Luk 24

Zezu anyuse se liku

1Vusa ve tsupulu ne suka kwen, baatu batse mesongo. Babapa madzi ne miyombo mye bangu beyebise. 2Bangu bayene imanya dze bedziba dzasa dze mesongo, dzaya kwele mbotu. 3Ye bangu benyidzile, bangu beke yene tsindzi ye Kunwu Zezu. 4Bangu nde yiba nda bangu bitsimene, palikise mebaka mole maya ne mengoyi mengeyingeyi busu ve bangu. 5Baatu bayene bongo, bawaya sina, mebaka mamu ne bangu ati: «Ye beyi bifumba tima ye bewaa, widzi mongo niyi? 6Wangu nde wiya, wangu anyuse se liku. Yivilayi medzi edze ne utanda beyi asaka Galile. 7Wangu etanda beyi ati: ''Uve basumbise we yikwene Mutu se meboko me batu bidzi ne mamvu mebi. Betse komidze wangu se koko ye beliningise, wangu atse nyuse vusa ve unsatu.''» 8Ye bangu beyivile me Zezu ewowe. 9Bangu bateme mesongo, batse ne utanda mesi me bangu beyene ne bebingi bedzi iku ne motu, ne, ne batu boko. 10Baatu babu, bedze ni Maliya we Mangidala, Zani, ne Maliya mama we Zaaki. Ne Batu boko bedze ne bangu, ne bangu betanda si dza nvu mene dzotu ne betuma be Zezu. 11Ni betuma be Zezu, beyiba nati baatu betanda ma nvu me nwangu, bangu basuna me baatu betanda. 12Ye Pyeli etelime, atse ne mbangu mesongo, yedzi edondime, asubidze mesongo, ayene si mikanda ne mikodzi mye bekuta tsindzi. Yedzi evutse sombo yedzi, akima ne medzi eyene.

Se peyi ye Emayusi

13Vusa mene votu, bebingi be Zezu bole bedze netse se mbuka ye kumvu Emayusi, ne unangwe Zeluzalemi ndzii Emayusi yedzi ne va metambi. 14Bangu bedze ne wowe ne mesi mesuta. 15Ye bangu bedze ne tanda biku nvu, Zezu akobise bangu, ye bangu besi belanda unsamba. 16Bebingi be Zezu beyene wangu, ni bangu beke yimba Zezu. 17Zezu asunwule bangu ati: «Me beyi bilanda, beyi bewowe ni meza? Ye bangu besita, badze zunzunlu.» 18Motu tima ye bangu we kumvu klwopase, akalule nedzi ati: «Weni mutu widzi se Zeluzalemi, we nde yiba me mesuta masi ma?» 19Wangu ne bangu ati: «Yangu niyi?» Bangu bakalule nedzi ati: «Mamvu me mekwa ne Zezu we Nazaleti. Wangu edze ni Mutu we Nzambi we singa, wangu alaka se bipikili byedzi ne biwowili byedzi, busu ve Nzambi ne ve batu. 20bekabi be bisemi bye Nzambi, ne bekunwu be besu, bangu bakwata wangu, basomo wangu ungenenge nwen liku, ye bangu bekomidze wangu se koko ye beliningise. 21Besu bedze ne yiba nati wangu atse lungise Izayeli. Ni, masi mole masuta adzi ni dze unsatu dze mamvu mamu me mekwa. 22Besu bakima ne va batu beyi nvu ye besu, bemetse mesongo ne suka kwen. 23Ni bangu beke yene tsindzi ye Zezu.» Ye bangu bemeya tanda ne besu ati betuma be Nzambi balaka bangu nyulu. Ye bangu beme tanda ati: «Zezu adzi mongo.» 24Va batu beyi nvu ye besu batse mesongo, ne bangu bayene si nda baatu betanda. Ni bangu bake yene Zezu. 25Ye Zezu etanda ne bangu ati: «Beyi bende ukilu ba, milima mye beyi myedzi ne udilu ne umekidze me Batu be Nzambi betanda. 26Tadzi we Nzambi etobo ake biki yene membaba mamu! Yayu Nzambi akaba wangu ukani vedzi?» 27Yedzi etanda bangu me Sanguvu ye Umpende ye tanda se nyulu yedzi. Wangu abanda ne Sanguvu ye Moyize, yedzi eyamba ne bisanguvu byesi bye Batu be Nzambi. 28Ndili ye bangu bekalwe kone mbuka ye bebingi bedzi bedze netse, Zezu apika nda mutu witse ulayi. 29Ni bangu bole bakomo wangu ati: «Dze kone besu, ya ya ni ikolo, ne vusa vakitse yinda.» Ye Zezu enyidzile se ndaku ne udze kone bangu. 30Zezu asunda untsitsi kone bangu, aboko lipembe yedzi evutise Nzambi live, yedzi etsitaka lipembe ne ukaba bangu. 31Pakilise, ye misa me bangu medzive, ye bangu beyimba Zezu. Ne ndili mene mbotu Zezu anyongo busu ve bangu. 32Bangu bawowe tima ye bangu, ye medze ni nda nwunyan se milima mye benu, ndili yedzi medze ne wowe ne benu se peyi, ne yebise tandaka benu mepiti me Sangunvu ye Umpende. 33Bangu batelime bavutse Zeluzalemi. Bangu bakalwe se ngundu, bakobise betuma be Zezu iku ne motu ne batu boko bakukene. 34Bangu besi batanda ne bebingi be Zezu bole ati: «Yedzi ni umbu Kunwu anyuse se liku, Simon ayene wangu.» 35Bebingi bedzi bole batanda bangu ma nvu mesuta se peyi, ye bangu betanda ati: «Besu beme yimba Zezu ndili yedzi me kabaka besu lipembe.»

