LUK 6
6
Kisang-Arni Alam Karju
(Mot. 12:1-8; Mrk. 2:23-28)
1Kisang-arni konam Jisu sok abithar arpatsi kidam jong amun, anang adun hel sok athe ingphrum ponhisi ari pen kahonot aro kicho. 2Manta angkhan Pharisi hel ke pulo, “Potsi asal kisang-arni tiki nangne, nali labang piyok te tikido?” 3Jisu pulo, “Dabhit po aro anang lokjor hel kangchir apot pot katiki nali chiporhe hlonghle yongma? 4Anang Arnam ahem lut damo, aro kanong atengke bangthe aparke bang helke kicho nangne Arnam kangton ahim ensi cholo aro alokjor helyok ta pilo?” 5Laparake anang analiyok pulo, “Arleng Aso si kisang-arni ta ahemphu lo.”
Ari Atotwe Arleng poyok Kapame
(Mot. 12:9-14; Mrk. 3:1-6)
6Kamprek inirsi ke kisang-arni konam anang Arnam ahem lut damo aro paklango, aro lalong ancho-ari atot kangwe arleng ihut kido. 7Kanong paklang hel pen Pharisi hel anangyok kisang-arni kiso pameye ma pameme ma pusi langdun dingsi kido, ladi tangsi anali anangyok ado pahlong une. 8Anang anali kachiron than unphrot yongta, labang ari atot kangwe arlengpo yok pulo, “Nang thurnot aro holek wang arjap.” Anang thuro aro lalong arjapmo. 9Laparake Jisu anali yok pulo, “Ne nali thando, kanong longke kisang-arni akime katiki aphan ma akangho katiki aphan, ajiu kapajok aphan ma kapangho aphan?” 10Anang anali ahuwit yok chighurensi langsi, anang arleng poyok pulo, “Nang aripo pakeng.”Anang ladisi aripo pakengo, aro anang aripo medetno. 11Manta anali aneng kang ongo aro Jisu yok pot inghol unbo pusi ihut para ihut chirwal prup mo.
Jisu Bang Kere-Hini Adun Karwal
(Mot. 10:1-4; Mrk. 3:13-19)
12Minon la-arni adak Jisu inglong kartulpe yok kapingkit yok damo; aro ajo pangthang Arnam yok pingkitsi dolo. 13Aro konam tha-ango, anang adun hel yok taramo; aro analidak, bang kere-hini arwalo lake: 14Simon, anang menke Pitor bilo, aro anang muso Andriu po, aro Jams po, aro Johon po, aro Philip po, aro Bartholomiu po, 15aro Mothi po, pen Thomas po, aro Alphayus po aso Jams po, aro Simon anangyok “Patriyot po” ta kataram, 16aro labang Judas Iskaryot po, aphelke Jisu yok hutur arideng kichampipo, anang arwalsi, analiyok kangthir adun amen bilo.
Jisu Kapaklang Pen Kiso Kapame
(Mot. 4:23-25; Mrk. 1:35-39; Luk. 4:44)
17Jisu adun hel pen inglong kartulpe para sunsi wango aro anang adun hel Judiya,
Jerusalem aro langpe akung kido Tayar pen Sidon para jokha rat akithe, adop athem ilong along arjapsi kido. 18Anali anang lam ka-one yok kiwang aro anali kiso bet pomar me detno. Si-ik ajiu kihap abangta wangsi me detno. 19Aro rat anang yok papholo, apotsi anang para ajakong damsi anali ahuwit pame detno, apotsi ahuwit arleng hel anangyok ki-ot chidhorelo.
Bor-eh Kichok Pen Kapherememe
(Mot. 5:1-12)
20Laparake Jisu adun hel langsi pulo, “Nali kicho kangwehel bor-eh chokman; piyok pu tene Arnam-alongri nali phansi. 21“Minon kangchir abangke bor-eh chokman; piyok pu tene nalipok chipang krang hlonge. Minon kasuru abang bor-eh chokman; piyok pu tene nali ingnek hlonge. 22“Konam arleng hel Arleng Aso anat, naliyok sime, aro prek bisi, nali patharaknge, aro nali men kangho pusi mokol nali ujhare, la amun nali bor-eh chokman. 23Laba adin hangsolsi nengrongsi chokane; piyok pu tene ethakpe long naliphan banta akithe bipido; piyok pu tene anali atono sar-lar helta turki helyok katiki thot badisi tikilo. 24“Manta minon apuru kidochong abang konbak kaphere memedo! piyok pu tene nali abithang neng chipangsamo. 25“Minon kangkrang abang konbak phere meme do! piyok pu tene nali ingchir phak hlonge. “Minon ingneksi kido abang konbak kaphere meme do! piyok pu tene nali neng aduknge aro suru hlonge. 26“Konam naliyok lam akime kipu abang konbak phere meme do! piyok pu tene anali sar-lar helta turki asisik helyok, labadi mat matsi ka-ote.”
