DZANDZA 1
1
Fudzu ye Umpende ya sunda kule bebingi be Zezu
1Kunwu Tofili, se sanguvu yami ye wika, ma tanda mesi me Zezu ebanda ne upika ne medzi elakise, 2ndzii ne vusa vedzi ebita ikulu. Zezu ne ubanda bita ikulu, ne singa ye Fudzu ye Umpende, wangu akaba bedzi etobo nda betuma bedzi mendondzi. 3Ndili ye Zezu ewaa, yumana yedzi enyuse tima ye batu bewaa, yedzi elaka nyulu bidzuku biyitsi ne betuma bedzi, ati wangu adzi mongo. Se masi meku menanyi, wangu edze si ne ulaka bangu nyulu ne uwowe ne bangu dze Ukani ve Nzambi. 4Vusa votu ndili yedzi edze ne udza bila bane betuma bedzi, Zezu atanda ne bangu ati: «Beyi nde lawe ne Zeluzalemi, ni bukayi ndaka ye Tata Nzambi edzika. Me mene, medze ma tanda beyi miti, 5Zan ni we kaba meteme me mangu, ni beyi se masi mi ya, beyi betse boko meteme me Fudzu ye Umpende.»
Zezu abita ikulu
6Betuma be Zezu bedze buma yotu nedzi, basunwule wangu ati: «Kunwu, ayi ni ndili mene yowe itse yebise ukani ve Izayeli?» 7Zezu akalule ne bangu ati: «Beyi nde dzamvu ne uyiba mendili ne yaka ye mamvu mamu mitse ya. Tata wami ni wiyiba mamvu mamu, wangu mene ni widzi ne singa ye upika mangu. 8Ni beyi betse bomo singa ndili ye Fudzu ye Umpende yi tse sunda kule beyi. Yayu beyi betse dze ni betotsi bami se Zeluzalemi, ne Zudee wesi, ne se Samali, ndzii ne se melongo mesi.» 9Zezu amana wowe vavu, yedzi ebita ikulu, ye bangu besi bedze ne uwaya nda wangu ibita, ye lingutsu le nvungule wangu. 10Ndili ye bangu bedze ne uwaya nda wangu ibita ikulu, palikise batu bole baya kone bangu, baswa mikanda mye fuu, 11ye bangu betanda ne bangu ati: «Batu be Galile, ye beyi biwaya ikulu ni yi? Zezu we me bita ikulu yu, atse ye vutse si nda ye beyi beme yene wangu abita ikulu.»
Matiyasi aboko buma ye Zuda
12Ndili ye Betuma be Zezu beteme kudzi ye kumvu mili mye Olivye, ye bangu bevutse Zeluzalemi. Ngundu nde ulayi ne kudzi, belanda si va metambi. 13Ndili ye bangu bedzanga Zeluzalemi, bangu babita se ndaku ye ndiki banyindzile se liyi ye bangu bikwanye keke ne kala. Batu bedze se ndaku yayu ni Pyeli ne Zan ne Zaaki ne Andele ne Filipi ne Toma ne Batelemi ne Matye ne Zaaki nwana we Alife ne Simon wi tondo dzandza, ne Zuda nwana we Zaaki. 14Bangu besi bedze ne ukukene si buma yotu, ne umbondo mendili mesi. Ne baatu ne Maliya mama we Zezu ne mbadzi be Zezu. 15Vusa votu, batu bemekidze Zezu, bakukene, yedze ne batu mikama meku mole. Pyeli atelime tima ye bana be tata, ne bangu ati: 16«Bana be tata, me Fudzu ye Umpende ye wowe se bisanguvu bye Umpende, se undzumvu nwen Davidi mebiki ya, wangu abanda wowe ne Zuda we laka batu bekwata Zezu peyi. 17Zuda edze ni besu ne bangu buma yotu, nedzi abomo yedzi pesi ye dzandza nda besu. 18Bedolo bedzi ebomo nedzi epika mamvu mebi, asumba kuba ne bangu, yedzi enanwen mulu zundzi, moyi nwa tsumve, mila mya tsalive utsa, utsa. 19Batu be Zeluzalemi besi beyuka vavu, ye bangu beluka kuba yayu kumvu se dzuyi dze bangu ati “Akeledama”. Avavu nati “kuba ye unsu”. 20Batende se sanguvu ye pisome ati:
“Ne ndaku yedzi, yedze ni nde batu,
ne batu nde dze se kati.”
Bavele tende ati:
“Ne mutu moko atse sengwene wangu se dzandza dzedzi.”
21Uve tima ye batu bedze ne usukudze besu mendili mesi, me Kunwu Zezu edze ne ulanda kone besu, 22ne ubanda meteme me Zambatisi ndzii ne vusa ve betemise wangu tima ye besu, wangu ayikwe totsi nda besu ne utandaka boko binyusili bye Zezu tima ye bewaa.» 23Ye belaka batu bole. Zozefi we kumvu Balsabasi, adzi ne va kumvu mboko ye Zutusi ne Matiyasi. 24Ye batu bemekidze Zezu bembondo ati: «Kunwu we wi yiba milima mye batu besi, laka besu tima ye batu be bole ba, wowe itobo. 25Yayu wangu ayikwe tuma we Zezu, asengwene Zuda, wangu apika dzandza dzowe. Ni Zuda wangu atse buma yedzi etondo.» 26Yumana, ye bete ndamvu ne uyiba we Kunwu itobele. Matiyasi ni we betobo, yedzi ekobise betuma be Zezu iku ne motu.
Currently Selected:
DZANDZA 1: WUM
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
