Bemba 5
5
1Usɛ, yajasa na ndomana wa jinɔ te Ananyasi, na mwaji Safila, na bango bahomba kuba yango. 2Ayokana bango na mwaji ihɔjɛcɛ iyate ngabo ya balɔlɔ, yango alwa iwɛcɛ iyate ngabo na batɔtu. 3Pyɛli ahimwa Ananyasi te: «Ya satan akweya ɔbɛ o lema, ihɔkɔkɔ Ekokoyi ya Pu na ihɔjɛcɛ iyate ngabo ya balɔlɔ bakuba bende? 4Usi yojasa teka bihi homba kuba yɛ ya ijasa iyɔbɛ? Nde usi yomu homba ya ango balɔlɔ bamuco ja ibɔbɛ? Yomu na pizo ya itemanga emba yanɛ o lema nde? Habe bato bomuhɔkɔ, nde Zambe!» 5Usya Ananyasi ayokasa mayɔkɔ mɛ, ango tatuwa awa. Bayokasa bahajɛ bayɛnɛ ebɛbɛ buce. 6Ba waza bayemwa, ba bungwa ecenje, na ibɛbɛcɛ ya ango na ilwaka ikonaka ya ango.
7Belɔmɔ bya yeka emba nda hanto, onyate mɛnɛ ya mwaji neji akweya, nde muyebasa emba ya yekanakasa. 8Pyɛli ahimwa ango te: «bitanda imɛ, nyoko mwa balɔlɔ mwa byamu homba kuba mutɛ?» Ango te ahimɛ: «nyoko mwɛ.» 9Ya Pyɛli asɔhɔ na neji te: «bya muyokana na inijɛcɛ Ekokoyi ya Ku? Ye baka te: bamulwa ihɔjɛcɛ momi ɔbɛ bajetɛ o itulu, bebɛpɛcɛ na nɔbɛ.» 10Ibujɛkɔ, atuwa o boho obwɛji na iwaka. Bawaza, usya bango bakweya, bakumɛ ango ewa, ya bango babɛpɛ ango na ilwaka ikonaka ango kuna-kuna na momi. 11Buka bwa babukwɛ na bayokasa eyaya yɛ bahajɛ bayɛnɛ ebɛbɛ buce.
Mayambala buce
12Batɔtu ba bekakasa mandembo, na beyaya buce opanga lupu. Minyan mahajɛ bajasa o isi mɛnɛ ɛkɔ, bya epesa ya jinɔ te salemɔn. 13Teka moto anɔnɔkɔsɔ ikweyaka o lupu ja ango. Nde lupu ja himɛkɛsɛ bango buce. 14Nyoko mwa bandomana na bahito mwa bukwɛkɛsɛ ku mwa buwa buce. 15Babɛpɛkɛsɛ bato baponga omejɔnhu, na inajɛcɛ bango obepoba na okwa mako, bosina te usya Pyɛli eyekaka ekokoyi eji ya yapitace moto mɔkɔ opanga ango. 16Lupu ja bato ja yengasa bya manɛ ma mboka ma kunakuna na Zɛluzalɛmi, bayakasa na bato baji na mekuku mya bebe na mempongo, ya bahajɛ bahakubwɛ.
Babanda batɔtu na iyejɛcɛ bango
17Nɛni mwa bawe ba bebuwa na bango na ango bajasa, basadusɛyɛni, mohino mwa banda bango na jambo jɛ ya bango bayemwa 18ya bango banda batɔtu na ihujɛcɛ bango o joko munɛnɛ. 19Nde na epundu ngɛlɛ wa Ku aji bwa matulu ma joko ya ngwa pwɛ bango na isɔhɔkɔ na bango te: 20«Lwakayi, o Elongwɛ ya Zambe, sɔhɔkɔ na lupu mayɔkɔ buce ma ndonga ya ihɛnwu.» 21Usya bango bayokasa nɛ, balwa bya elongwɛ ya Zambe na kwaji ihɛlɛcɛ iyɔkɔ.
