Bemba 11
11
Pyɛli oboho bwa buka bwa babukwɛ ba Zɛluzalɛmi
1Batɔtu na bana nyangwɛ bajasa bya Zude bayoka te na bato baji teka ja ba-Zufi behimɛ iyɔkɔ ja Zambe. 2Usya Pyɛli ahuwana bya Zɛluzalɛmi, bayokwɛ Baba-Zufi bawɛ masicɛ na neji 3Na isɔhɔkɔ te: «O kweya bya matona ma bato bateka pumba saci ijaka maja bihi na bango!».
4Ya Pyɛli ahula itandaka bango bemba bya yekanasa bya hajɛ. Ya ango asɔhɔ na bango te: 5«Majasa bya etafɛlɛ ya Zope usya majasa ibɔndɔkɔ, ibujɛkɔ makata tengeke ya mayɛnɛ yɛni. Ya mayɛnɛ emba ya yenga bya iko nda ebungu bakota yango maluma ma nanyi ya hula na iko yaya o kuna amɛ. 6Ya masɔzɛsɛ obwɛji, emba yɛ bya katɔ ya mayɛnɛ basito bamako ma nanyi, basito ba bwa, besitoto na bonyɔji. 7Okate ya mayoka ekɔlu ya asɔhɔ na namɛ te: “Pyɛli, yemwaka, bomaka ete oja!” 8Nde ya mahungwɛ te: “Hamama, Ku amɛ! Matajanaka emba ya bobe, ya eciya yakusi kweya o hoko mwamɛ!” 9Ya ekɔlu yahuwana bopwaka ekusi ya mba bya iko na isɔhɔkɔ te: “Emba ya Zambe amukungwa, ɔbɛ teka nyɛnyi tanda te yajɛ eciya.” 10Ya yekanasa nɛ bekusi behanto, o nyate mɛnɛ ya ahuwana bya iko. 11Ibujɛkɔ, bato bahanto baya bya elongwɛ ya bɛhɛ bajasa babalomasa imɛ bya Sezali. 12Ya Ekokoyi ya sɔhɔ na namɛ te lwaka bina bango teka cɛcɛ. Bana nyangwɛ bamɛ ntoba batɛ bamuhucɛ mɛ bya Sazale, ya bɛhɛ bakweya o Elongwɛ ya Kɔnɛli. 13Moto wɛ te ahula obotandaka bɛhɛ nda ngɛlɛ apwasa neji o Elongwɛ na isɔhɔkɔ neji te: “Lomaka moto bya etafɛlɛ ya Zafe ikwaka Simɔ wa kombo te Pyɛli, 14ango etandaka ɔbɛ iyɔkɔ ja oyongaka na ja ango, ɔbɛ na buka bwɔbɛ bwahaje.” 15Nde usya majasa obosɔhɔkɔ, Ekokoyi ya Pu yahula ukwa bango bahajɛ nda o itasɛ. 16Okate ya mayebwa iyɔkɔ ja Ku ja ango asɔhɔsɔ te: “Za aluba bihi o nso, nde belubaka bihi o Ekokoyi ya Pu.” 17Ice Zambe ewɛ na bango, etɛ ya ango awɛsɛ na mini usya mina abukwɛsɛ Ku Zɛzi-Kilisitɛ, imɛ za ecɛcɛcɛ Zambe?» 18Usya ango ahijɛsɛ iyokaka nɛ, ya bango bakanga na ikumɛcɛ Zambe, na isɔhɔkɔ te: «Zambe ebeka mombo te bato ba teka ja ba-Zufi bahongɛcɛ bejɛmi bya ango na bango bajace na o ndonga ya mombo!».
Buka bwa babukwe ba Atyɔsi
19Bahangasa usya bandejɛsɛ bongo onyate ya ilɛlɛ ja Etyɛni bayekana o njenja mɔngɔ ya Finisi, o ndobe ya Sipili na o etafɛlɛ ya Atyɔsi, nde bitandakasa minɛ iyɔkɔ na ibate bato ka na ba-Zufi okayi. 20Opanga ango yajasa na bato ba beposi bya Sipili na Silɛni bayasa, bya Atyɔsi, basɔhɔkɔsɔ na bato baji taka ja ba-Zufi na itandaka bango itundu ja mbɛ ja Ku Zɛzi. 21Okate obɔ wa Ku bwajasa na bango, bosina mɛnɛ bwa bato buce bakala babukwe na ihijɛcɛ Ku. 22Ya Buka bwa Babukwɛ bwa Zɛluzalɛmi bayoka ntandu mwɛ, ya bango baloma Banabasi, bya etafɛlɛ ya Atyɔsi. 23Usya ango apundasa, ayɛnɛ bondonga bwa Zambe, ango te aceba, ya ango aloma bango ijaka kanganga na Ku na melema mya ango myahajɛ. 24Bosina te ajasa Moto wa mbɛ, ajasa humɔn na Ekokoyi na ibukwɛ ja inɛnɛ. Bato buce bahimɛ Ku.
25Ya Balabasi alwa ikwaka Sɔli bya Tasi. 26Usya bango bakumɛsɛ ango, ya bango balwa na neji bya etafɛlɛ ya Atyɔsi. Bahajɛ babekasa na nkola mwatula oyumbu ya buka bwa babukwe ihɛlɛcɛ lupu maheya. Yajasa bya Atyɔsi ya, ekusi ya boho-boho, ya babangasa bayokwɛ te bakelete.
Nyamo mwa Babukwɛ ba Zude
27Osondi mɛnɛ yɛ Mentɔci mya manya bya Zɛluzalɛmi ilwaka bya Atyɔsi. 28Iwate opango bango, wa jinɔ te, Angabisi ya ango ayemwa na pizo ya Ekokoyi na isɔhɔkɔ te mokuku mwa za mwetuwa o mɔngɔ mwahajɛ. Za yɛ yatuwasa, osondi ya Kolodi ajasa nkani. 29Ya bayokwɛ batemanga te, moto awɛcɛ nyoko mwa ango nyɛni wɛ, ilomaka bana nyangwɛ bamini bwaji bya njenja mɔngɔ ya Zude. 30Babekasa nɛ: ya bango baloma balɔlɔ bɛ na Banabasi, na Sɔli iwɛcɛ na bakombo.
Currently Selected:
Bemba 11: KOQ
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
