LUK 11

Jisu Pingkit Kapaklang

(Mot. 6:9-15)

1Jisu ilong long pingkit jongsi kido, aro anang kapingkit tang amun, adun ihutpo Jisu yok pulo, “Hemphu, Johon po adun hel yok kapaklang badi hali yokta kapingkit hali paklang not.” 2Jisu analiyok pulo, “Konam nali kapingkit amun, labadi punot: O Apa, nangmen chirdom pamenang, nang longri pawang nang. 3Hali kanange cho-jun arniten haliyok pinot. 4Aro hali pap hel ron not, piyok pu tene halita bithang dhar kichak abangyok ronman. Aro haliyok honjat yok ke ponenot.”

Pingkit Kachirbu

(Mot. 7:7-11)

5Aro Jisu analiyok pulo, “Chiron, nang ihut khoipo do, aro nang ajo jarlo anang dung dame aro anangyok nang puye, “O khoipo, him plangthom aholan nepitha; 6piyok pu tene ne-khoi ihut akaholo para wang hleng do, manta anangyok kapacho apot weklong do. 7Aro anang la-amun hem arlo para wang puye, ne-dati ye not, minon hetsi owapo inghap mo, nesohel nepen ih si do; nang kipiyok ne thur un-eh lo.” 8Ne nali thando anang thurthe aro nang pipe yongta, anangke nang khoipo apotsi, nang anang yok kihang jong anat, anang thursi nang potsi kanangeso nang piye. 9“Lasi ne nali thando, chihang, aro tangsi nali piye; chibisar, aro tangsi nang hlonge; pardeng, aro owa ingpu piye. 10Piyok pu tene abangten inghosi chihang, pahlongman, aro abangten ingho pardengman, analiyok owa ingpu piye. 11Nali sitem ingho anang pa po do, asohel ok chihang tene, anang ok aholan phurul piman? Lale asopo him chihang, tene him aholan anangyok arlong piman? 12Lale osohel wo-ati hang, tene anangyok chehe-labongsi piman? 13Nali laparake, inghosi akangho yongta, nang sohel yok akime abanta pithek, tene inghosi anangyok chihang lahelyok konbak ong-ongsi ethakpe long kido Apa Jiuli-Kangthir pipeye ma?”

Jisu Pen Belsabul po

(Mot. 12:22-32; Mrk. 3:19-30)

14Minonke Jisu konam kalarpo para si-ik ujharo, si-ik ajiu olesi damo, kalarpo lam than uno, aro rat hel asombhik hlong detno. 15Manta angkhan ke anangyok pulo, “Si-ik ajiu arecho Belsabulpo parasi si-ik ujharo.” 16Angkhan ke anangyok honjat kilange aphan ethakpe para asin kapaklang yok hango. 17Manta anali kachiron hel anang thek detsi anali yok pulo, “Alongriten kachilang set-set chiplang pu tene chingho man, aro kachilang set-set ahemhel chibhak det man. 18Si-ik hijan-jan chilang set-setsi chiphlak det, tene anang abithang alongri pot badi chirjap une?— piyok pu tene nali pudo ke ne Belsabul po pensi si-ik ujharman. 19Minon ne Belsabul po parasi ne si-ik ujhar pu tene, nali phel kidun abangke ingho pen si-ik ujhar une? Ladisi anali nali phuthak bisarpo chiplange. 20Manta Arnam ari munso pensi si-ik ujhardo, tene Arnam-alongri nali dung het wango. 21Konam ajakong kido arleng ihut hilai-borsa pen chihonjoksi abithang ahem hondo anang bihinihel me-atsi do. 22Manta konam layok ajakongchot arleng ihut wang aro anangyok parem, tene anang potsi hilai-borsahel yok kikrol, aro kanghu hel chinghu pondetsi chithaksi enman. 23Inghosi nepen dode, anang nelang setsetman; aro inghosi nepen chingrumre, anang chidat detman. 24“Konam akisim si-ik ajiu ighonebak arlengpo para olesi dam, la-amun anang lang kangwe athem artingsi kisang athem chilang-worman, manta anang athem pahlong un-eh si, anang puman, “Ne olesi kiwang nihem yoksi chiru phakbo. 25Konam anang wang, hem pangthir phlensi aro me-atsi kibi thekman. 26Laparake anang damsi aro kamprek kanghochot bang thorok-isi si-ik ajiu chiwansi, aro anali lutsi aro dolongman; aro ango arlengpo yok ke aphelposi ingho chotman.”

Khanang Nengsam

27Konam anang labang alam kithan jong amun, arloso ihut rat asitem para hangchersi anangyok pulo, “Ingho arlososi nang paplango, aro mok pachulo anali al ki-en konbak nengsam chokngo!” 28Manta Jisu pulo, “Oik, layong ta inghosi Arnam-alamthe onedo aro meng do, analisi bor-eh chokchot.”