Nɛni mwa bawe ba bebuwa na bajasa bango na neji baya. Isɔjɛcɛ yumbu ya inɛnɛ ya ba-Zufi na yumbu ya bakombo bahajɛ ba Izahɛli. Ya baloma ikwaka batɔtu bya joko. 22Usya bakɔle ba joko bayasa, bikumɛsɛ bango o joko. Bahunwana na itandaka te: 23«Bɛhɛ bamukumɛ joko o bweji nci, na bakɔle bamuja o masi mango o boho bwa matulu nde o isi ya bɛhɛ bamu njibwa itulu, bɛhɛ bata kumɛ na Moto bya katɔn.» 24Usya bango bayokasa nɛ, Nɛni mwa bakɔle ba elongwɛ ya Zambe na menɛni mwa bawe ba bebuwa, ba yɛnɛ ngambala na emba ya hulangasa. Ya bango bahimwa emba ya hulangakasa na batɔtu. 25Okate ya Moto aya itandaka bango te: bato ba bya amuhujɛ o joko baje bya elongwɛ ya Zambe, baje o hɛlɛcɛ maheya na lupu!
26Ya nɛni mwa bakɔle na bakɔle balwa ihakaka bango, baya na bango nde ka na mambo, bosina bwa bango ba lɔngosɔ te lupu ja toko hanza bango ma manyan. 27Usya bango bayasa na bango, bya yumbu ya inɛnɛ ya ba-Zufi. Ya nɛni mwa bawe ba bebuwa mwa himwa bango te: 28«Asɔhɔ na bango te bɛhɛ bamu himba bihi te taka mici hɛlɛ maheya na jinɔ jɛ?. Bihi balozɛ Zɛluzalɛmi wahajɛ na maheya ma bihi! Byahakɛ ihacɛcɛ bɛhɛ ibuza ja ilɛlɛ ja moto wɛ!» 29Pyɛli na batɔtu bahungwɛ na bango te: «Lɔngɔkɔ Zambe amɛnɛ habe bato. 30Zambe wa ba hangwɛ ba mini ayomwɛ Zɛzi, wa bihi, bamu mboma na idɔmɛcɛ o kuluwa. 31Zambe abesɛ ango opɛyi obɔ bwa hangwɛ nda nkani na Yonji, bosina te bato ba Izahɛli ba hongɛcɛ bejɛmi na iyɛnɛcɛ cɛyi ya mesɛmbɛ. 32Bɛhɛ, baje bamukɔbɛ o bemba byɛ byahajɛ, na Ekokoyi ya Pu ya Zambe amuwɛ na bato ba siswa ango.»
33Usya, bato ba yumbu ya inɛnɛ ya ba-Zufi bayokasa ma yɔhɔkɔ mɛ ba nganya bahakasa ibomaka bango. 34Nde falizɛ wa jinɔ te ngamayɛli, wa nlɔnji mwa ceko, lupu bahimɛkɛsɛ ango buce, ayemwa o yumbu na ilomaka te bapwɛce bango. 35Yango asɔhɔ te: «bato ba Izahɛli kwaka bocɛngu na emba ya bya haka ibekaka na bato batɛ. 36Elɔmɔ yeyekana, yajasa na moto wa jinɔ te Tedasi. Asɔhɔkɔsɔ te ya jasa na moto ahɛlɛkɛsɛ nyo, wa bato emba nda batɔ sini mwambi (400) bahinjɛ ango. Nde baboma ango, bajasa na neji ba hangana masi mahajɛ na bango ilapaka. 37Onyate ango, Zuda moto wa Ngalile, o sondi ya nlango, abekasa te bato buce ba hijɛkɛsɛ ango: na neji ajasa ewa, bahinjɛkɛsɛ ango te bahangana. 38Osatɛ, ma ngu sɔhɔko na bihi, teka mini temanga bato batɛ, jikaka bango balwace. Ice bemba bya bango batemanga na ibekaka bya yenga na bato byelapaka. 39Nde ice ya yenga bya Zambe aji, bya kusi lapɛ yango jaka na bocɛngu bosina te bya toko ja o ibaji na Zambe.» Bango te bahimɛ iyɔkɔ jeji. 40Ya bango babanga batɔtu, baloma ihazaka bango menkula, ba himba bango isɔhɔkɔ na jinɔ ja Zɛzi kilisite ba yɛjɛ te bango.
41Ya batɔtu bamanya yumbu ya inɛnɛ ya ba-Zufi. Baje na cɛmbo na bosina te Zambe eyɛnɛ te yaje mbɛ te bapazɛcɛ bango na bosina bwa jinɔ ja Zɛzi kilisite. 42Minyan mahajɛ, o Elongwɛ ya Zambe na bya belongwɛ, ba jakasa ihɛlɛcɛ na itandaka itundu ja mbɛ ja Zɛzi kilisite.
Currently Selected:
Bemba 5: KOQ
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
