LUK 10
10
Kep Thorok-Isine Bang Hiniyok Kitol
1Labang aphel Hemphu kamprek bang kep thorok-isine bang-hini arleng yok pachakngo aro anang abithang kidame rongsoten aro athemten ayok bang-hini bang-hini, anang ngo tolo. 2Anang analiyok pulo, “Bithar asok menjapsi do manta katiki abangke bekso det, lasi anang bithar long katiki abang ako-ong kitolyok Hemphu yok pingkit. 3Damot, chilang, bherabik aso hel badi timit hel asitem ne nali toldo. 4Abor, lale chul, lale keng-op chiponek aro duwar long ihut yokta kardom piyek. 5Dak bangpo ahem long nang lutdam ango pu, labang hem ayok nengsam pado nang! 6Aro lalong inghone bak nengsam abang do tene, nali nengsam labang arleng aphuthak doye; manta dode tene, naliyok wang phaknge. 7Idon hem longne do aro anali pot nali piye cho-jun, piyok pu tene katiki abang ador hlong nange, hem idon para idonyok damek. 8Nali rongso yok kilut dam amun lalong arleng hel nang chingdene aro nalingo potsi piye lane chonot; 9kiso abangyok pame aro analiyok pu, Arnam-alongri nali dung hetno. 10Manta nali konam rongsoyok lut dame aro lahel nali chingdende tene duwar ayok damot aro thanot, 11“Nali kengtak long hali kido rongso anghan chirhap yongta, mehel naliyok ado kikol aphan chihijir bang. Tangsi Arnam-alongri adung het wang hlengo pusi, thek nange.” 12Ne nali thando, labang bisar akithe arni rongpe long aduk Sodum yokta chihi un-eh chotne.
Kikrolkre Arongso
(Mot. 11:20-24)
13“Ayoh! Khorajin! ayoh Bethsaida! Nali konbak kaphere-meme do, piyok pu tene nali sitem long konbak jakong-kithe asal katiki, lamehel Tayar pen Sidon longne katiki nang tene, lalong arleng hel angot bosta ape chipersi, thetlo long iningsi, neng kachiparlep asin badi chihelo hoi. 14Manta bisar arnike Tayar pen Sidon arni aduk kachihi jalsochotne. 15Aro nali, ei Kaparnaum, nang ethakpe yok thure ma, ma nang jom ayoksi nang tinang. 16Jisu kep thorok-isine bang-hini ayok pulo, “Inghosi nali lam oneye, anali nelamthesi oneye; aro inghosi ne-chidengde ye analike neyoksi chidengde ye; aro inghosi ne-chidengde ye, anang neyok kitol poyoksi chidengde ye.”
Kep Thorok Isine Bang-hini Abang Kachiru Phak
17Kep thorok-isine bang-hini arleng neng arong pen wang chirulo, anali pulo, “Hemphu, hali nangmen pen than tene si-ik helta hali mengman!” 18Jisu anali pulo, “Ne ethakpe para katha-ang kabarlang badi si-ik kijang thekngo. 19Onenot, ne phurul aro che-he langbong athak kidongyok, aro ahuwit hutur aphuthak kihal apharan nalipilo; aro la-amun jatsi naliyok jibadi yongta pangho un-eh ye. 20Layongta si-ik hel naliyok mengman, labang alam anat nali nengrong chipadodesi, nali menhel ethakpe long kiwi do, la-anatsi aneng arong chipado.”
Jisu Aneng Arong
(Mot. 11:25-27)
21La-apor mat-matsi Jisu Jiuli-Kangthir aneng arongo aro pulo, “O Pa, ethakpe pen pirthimipe Hemphu, ne nangyok kardom pido, piyok pu tene nang me-at kithek-kire aro budhi ater parake lamehel butilo aro osohelyok chiklango; oik, Pa, nang labang kajinsosi katiki ye anengdo. 22Ahuwit apot ne Apa ne arideng champilo; aro Apa aparke kamprek kaita Aso yok chinine, lale Aso aparke kamprek kaita Apa yok chinine aro Aso inghoyok anengdo anangyok si anang chiklangman.” 23Laparake adun hel aga chirtingsi, anali hudet yoksi Jisu pulo, “Nali pipotsi kithek hlong amek konbak bor-eh chok do. 24Ne nali thando, nali kithekpo turki pen rechohel kithek aneng kido, manta thek hlonghle yongo aro nali karju hlongpo analike arju hlonghle yongo.”
