LUK 7
7
Sonturi Aghaipo Aturuyok Jisu Kiso Kapame
(Mot. 7:1-13)
1Jisu lamehel kipu tangdet aphel, anang Kaparnaum ayok damo. 2Roman Sonturi aghaipo nengdok turu ihut kido, aro arlengpo kisosi kithibo detno. 3Konam sonturi aghaipo Jisu alam arju hlongo, anang turupo kapame yok adhok Jihudi kithe kiding abangyok anang dung wang tolo. 4Konam anali Jisu adung wango, anali labang arlengpo yok khanangsi wangrap dun nange pusi, chingduksi thano, “Nang labang arleng aphan jinso nange, ladi kamichang arleng, 5piyok pu tene anang ili arlengyok nengdok man, aro anangsi hali Arnam ahem ihum kikempi.” 6Aro la-amun Jisu anali pen duno, manta konam anang hem adunghet hlengo apot, labang sonturi aghaipo alok helyok anang dung tolsi pathano, “Hemphu, nang bithang la-an chipaduk ngek, piyok pu tene nang nehem wang-kilut nange, ne michangche; 7lasi neta nangdung kidamyok ne michange puke chironre. Manta nang ithe lamthe thanot, aro la-amun ne turupo medetne. 8Piyok te pu tene ne manta bang aghai arlo arleng, ne arlo sonturi hel do; ne ihut ayok, “Damot,” pu tene, anang daman, aro bangyok, “Wangot” pu tene, aro anang wangman, aro ne turu po yok “Labang tiki” pu tene, anang tikiman.” 9Konam Jisu labangpo arju hlongo anangta asombhik hlongo, aro anang phel-phel kidun ratyok langsi, anang pulo, “Ne nali thando, ne ladi kikrol thip Israyel alongri yongta jat thek hlonghle yong.” 10Konam ingho aharahel yok kitol lahel sonturi salchakpo ahemyok chirul phakngo, la-amun anali turu poyok kime thek hlongo.
Nainlong Himepe Aso poyok Kapabur
11La-aphel jong-jongsi anang Nain rongso yok damo, aro adun hel duno aro jokha rat akithe anang pen duno. 12Anang rongso owa amahang angkihleng yok ke, ihut arleng thiri kiponbo ayok olesi kido. Kithi arlengpo anang aipe ihut detsi aso penso kido, aro anang himepe kido; aro rongso para rat ako-ong abangta anang pen kido. 13Konam Hemphu anangyok theksi, anang angthin arlo anangyok ingjinso meme hlongdetno aro anangyok pulo, “Suruyek.” 14Laparake anang pango chotsi damo aro kithi chondol po otdamo, aro kihrol pon arleng hel sangrulo. Aro Jisu pulo, “Ei riso po, ne nang thando, thurnot!” 15Kithi arleng ingthursi iningo aro lam thano, aro Jisu anang aipe arideng pilo. 16Anali ahuwit chiphere detno; aro anali Arnam bokhone lo, thano, “Ili sitem ihut turki aghai chiklango!” aro “Arnam anang arleng helyok wang raldo!” 17Labang Jisu alam Judiya alongri jon-jan aro ahuwit angbong alongri dung chitha-ang detno.
Johon Baptist po Ahara Kiwang
(Mot. 11:2-19)
18Johon po adun hel labang alam hel anangthan damo. Lasi anang bang-hini adunyok taramo, 19aro Hemphu adung analiyok tolsi anang paparju tolo, “Nangsi Johon po wang kipu ihutpo ma, ma hali inghonebak ihutyok inghong nang?” 20Konam anali bang-hini Jisu adung wango, anali pulo, “Johon Baptist po lam karjuyok nangdung haliyok wangtol do, “Nangsi kiwang nangepo ma, ma hali kamprek ihutyok inghong nang?” 21Jisu lajongsi amokha kiso arlenghel, biyadhi kisohel, aro si-ik kihap, aro chotok arlengyok amek pathek pilo. 22Aro anang Johon po ahara helyok puphakngo, “Damot aro nali potsi thekngo ma aro arju hlongo ma, dam phakne Johon po yok thandamot: chotok hel amek thekngo, kengkok hel akeng damo, arje-ibeng kiso medetno, nothong abang arju hlongo, kithi abang ingthuro, kiduk kicho-kangwe abangyok kime-alamthe thano. 23Aro inghosi nelong kangho hlonghle, anang bor-eh chokdo.” 24Konam Johon po ahara hel tikangsi kidam aphel Jisu rat helyok Johon po alam thano, “Nali ingnam aju olene kidam amun pot te kilang yok kidam? Ingkra arong tomon kahujuk kilangyok ma? 25Tene pot kilang yok kidam? Kangduk ape kachi-ikyok kilang aphan ma? Langot, inghosi klarjo ape chi-iksi nengrongsi adin parkan man, anali recho ahemsi doman. 