Popular Bible Verses from Lucas 9

Share

Saájee nkachiꞌ re̱ꞌ nu̱u̱nꞌ ntáká rá ñɨvɨ: ―Retú néni ɨɨn ñɨvɨ kuíni‑i kunikɨnꞌ‑ɨ nuꞌuꞌ jee xináánꞌ‑a iniꞌ‑i rá níyo iniꞌ maáa, jee ta ki̱vɨ̱ꞌ ɨɨn ni koo iniꞌ‑i kunoꞌo‑o jie̱ꞌe̱ꞌ nuꞌuꞌ kuéntáꞌ ɨɨn ya̱ níso‑o kurúsiꞌ sáva kuviꞌ‑i nu̱u̱nꞌ vá, jee kunikɨnꞌ‑ɨ nuꞌuꞌ.

Chi néni ɨɨn ya̱ ntu níkɨ́nꞌ nuꞌuꞌ chi níyo iniꞌ‑i kutekuꞌ va̱ꞌa‑a jín ya̱ ka̱ku‑u nu̱u̱nꞌ tu̱nóꞌó kiji nu̱u̱nꞌ‑u jie̱ꞌe̱ꞌ níkɨ́nꞌ‑ɨ nuꞌuꞌ, sukuíta‑a ya̱ kutekuꞌ‑u jín Ndiosíꞌ. Soo néni ɨɨn ñɨvɨ ya̱ níkɨ́nꞌ‑ɨ nuꞌuꞌ súka̱ꞌ nóꞌo‑o tu̱nóꞌó ne̱ kuviꞌ‑i jie̱ꞌe̱ꞌ níkɨ́nꞌ‑ɨ nuꞌuꞌ, jee ka̱ku nijia‑a chi ni̱ꞌi̱nꞌ‑i ya̱ kutekuꞌ‑u nɨ́ɨ́nkání jín Ndiosíꞌ saꞌá re̱ꞌ.

Soo nkachiꞌ Jesús nu̱u̱nꞌ‑u: ―Ɨɨn ñɨvɨ ya̱ kuíni‑i kunikɨnꞌ‑ɨ nuꞌuꞌ, soo retú nákúne̱ꞌyá‑a ichi yátá‑a nánikó iniꞌ‑i, saájee kúvi‑i kuéntáꞌ ɨɨn te̱e ya̱ retú nka̱jiéꞌé‑e ntɨɨn‑ɨ yutun xiníkɨꞌ jiáꞌa yukunꞌ, jee nákune̱ꞌyá yátá‑a ya̱ta̱ꞌ‑a, chi níkó iniꞌ‑i. Saájee ni ɨɨn ñɨvɨ ya̱ íyó suꞌva ntu íyótiñu ñɨvɨ vá sáva satíñú‑u nu̱u̱nꞌ Ndiosíꞌ jie̱ꞌe̱ꞌ tiñu tátúníꞌ re̱ꞌ.

Chi, ¿na̱ nu̱u̱nꞌ íyótiñu nu̱u̱nꞌ ɨɨn ñɨvɨ retú ni̱ꞌi̱nꞌ‑i kua̱íyó ñɨ̱vɨ́ nɨ́ɨ́n yaꞌá rúja, retú sukuíta‑a maáa áxí retú xínáánꞌ‑a maáa ya̱ nsáꞌ nanitáꞌvíꞌ‑i nu̱u̱nꞌ Ndiosíꞌ rúja?

Chi néni ɨɨn ñɨvɨ ya̱ kúkanuun‑u jie̱ꞌe̱ꞌ nuꞌuꞌ jín jie̱ꞌe̱ꞌ tu̱ꞌun ni̱ꞌ, jee suni maáníꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee kukanuun ni̱ꞌ jie̱ꞌe̱ꞌ ñɨvɨ vá, sáá niji ni̱ꞌ va̱ne̱ꞌ tu̱u̱nꞌ nasɨ́kuitɨꞌ ya̱ maa viiꞌ kúñáꞌnú ni̱ꞌ jín Tátáꞌ ni̱ꞌ Ndiosíꞌ, jín rá najiáꞌáꞌ ííꞌ re̱ꞌ.

Jee nkachiꞌ Jesús nu̱u̱nꞌ‑u: ―Rá ñu̱nkuii chi íyó rá yaviꞌ kava nu̱u̱nꞌ kíxíꞌ rátíꞌ, jee rá kitɨ chúchíyoꞌ ya̱ jíkó súkún íyó takaꞌ rátíꞌ. Soo nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, ni ntu̱ví íyó nu̱u̱nꞌ kosoꞌ xi̱ni̱ꞌ ni̱ꞌ najia̱ví ni̱ꞌ ―nkachiꞌ re̱ꞌ.

Jee nkachiꞌ re̱ꞌ nu̱u̱nꞌ ráa: ―Néni ɨɨn ñɨvɨ ya̱ nu̱u̱nꞌ súví nuꞌuꞌ íyó maniꞌ iniꞌ‑i nakuatáꞌví‑i su̱chí lúlí yaꞌá, jee suni íyó maniꞌ iniꞌ‑i nakuatáꞌví ñɨvɨ vá nuꞌuꞌ ranika̱ꞌ. Jee ñɨvɨ vá ya̱ íyó maniꞌ iniꞌ‑i nákuatáꞌví ráa nuꞌuꞌ, suni íyó maniꞌ iniꞌ‑i nakuatáꞌví ñɨvɨ vá Ndiosíꞌ ranika̱ꞌ, ya̱ nchu̱ichí nuꞌuꞌ va̱ji ni̱ꞌ. Chi ɨɨn ñɨvɨ ya̱ ntu kúñáꞌnú‑u ka̱ꞌ nteñu ntáká rán, suvivá kúñáꞌnú ka̱ꞌ nu̱u̱nꞌ Ndiosíꞌ ―nkachiꞌ Jesús.