LUK 2
2
Jisu Kiplang Alam
(Mot. 1:18-25)
1Koisor Agastas recho po munusi hel alekhot pinange pusi pirthepe dung thano. 2Bangposi kicheng cheng arleng alekhot ki-enpon aro Siriya alongri Kuirinias po gobornor kido. 3Ahuwit ta amen alekhot kachipi ayok abithang rongso yok damo. 4Josep po ta Galili alongri Najaret rongso para Judiya alongri Dabhit po kido rongpe Bethlehem yok damo, piyok pu tene anangke Dabhit recho po kiplang ahem agijing kido. 5Anang amen alekha kachipiyok anang don arik-kicho tang, agat kido Mary pe yok ensi damo. 6Konam anali lalong hleng damo la-amun aso kiplang apor chokngo. 7Aro anang so tahang penso oso paplango aro anangyok pe pen persi longhong long pa-ih lo. Piyokte pu tene don ahem athem kangwe dung.
Khokhre Pen Atharlon
8Labang alongri angbong angkhan khokhre hel bithar long anali anuwe bherabik honsi kido. 9Laparake Hemphu long ihut Arnam tharlon anali dung chiklango aro Hemphu Arnam tharlon analiyok katha-ang pilo aro anali chiphere detno. 10Manta tharlon analiyok pulo, “Phere yek! Ne nali ahuwit arleng hel aphan kime-alamthe wando. 11Mini Dabhit po rongpe long naliphan Ral Hemphu plango, anangsi Khristo, Hemphu lo. 12Bangpo nali phan isi asin hlonge: nali ihut oso pepen persi aro longhong long pa-ih lotsi kibi hlong dame.” 13Aro jongsi ethakpe para Arnam tharlon ako-ong, labang tharlon pen chiloksi Arnam yok bokhonesi pulo, 14“Ethakpe long Arnam jortang padonang, aro pirthimipe athak, anang inghoyok neng jinsoye arleng hel asitem nengsam padonang.” 15Konam tharlonhel analiyok tikangsi aro ethakpe ayok damo, khokhre hel chipujolo, “Hemphu Arnam kithan alam kachiplang apotmar kilang ayok ili minon Bethlehem ayok dam nang dou.” 16Lasi anali parjangsi damo aro Mary pe pen Josep po yok pochakngo, aro oso so longhong long kapa-ih thek hlongo. 17Konam khokhre hel anangyok thekngo, oso so anat Arnam tharlon analiyok potsi kipu alam, labang ahuwit alam thanpono; 18aro ahuwit ta khokhre hel kipu alam arjusi asombhik hlongo. 19Manta lamehel apot mar Mary pe aneng chiron-chibemsi neng chiparilo. 20Khokhre helyok jibadi kipu, ladisi anali ahuwit theksi, Arnam yok bokhone si lunso lunsi chirulsi damo.
Jisu yok Amen Kibi
21Narkep arni kidam aphel, konam oso so a-ok kangtep aporo, la-amun anang menke Jisu pusi bilo. Labang amen, anang apok arlo kido ango Arnam tharlon po parasi amen kipi.
Jisu yok Arnam Ahemlong Kichampi
22Konam Mosi po kanong badi, anali kachipangthir ayok aporo, la-amun Hemphu long anangyok kichampi yok, anali Jerusalem yok wango, 23(Hemphu Arnam kanong long kiwi badi, “So tahang penso oso yok Hemphu lang kangthir pusi puye,” kipu badi), 24aro Hemphu kanong long kipu badi analita wothum jor-ni lale wothum aso jon-ni Hemphu Arnam aphan buli kipiyok pidamo. 25Minon ke Jerusalem long kido Simiyon amen, ihut arleng kido; anang dhorom kangthir, Arnam kaphere, aro Israyel alongri kiralyok inghong dingsi kido arleng, aro anang phuthak Jiuli-Kangthir kido. 26Aro Hemphu, lake Khristo yok thekthe lengke, anang thitheye, labang alam Jiuli-Kangthir parasi anangyok kachiklang. 27Jiuli-Kangthir pen nengrungsi Simiyon po Arnam ahem wango; aro konam ape-apo Jisu oso so aphan kanong abi-pun badi tikisi kapatang yok Arnam ahem wano, 28Simiyon po oso soyok arbaksi Arnam yok kardom pisi pulo, 29“O Hemphu, minon nang lamthe ateng nang murkiya po yok nengsamsi padine tolnot; 30piyok pu tene nemek pensi nang kapajoktang thek hlongo. 31Jibak kijoktang ahuwit arleng hel amahang kido amunsi nang honjok krengo, 32Bang-ajat helyok nang katha-ang kachiklang yok aro nang Israyel arleng jortang kidoyok,” 33Aro oso so aphan labang jipe kipu alam thano, anang aipe-apo la-amun asombhik hlong detno. 34Laparake Simiyon po analiyok bor-eh pilo aro anang ai Mary pe yok pulo, “Labang oso so akong-ong arleng Israyel agijing adak kanghon aro kijok aphan, aro arleng hel kipatharak asin aphan, Oso-soyok Arnam pachakdo, 35aro lake ingthin alam pachiklane—aro ihong nokjir abithang ajiu longta kichang atenge. 36Lalong Aser ajat Phanuyel po aso pe Anna amenpen, abo akisar turki pe ihut apihan po pen nengkan thorok isi chi-ensi, 37laparake angkol philine-phili anengkan ayok himepe chiplangsi dolo. Anang Arnam ahem para chiterekre pensi, an-kihum aro pingkit pen anelo-anuwe chirdomsi kido. 38La-aporsi anangta hem arloyok wang lutno, aro Arnam yok parklamyok aro Jerusalem rongpe kijokyok inghongsi kido ahuwit arleng ango oso so alamthe kithan chengpono.
Najaretyok Kachiru
39Konam anali Arnam kanong ateng kanange ahuwit patang detno aro anali Galili alongri, abithang arong Najaret ayok chirulo. 40Oso-so thelo aro ajakong wango, aro Arnam kajinso anang phuthak dolo.
Oso Apor Jisu Arnam Ahem Kidam
41Minon ke anengkan ten Jisu ape-apo Kijoktang-kamai aphan Jerusalem yok kidam. 42Aro, konam Jisu nengkan kere-hini abo chokngo, anali abi-pun ateng kamai along damo. 43Konam kamai oro ar anali chirulsi wango, oso Jisu ke Jerusalem long ri-ero, manta anang ape apo ke than un-eh yongo. 44Anang lokjor arleng asitemdo pusi chironsi dolo, anali inirsi aduwar damo. Laparake anang don-rat aro alok-jor asitem bisar damo. 45Konam anali Jisu yok pahlong un-eh yongo, anali bisar bisarsi Jerusalem ayok wang phakngo. 46Ni-thom aphel anali anangyok Arnam ahem long hlongo, anang paklang hel asitem iningsi, anali lam onesi kido, aro analiyok lam ako-ong arjusi kido pahlong damo. 47Aro inghosi anang lam arjulo, anali ahuwit lam abhu kihlong hel aro lam kiwol dun phak hel asombhik hlongo. 48Konam anang ape-apo anangyok thekngo anali asombhik hlongo; aro anang aipe anangyok pulo, “Ei pa, haliyok piyok te ladi sansedo? Langot, nang pa pen ne ta konbak aneng aduksi nangyok bisar-wor do.” 49Anang ape-apoyok pulo, “Nali piyok te neyok bisar-wor do? Ne Apa ahemlong ne do nange puke nali than un-eh yong ma?” 50Manta anang kipu alam abhu hlonghle yongo. 51Lapara ke anang analipen damo, aro Najaret yok hlengsi, anali lam mengdun hopsi dolo; anang aipe ke lamehel ahuwit angthin along nengchirilo. 52Aro Jisu agiyan pen, aro abo anengkan, aro Arnam aro munusi kajinso long kihari do-longo.
Currently Selected:
LUK 2: AMRI-BSI
Highlight
Share
Copy
Want to have your highlights saved across all your devices? Sign up or sign in
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.