Hutur helyok Anengdok
(Mot. 5:33-48)
27“Manta, lam ka-one helyok thando, nali abithang kido huturhel yok nengdok; inghosi naliyok simman, analiyok me-at sal-lappon. 28Hao nali kipi abang yok bor-eh pi aro kangho nali katiki abangyok pingkit pi. 29Inghone bak ihi aga ang-om long nang ardep tene lahi aga ang-om longta anang pardep, inghone bak nang kut cholpo endet tene, nang cholta pa-en nang. 30Abangten kihang abang yok nang pene-bak pi aro nang para inghonebak pene-bak en tene, hang phakngek. 31Bang hel naliyok jibadi arkel-pasi tene, nali akime hlongman, nalita lahel yok ladine arkel-pasipon. 32“Nangyok nengdok abang yokne nali nengdok tene, pot te parklam une? Piyok pu tene papi abangta labadisi nengdokman. 33Nangyok akime katiki abang yoksi nali akime tikipi, tene pot te parklam une? Piyok pu tene papi helta papi yok ladisi tiki man. 34Nang bang para kapahlong chihasi analiyok nohok dhar pilo, tene nali pot parklam une? Labadike papi helta papiyok dhar piman. 35Manta nang huturhel yok nengdok aro akime tiki, aro nenghohene nohok dhar pi, lasi nali banta akithe hlonge aro kithechot Arnam Aso chiplang une; piyok pu tene kirap kidengde aro kangho arlengyok ta anangsi bor-eh piman. 36Nali Apa jibadi kajinso do, nali ta ladi kajinso chiplang.
Bang Helyok Kabisar
(Mot. 7:1-5)
37“Bangyok bisarek aro Arnam ta nali bisarse ye, bang helyok adai kalek aro Arnam ta adai nali kolkeye, bang hel yok ron aro Arnam ta nali rone; 38banta pinot, la-amun Arnam ta banta nalipi ye, me-at lin si, ber si, hujuk-hijirsi, papleng sopsi nali awamlong nangpi ye, piyok pu tene nang bang helyok kilin badisi nangyok ta nanglin phaknge.” 39Anang anali yok isi athenghlan thano, “Chotok arleng ihut, chotok ihut yok paklang pon unman ma? Anali bang-hini ahilik long jangbub beye ma? 40Adun ihut ke paklang poyok chipathe un-eh? Manta abangten kithekdet abangke, paklangpo badi ye. 41Piyok te nang bithang amek ber poke chilangle si, nang muso amek long kido mekber long langdo? 42Lale, pot badi nangbithang amek long kido mekberyok lalnglesi, O khoipo, nang mek para mekberso hek pibang, ladi alam nangmuso yok pu thekman? Ei aneng asik abang, ango nang bithang amekpo para mekberpo chihekne tinot, tangsi nang muso amekberpo kihek yok charphlen si lang une.
Thengpe Arong Pen Anang Athe
(Mot. 7:15-20)
43“Akime thengpe arongke akangho athe wang un-eh aro akangho thengpe arong ke akime athe wang un-eh; 44thengpe arongten yok athe kiwang para chiniman, ingsu-changprak arong longke dumuru athe wangwe aro angsu kido arong longke rihanthu athe wangweye. 45Akime arleng ke anang angthin mat-mat kime apuru para, akime abihini wangman, aro akangho arlengke akangho parasi, akangho bihini wangman; piyok pu tene aneng arlo kachiron ong para angho lam ingjeman.
Bang-hini Hem Kikem Arleng
(Mot. 7:1-27)
46“Nang piyok neyok, “Hemphu, Hemphu,” pusi ne taramdo, aro ne kipu alamthe hel tikike? 47Inghosi ne lamthe oneh aro mengpon, anang pot badi arleng, ne nali yok paklange. 48Ingho arleng hem kikem amun, parnuksi kituk, aro armu arlong athak bhiti ingholsi anang hem kikem arlengpo badi; lang-langjon alang thesi pangnum detno manta hempo me-at kikem anat pakrep un-eh yongo. 49Manta inghosi onesi tikike, anangke bhiti wene lungle athak hem kikem arlengpo badi. Langjon alang plengsi hempo chingholo, aro labang ahem chingho phrotno.
Currently Selected:
LUK 6: AMRI-BSI
Highlight
Share
Copy
Want to have your highlights saved across all your devices? Sign up or sign in
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.
