LUK 12
12
Aneng Asik Abangyok Kapaserek
(Mot. 16:26-27)
1La-aleng langyok konam hajar arat inan chingrumo, la-amun anali akeng chidong nero, Jisu adun hel yok ango pulo, “Pharisi hel athengkur para chilang wenne do, anali aneng asik para chiterek. 2Kidip klak isi abihini chiklange ke dode ye aro kabuti isi abihini thekthe det ke dode ye. 3Lasi, nang potsi kangting along kipu ma katha-ang long arju daknge, aro nang hem kahangar owa aphel potsi than jol-jole ma lake hem kardong para pachitha-ange.
Hoi Kicho Kaphere Nange Alam
(Mot. 10:26-33)
4“Ne khoi hel, ne nali thando, abangpo yok kamari abangyok ke phere yek aro labang aparke anali jat tiki un-eh. 5Manta ingho yok phere nange, ne nali thane: ingho yok phere nange bangpoyok phere, anang kamari tang aphel, jom alongyok kiti un apharan ta do. Oik, ne nali thando, anang yokne phere! 6Wosirka jon-phongo yok poisa hini pen jorje ma? Yongta lamehel isiyok Arnam ango ke chitenge-nge. 7Manta nali phu ahuwit achu-jengta alekhot en det do. Phere yek; nali wosirka hel yokta ador dochot.
Khristo yok Hoi Kicho Aro Hoi Kichoche
8“Ne nali thando, abangten inghosi arleng hel ango neyok hoicho, Arleng Aso ta Arnam tharlon hel ango hoicho ye; 9manta inghosi arleng hel ango neyok hoi choche ye, Arnam tharlon hel angota hoi choche ye. 10Aro abangten ingho Arleng Aso yok kilang set-set alam kipu abang yok ke rone; manta inghosi Jiuli-Kangthir yok lang set-setne kaparem hel yok ke anang ronre ye. 11Konam anali kachirdom ahemhel kichak pon abang hel, kapangdom aphu-phang hel aro apharan kido ango nali po tene pot badi pu ye lale nali pot than nange chiron hapmek. 12Piyok pu tene la-apor nali pot pu ye, Jiuli-Kangthir si nali paklange.”
Hem-kime Kamango Arleng Athenghlan Alam
13Rat asitem para arleng ihut Jisu yok pulo, “Paklang po, apa tikangsi kidam apuru ne pen kachithak yok neka yok thanot.” 14Manta Jisu anangyok pulo, “Ei lokpo, nali phuthak kabisar lale nali apuru kapathak yok ingho nepekngo?” 15Aro anang analiyok pulo, “Ahuwit alop para abithangyok chiralsi, chilangwenne do; piyok pu tene onglene do yongta, arleng ajiupo anang apuru pen ke kalek.” 16Aro anang athenghlan isi analiyok thansi pulo, “Ihut hem-kime arleng lungle ako-ong kido. 17Lasi anang thinlong chirono, ne pot te tikibo, piyok pu tene ne sok-sang kapangrum athem ingjong?” 18Aro anang pulo, “Labadi ne tikiye; sokmer hel phri detsi, akithesi sok mer keme; lalong sok-sang pen bihinihel pangrum detsi biye. 19Laparake nebithang ajiu yok puye, O ne jiuli po, jokha anengkan yok nang phan boi-bihini pangrumsi bido, sang-done; cho-junne, nengrong chipadonot. 20Manta Arnam anangyok pulo, “Kamango arlengpo! mini anuwe nang Jiuli nang para pondet bo; la-amun pot abihini mar pangrumsi bilo, lamehel ingho aphan chiplange?” 21Lasi inghosi Arnam aphan jiuli chipa-ong esi, abithang aphan boi bihini chipangrum man, anang labadi chiplangman.
Arnam Kikrol
(Mot. 6:19-21; 25:34)
22Anang adun helyok pulo, “Lasi ne nali thando, nali pot choye pusi ajiu anat, aro pot chi-iknge pusi abangpo aphan chiron hapmek. 23Piyok te pu tene kicho-kijun yok ke ajiu po ador chot, pe-rik yok ke abangpo ador chot. 24Wohel yok chironlang, analike amuta rip-re, lale sok-sangta chipangrumre; yongta Arnamsi analiyok pachoman. Nali wohel yokta konbak ador chot. 25Aro nali chiron hapsi nali Jiuli beksobak pading une ma? 26Nang sal aso imung so ta tiki un-eh tene piyok te kamprek asal hel yoksi chiron hap do? 27Ingnam amirhel pot badi the dingman lang, anali sal tikike lale hon ta pherphe, yongta ne nali thando, Solomon recho po ahuwit anang jortang do yongta lamehel isi atengta kachi-ik mechot pe-rik kangwe. 28Mini bithar long kihreng jong kido abap hel yok ke minap me long pasek detne, ingnam amirhel yok ke Arnam la-an pe-rik pa-ik dotene, oi Arnam yok kikrol chet arleng hel! Layok ke anang naliyok konbak pe-rik pa-ik chotne. 29Nang pot chobo, pot junbo puke labang hel bisarek aro chiron hap mek. 30Piyok pu tene bharasot long ahuwit ajat helta lamehel abihini arniten bisarman aro lamehel nali kanange do pusi nali Apa thek kreng. 31Lasi nali anang longri aphan chihang aro lamehel abihini nalipi ye.