Kime Samaritan Athenghlan
(Mot. 22:34-40; Mrk. 12:28-34)
25Lajongsi kanong paklang ihut honjat kilang yok thursi Jisu yok pulo, “Paklangpo, ki-or-eh ajiu kihlong yok ne pot tiki nange?” 26Jisu anangyok pulo, “Kanong along pot te wido? Nang lalong pot chiporhe hlongman?” 27Anang pu phakngo, “Nang ahuwit angthin pen, nang jiuli pen, aro nang jakongpen, aro nang kachiron anengpen Hemphu Arnam yok nengdok; aro nang bithangyok badi adung arel abangyok nengdok.” 28Aro Jisu anangyok pulo, “Nang kipu wang phlendo; bangpo tiki, aro nang hrenge.” 29Manta anang abithangyok dhorom kangthir kapaklang yok, anang Jisu yok pulo, “Nekung-nerel abangke inghote?” 30Jisu pulo, “Arleng ihut Jerusalem para Jeriko yok kidamjong amun kanghu hel anang pochaksi anang pe-rik ingsek detno aro anangyok pam rensi mari holo aro tikangsi damo. 31Minonke la-apor si ihut bangthepo labang aduwar dam jongsi kido; aro konam anang arlengpo yok thekngo, anang pekmelsi prek aga damo. 32Labadisi ihut deri arlengpo, konam anang labang athem wango aro arlengpo yok thekngo, anangta prek aga pekmelsi damo. 33Manta Samariya arleng ihut, konam labang aduwar damo aro labang arlengpo adungyok wango; aro konam anang arlengpo yok thekngo, anang jinso-meme hlongo. 34Anang adungyok damo aro anang kichang long pe bamo, jangthu aro athe alang kichang amek hel long helo. Laparake arleng po yok abithang noselmurep athak parlulo aro idon ahemyok ponsi al-eno. 35La-aphel arni rupa atheng tanga hini olesi don ahem ahemphu poyok pisi pulo, “Anang yok me-atne langnot, konbaksi inghonman, nebithang wangsi wangpi phaknge.” 36Nali thin badi ke, labang kithom asitem ingho bangpo te kanghu arideng kiduk amun ingho adung arel arleng chiplange pusi chirondo?” 37Kanong paklangpo pulo, “Ingho bangposi anangyok jinso paklango anango.” Jisu anangyok pulo, “Damot aro labadi tikinot.”
Jisu Martha pe Pen Mary pe Ahemyok Kidam
38Jisu pen adun hel abithang aduwar kidam jong amun anang rong isi long lut damo aro lalong Martha pe ahem long anangyok chidengo. 39Aro Mary amen anang musope, Jisu keng-ari adung iningsi, anang kapaklang alamhel onesi kido. 40Manta Martha pe ahudet al-poson asalhel katiki kapachok un-eh anat sung-sung rem-remsi, Jisu adungyok wangsi pulo, “Hemphu, al-poson ki-enyok nemuso pe ne-phuthak sal patiki detdo, bangpo nang chironre yong ma? La-apot neyok wangparap yok thanot.” 41La-amun Hemphu pulo, “Martha, Martha, nang ajat-jat alamsi neng pichot do aro salsi chipalak bop do. 42Manta kanange ke isi det. Mary pe ke akime abhaksi arwalo; bangpo anang para pon un-eh ye.”
Currently Selected:
LUK 10: AMRI-BSI
Highlight
Share
Copy
Want to have your highlights saved across all your devices? Sign up or sign in
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.