26Tene pot kilangyok kidam? Turki poyok kilang aphan ma? Oik, ne naliyok pu bang, aro turki poyok ta kithe chotpo yok kilangdam. 27Piyok pu tene turki yokta kithechotpo alam wisi labadi pudo, ‘Langot, nang ngo-ngo si ne ahara poyok toljong do, anangsi naliphan duwar honjok piye.” 28Ne nali thando, arloso para kiplang arleng adak ke Johon po thechot, manta ethakpe-alongri longke inghosi kibek yokta kibekchot posi Johon yok ta aghaichot.” 29Aro ahuwit arleng aro kalukdar hel anang lam arjusi, Johon Baptist po para baptist chiplangsi, Arnam ke bisar-kangthir pusi mengo. 30Manta Pharisi hel pen Kanong paklang hel Johon po para baptist chiplangple si Arnam angden anali natsi akijol otelo. 31“Tene labang owepo yok pot pente pangbar nang? Aro anali ingho badi? 32Anali hathi long kangning osohel badi aro ihut para ihutyok chitaramjosi kachipu badi, ‘Hali nali phan muri butpilo, aro nali kanke yongo; hali kasuru ghuk-ghuk, aro nali aneng dohojinje yongot.’ 33Johon Baptist po kiwang manta anang choche junjesi kido, aro nali kipu, ‘anang penke si-ik ajiu do;” 34Arleng Aso wangsi cholo aro juno, aro nali ke pudo, “Langot, ihut kicho akhok aro hor kangri, anangke kalukdar hel aro papi hel alok. 35Layong ta, Arnam agiyan po ke khanang pusi anang aso hel parasi aporman hlongdo.”
Ihut Papi Arloso yok Kironpi
36Pharisi ihut Jisu yok anithu anang kichoyok anang hem taramo, aro Jisu anang hemyok damo aro kicho anghol along iningo. 37Aro rongso long ihut arloso kido, anang papi kido, Jisu Pharisi ahem anang cho-jun long do kipu arju hlongosi, anang bati papleng klaksi kanempru jangthu wano. 38Anang Jisu aphel arjapsi, surusi kido, aro Jisu akeng long chamo aro anang chupen wenpono. Laparake anang keng mungo aro akeng hel jangthu helo. 39Minonke anang yok kataram Pharisipo labang theksi, anang abithang yok chipulo, “Labang arlengpo khanangsi turki pu tene anang bangpe papi arlosope inghosi anangyok ot do— kithek nangelo.” 40Jisu lam thano aro Pharisi poyok pudakngo, “Simon, nangyok ne penebak kipu chet alam do, “Paklang po,” Pharis po pulo, “Nethan not.” 41Jisu thanpon no, “Hem-kimepo nohok ki-en arleng bang-hini kido; ihutke anang para phoro kep phongo tanga atheng aro ihut poke kep phongo eno. 42Konam bang hini ta nohok wolphak un-eh yongo apot hem-kimepo analiyok rono. Minonke dak bangpo yoksi anang nengdok chotne?” 43Simon po puphakngo, “Ne ingthin badike, kiron chotpo yok, anang si.” Jisu pulo, “Nang asereng alam pudo.” 44Laparake anang arlosope aga langsi Simon po yok pulo, “Labang arlosope yok thek do ma? Ne nang hem lutdamo; manta nang nekeng kachicham yok lang nepipe yongo, manta arloso pe mek-kri pen nekeng chamo aro anang achu pensi nekeng hel weno. 45Nang nemungme yongo, manta ne wang-kilut amun para nekeng kimung yok tikangke yong. 46Nang nephu jangthu helhe yongo, manta anang nekeng jangthu helo. 47Lasi, ne nangyok thando, anang pap mar, ong-ongo, labang rontango; la-anat anang nengdok chot paklango. Manta inghoyok beksosi ronman, beksosi nengdokman.” 48Laparake Jisu arlosoyok pulo, “Nang pap hel ron tango.” 49Manta ingho kicho ahong long kangning abang anali kido adak chithano, “Ingho te labang po ke, pap yok ta kiron unpo?” 50Aro anang arlosope yok pulo, “Nang kikrol si nang ralo; nengsamne damot.”
Currently Selected:
LUK 7: AMRI-BSI
Highlight
Share
Copy
Want to have your highlights saved across all your devices? Sign up or sign in
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.
