JOHON 17
17
Jisu Adunhel Aphan Kapingkit
1Jisu lamehel alam kithan tang aphel, anang ethakpe yok lang etsi pulo, “O Pa, apor wang hlengo; nang So yok potsi jortang pinot, lasi Aso ta jortang nang parklam une, 2nang Aso arideng kipi ahuwit yok ladisi or-eh len ajiu pilo, piyok pu tene nang ahuwit arleng aphuthak anangyok apharan pilo. 3Aro ihut det khanang Arnam nangsi, nangyok aro nang wang kitol Jisu Khristo yok kachini, lalo or-eh len jiuli. 4Nang neyok potsi patiki tolo, ne mehel pachoksi pirthepe athak nang jortang pilo. 5Lasi minonke O Pa, pirthepe kithepthe ango, nang pen kido amun, ne potsi ajortang kido, la-ajortang po, minon nangpara neyok jortangpo nepinot. 6“Nang labang pirthepe adak para konbaksi arleng neyok pilo, lahel ango ne nangmen pachiklango; aro anali nang arlengsi kido, nang lahelyok neyok nepilo; aro anali nang lamthe eno. 7Minon anali nang neyok kido-kangwe nekipi, lahel ahuwit nang parasi wango, pusi anali bangpo than uno; 8piyok pu tene nang potsi alamthe neyok nekipi, mehel alam ne analiyok pilo, aro anali mehel ahuwit chidengo, aro ne ke nang para wango, labang ta khanangsi thekngo, aro nang neyok wang tolo, lata anali krolo. 9Ne anali phan pingkit do; pirthepe aphan pingkit ke yong, manta inghoyok nepilo anali phansi pingkit do. 10Ne arleng ke nang arlengo, aro nang arlengke ahuwit ne arlengo; aro ne anali sitem jortang dolo. 11Aro minonke ne labang pirthepe long kalekngo, manta anali pirthepe long dolang aro ne nang dungyok damsi do. O kangthir Apa, ili isidet kido badi, analita ladi isidet si pado nang, la anat, nang pot amensi nepilo, nang labang amenpen analiyok ralnot. 12Ne analipen kido amun, nang pot amen nepilo, nang labang amenpen ne analiyok ralo; aro anali ihut ta chingbobe yongot, la-apot lo-kangthir alam kichok yoksi, kanghon nange Aso detsi inghono. 13Manta ne minon nang dungyok damdo, aro anali sitem nenengrong pachok nang, lasi pirthepe long kido amun lamehel alam than do. 14Ne nang lamthe analiyok pilo; aro ne pirthepe para kalek, analita ladisi pirthepe long kalekngo, pirthepe analiyok simo. 15Ne analiyok pirthepe para kipon ayok ke kalek, manta ne anali si-ik apap para kikom yoksi anali phan pingkit do. 16Ne pirthepe para kalek, anali yong ta pirthepe aphan kalek. 17Khanangpen anali yok pangthir not; nang lamthesi khanangpo. 18Nang neyok pirthepe long wang kitol badi, neta analiyok pirthepe long tolo. 19Aro analiyok ta khanangpo along chipek ngo, labang anatsi anali phan nebithang ta nangdung chipekngo. 20“Labangpo anat detke pingkitke yong, manta anali lampensi neyok kikrol ahuwit abang anat ta pingkit do, 21La-amun anali ahuwit ta isidet doye. Nang badi, O Pa, nang neyok wangtolo, bangpo pirthepe kikrol aphan, nang nelong isi kido badi, aro ne nanglong isi kido badi, anali longta ili long isi det pado nang. 22Nang neyok nekipi jortangpo ne analiyok ta jortang pilo, lasi bangpo pirthepe kithan unyok ili isidet kido badi, analita isidet do-une, 23ne analipen do, aro nang nepen dosi, anali isidet chiplang une, la anat pirthe kapaklang ayok lake nang nekitol badi aro nang neyok nengdok kido badi neta lahelyok nengdokngo. 24O Pa pirthepe kithep ango, nang neyok nengdokngo apotsi ahuwit jortang neyok pilo, ne labang jortang, nang neyok kipi arleng hel kapathek yok, ne kido athemlong, nepen analita kapado dam hlongyok, labang neneng ar-ih do. 25“O dhorom kangthir Apa, pirthepe nangyok nang chinine yongo, manta ne nang chinilo; aro nangsi neyok wang tolo, bangpo anali than-uno. 26Ne nang men analiyok pachinilo, lasi jibadi nang neyok nengdok ngo labang nengdok analipen doye, aro ne nengdok analilong do.
Currently Selected:
JOHON 17: AMRI-BSI
Highlight
Share
Copy
Want to have your highlights saved across all your devices? Sign up or sign in
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.
