DZANDZA Mebandu
Mebandu
Sanguvu ye medzandza me Betuma be Zezu ye unyole ye Luke etende. Se sanguvu ye wika, Luke awowe nda bedziya Zezu, nda wangu elanda se sendze ne nda wangu ewaa, nda wangu enyuse ne nda wangu elaka nyulu ne bebingi bedzi, ne nda wangu eteme kone bangu abita ikulu. Ni se sanguvu ye medzandza me betuma ye laka nda unkuka nwen Zezu nwen banda, ne nda Fudzu ye Umpende ye lundise bebingi be Zezu ya yamene bangu ne upika mamvu meneni.
Se sanguvu yayu, besu bayene nda mikuka mye wika mye banda tima ye batu be bezwife se Zeluzalemi. Bekobise batu be wika babu se bingundu bye Antyose Kolinte ne ye Filipi. Bewanga unkuka nwen Zezu nwanwu ni betuma be Zezu yedze ne Pyeli. Poli se atandaka misisili mive se bingundu biyitsi, awanga ne mikuka mye Zezu miyitsi. Batu be mikuka mye Zezu mye Poli ewanga beyene membaba meyitsi, ni Fudzu ye Umpende ya yamene bangu ne ubomo singa.
Luke we tende sanguvu yi edze ne utse se midzunga myoko bane Poli. Yene utsina ve beyi bitse yene betanda ati besu se sanguvu yedzi.
Sanguvu yi, bakabene yangu biliyi bisatu:
– Mebandu me unkuka nwen Zezu se Zeluzalemi, ni ndili ye Zezu ebita ikulu (1.1 – 8.3),
– Bitandili bye misisili mive se ilongo dzesi (8.4 – 12.25),
– Ne se melongo midzi kone nzali ye metsimba ye kumvu Meditelane ndzii se kwele ye kani we uneni we Lome idze (13.1 – 28.31).
Betuma be Zezu batanda se bibuma byesi ne se sendze yesi misisili mive mye Zezu Klisti. Bangu bawowe kule Zezu bedzi bezwife, ne bidzi kaka bezwife. Me Zezu idzi, medzi etanda ne medzi epika, medzi ni me Fudzu ifumba ne ulaka bebingi bedzi.
Manvu me betanda se sanguvu ye medzandza me betuma be Zezu, ye laka me unkuka nwen Zezu se mendili mesi dzandza dze bangu bipika. Dzandza dzadzu, ni utandaka misisili mive mye Zezu Klis tine batu besi ndzii kwele ye sendze yi sele.
Currently Selected:
DZANDZA Mebandu: WUM
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES