JOHON 16

1“Nali kangho kiwangwe ayok, ne naliyok mehel alam thano. 2Anali arleng hel kachirdom ahem para naliyok yok mokol nali pa-oleye. Piyok pu tene labadi nali kamari apor, Arnam asal tiki do pusi chirone, ladi apor wangdo. 3Aro anali Apa yok aro neyok kachinine anatsi mehel tiki ye. 4Manta konam ladi apor wange, konam ne labang nali kithan alam helta la-amun neng chipurkiye, la anat mehel alam naliyok pulo.”

Jiuli Kangthir Asal

“Ne nali pen do apotsi, lamehel alam kicheng para nali thanthe yong. 5Manta minon, neyok wang kitolpo adungyok damsi do; yongta nali kaita daklong yok dame pusi ihut ta neyok arjuje yong. 6Manta ta ne naliyok lamehel alam nali kithan apotsi, nali thinhel neng aduk dodet do. 7Layongta ne naliyok khanang alampo nali thando: lake ne kidamsi naliphan mechotne, piyok pu tene ne tikangsi damde tene, naliyok labang wang kirap po wangwe ye; manta ne damo tene, nalidung anangyok wang tole. 8Aro konam anang wange, pirthepe apap alam, kadhorom alam, aro Arnam bisar-ote alam anat pirthepe long ado kido aporman paklange: 9pap anat, piyok pu tene anali neyok krolkre yongo; 10dhorom kangthir anat, piyok pu tene ne Apa adung damsi do, aro nali neyok thek hlonghle ye; 11bisar-kahonthe ye anat, piyok pu tene labang pirthepe phu-phang helyok bisar weno. 12Ne minon hok naliyok kipuyok ako-ong dolang, manta labang minon nali chihi un-eh. 13Konam labang khanang Jiuli wang, la amun anang khanang aduwar nali paklang pone; piyok pu tene anang abithang para lam thanthe ye, manta anang potsi arjuye, labang si pu ye, aro naliyok mophel kiwange alam than daknge. 14Anang neyok jortang piye, piyok pu tene ne rideng potsi do, anang lalong para ensi, naliyok thane. 15Apa ari deng kido ahuwit nepi detno; lasi ne nali kithane ke ne long pot do, anang lamehel ensi naliyok thane.”

Aneng Adukpo Aneng Arongdetne

16“Bekso apor aphel, aro nali neyok thek hlonghle ye, aro bekso arni aphel, aro neyok thek phak hlonge.” 17Laparake anang adun hel angkhan ke ihut para ihut chipujo lo, ‘Bekso aphel nali neyok aro thekthe, aro bekso arni aphel ke nali thek phak hlonge’; aro ‘Piyok pu tene, ne Apa adung damsi do’, Bangpo ke pot alam ili pudo? 18Lasi anali pulo, ‘Bekso aphel’ labadi pot alam pudo? Anang pot pudo, halike abhu hlonghle yong.” 19Jisu anali lam arju ye aneng than unsi analiyok pulo, “Bekso aphel neyok aro thek hlonghle ye, aro bekso arni aphelke nali nethek phaknge, ladi alam ne nali pulo, labang acho alamke nalidaksi ihut para ihut chirjudo ma? 20Khanangsi ne nali thando, nali suruye aro angthin aduk do ye, manta pirthepe ke aneng arong hlonge; nali aneng aduk do ye, manta nali neng adukpo aneng arong phaknge. 21Konam arloso ihut oso kihlong apor, anang abipen wangman, piyok pu tene anang apor wangchok man. Manta konam anang oso plango, anang pirthepe long oso ihut kiplang anengrong ongsi, labang aduk anang neng chiri-re. 22Lasi nali ta minon jongke aneng aduk do; manta ne nalithek phaknge, aro la-amun nali ingthin nengronge, aro nali labang anengrong kaita nalipara khar pon un-eh. 23La arnike neyok imung alamta ne-chihanghe ye. Khanangsi ne nali thando, nali Apa ango penebak chihang, tene anang nemen pensi naliyok bangpo piye. 24Minon hok nemen pen nali jat chihanghe yong. Nali nengrong kipleng aphan, lasi chihang, tangsi hlonge.”

Pirthepe yok Kihal Alam

25“Lamehel alam athenghlan pensi ne nali pulo. Konam aporsi athenghlan pen nali thanthe ye, pachitha-ang daksi Apa alam pachitha-ange, labang apor wangsi do. 26La arnike nali ne menpen chihange. Ne nali phan ne Apa yok pingkitne, ladi ne nali pupe; 27piyok pu tene Apa abithang naliyok nengdokman, piyok pu tene nali neyok nengdokngo, aro ne Apa para wangdo kipu alam nali kroldo. 28Apa adung para ne pirthepe yok wango; pirthepe tikang phaksi, Apa adungyok dam bang.” 29Anang adun hel pulo, “Langot, nang minon athenghlan ke thanthe si, pachiklan daksi thando. 30Nangke thek phrotpo, aro kaita nangyok lam karju nange ingjong; bangso pensi nang Arnam para wangdo, pusi hali kroldo.” 31Jisu analiyok pulo, “Minon nali kroldo ma? 32Konam apor nali abithang athem long chingrum put-putsi, neyok ahudet tikang detsi dame, ladi apor wang hlengo. Layongta nehudet kalek, piyok pu tene Apa nepen do. 33Nali nepen nengsam pahlong, lasi ne lamehel alam naliyok pulo; pirthepe long nali aduk do. Manta chipangtang; hane pirthepe yok halo.”

Currently Selected:

JOHON 16: AMRI-BSI

Highlight

Copy