Bemba 10
10
Yɛni ja kɔnɛli
1Ya ajasa bya Sezali na moto wa jinɔ te Kɔnɛli, ajasa nɛni mwa bahɔlɛ sini obuka bwa bahɔlɛ ba Lɔmi bwababanga te «buka bwa Itali». 2Ajasa moto wa hongololo, asiswakasa Zambe bango na buka bweji. Anyamwakasa metende mya buka bwa ba-Zufi, na ibɔndɔkɔ Zambe minyan mahajɛ. 3Usya buya bwa bandasa emba nda belɔmɔ behanto bikɔ, ya ango ayɛnɛ ngɛlɛ wa Zambe oyɛni akweya bya ango aji na isɔhɔkɔ neje te: «kɔnɛli!». 4Usɛ ya ango asɔzɛ ango, bɔngɔ te bwa banda ango ya ango wungwɛ na neji te: «Ya bende Ku?» Ngɛlɛ te asɔhɔ neji te: «Mebɔndu myɔbɛ na mbemba bya mbɛ byo obeka na mentende byebeta bya Zambe aji mwaji yebijɛ ɔbɛ. 5Lomaka bato osatɛ bya Zafe iyaka na moto wa jinɔ te Simɔ wa kombo eji te Pyɛli. 6Aja bya elongwe ya iwate moto wa jinɔ te Simɔ, ango aji na ehaji ya iyebɛcɛ bemba na bebanda bya basito, wa elongwe yaje opopoko ya Zowa ya macemba.» 7Usya ngɛlɛ asɔhɔso na neji alwasa, kɔnɛli te abanga mejasi myeji myemba na hɔlɛ mɔkɔ mwa jazakasa bya ango aji na asiswaka Zambe. 8Ya ango alazɛ bango emba ya muyekana, ya ango aloma bango bya Zope.
Dzɔtɔ ja Pyɛli
9Asana, usya bango bajongakasa na ihinyanaka o kuna Etafɛlɛ, Pyɛli abeta ukwa mwaza mwajasa na epesa, usya buya bwa pwasa zumba, ibɔndɔkɔ. 10Ya za yabanda ango ahakakasa ijaka. Usya bayambakasa ango maja, ya ango akata tengeke. 11Ayɛnɛ iko ja jibwana na emba ya nda ebungu ya inɛnɛ bakota ya ango maluma mananyi ya hula ukwa hehe. 12Bya katɔ yajasa na basito bamako ma nanyi na besitoto bya hehe, na bonyɔji. 13Ya ekɔlu ya sɔhɔ na neji te: «Pyɛli, yemwaka, bomaka ete oja.» 14Ya Pyɛli ahungwɛ neji te: «Hamama, Ku! Mataja emba ya eciya, na ya bobe na ka!». 15Nde ekɔlu yahuwana bosɔhɔkɔ na neji ekusi ya mba te: «Emba ya Zambe amukungwa, ɔbɛ teka nyɛnyi tanda te yajɛ eciya!». 16Emba yɛ ya bekubwɛsɛ nɛ bekusi bye hanto, ibujɛkɔ, emba yɛ yahuwana bya iko.
17Usɛ Pyɛli ajakasa o botemangaka sina ya yɛni ya ango ayɛnɛsɛ. O elɔmɔ yɛ, bato ba kɔnɛli alomasa, bajasa o bohakaka Elongwɛ ya Simɔ. Ya bango bapunda oboho bwa itulu. 18Ya bango babanga na ihimwaka te: «Simɔ wa kombo te Pyɛli aja usatɛ?». 19Pyɛli anɛcɛ atemanga sina ya yɛni ya Ekokoyi ya sɔhɔ na neji te: «Ya ngutɛ na Bandomana bahanto bahaka ɔbɛ. 20Hulaka, lwaka bina bango teka cɛcɛ, imɛ mamuloma bango.» 21Ya Pyɛli ahula na isɔhɔkɔ na bato bɛ te: «taka mɛ, wa bya haka. Ya byamuya ibekaka biyetɛ bende?.» 22Ya bango bahungwɛ neji te: «Kɔnɛli wa nɛni mwa bahɔlɛ sini, aje moto wa hongololo, asiswa Zambe wa ba-Zufi bahajɛ ba atanda ntandu mwa mbɛ ukwa eji. Ngɛlɛ wa Pu Zambe awɛ ango masicɛ te abangace ɔbɛ bya mboka eji iyokaka embe ya otandaka ango.» 23Ya Pyɛli akwa bato bɛ, bahanto bya elongwɛ eji inangaka.
