ꞌ ya̱ káꞌánꞌ nusuyuꞌú vá, jee niniꞌ ráa ya̱ kua̱chi métúꞌún nika̱ꞌ Jesús íñɨ́ re̱ꞌ jín ráa. Jee nñu̱yuꞌuꞌ iniꞌ ráa jie̱ꞌe̱ꞌ vá, jee rá ki̱vɨ̱ꞌ yukuán ni ntu̱né nkáchíꞌ kuitɨꞌ ráa nu̱u̱nꞌ ni ɨɨn rá ñɨvɨ ya̱ niniꞌ ráa.

Xínúvi Jesús ɨɨn te̱súchí yɨ́ꞌɨ́ ta̱chi̱ꞌ kíni iniꞌ‑i

(Mateo 17:14-21; Marcos 9:14-29)

37Jee ki̱vɨ̱ꞌ steñu̱ꞌún, sáá nnuun ráa yuku vá, jee kue̱ꞌe̱ꞌ nasɨ́kuitɨꞌ rá ñɨvɨ ña̱taꞌanꞌ ráa Jesús. 38Jee nteñu rá ñɨvɨ kue̱ꞌe̱ꞌ vá nka̱najíín ɨɨn te̱e, jee nkachiꞌ‑i:

―Mestrúꞌ, jíkánꞌ táꞌvíꞌ ni̱ꞌ nu̱u̱nꞌ nú ya̱ kune̱ꞌyá nú se̱ꞌya yɨ́ɨ́ ni̱ꞌ, chi métúꞌún xíníꞌ nkaku re̱ꞌ ví se̱ꞌya yɨ́ɨ́ ni̱ꞌ ya̱ íyó. 39Jee ɨɨn ta̱chi̱ꞌ kíni tɨ́ɨn‑ɨ re̱ꞌ jee síkánajíín‑i re̱ꞌ, jee jiáꞌníyɨꞌɨ́‑ɨ re̱ꞌ, jee kéne tiu̱u̱nꞌ iniꞌ yuꞌú re̱ꞌ. Jee xe̱e̱nꞌ xá xínóꞌo‑o re̱ꞌ, jee u̱ꞌvi̱ꞌ xá siááꞌ‑a re̱ꞌ. 40Ni̱ka̱nꞌ táꞌvíꞌ ni̱ꞌ nu̱u̱nꞌ rá te̱e súkuáꞌa nú ya̱ taníkɨ́nꞌ ráa maa, soo ntu nkúneí ráa ―nkachiꞌ te̱e vá.

41Saájee nkachiꞌ Jesús:

―¡Na̱ ka̱ꞌ rá ñɨvɨ yaꞌá ya̱ ntu ínúꞌ iniꞌ ráa Ndiosíꞌ jín ya̱ nku̱sɨ́ɨ́n rán nu̱u̱nꞌ ya̱ nááꞌ! ¿Na̱ja ka̱ꞌ tiempúꞌ vá íyó kuneeꞌ ni̱ꞌ jín ránoꞌó? ¿Na̱ja ka̱ꞌ tiempúꞌ vá íyó keꞌneꞌ iniꞌ ni̱ꞌ nu̱u̱nꞌ ránoꞌó? Kínaka se̱ꞌya yɨ́ɨ́ nú yaꞌá ―nkachiꞌ Jesús.

42Jee ni kua̱kuyatin te̱súchí vá nu̱u̱nꞌ Jesús, jee nxi̱nániso ta̱chi̱ꞌ kákini kánéꞌí vá maa nu̱u̱nꞌ ñu̱ꞌún, jee ñaꞌniyɨ̱ꞌɨ́‑ɨ re̱ꞌ. Soo nnu̱xeenꞌ Jesús nu̱u̱nꞌ ta̱chi̱ꞌ kíni vá, jee nkene‑e kua̱ꞌa̱nꞌ‑a, jee nxi̱núvi re̱ꞌ te̱súchí vá, jee nna̱ku̱ꞌva re̱ꞌ maa nu̱u̱nꞌ tátáꞌ‑a. 43Jee kua̱íyó rá ñɨvɨ íñɨ́ yukuán nti̱vɨ́ xíniꞌ ráa ya̱ kúñáꞌnú nasɨ́kuitɨꞌ Ndiosíꞌ.

