Marke 2
2
Jesu asalaha balaha obuka
1Ecuhu eke eyira, Jesu oyi na vuriha Kapernahume. Ayuhi ndi nde oli o njo. 2Ŋa baari kuna akuyi, ebiri eki eya onyana se ma onywa a njo kali. Nde atooso bo mbari. 3Baari ayi na nde obuka omo, abalaha ana aki amabira co. 4Ŋa bo aki i buuna oto na nde na e Jesu ni, obila ma lemvuuru, bo anaani okaami a njo tele na Jesu, mo bulu lya bo apiisi okuba obuka okiihi o tolo. 5Jesu omono oyalihi o bo, oduhi na obuka ndi: «Mwana a me ambiini a we amiboloho.» 6Ayisihi ma Esaangumu ake ma aki o nci o ŋaa mawobo nca etima e bo ndi: 7«Balaha ji ewobiho bu ŋa mo oma? Nde atuha Njyami. Abuuna oboloho ambiini na, o ngula Njyami otu?» 8Jesu aki oyaa nca Oduduma a nde maami a bo matsimihi, na bo ndi: «Be bi ecimiŋi ema nca etima e be? 9O syami kali oma: leduha le na obuka mbɨri “Ambiini a we amiboloho”, si kali leduha le mbɨri: “Temeŋe, yaha okuba a we, we olaana”? 10Ee yemihi! Ŋa me esaha be leyaa mbɨri Mwana a mvuuru na onkʉmu ma oboloho ambiini a baari a yula ncye.» Ŋa nde na obuka ndi: 11Me eduha we mbɨri: «Temeŋe yaha okuba a we, we oje njo e we!» 12Balaha jya etemiŋi, eyahi okuba a nde o ŋiŋa, ecuuhi o miisi a baari aso. Bo aso aya o nca lekemi lo mɨni, bo makuusa lekʉma le Njyami maduha ndi: «Bisi lekini omono jaa nkɨma mva ji ni!»
Jesu acwolo Levi nde se aja bɨla asi ma ambiini
13Jesu ovurihi oyeni osyese okeri onini. Lemvuuru leso leyi na e nde, nde se ayisiha bo. 14Nde oyira nde omoni Levi a mwana Alfe o nci o biri ma gʉruha lepo. Jesu na nde ndi: «Lwono me!» Nde otemiŋi, olwoni nde. 15Emana Jesu oyeni na aja biila o njo e Levi. Atoniŋi ma lepo bɨla asi ma ambiini kuna aki o tanda bɨla Jesu na alwoni a nde, obila bo aki na kuna, bo se alwoniŋi nde. 16Ŋa Afarisi ma aki ayisihi me ekele, amono ndi nde aja bɨla asi ma ambiini na atoniŋi ma lepo, bo aduhi na alwoni a nde ndi: «Oma? Nde aja bɨla atoniŋi ma lepo na asi ma ambiini?» 17Jesu oyuhi bo na bo ndi: «Ma ali na kaama mo osalihi abyeri, ŋa ka enganaha ni. Me eka aya na acwolo baari ma cimiha ndi bo ali tele ni, ŋa anga ambiini.»
Jesu awobo ma leka le ongerehe
18Ŋa alwoni a Jan bɨla Afarisi ma aka ongerehe, bo ayi na aduha na Jesu ndi: «Obila eli alwoni a Jan bɨla alwoni ma Afarisi ma aka ongerehe, okoroho alwoni a we i ka ongerehe ni mo oma?» 19Jesu okaali bo ndi: «Be letsimiha mbɨri anjya ma aya o cinda e baala mabuuna oka ongerehe o ntini olumi ali bɨla bo? Ntini olumi ali bɨla bo, bo i buuna oka ongerehe ni. 20Ŋa ecuhu ma eje oya ma aje ocyese olumi o mpaniŋi e bo, ŋa bo ma aje oka ongerehe o cuhu jya.
21Mvuuru i buuna obaama obari o mfa enyarihi bɨla mfa e kala ni. Ma oduma ndi obari omfa enyarihi ojiima mfa e kala, yo eselihi obaha. 22Mvuuru i buuna olehe mali ma anyarihi nca ambasa a kala ni. Ma oduma mali amabula ambasa, leyeli na mali na ambasa. Mali ma anyarihi olehe nca ambasa ma anyarihi!»
Mwana a mvuuru nkʉmu a cuhu mawumaha
23Ŋa cuhu mawumaŋa mo, Jesu aki atina anguunu a ble. O njila alwoni a nde matolo mburu e ble. 24Afarisi aduhi na nde ndi: «Ma keese, alwoni a we ma asa maami ma amalehe ngɨri o cuhu mawumaŋa oma?» 25Jesu okaali na bo ndi: «Be lekini oliira maami a Davide asi o ntini eki nde na kaama bɨla njala nde bɨla abuha a nde ni? 26Osuumbu a nde anyuniŋi nca njo e Njyami o ntini osi avwoŋi onini Abyatare, nde oji mpeembe ma ampi Njyami, eli mvuuru okɨma i buuna oja ni o ngula asi ma avwoŋi. Emana Davide se ompi abuha a bɨla nde.» 27Jesu okaali na bo ndi: «Cuhu mawumaŋa asi o mvuuru, ŋa aka sa mvuuru o cuhu mawuumaha ni. 28Kya obila o Mwana a mvuuru ali nkʉmu a cuhu ma wuumaŋa.»
Currently Selected:
Marke 2: MDT
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
