JOHON 18

Jisu yok Kinep

(Mot. 26:47-56; Mrk. 14:43-52; Luk. 22:47-53)

1Jisu lamehel alam kithan aphel, Kidron dongpe haga apar, lalong isi barik kido, adun hel pen lalong yok damo, labang barik long anang aro adun hel lut damo. 2Minon ke hutur arideng anangyok kipek det Judas pota labang athem kachini, piyok pu tene Jisu anang adun hel ensi apor-apor lalong kidam. 3Lasi Judas po sonturihel, aro bangthe aghai, aro Pharasi hel para phu-phangyok pochaksi, melur, theng-tom aro nokjir ensi, labang athem hleng damo. 4Laparake Jisu, bang hel kachiplang thek krengsi, abithang anang ango wang chotsi analiyok arjulo, “Nali inghoyok bisar do?” 5Anali pulo, “Najaret Jisu yok.” Jisu anali yok pulo, “Hane si anango.” Anangyok hutur arideng kipek det Judas kachobel pota, anali pen lalong arjap dingsi kido. 6Konam Jisu analiyok pulo, “Hane si anango,” kipu la-amun anali paphel damphaksi lungle chikrep damrulo. 7Anang analiyok arju phakngo, “Nali ingho yok bisar do?” Anali pulo, “Najaret Jisu yok.” 8Jisu pulo, “Hane si anango pusi ne nali than tango, lasi neyoksi bisardo, tene lamehel arleng padam minang.” 9“Nang nekipi abang yok ne ihut ta pangbobe yongo.” Labang anang phan kiwi-alam kapachok yoksi anang ladi pulo. 10Laparake Simon Pitor po ipak nokjir ensi kido apot, ahom para hung thersi, bangthe po aturu ayok, ancho-ari abak anopo chor hletno. Aturu po amenke Malkhas kido. 11Lalongsi Jisu Pitor poyok pulo, “Nang nokjirpo ahom long chithal phak ngot. Apa neyok nekipi potsi duk-hap langhanpo pilo, ne bangpo jun nangne ye ma?”

Jisu yok Anas po Adung Kipon

12Lasi sonturi hel aro Jihudi phu-phang hel Jisu yok nepmo, aro anangyok bamo. 13Ango ke anali Anas po adungyok pono, piyok pu tene anang labang anengkan si bangthe kachiplang aro Kaiphas po ahupo kido. 14La Kaiphas po Jihudi helyok adiha kipi, te rat hel aphan ihut arleng kithi ke akime, labang arleng anango.

Pitor po Jisu yok Hoi Kichoche

(Mot. 26:69-75; Mrk. 14:66-72; Luk. 22:54-62)

15La-amun Simon Pitor po aro prek ihut adunpo Jisu aphel phel duno. Labang prek adunpo bor-bangthepo pen kachichini kido, Jisu pen bor-bangthe sotal longyok lut damo, 16manta Pitor poke owa amahang longsi arjap dingsi dolo. Lasi bor-bangthepo pen chinisi kido prek adunpoke mokolyok wang phaksi, owapo amahang kido arlosope yok chithansi, Pitor poyok palut pono. 17Lalong owa long kido arloso pe Pitor poyok pulo, “Nangta labang arlengpo adun hel asitem ihut kalek ma?” Pitor po pulo, “Ne ke kalek.” 18Labang athem kichum adin amun apotsi turuhel aro paton hel me angkri pakarsi, aro anali arjap phrongsi me-chinghip mo. Pitor pota anali pen arjap dun dingsi me-chinghip duno.

Bangthe po Jisu yok Lam Karju

19La-amun bor-bangthe po Jisu yok, anang adun hel alam aro anang kapaklang alam arjulo. 20Jisu anangyok pulo, “Ne pirthepe ango pachiklan daksi thano; ne Jihudi hel Arnam ahem long kapaklang, lalongsi ahuwit Jihudi hel wang kachingrum athem, arnita paklango, butisit ke jatsi thanthe yong. 21Neyok piyok te arjudo? Inghosi arjulo, lahelyok ne pot puhlongo, labang analisi than une.” 22Konam anang labadi kipu amun, arjapsi kido paton hel ihut Jisu yok ardepsi pu lo, “Bangthe poyok ladi angpu dun man ma?” 23Jisu anangyok pulo, “Kipu nangne penebak kangho pu hlongo tene, labang hakhi pi. Manta akime alamsi thanhlong do tene neyok piyokte ne-ardep do?” 24Laparake Anas po bamthip si kido Jisu yok, Kaiphas bangthepo adung yok tolo.

