Marke 3
3
Jesu osalihi mvuuru aki na oleme o kwoho o cuhu ma wuumaŋa
1Emana Jesu ovurihi nca njo mavwonoŋo. O ŋaa eki na balaha mo eki na kwoho emalemehe. 2Bo aki mabemeŋe yuhu Jesu aki asalaha nde o cuhu mawuumaŋa, mo bu ndi bo abanaŋa nde. 3Jesu oduhi na balaha eki na kwoho emalemehe ndi: «Temeŋe! Jyaha o mwa baari.» 4Emana nde opɨsi bo ndi: «Mabuuna osa o cuhu mawuumaŋa oma? Lesa la leve si kali lesa le jaa e mbi? Levusuha le mvuuru o mwo si kali lebuma le nde?» Ŋaa bo aya pi. 5Jesu okeesi bo obye nkala, nde se omoni obi mo osuumbu a bo ma aki na etima onono. Nde na balaha jya ndi: «Laba kwoho.» Nde olabi kwoho, nde se owuumi. 6Afarisi acuuha, akuusihi abuha bɨla baari ma Erode ma omono osuumbu ma obuma Jesu.
Jesu asalaha baari ma osyese a jaanga
7Jesu oyeni bɨla alwoni a nde osyese okeri onini. Lemvuuru le kuna lewi na Ngalili lelwono nde, ŋa asi Jide 8na Jerusaleme na Idume ngula sabi e Jurde ŋa osi o Tiire bɨla Sido. Lemvuuru le kuna leyi na e nde mo osuumbu a bo mayuhi maami a nde asiihi. 9Jesu otumi alwoni a nde ma oyeese mbuungu mo oduma lemvuuru lemajaraha nde. 10Obila nde aki amasalaha baari kuna, o ŋaa, aso ma aki na angaa avi o yula nde ma otiila o nde. 11Ŋa ntini edidima me ebi ma emoniŋi Jesu, baari avi o ncina nyiili e nde ma gʉla ankɨma ndi: «We, we Mwana a Njyami!» 12Ŋa Jesu owobi na bo na nkala eso ndi i duha ndi yu nde ni.
Jesu aswolo antuma a kuumi na vwele
13Emana Jesu okumi yula okuri, nde ocwoli a nde adii, bo se ayi na abasaha nde. 14Nde oswoli kuumi na vwele a nde aluhi ankuumi ma antuma mo oka bɨla nde, na letuma le bo otooso Ncya e Mve, 15nde se ompi bo onkʉmu ma ocuura edidima me ebi. 16Nde oswoli kuumi na vwele: Simo a nde ampi nkuumi e Pyere, 17Jake a mwana Jebede bɨla Jan a mwana nguhu a Jake nde oluhi bo nkuumu e Boanernajese, mo oduha ndi «baana a ngari» ; 18na Andɨre bɨla Filipe na Bartelemi, Matye, na Toma, na Jake a mwana Alife, Tade na Simo o jelote, 19bɨla ŋa Jida osi Iskarote atosihi Jesu.
Jesu bɨla Belejebule
20Jesu oyi njo, lemvuuru levra lekuhi na e nde, nde bɨla alwoni aki aya na mpili oja kali. 21Ŋa nkwono e Jesu eyuha ncya jya, bo ayi na akwara nde, obila bo aduuhi ndi: «Nde oya ocwi kali!»
22Ŋa ayisihi me ekele ma awi Jerusaleme aduuhi ndi: «Belejebule oli o nde!» Na «Onkʉmu o nde acuuriha edidima me ebi bya, oma kaaha onkuumi e nkʉmu edidima me ebi!» 23Ŋaa Jesu ocwoli bo, oduhi bo ma antsintsami ndi: «Sata obuuna ocuura Sata buni? 24Yuhu osi omo otu ejwana bɨla co anku, osi kya i ma buuna oka ni. 25Baari a nkwono mo ntu yuhu majwana o mpaniŋi e bo, onkwono vwa ocalihi. 26Yuhu Sata ajwana bɨla nde anku, yuhu nde se omicalaha, nde i mabuuna oka ni, a nde maami awi.
27Ŋaa mvuuru i buuna onyuniŋa nca njo e balaha eli na mpari nde ojibi nde mvuuha e nde yuhu nde okini osa kura balaha e mpari jya endi ni. O ngula ŋaa, nde aje obuuna ojiba mvuuha e mo njo e nde jya. 28Sisyele me eduha be mbɨri: ma aje oboloho baari ma omwo ambiini a bo bɨla ŋa etuhi e bo matuha Njyami. 29Ŋa mvuuru aje otuha Oduduma Santi, ma aka aje oboloho nde ni: nde oma sa mbiini e mbumbu.»
30Jesu awobihi vwa, obila bo aduuhi ndi: «Nde na odidime ebi o nde!»
Nkwono e Jesu e jaa jaa
31Nguhu a Jesu bɨla baana ma anguhu a nde awasihi. Bo aya o nji, atumi mvuuru na acwolo nde. 32Lemvuuru leki o nci lema ajeneŋe Jesu, aduhi na nde ndi: «Mono nguhu a we bɨla baana ma anguhu a we a ba o nji masaha we.» 33Jesu okaali na bo ndi: «Nguhu a me bɨla baana ma anguhu a me ba na?» 34Nde okeesi baari ma amajeneŋe nde ma aki ma anci, oduhi ndi: «Lemono nguhu a me bɨla baana ma anguhu a me! 35Mo oma, mpɨni mvuuru asa ediiŋi e Njyami, jwa mwana a nguhu a me, jwa nkeri jwa se nguhu a me.»
Currently Selected:
Marke 3: MDT
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