Ya̱ uvíꞌ íchí tukuni káchítu̱ꞌún Jesús ya̱ kuviꞌ re̱ꞌ

(Mateo 17:22-23; Marcos 9:30-32)

Jee ni tívɨ́ xíniꞌ rá ñɨvɨ jie̱ꞌe̱ꞌ nɨꞌɨ rá tiñu máá ñáꞌnú mánasɨ́ ya̱ sáꞌá re̱ꞌ jee nkachiꞌ Jesús nu̱u̱nꞌ rá te̱e kútáꞌán ráa jín re̱ꞌ súkuáꞌa re̱ꞌ ráa:

44―Chuso̱ꞌo vava̱ꞌa rán rá tu̱ꞌun yaꞌá ya̱ káchíꞌ ni̱ꞌ nu̱u̱nꞌ rán, chi nuꞌuꞌ ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, va̱kuyatin naku̱ꞌva ɨɨn ñɨvɨ nuꞌuꞌ xi̱ntíín rá te̱e ya̱ jíníꞌ u̱ꞌvi̱ꞌ ráa nuꞌuꞌ ―nkachiꞌ Jesús.

45Soo ni ntu ña̱ku̱ꞌun iniꞌ ráa tu̱ꞌun yaꞌá ya̱ nkachiꞌ re̱ꞌ, chi nyɨse̱ꞌí tu̱ꞌun yaꞌá nu̱u̱nꞌ antúníꞌ ráa sáva nkúvi ki̱ku̱ꞌun iniꞌ ráa maa, soo nyu̱ꞌví ráa nakatu̱ꞌún ráa re̱ꞌ jie̱ꞌe̱ꞌ tu̱ꞌun yaꞌá ya̱ nkachiꞌ re̱ꞌ.

Né ɨɨn kúvi ya̱ kúñáꞌnú ka̱ꞌ

(Mateo 18:1-5; Marcos 9:33-37)

46Saájee kuíre rá te̱e kútáꞌán jín re̱ꞌ súkuáꞌa re̱ꞌ ráa nka̱jiéꞌé ráa kantátúꞌun ráa jie̱ꞌe̱ꞌ né ɨɨn ráa vá kúñáꞌnú ka̱ꞌ. 47Soo jie̱ꞌe̱ꞌ nika̱ꞌ ya̱ jíníꞌ Jesús ya̱ jiáni iniꞌ ánímaꞌ ráa, jee ntɨɨn re̱ꞌ ɨɨn su̱chí lúlí ñani re̱ꞌ maa xiín re̱ꞌ. 48Jee nkachiꞌ re̱ꞌ nu̱u̱nꞌ ráa:

―Néni ɨɨn ñɨvɨ ya̱ nu̱u̱nꞌ súví nuꞌuꞌ íyó maniꞌ iniꞌ‑i nakuatáꞌví‑i su̱chí lúlí yaꞌá, jee suni íyó maniꞌ iniꞌ‑i nakuatáꞌví ñɨvɨ vá nuꞌuꞌ ranika̱ꞌ. Jee ñɨvɨ vá ya̱ íyó maniꞌ iniꞌ‑i nákuatáꞌví ráa nuꞌuꞌ, suni íyó maniꞌ iniꞌ‑i nakuatáꞌví ñɨvɨ vá Ndiosíꞌ ranika̱ꞌ, ya̱ nchu̱ichí nuꞌuꞌ va̱ji ni̱ꞌ. Chi ɨɨn ñɨvɨ ya̱ ntu kúñáꞌnú‑u ka̱ꞌ nteñu ntáká rán, suvivá kúñáꞌnú ka̱ꞌ nu̱u̱nꞌ Ndiosíꞌ ―nkachiꞌ Jesús.