Pitor po Jisu yok Hoi Kichoche Alam

25Lajongta Simon Pitor po arjap dingsi aro me-chinghipsi kido. Anali anangyok arjulo, “Nangta anang adun hel asitem ihutpo ma?” Anang hoi chochesi pulo, “Ne ke kalek.” 26Bor bangthepo ihut aturu, lake Pitor po ingho ano kichorhlet, anang kachipho arleng ihutpo pulo, “Ne nangyok anang pen barik long kido ne nang thekthe yong ma?” 27La-amun Pitor po hoi chophakphe yongo, aro la-amunsi wopo kulo.

Jisu yok Pilat po Adung Kipon

(Mot. 27:1-2,11-14; Mrk. 15:1-5; Luk. 23:1-5)

28Laparake anali Kaiphas po ahem para gobornor Pilat po athem Jisu yok pono. La-amun adap prang kido. Anali Kijoktang-kamai cho-jun kichodun aseisi, chipasimse ayok, lahel gobornor ahem lut dunde yongot. 29Lasi Pilat po mokolyok damsi analiyok arjulo, “Nali bang arlengpo aphuthak pot ado ka-ojor alam wando?” 30Anali anangyok pulo, “Anang kangho kangwe nang tene nang rideng anangyok champipe lo hoi.” 31La-amun Pilat po analiyok pulo, “Nali anangyok ponsi nali bithang kanong ateng anangyok bisar-ote not.” Jihudi hel anangyok pulo, “Ihut yokta kamari yok kanong badike hali apharan ingjong.” 32(Labang abithang pot badi thiye, labang alam Jisu jibadi kipu, bang posi kichokyok chiplango.) 33Laparake Pilat po anang hempeyok lut dam phaksi, Jisu yok taramsi arju phakngo, “Nangsi Jihudi hel arechopo ma?” 34Jisu pulo, “Nang bithangsi labang alampo arjudo ma, ma bang hel nelam hel nangyok nang thano?” 35Pilat po pulo, “Ne ke Jihudi arleng ma? Nang bithang arleng hel aro bangthe helsi nangyok nerideng champilo. Nang pot tiki lo?” 36Jisu pulo, “Ne longri labang pirthepe long kalek. Ne longri labang pirthepe kido nang tene, Jihudi hel arideng neyok kichampi hlonghle yok, ne adun hel chirbu chilarelo hoi. Manta minon ne longri holek pirthepe long kalek.” 37Pilat po Jisu yok arjulo, “Tene nang recho ma?” Jisu pu phakngo, “Nangsi pudo ne ke recho. Labang anatsi ne wang plango aro bangpo anatsi khanangpo hakhi kipi yok ne wang plango. Ingho khanangpo long kido abangten ke nelam oneman.” 38Pilat po anangyok pulo, “Khanang poke pot te?”

Jisu yok Kamari Kithan

(Mot. 27:15-31; Mrk. 15:6-20; Luk. 23:13-25)

Labang thansi Pilat po mokol yok damphaksi Jihudi hel ayok pulo, “Ne ke anangyok jatsi ado pahlonghle yong. 39Manta Kijoktang-kamai amun ne naliyok ado katiki kibeng arleng ihut yok kapajok yok nali ladi abi-pun ke do. Nali Jihudi hel rechopo yok nali pajokpi ayok, nali ladi aneng do ma?” 40Lalong anali hang solsi puphakngo, “Labang arlengpo ke nangne, Barabas poyokne pajok.” Labang Barabas po ke kanghu kido.

Currently Selected:

JOHON 18: AMRI-BSI

Highlight

Copy