Na kwaji, ya ango ayemwa ilwaka bango na bango. Na bana nyangwɛ ba Zope balwasa ihucɛcɛ ango. 24Yana ya bango bapunda bya Sezale. Kɔnɛli abokakasa bango ajasa bango na buka bweji bya itona jeji na bana nyangwɛ beji ba mombo bango bangwa bangasa. 25Usya Pyɛli ayongasa kweya, kɔnɛli aya itakaka na neji, ya ango ahuma mabɔngɔ boho bweji na isosaka ango na mabiya. 26Nde Pyɛli te ayemwɛ ango na isɔhɔkɔ te: «Yemwaka, na namɛ majetɛ moto nda ɔbɛ.» 27Usya, bango na Kɔneli bajɔngakasa bajɔngasɔhɔ ya bango bakweya o elongwɛ na ikumɛcɛ bato buce besɔnɔ. 28Ya ango asɔhɔ na bango te: «Byangwa yeba te yaje eciya na Zufi ijongaka na mencɛyi na ikweyaka o belongwɛ byango. Nde Zambe ehɛlɛ mɛ te teka mici sɔhɔ na moto nde moto te oje bobe ice na mesɛmbɛ. 29Na bosina mɛnɛ bwamamuya teka cɛcɛ usya byamu loma bato ibangakamɛ. Mahaka iyebaka sina ya byamu bango mɛ». 30Ya Kɔnɛli ahungwɛ na eji te: «Yebeka na myan mahanto, olɔmɔ mɛnɛ eko, usya buya bwa banda belɔmɔ bye hanto bikɔ, majasa o bobɔndɔkɔ o elongwɛ amɛ. Ibujɛkɔ moto apwa oboho bwamɛ tɛtɛ na mekanda mya ngɛyi-ngɛyi. 31Ya ango asɔhɔ na namɛ te: “Kɔnɛli, Zambe eyoka mebɔndu myɔbɛ. Mwata yebijɛ nyamo mwonyamwa mɛntende. 32Lomaka moto bya Zope ilwaka ikwaka Simɔ, wa kombo te Pyɛli. Aje bya elongwɛ ya Simɔ ijazi mwa lata bemba na bembanda bya basito, ya kuna zowa ya macemba.” 33Ya ango ya maloma bato byoji, o beka obweji iyaka. Mini bahajɛ bajetɛ osatɛ o boho bwa Zambe, iyokaka mambo mahajɛ ma Ku amuloma ɔbɛ itandaka bɛhɛ.»
Iyɔkɔ ja Pyɛli
34Ya Pyɛli akwa iyɔkɔ na isɔhɔkɔ te: «Mombo, meyeba mombo te Zambe mwa kame moto nde moto, 35Nde o myɔngɔ mitɛ myahajɛ, moto asiswa Zambe ete abeka emba ya hongololo, ango aji mbɛ o boho bweji. 36Alomasa itundu jeji bya buka bwa izahɛli itandaka itundu ja mbɛ ja Itabu okɔngɔ mwa Zɛzi kilisite aji Ku wa moto wahajɛ. 37Bihi bangwa yeba emba yamuyekana bya Zude wahajɛ, ya tasɛsɛ boho bya Ngalili, osondi ya Za atandakasa jambo ja ilubaka bato o nso. 38Bya ngwayeba nda Zambe alozɛsɛ Zɛzi wa Nazalɛti na Ekokoyi ya Pu na tuma, wa masi mahajɛ mangwa yekanakasa, na ibekaka bamba bya mbɛ na iyojɛcɛ bato bahajɛ ba jabulu apojɛsɛ, bosina te Zambe ajasa neji. 39Bɛhɛ bakɔbɛsɛ okate, na iyɛnɛcɛ bemba byahajɛ bya ango abekasa mɔngɔ mwa ba-Zufi na bya Zɛluzalɛmi. Bamuboma ango usya badɔmɛsɛ ango o kuluwa. 40Nde buya bwahanto Zambe ayomwɛ ango omalonga. Ya Zambe abeka te bayɛnɛcɛ ango, 41Habe na lupu ja ahajɛ, ka na bakɔbɛ ba Zambe abɔnɔsɔ, na bɛhɛ bajasa na iwanka neji usya ya ango lumyasa na malonga. 42Ango amuloma bɛhɛ ilwaka itandaka itundu ja mbɛ na lupu ihɛlɛcɛ te ango wa Zambe amubɔnɔ ipabaka bawewe na bataka wa. 43Mentɔci myahajɛ myasɔsɔ ukwe eji te: moto nde moto aji na ibukwɛ na neji beyɛnɛcɛ cɛyi ya mesɛmbɛ myeji.»
Ekokoyi yahula ukwa baji teka ja ba-Zufi
44Pyɛli anyɛci obosɔhɔkɔ Ekokoyi yahula ukwa bango bahajɛ bayokokasa iyɔkɔ. 45Okate buka bwa babukwɛ baji ba-Zufi bayasa bango na Pyɛli bayɛnɛ bohihi na janga mwa baji teka ja ba-Zufi ba Ekokoyi pu yahulasa ukwa baji tekaja ba-Zufi. 46Bosina te bayokakasa bango isɔhɔkɔ imate malɔngɔ na isomɛcɛ Zambe. Okate ya Pyɛli ahuwana basɔhɔko te: 47«Mini, banyɛni bena bato batɛ ilubaka bango o nso ba Ekokoyi ya Pu yamuhula ukwa ango nda mini?» 48Ya Pyɛli asɔhɔ te lubaka bango o nso na jinɔ ja Zɛzi kilisite. Ya bango bahimwa ango ibekaka myan bango na ango.
Currently Selected:
Bemba 10: KOQ
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
