Kumsada 20
20
Abraon fala kuma Sara i ka si minjer
1Abraon sai di Manre, i bai mora na ladu di sul di Kanaan, na metadi di Kades ku Sur. Mas tardi, oca i bai pa Jerar,#Kap 10.19; 26 2i fala di Sara si minjer kuma#Kap 12.13; 26.7 i si irma. Abimelek, rei di Jerar, manda toma Sara.
3Deus bai pa Abimelek di noti na suñu, i falal: “Bu na muri pabia di minjer ku bu toma. I tene si omi ki kasa ku el.”
4Abimelek ka tokaba inda nel; asin i punta: “Siñor, bu na kaba ku un nason justu? 5Nta omi ka falan kuma i si irma? Minjer tambi i ka falan kuma i si ermon? N fasi es ku bon korson, ku mon limpu.”
6Deus falal na si suñu: “N sibi kuma bu fasi es ku bon korson. E ku manda N tujiu peka kontra mi. Asin N tujiu toka nel. 7Gosi, torna minjer pa si omi, pabia el i anunsiadur di ña palabra. I na roga pa bo pa bu pudi vivi, ma si bu ka tornal, sibi sertu kuma bu na muri, ku tudu kil ku bu tene.”
8Abimelek lanta mandrugada, i coma tudu si ŝefis, i konta elis tudu ki palabras ki obiba. Ki omis tenba garandi medu. 9Abimelek coma Abraon, i puntal: “Ke ku bu fasinu? Na ke ku N peka kontra bo pa bu tisi garandi pekadu riba di mi ku ña renu? Bu fasin un kusa ku bu ka dibi di fasi.” 10I torna punta Abraon: “Ke ku manda bu fasi e kusa?”
11Abraon falal: “Ami N fala na ña sintidu: ‘N ten sertesa kuma jinti ne kau ka ten rispitu pa Deus. E na matan pabia di ña minjer.’ 12Na bardadi el i ña irma tambi. I fiju di ña pape, ma no ka junta mame. I bin sedu ña minjer. 13Oca ku Deus falan pa N sai na kasa di ña pape pa N bai na utru kau, N falal: ‘Asin ku bu na mostra kuma bu aman: Kada kau ku no ciga, bu ta fala kuma ami i bu ermon.’ ”
14Abimelek toma karnelis ku bakas, ku katibus macu ku femia, i da Abraon, i tornal Sara si minjer, 15i falal: “Ali ña tera sta bu dianti. Bu pudi mora na kau ku bu misti.”
16I fala Sara: “Jubi, N da bu ermon mil mueda di prata. Es i pa tapa uju di kilis ku sta ku bo. Elis tudu e na sibi kuma bu ka ten kulpa.”
17Abraon ora Deus. Deus kura Abimelek ku si minjer, ku si katibus femia, pa e pudi padi fijus, 18pabia SIÑOR tujiba tudu minjeris na kasa di Abimelek pa e padi, pabia di Sara, minjer di Abraon.
Currently Selected:
Kumsada 20: povB
Highlight
Share
Copy
Want to have your highlights saved across all your devices? Sign up or sign in
© 1993-2020, Instituto de Tradução e Alfabetização