Jona po Asin

(Mot. 12:38-42)

29Konam rat ongpon chotno, Jisu kipu cheng pono, “Labang awepo akangho awe! Asin bisarman, manta Jona turki po para kamprek asinke pi un-eh ye. 30Piyok pu tene Ninebi arleng hel aphan Jona po si asin badi kachiplang, ladisi Arleng Aso ta labang owepo aphan labang chiplange. 31Ni-tu aga kido rechope labang owepo pen bisar long arjap dunsi analiyok ado kole, piyok pu tene pirthimipe kijut alongri para Solomon po agiyan alam ka-oneyok kiwang, aro langot, holek Solomon po yok ta akithe chotpo do! 32Ninebi arleng hel bisar arni thursi labang owepo yok ado kole, piyok pu tene Jona po Arnam alam kithan para analineng chipharlep mo, aro langot, Jona po yok ta kithe chotpo holek do.

Abang po Katha-ang

33“Ihut ta sati isi pakarsi bati lale ho arlo dipke bibe, manta gosa longsi biman, tangsi ingho wang kilut abang katha-ang thek hlong man. 34Nang meksi nang bangpo katha-ang, konam nang mek akime doye, nang abang dungsi tha-angsi doye; manta konam nang mek memeye, nang abang dungsi kangting. 35Lasi nanglong kido katha-angpo, kangting hlonghle aphan nang meso chilang. 36Nang abangpo katha-ang phlen, aro labang iphlakta kangting pen dode, tene melur katha-ang nangkipi badi, abangpo tha-angphlen man.”

Kanong Paklang Pen Pharisi Helyok Jisu Ado Kipu

37Jisu lam kithan jong amun, ihut Pharisi Jisu yok, anang pen kichoyok taramo; lasi anang lut duno aro kicho ahong long ining duno. 38Jisu kicho ango ari chichamche si kicho along kangning theksi Pharisi po asombhik hlongo. 39Laparake Hemphu anangyok pulo, “Minonke nang Pharisi hel ke senge aro langhan anglang aga detsi ingthelman, manta nangneng arlo ke akro aro kachidong-kachibersi pleng klaksi do. 40Nali pamuktong abanghel! Inghosi anglang aga thepmo ma, anangsi arlo agata thepthe yong ma? 41Lasi nangneng arlo kido akime abihinihel banta kipi badi pajirnot aro kidokangwe abi-pun naliphan ingthire. 42“Manta hai, hai, Pharisi hel nali konbak kaphere meme do! Piyok pu tene nali podina, nene, kijok birik amu bhak kep long ibhak banta pido, aro Arnam bisar-kangthir panung kuldo, aro Arnam nengdok tikango; mehel katiki nange do aro prek hel ta mengsi panungkul nangne. 43Nali Pharisi hel konbak kaphere memedo! Piyok pu tene kachirdom ahem long aman kihlong anghol kangning aneng dokman aro hathi long kardom kapajir aman bisarsi kangning aneng dokman. 44Konbak nali kaphere memedo! piyok pu tene thiri ahilik athak arleng hel chithan un-eh si dam-wangman, ladi kachiklangkle thiri ahilik badi nalilo.” 45Kanong ukil ihut Jisu yok pulo, “Paklang po, konam nang lamehel kipu amun, nang hali yokta patharak man.” 46Aro Jisu pulo, “Ei kanong ukil helta nali konbak kaphere memedo! Piyok pu tene nali arleng hel aphuthak kardip abhar parung ponman, aro nali bithangke kardip abhar hel kirung dunyok nali ari munso ta paphophe. 47Konbak nali kaphere meme do! Piyok pu tene nali sar-lar hel kamari turki hel aphanke me-at ahilik oteman. 48Lasi nalisi hakhi do, aro nali sar-lar hel katiki nalita hoicho do; piyok pu tene anali turki yok marilo aro nali thiri ahilik hel kemo. 49Lasi Arnam agiyan alamthe pudo, “Ne anali turki hel aro adun hel tol le. Angkhan yok ke anali mariye aro paduknge. 50Lasi pirthepe kasanse arni para ahuwit turki helyok kamari, 51Abel po yok kamari awi para Jakhariya poyok kamari, inghoyok kangthir athem aro athuli awak long kamari, anangsi labang oweyok adai piye. Oik, ne nali thando, arleng hel labang aweyok adai piye. 52O kanong ukil nali kaphere meme do! piyok pu tene nali agiyan asabi enpon detno; nali bithang ta lutdunde yongo, aro kilutne abang yokta teng klakngo.” 53Konam Jisu labang athempo tikangsi kidam amun, kanong paklang hel aro Pharisi hel anangyok hutur aneng dolo aro anang kangho kangje alam hel ado ki-otyok asek langsi dolo, 54anangyok rung dunsi prek-prek alam pathan jongsi, penebak kangho pathan si kinep ayok inghongsi dolo.

Currently Selected:

LUK 11: AMRI-BSI

Highlight

Copy