Ɨɨn ñɨvɨ ya̱ ntu íñɨ́ si̱kɨ̱ꞌ Jesús jee nákuiñɨꞌ‑ɨ jín re̱ꞌ

(Marcos 9:38-40)

49Jee nkachiꞌ Juan:

―Mestrúꞌ, niniꞌ ránꞌ ɨɨn te̱e ya̱ nu̱u̱nꞌ súví nú táníkɨ́nꞌ re̱ꞌ rá ta̱chi̱ꞌ kíni ya̱ yɨ́ꞌɨ́ iniꞌ rá ñɨvɨ. Jee ninii̱yo ránꞌ saꞌá re̱ꞌ ka̱ꞌ suꞌva, chi ntu kútáꞌán re̱ꞌ jín‑ó ―nkachiꞌ Juan.

50Soo nkachiꞌ Jesús:

―Koto jíníi̱yo rán maa nu̱u̱nꞌ re̱ꞌ, chi ɨɨn ñɨvɨ ya̱ ntu kénta si̱kɨ̱ꞌ‑ó, íñɨ́‑ɨ jín‑ó ―nkachiꞌ Jesús.

Nnu̱xeenꞌ Jesús nu̱u̱nꞌ Jacobo jín Juan

51Jee sáá nku̱yatin tiempúꞌ ya̱ kɨ̱noꞌonꞌ Jesús kɨ̱naa re̱ꞌ antivɨ́ súkún, jee ɨɨn ni ñúꞌún iniꞌ re̱ꞌ ya̱ kɨ̱ꞌɨ̱nꞌ re̱ꞌ ñuunꞌ Jerusalén. 52Jee nchu̱ichí re̱ꞌ xíꞌna ka̱ꞌ sava rá te̱e kua̱ꞌa̱nꞌ ráa nu̱u̱nꞌ, jee kua̱ꞌa̱nꞌ ráa nki̱vɨ ráa ɨɨn rá ñuunꞌ Samaria sáva nukú ráa nu̱u̱nꞌ satúꞌva ráa kino̱o re̱ꞌ. 53Soo ntu njiáꞌa rá ñɨvɨ ñuunꞌ vá kino̱o re̱ꞌ yukuán, chi niniꞌ ráa ya̱ ñúꞌún iniꞌ re̱ꞌ kɨ̱ꞌɨ̱nꞌ re̱ꞌ Jerusalén. 54Jee Jacobo jín Juan, rá te̱e kútáꞌán jín re̱ꞌ súkuáꞌa re̱ꞌ ráa, jee sáá niniꞌ ráa ya̱ nkuvi sukuán, jee nkachiꞌ ráa:

―I̱toꞌoꞌ, ¿á kuíni nú ya̱ tatúníꞌ ránꞌ ya̱ kiji nkuun ñuꞌunꞌ ne̱ antivɨ́ sáva xináánꞌ‑a rá ñɨvɨ ñuunꞌ yaꞌá, kuéntáꞌ kua̱ꞌ nsa̱ꞌá Elías ne̱ yanaꞌán? ―nkachiꞌ ráa.

55Saájee nna̱kune̱ꞌyá Jesús nu̱u̱nꞌ ráa, jee nnu̱xeenꞌ re̱ꞌ nu̱u̱nꞌ ráa, [jee nkachiꞌ re̱ꞌ:

―Ni ntu jíníꞌ rán ne̱ nu̱u̱nꞌ va̱ji tu̱ꞌun káꞌánꞌ rán. 56Chi nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, nsáꞌ váji ni̱ꞌ xináánꞌ ni̱ꞌ rá ñɨvɨ, chisaꞌ va̱ji ni̱ꞌ sáva síkáku ni̱ꞌ rá ñɨvɨ ―nkachiꞌ re̱ꞌ.]

Saájee kua̱ꞌa̱nꞌ re̱ꞌ jín ráa inka ka̱ꞌ ñuunꞌ.

