ลก 11

ลอง เฌา เยซู มาโนว ปี ดี ปาย ดี ซาคึร ดี เฌาพรา

1อู ซีแง, เฌา เยซู กอย ซาคึร อู โปละ. วาย แฮะ ฮอต อัน ซาคึร, ดีแบ อัน อู วี ต็อห, “อึย แม เฌา, หมาณ แม มาโนว บอ เย, แตห เย นับ เหมา ดี ปาย ดี ซาคึร, แตห อึณ ปี ดา ซารา อายอฮาน แฮะ มาโนว ดีแบ อัน.”

2ปัน ตี เฌา เยซู ต็อห ดี เฆ, “ดอ ซาคึร เบ, เบ โลว ต็อห,

‘อึย ฆูณ เย อี กอย ฆางหราว, แตห เย ดูอี มึห น็อห อี โรวเซ รีมาด แม เฌา. อาคราว ดี อึบ แม ดูอี แดง กาดาย, แตห แม แตห อึณ ตัห, แตห อึณ ฌัม.

3ดอน ซีแง ดอน ซีแง แตห แม เฌา ดัว ปี ดี โฮม ดี เย.

4แตห แม เฌา บลัวะ แวน หมาบ แปะ แฮะ โบง เย, แตห อึณ ปี, บอ เย บลัวะ แวน หมาบ แปะ แฮะ โบง กาลึบ ดูอี เฮา ดี เย. เย บอ หมาณ ดี แม เฌา, แกวะ แตห เย โดบ ดูอี อี กาซูห เย โบง หมาบ. แตห เย ลอด นา ตู หมึอม.’#11:4 บับ ดอ โฆว มัง โมยว อาว บาะ “แตห เย ลอด นา ตู หมึอม”

เบ โลว ซาคึร ปาย ตี.”

5ปัน ตี เฌา เยซู วี ต็อห ดี ดีแบ อัน, “เซ อึณ บอ มึห ดูอี อู วี กาแต เบ, เซ ฆึก อัน แฮะ ตัห โดง กอย อัน แคง หมึร, อัน ดี บอ วี ฮาว ดี กาง ฆึก อัน ปอ วี, หมาณ ดี อัน ต็อห, ‘อึย ฆึก, โอว หมาณ ดี การ็อห คามูน แม โอย โบ็ง. 6ฆึก โอว อู วี แฮะ ตัห ฌัม โดง กอย โอว ดอ ตี นี. โอว ยี ตู มึห ดี เฮียง อัน โฮม มาเซ.’

7เซ อัน แฮะ ฮอต หมาณ ปาย ตี, ฆึก อัน อี กอย แคง กาง ตึอน, อัน ดี บอ ต็อห, ‘แกวะ ดีแล โอว. โอว แฮะ ซ็อง รีด มาโลห กาง โอว. บอ โอว บอ ฆอน โอว, เย แฮะ ฮอต ลึบ อีด. อาว ฮู ปึอน ยีต ดัว มาเซ ดี แม.’ 8ฆึก อัน ตึอน ต็อห ปาย ตี. โอว ยี ต็อห ดี เบ, เซ ฆึก อัน อี กอย แคง กาง ตู ยีต ดัว ดี อัน โกบ มูห ฆาย อู ฆึก, อัน ดี บอ ดัว โกบ หมาณ ตู จู ตู พลา อัน. ฆึก ตี ดี บอ ยีต ดึห ดัว ดี อัน แคะ ปี ซี ปึอน อัน. 9โอว ต็อห ดี เบ, เซ เบ หมาณ, เบ ดี ปึอน. เซ เบ เหรต, เบ ดี ยึร. เซ เบ ดอย มาโลห, เบ ดี ปึอน ดี ลึบ. 10โคว, ดอน อี อี หมาณ, อัน ดี ปึอน. ดอน อี อี เหรต, อัน ดี ยึร ปี เหรต อัน. บอ ดอน อี อี ดอย มาโลห, อัน ดี ปึอน ดี ลึบ แคง มาโลห ตี.

11เซ อึณ มูห ฆูณ อี กอย กาแต เบ, เซ ฆอน อัน หมาณ มาฆา ดี อัน, อึณ ตู มึห ฆูณ วี เหมา อี วี ดัว มาฮัณ ดี ฆอน อัน. 12เซ ฆอน อัน หมาณ ปึอน เอียน ดี อัน, อัน ตู วี ดัว มา แมงเงา ดี ฆอน อัน. 13อึณ บอ ปาย ตี. เบ อี มูห ดูอี มืก ยี นับ ดี ดัว นา หมึอม ดี ฆอน เบ. ปาย ตี ฆูณ เบ, อี กอย ฆางหราว, อัน นับ ดี ดัว อี หมึอม หลึอม ตี. อัน ดี ดัว น็อห พึอม เฌาพรา ดี ดอน อี อี หมาณ ดี อัน.”

ลอง ปวน เฌา เยซู ฆาย ปวน โบว กานัม

14ดอ อัน ตี อึณ บอ มึห ดูอี อู วี. กานัม อี ตู นับ ดี กาลาง โฆรห แฮะ ลึบ กอย แคง โดว โบ็ง อัน. เฌา เยซู ซูต กานัม ตี เลห แคง โดว โบ็ง ดูอี ตี. ดอ แฮะ ฮอต เลห กานัม ตี, ดูอี ตี วี ปึอน กาลาง โฆรห อู เฌณ. เฆ ดูอี กืน มืร อาม ลอง อัน ตี. 15ดูอี มัง อี, เฆ ยี ต็อห ลอง เฌา เยซู, “ดูอี ตี, อัน ดึห ปวน โบว กานัม อี จืร เบเซบู,#11:15 เบเซบู บอ โบว กานัม อี จืร ซาตาน แฮะ มูห อู โมยว. แตห อัน ซูต กานัม เลห แคง โดว โบ็ง ดูอี.” 16เฆ ดูอี มัง อี, เฆ ยี ซี เทว เฌา เยซู. เฆ บอ หมาณ, แตห อัน บยัะ นา หมึอม อาม กาเซา ดี เฆ, แตห เฆ กอ นับ ซีคยา, อึณ มูห เฌาพรา, อี ตึย อัน ตัห โลง แดง กาดาย.

17เฌา เยซู ยี นับ ปี เฌณฌา เฆ. อัน วี ต็อห ดี เฆ, “เซ อึณ มึห มืง อู มืง, เซ ดูอี อี กอย แคง มืง ตี ลาย กาย็อห ลาย กาโฆห, มืง ตี, อึณ ดี ลึร, อาว ปึอน กอย. อึณโฮม ดูอี มืร ปาย ตี. เซ เฆ อู อึณโฮม ลาย กาย็อห, อึณ บอ ลึร โตต. 18เซ โบว กานัม อี จืร ซาตาน วี ลาย กาลูต ดี เฆ กานัม แคง พึง อัน, มืง ปี อึบ อัน อาว ปึอน กอย. อึณ บอ ปาย ตี, เซ เบ ต็อห, โอว ดึห ปวน กานัม เบเซบู ตึอน, ซูต กานัม เลห แคง โดว โบ็ง ดูอี. 19เซ แฮะ หมาน ปี ต็อห เบ ตี, อึณ ยี มูห บอ เฆ ดูอี อาโมยว เบ, บอ เฆ ซูต กานัม เลห แคง โดว โบ็ง อี เฮา. บอ เฆ ดึห ปวน ฌึร ตี. อึณ ยี มูห เฆ ดูอี อาโมยว เบ ตี, เฆ ดี วี ซูงพยาด ลอง โฆรห เบ, ต็อห อึณ ตู หมาน. 20เซ อึณ ยี มูห น็อห พึอม เฌาพรา อี แตห โอว ซูต เลห กานัม แคง โดว โบ็ง อี, อึณ แฮะ ลึห ซีคยา ลอง มืง ปี อึบ เฌาพรา. อัน แฮะ ฮอต ตัห โดง กอย เบ, แตห อัน เฌา อึบ โตต ดอน โมยว แดง กาดาย นี.

21เซ อึณ มึห ดา อี มึห โปลม มึห แฮณ, ชึบ ครึง กาโฆห, บัร กาง อัน, อึณ ตู มึห อาเซ อี ยัะ ลึบ ปรา โกรวกราม อัน. 22เซ อึณ ยี มึห ดูอี อี มึห โปลม มึห แฮณ หลึอม ดา อี ตึอน, เซ อัน ตัห กาโฆห แป, อัน ดี ปึอน ดี ดึห โตต ครึง กาโฆห โดง น็อห ตาง ดูอี ตึอน. แฮะ ฮอต, อัน ดี ปึอน ดี ดึห โตต โกรว ดูอี ตี, วี กาซาง ดัว บอ ดี ฆึก อัน.

23อาเซ ตู โพรม โอว, อัน แบน รันซู โอว. อาเซ ตู แดะ กาฌูะ ดูอี รึม โดบ โอว, อึณ ปี อัน โบง แตห เฆ กาย็อห ดี โอว.

24เซ อึณ มูห กานัม อี แฮะ เลห แคง โดว โบ็ง ดูอี, อัน วี ฮาว วีน ดี แล แคง โดง กาฮ็อห, เหรต โดง ดี ปึอน กอย อัน, ยี ตู ยึร มาเซ. ดอ อัน ตี อัน ดี ต็อห แคง น็อห อัน, ‘โอว ดี วี เวณ ลึบ โดง กอย บรีม โอว ตึอน.’ 25ดอ ตัห ฌัม อัน โดง กอย บรีม อัน, อึณ ปี ดูอี ตึอน แฮะ ฮอต บีห ยัห กาง อัน, แฮะ ฮอต โบง แตห อึณ กาแลบ ซีคยา โตต ดอน โมยว. 26ปัน ตี อัน มืร ฮาว แดะ กานัม ปอ บู โดว, อี ฮาย หลึอม อัน, แตห เฆ บอกาเฆลียด กอย โดง บรีม อัน. ดูอี วี ปี ลึบ กอย เฆ ตี, อัน บอ ฌัม ดูก ตาง หลึอม คา อาต.”

27เฌา เยซู แฮะ ฮอต กาลาง ปาย ตี, อึณ มึห อีบึณ อู วี กอย กาแต ดูอี กืน. อัน บอ จูห ดี กาลาง โฆรห ตาง ดี เฌา เยซู. อัน ต็อห, “อึย, อีบึณ อี มูห มา ฆึอด แม, อี แตห แม หณอด อึม ปู อัน, อัน แฮะ มึห น็อห ดาคึย อาคัร.”

28เฌา เยซู วี ต็อห ดี อัน, “เฆ ดูอี อี โทม โฆรห เฌาพรา บอ โบง โดบ ปี จัร อัน เฌา เฆ โบง, อึณ มูห เฆ ดูอี ฌึร ตี, เฆ ดี ปึอน น็อห ดาคึย.”

ลอง อาโยวนา ตึอน

29ปัน ตี ดูอี กืน กาเซา แฮะ ตัห กาฌูะ. เฌา เยซู ต็อห ดี เฆ, “ดูอี ฌาด นี แฮะ มืก. เฆ ซี ยึร นา หมึอม อาม กาเซา ปี บยัะ เฌาพรา ดี เฆ. เฌาพรา ยี แฮะ แตห เฆ ยึร นา หมึอม อาม กาเซา ปี โบง อัน ดี อาโยวนา ตึอน. แดง ตี อัน ตู แตห เฆ ยึร มาเซ. 30อาโยวนา มูห ดูอี อี บยาน โฆรห เฌาพรา. แปะ แฮะ กาลาง อัน แฮะ แบน นา หมึอม อาม กาเซา ปี บยัะ เฌาพรา ดี เฆ ดูอี อี กอย แคง มืง นีนีเว ตึอน. ปาย ตี, บอ โอว อี แฮะ แบน ฆอน ดูอี, อึณ ปี โอว แฮะ แบน อี หมึอม อาม กาเซา ดี ดูอี ฌาด นี. 31ดอ มึอน, บอ นาง ฮอคัม อี กอย มืง เตต, อัน แฮะ ดึอม ตัห แคง มืง โต็ง กาเซา, ฌัม มืง ปี อึบ คูนดีคัม อาซาโลวโมว ตึอน, แตห อัน ปึอน ดี ยึร ดี โทม อางยาน อาซาโลวโมว. โอว ยี ต็อห ดี เบ ดูอี อี กอย ฌาด นี, เบ แฮะ ยึร ดูอี อี มึห อาพูง ดังโคว ตาง หลึอม คูนดีคัม อาซาโลวโมว ตึอน. โคว อัน, ดอ ฌัม ซีแง ดี ซูงพยาด เฌาพรา ดารา, นาง ฮอคัม ตึอน ดี ยีต พยาก ดูอี ฌาด นี. 32ปัน ดี ซูงพยาด เฌาพรา ดารา ดี อี, บอ เฆ ดูอี อี ดึอม กอย มืง นีนีเว ตี, เฆ ดี ยีต พยาก เบ. เฆ แฮะ ดึอม แวน น็อห บรีม เฆ, ดึห น็อห กามาย ดอ กาลาง อาโยวนา ลอง ดารา เฌาพรา ดี เฆ. เบ อี กอย ดี นี, เบ ยี แฮะ ยึร ดูอี อี ตาง หลึอม อาโยวนา ตี. เบ ยี ตู โทม โฆรห อัน.”

ลอง บลาง แคง โดว อี

33เฌา เยซู วี ต็อห, “อาว มึห อาเซ อี ปีด็อะ เงา ออม, วี เบลห อูน นา ครึม. อัน มืร ตู ปีด็อะ เงา ออม วี ซีบลึก อูน ครึม ซีลัยะ. ดอน อี อี ปีด็อะ เงา ออม, อัน นับ ดี อูน แตห อัน กอย แดง ดัง อัน, แตห อึณ บลาง ดี ดูอี อี ตัห ลึบ แคง กาง ตึอน. 34งาย เบ ปี เงา ออม ตึอน, อี แตห อึณ บลาง โตต ดอน โปละ. เซ งาย เบ แฮะ ลึห ซีคยา, อึณ ปี โดว เบ บอ โดว แฮะ บลาง. เซ งาย เบ แฮะ ลึร, อึณ ปี โดว เบ บอ โดว แฮะ อับ ว็อง. 35โคว, เบ โลว ซาดีก, แกวะ แตห บลาง อี กอย แคง โดว เบ ตี วี แบน อับ ว็อง. 36เซ บลาง กอย โนะ แคง โดว โบ็ง เบ, เซ อาว ฮู มึห มาเซ อี อับ ว็อง แคง โดว โบ็ง เบ, อึณ ดี บอ บลาง โตต, แตห อึณ ปี บลาง เงา ออม แฮะ ลึห ดอน โปละ, แตห อึณ กอ ลึห โตต ดอน โมยว.” เฌา เยซู แฮะ มาโนว เฆ ดูอี กืน ปาย ตี.

ลอง แบน วี แบน วี อี ดี ฌัม ดูก ตาง

37แฮะ ฮอต ปัน ตี อึณ มึห ดา อู วี แคง พึง พารีแซ, อัน บาง เฌา เยซู ฮาว โฮม โบม แคง กาง อัน. อัน เฌา บอ ฮาว รึม โดบ อัน. เฌา เยซู แฮะ ลึบ แคง กาง ตึอน, อัน ตูต ดี มาตีณ, ต็อห ดี โฮม. 38ดา อี ตึอน, ดอ ยึร อัน, เฌา เยซู ตู บาย แด อัน อาต โฮม อัน โบม, ตู โบง โดบ ฮีด เฆ ดูอี อายูดา, อัน บอ อาม ลอง อัน ตี.

39เฌา เยซู ยี ต็อห ดี อัน, “เบ ดูอี พึง พารีแซ, เบ ปี ดูอี อี ดึห ก็อก เฆ ซีลัยะ, บาย มี นา เรต. นา แคง อึณ ยี ซี กาดาต. แคง น็อห เบ บอ ปาย ตี. อึณ มึห ลอพัะ บอ นา มืก นา ฮาย กอ โนะ นา แคง. 40เบ แฮะ รึร. เหมา อึณ ปาย ปี ทาง เบ, อึณ ปึอน โบง ปาย ตี? เฌาพรา อี แฮะ โบง แตห อึณ มึห นา เรต ดอน โมยว, อัน มืร แฮะ โบง แตห อึณ มึห บอ นา แคง ดอน โมยว. 41แตห เบ ยี แวน ลอพัะ อี กอย แคง น็อห เบ. แฮะ ฮอต, แตห เบ ดัว ดี ดูอี ฆีน, ดูอี อี ฌัม ดูก. เซ เบ โบง ปาย ตี อี ซี กอย แคง น็อห เบ ดอน โมยว, อึณ ดี ซีงา, อึณ ดี บอด ดี เบ.

42อึย เบ พึง พารีแซ, เบ ดี ฌัม ดูก ตาง. บอ เดา หลึง ฆาย เดา ซีมูง บอ เดา แบน โมยว แบน โมยว ปี ฮับ เบ แคง ฮาบ, เบ นับ ดี ดัว ฆึร บูน อู บูน, หลู ดี เฌาพรา. เบ ยี ตู โดบ นา มูห นา หมาน. เฌาพรา มืร, เบ ตู ร็อก. เบ ยี โลว โบง บอ อา โมยว. เบ โลว ร็อก เฌาพรา, บอ ปี ดี หลู ดอน โมยว ตึอน, เบ ตู โลว ปีว.

43เบ พึง พารีแซ, เบ ดี ฌัม ดูก ตาง โกบ ปีคึก เบ ดี เบ. เซ เบ ตูต แคง โฌง เบ, เบ บอ อึง ดี ตูต โดง จา, แตห ดอน อี ยึร เบ. เซ เบ บอ กาตูณ ดูอี เฮา แคง กาลัห, เบ ซี แตห เฆ ดูอี กรึบ เบ.

44เบ ดี ฌัม ดูก ตาง. เบ ปี อวน ดูอี ยัม. ดอ ตัห ฮาว ดูอี นา แดง, เฆ ยี ตู นับ แฮะ มูห อวน ดูอี ยัม.”

45อึณ ยี มึห ดา ซารา อี มาโนว ดารา เฌาพรา อู วี, อัน ต็อห ดี เฌา เยซู, “อึย ดา ซารา, เซ แม ต็อห ปาย ตี, อึณ ปี, แม ซี แตห อาฆยาง เย ลึร.”

46เฌา เยซู วี ต็อห, “บอ เบ ดา ซารา อี มาโนว ดารา เฌาพรา, เบ ดี ฌัม ดูก ตาง. อึณ ปี เบ ดึห โกรว อี จัน กาเซา ดาง แดง ดูอี เฮา. อี มูห เบ, กานู เบ อู โบ็ง มืร, เบ ตู คัม ดี จอย อี โจะ.

47เบ ดี ฌัม ดูก ตาง อาคาคัร. โคว, เบ แฮะ โบง อวน ดูอี ยัม อี ชีด กาเซา, แตห เบ อูน ดูอี อี บยาน โฆรห เฌาพรา นา แคง. อึณ ยี มูห ฆูณ ดัง เบ, อี แฮะ ง็อห ยัม ดูอี อี บยาน โฆรห เฌาพรา เฆ ตี. 48อาตี ยี แตห อึณ ลึห ซีคยา, บอ เบ แฮะ ลาย โพรม รึม โดบ แปะ แฮะ โบง เฆ ดา ดา เบ ตี. เฆ ฆูณ ดัง เบ ตึอน, เฆ แฮะ ง็อห ยัม เฆ ดูอี อี บยาน โฆรห เฌาพรา. แฮะ ฮอต, เบ แฮะ วี โบง อวน เฆ, แตห อึณ กอ ชีด. 49เฌาพรา มืร แฮะ ดึอม กาลาง โฆรห ลอง อัน ตี. อึณ มูห อางยาน อัน เฌา อี แฮะ ดึอม ต็อห, ‘โอว ดี ตึย ดูอี อี บยาน โฆรห เฌาพรา บอ เฆ ดา ซารา ปี ร็อห โอว, แตห เฆ ฮาว ฌัม โดง กอย เฆ ดูอี ตึอน. เฆ ยี ดี ง็อห ยัม ดูอี ปี ตึย โอว มัง อี. บอ มัง อี, เฆ ดี โบง นา จีจีว ดี เฆ.’ 50โอว ดี โบง ปาย ตี. โคว, แปะ แฮะ โบง ดูอี, อี ง็อห ยัม เฆ ดูอี อี บยาน โฆรห เฌาพรา ตึอน, โอว ดี แตห หมาบ เฆ ตี แบน หมาบ เฆ ดูอี ฌาด นี. อู ซีณ ดอ โฆว อัน, ดอ โบง เฌาพรา กาดาย, กอ ฌัม อาตึร นี, เฆ ดี โลว คัม หมาบ ฌึร ตี โตต ดอน โมยว. 51โอว ต็อห ดี เบ, อู ซีณ ดอ ง็อห เฆ อาซาก อาแบ ตึอน, กอ ฌัม ดอ วี ง็อห เฆ อาซาคารา ตึอน, อี ยัม ดอ กอย อัน ดี กาแต กาโช็ง หลู ฆาย โฮว เฌาพรา, เฌาพรา ดี แตห เฆ ดูอี ฌาด นี วี คัม โตต หมาบ ฌึร ตี.

52เบ ดา ซารา อี มาโนว ดารา เฌาพรา, เบ ดี ฌัม ดูก ตาง. อึณ ปี เบ แฮะ ดึห แวน ลัะคัดเซา อี ปึอน วึห มาโลห, แตห อี เฮา ลึบ ฮาว โดบ อึณเตณ อี แตห ดูอี นับ ดอน โมยว. อึณ ปี, โกบ ตู ลึบ เบ อึณเตณ ตี, เบ วี แคร บอ อี เฮา อี แฮะ ซี ลึบ.” ปาย ตี เฌา เยซู กาลาง โฆรห ดี เฆ อี กอย แคง กาง ดูอี พึง พารีแซ ตึอน.

53วาย อัน ตี เฌา เยซู แฮะ ฮอต เลห แคง กาง ตึอน, เฆ ดา ซารา อี มาโนว ดารา เฌาพรา บอ เฆ พึง พารีแซ, เฆ มึห น็อห ซี แตห อัน ฌัม ดูก. 54เฆ บอ ดีหมอด อัน แบน โมยว แบน โมยว, บัร ดี โทม โฆรห ปี กาลาง อัน อี ตู โดบ ดารา เฌาพรา, แตห เฆ ปึอน ดี พยาก อัน.

Currently Selected:

ลก 11: pce

Highlight

Copy