Ethak pe Long Kimechot Apuru
32“Ei akibek ajhak, phere yek, piyok pu tene labangpo nali Apa aneng arongsi longri po nali kipiye aneng do. 33Nali potsi abihini do, bangpomar chijorsi, kicho kangwe abang yok banta pinot; piyok pu tene daklongsi kanghuta pon un-eh, aro daklong arhlok ta choche, labadi ethakpe, nang bithang aphan yok kibanbe achul pen kibi chihonjoksi, kiprelpre apuru long chibi. 34Piyok pu tene, daklongsi nang apurupo chibiye, lalongsi nangneng ta do ye.
Kanghongding Murkiya
35“Nali amicheng chikokne do aro nali melur badi chipakarnot. 36Murkiya hel anali Hemphu yok jorme-pachihap chojun para hem wang kachiru yok kanghong phrong badi, la tangsi konam anang wangsi owalong arki pilo tene, photsi anali owapo ingpupi-un arleng badi nali chiplang. 37Hemphu kiwang amun ingho murkiya hel trepsi kido theknge, analisi bor-eh chok; khanangsi ne nali thando, anang abithang amicheng long chikoksi, anali yok kicho ahong long pangningsi, aro anang abithang analiyok wang bakpiye. 38Anang jarlo, lale wo-kuthe apor wangsi, ladine analiyok thek hlong, tene lamehel murkiya helsi abor-eh chok. 39Aro konam apor kanghu wange, labang hem-ahemphu kithan-un, tene anang ahari hlong-etsi, tuksi kachunghu yok hem tikangke lo hoi, bangpo nali chithan un. 40Aro nalita trepne do, piyok pu tene nali kachithan un-eh apor, Arleng Aso wange.”
Kikrol Lale Kikrolkre Murkiya
(Mot. 24:45-51)
41Pitor po pulo,“Hemphu, nang labang athenghlan pensi thando ma, lale lampo ahuwit aphansi thando ma?” 42Aro Hemphu pulo, “Tene, anang hem murkiya helyok kahonjok apor ateng kicho abihini kipiyok, Hemphu lahel aphuthak anang hem kilang kipekdet, labadi kikrol ket aro kithek-kire murkiya inghote do? 43Anang ahemphu po kiwang amun dak bang murkiya po inghoyok labadisi katiki theknge labangsi bor-eh chokman. 44Ne aserengsi nali thando, labang murkiya yoksi anang apuru aphu-phang pek detne. 45Manta nehemphu po kiwang abhem do, murkiya po nenglong ladi chipusi, prek arloso-penso aturu helyok pam-thengsi, aro cho-jun ingrisi dolo, 46konam arni labang murkiya po kanghonghe, aro konam apor anang chithan un-eh, labang aporsi anang ahemphu po wangsi anangyok thubongsi, kikrolkre hel pensi anang kihlong nange abhak honjoknge. 47Aro dakbang murkiya ahemphupo aneng than-un yongta chihonjok ke dode, aro anang neng ateng tiki ke, anangyok jokha thenge. 48Manta ingho bangposi than un-eh si kitheng nange asal tikiman, anang yok thenge; aro inghoyok ako-ong chotsi kipi, anang para ongchot si hange; aro arleng hel inghoyok ongchotsi kipek, anang para ongchotsi hange.
Jisu Anatsi Kachibhak
(Mot. 10:34-39)
49“Ne pirthimipe athak me kitiyoksi wango; aro oh, labang minon pakarjong tene! 50Ne isi baptist po pensi baptist kachiplang anengdo aro bangpo chokche lengke konbak angthin thirthesi dohlong do! 51Ne pirthimipe athak nengsam kipiyok wando pusi nali chirondo ma? Ne naliyok than do, ladi kalek, kibhalak yoksi wangdo, 52piyok pu tene minon parake hem idon long bhak phongo chibhaknge aro bang kithomke bang-hini yok chilang setsetne aro bang hinike bang kithom pen chilang setsetne. 53Anali apo poke asopo pen aro asopo ke apapo pen, anang aipe asope pen aro asopeke anang ai pen aro anipe ke amunpe pen aro amunpe ke anipe pen chilang setsetsi chibhak detne.”
Aporpo Abhu Kihlongdet
(Mot. 16:1-4)
54Jisu arleng hel yok pulo, “Konam ni-chel aga para inghun kiwang nali thekman, nali phot si arwe jange pusi puman aro ladisi chiplangman. 55Aro konam ni-ting aga para tomon kijap amun arni asok do ye pusi nali puman aro ladisi chiplangman. 56Nali anengsik abang! nali pirthimipe aro suneng athak asot langsi pot badi ye than un; manta minon apor yok ke piyok te nali than un-eh?
Kilang Un-eh Pen Kachipangsam
57“Aro piyok anat te abithang alam apun ateng chibisar thekthe? 58Piyok pu tene nang ado pisi chigosor ako bisarpo ango nangpon tene, duwar alongne chipangsam; ladide tene anang bisarpo angoyok nang champi ta hal; aro bisarpoke nangyok sal-chakthepo arideng champi ye aro sal chakthepo ke akrol long nang thale. 59Lasi ne naliyok thando, kidochet anohok so nali pidetde lengke nali lalong para ole un-eh ye.”
Currently Selected:
LUK 12: AMRI-BSI
Highlight
Share
Copy
Want to have your highlights saved across all your devices? Sign up or sign in
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.