Tu̱ꞌun jie̱ꞌe̱ꞌ rá ñɨvɨ ya̱ kuíni ráa kunikɨnꞌ ráa Jesús

(Mateo 8:19-22)

57Jee ni kua̱ꞌa̱nꞌ ráa ichi jín Jesús, jee ɨɨn te̱e nkachiꞌ‑i nu̱u̱nꞌ re̱ꞌ:

―[I̱toꞌoꞌ ni̱ꞌ], kunikɨnꞌ ni̱ꞌ noꞌó né ni ví nkuvi nu̱u̱nꞌ kɨ̱ꞌɨ̱nꞌ nú ―nkachiꞌ‑i.

58Jee nkachiꞌ Jesús nu̱u̱nꞌ‑u:

―Rá ñu̱nkuii chi íyó rá yaviꞌ kava nu̱u̱nꞌ kíxíꞌ rátíꞌ, jee rá kitɨ chúchíyoꞌ ya̱ jíkó súkún íyó takaꞌ rátíꞌ. Soo nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, ni ntu̱ví íyó nu̱u̱nꞌ kosoꞌ xi̱ni̱ꞌ ni̱ꞌ najia̱ví ni̱ꞌ ―nkachiꞌ re̱ꞌ.

59Jee nkachiꞌ re̱ꞌ nu̱u̱nꞌ inka ka̱ꞌ:

―Kunikɨnꞌ nuꞌuꞌ.

Soo nkachiꞌ‑i nu̱u̱nꞌ re̱ꞌ:

―I̱toꞌoꞌ, taji nú xá xíꞌna ka̱ꞌ kɨ̱ꞌɨ̱nꞌ ni̱ꞌ kɨ̱se̱ꞌí ni̱ꞌ tátáꞌ ni̱ꞌ ―nkachiꞌ‑i.

60Jee nkachiꞌ re̱ꞌ nu̱u̱nꞌ‑u:

―Ku̱ꞌva nú ya̱ rá ñɨvɨ kuéntáꞌ níꞌiꞌ ráa nu̱u̱nꞌ Ndiosíꞌ kɨ̱se̱ꞌí ráa rá ni̱yɨ ráa. #9:60 Nkaꞌanꞌ Jesús jie̱ꞌe̱ꞌ kuéntáꞌ ni̱yɨ kúvi ñɨvɨ ntu ínúꞌ iniꞌ ráa re̱ꞌ. Soo noꞌó, kunikɨnꞌ nuꞌuꞌ jee kachitu̱ꞌún nú na̱ja ki̱vɨ ñɨvɨ xi̱ntíín Ndiosíꞌ tatúníꞌ re̱ꞌ nu̱u̱nꞌ ráa ―nkachiꞌ Jesús.

61Jee nkachiꞌ inka ka̱ꞌ:

―I̱toꞌoꞌ ni̱ꞌ, kunikɨnꞌ ni̱ꞌ noꞌó, soo xíꞌna ka̱ꞌ taji nú kɨ̱kaꞌanꞌ ni̱ꞌ ntíꞌ ka̱ꞌ jín rá táꞌán veꞌi ni̱ꞌ ―nkachiꞌ‑i.

62Soo nkachiꞌ Jesús nu̱u̱nꞌ‑u:

―Ɨɨn ñɨvɨ ya̱ kuíni‑i kunikɨnꞌ‑ɨ nuꞌuꞌ, soo retú nákúne̱ꞌyá‑a ichi yátá‑a nánikó iniꞌ‑i, saájee kúvi‑i kuéntáꞌ ɨɨn te̱e ya̱ retú nka̱jiéꞌé‑e ntɨɨn‑ɨ yutun xiníkɨꞌ jiáꞌa yukunꞌ, jee nákune̱ꞌyá yátá‑a ya̱ta̱ꞌ‑a, chi níkó iniꞌ‑i. Saájee ni ɨɨn ñɨvɨ ya̱ íyó suꞌva ntu íyótiñu ñɨvɨ vá sáva satíñú‑u nu̱u̱nꞌ Ndiosíꞌ jie̱ꞌe̱ꞌ tiñu tátúníꞌ re̱ꞌ.

Currently Selected:

Lucas 9: meh

Highlight

Copy