Zezu alaka nyulu ne bebingi bedzi

36Ye bangu bedze ne uwowe vavu, Zezu wangu mene aya tima ye bangu, ne bangu ati: «Itavu dzedze ne beyi.» 37Bebingi bapalive, bayene bongo amene, ni bangu beyiba nati bangu bayene unkuku. 38Ni Zezu atanda ne bangu ati: «Ye beyi biyene bongo niyi? Ye beyi bidzi ne mesuna se milima mye beyi niyi? 39Wayayi meboko mami ne mekulu mami, yedzi ni memene, betimayi nami, wayayi me, ni unkuku nde misunya nde biyisi, nda me, nda beyi biyene.» 40Wangu amana tanda vavu, alaka bangu meboko ne mekulu medzi. 41Bebingi be Zezu bedzi se itsisa dzineni ne bangu beyene Zezu, bangu beke yiba ati, Zezu atuka vele dze mongo busu ve bangu. Ye Zezu esunwule bangu ati: «Beyi bedzi ne yila ye udza?» 42Bangu bakaba wangu liyi ye swi ye kangikangi. 43Zezu aboko liyi ye swi adza busu ve bangu. Yedzi etanda ne bangu ati: 44«Yene mami etanda beyi, ndili yami edze kone ne beyi, mesi me betende nami se tsila ye Moyizi, se bisanguvu bye Batu be Nzambi ne se me Pisome, mesi mamu umve ma ya.» 45Ye Zezu ekaba bangu utsengu, ve uyiba mepiti me se sanguvu ye Umpende. 46Zezu ne bangu ati: «Yene me batende se Sanguvu ye Umpende, Klisti we Nzambi etobo atse yene membaba. Vusa ve unsatu wangu atse nyuse se liku.» 47Ne kumvu yedzi, yene me bitse tanda ne batu besi, ne ubanda Zeluzalemi, betse tanda ne batu ati: «Dzikayi mesumu, ya Nzambi aboloko beyi. 48Beyi ni betotsi beyene mamvu mamu mesi. 49Yayu me, metse luma beyi we Tata wami edzika ndaka, ni mve beyi badze se ngundu ndzii ne ndili ye singa ye ikulu yisunda kule beyi.»

Zezu atse ikulu

50Ye Zezu ebapa bebingi bedzi bakaka ne mbuka ye Betani, yedzi etumbidze meboko, akaba bangu meve. 51Ndili ye Zezu edze ne kakise bangu, wangu adzika bangu, atse ikulu. 52Ndili mene yayu bebingi bedzi bavina mebongo, babondo wangu, ye bangu bevutse Zeluzalemi ne itsisa dzesi. 53Masi mesi bangu bedze si ne uyakwe mimvu se ndaku ye Nzambi,

Currently Selected:

Luk 24: WUM

Highlight

Copy