LUK 8

Angkhan Arloso Jisu Pen Kidun

1Bekso aphel anang rongpe aro rongso hel aga Arnam-alongri kime-alamthe parjusi aro pahar-woro. Bang kere-hini adunta anang pen kido, 2aro angkhan arloso hel adak si-ik ajiu aro bet hel para kime arloso kido, Mary pe, lake Megdalini pe ta puman, ingho pe para thorok isi si-ik ajiu ka-ujhar, 3aro Herod po asal aphu-phang Johana pe apihan Chuja po aro Susana pe aro amokha arloso anali pen kido, labang arloso hel abithang boi-bihini parasi analiyok al-poson ensi kido.

Chili Kirip Athenghlan

(Mot. 13:1-9; Mrk. 4:1-9)

4Konam rat akithe wangsi chingrumo aro rongpe para rongpe arleng anang dung wango, anang athenghlan pensi pulo, 5“Ihut chili kirip arleng chili kiripyok olesi damo; anang kirip amun adhok chili duwar akung jang damo; aro dongsinek ngo, aro athak kangjar awohel wangsi chodetno. 6Angkhan arlong athak jangdamo; aro arong wango, lungle ajip kangwe apotsi kreng dapmo. 7Angkhan ingsu-aju jang damo, aro ingsu hel thelo aro sok arong hel jol-detno. 8Angkhan lungle akime long jang damo, aro arong thelo, bangpo phoro isi athe wango.” Anang than tangsi, anang hang-hangsi pulo, “Ingho si ano do tene onenot.”

Athenghlan Kipu Alam Aron

(Mot. 13:10-17; Mrk. 4:10-12)

9Laparake Jisu adun hel labang athenghlan acho alampo anangyok arjulo. 10Aro anang pu-phakngo, “Arnam-alongri kabutisit acho alam the-re ayok nali pido; manta angkhanke lang yong ta thekthe ye, aro oneyong ta abhu hlonghle ye, la anat anali phan ke athenghlan pensi pu pon do.

Chili Kirip Athenghlan Kithandak

(Mot. 13:18-23; Mrk. 4:13-20)

11“Minon athenghlan ke labadi: chili amuke Arnam alam po lo. 12Duwar akung kijang dam chili amu ke karju hlong abang; laparake si-ik wango aro Arnam alam anali angthin arlo para pon detno, lasi anali kikrolkre yongo aro chipajok un-eh yongo. 13Arlong athak kijang dam chili amu poke lahelo, inghosi, konam lam arju hlongo, nengrongsi kachideng arleng. Manta anali angkur kangwe anat; anali bekso adin krolo aro aphel honjat wangsi chirulphak ngo. 14Ingsu aju kijangdam chili amuhel, anali arju hlongo; manta anali arni ding parake abithang ajiubong, lungle-phalang, aro labang aneng arong marsi jol detno aro anali athehel mengme yongot. 15Manta lungle akime athak kijang dampo lamthe arju hlongo aro anangthin pabek hopsi aro kime aneng pensi, aro kachihi kachipaneng ding athe wango.”

Pachik Arlo Kido Asati

(Mot. 4:21-25)

16“Kaita sati pakarsi pachik kuklak ke bibe, lale ki-ih ahong arlo bibe; manta hem arlo kilut abang yok katha-ang kihlong ayoksi gosa athaksi biman. 17Piyok pu tene chiklang kleye, labadi isi abihini wepen; aro inghoyok chithan un-eh ye, aro chiklang dakdeye, ladi penebak kachibuti un abihini wepen. 18Tene, nali pot badi onedo, bangpo meso chilang, piyok pu tene ingho dochong do, anangyok pisi doye, manta ingho jatsi ingjong, anang potsi dolang pusi chiron, bangsota anang para pondetne.”

Jisu Anang Ai Pen Amuso Hel

(Mot. 12:46-50; Mrk. 3:31-35)

19Laparake Jisu anang ai pen amuso hel anang dung wango manta rat ki-ong anat anang pen papochak un-eh yongo. 20Aro inghone bak Jisu yok pulo, “Nang ai pen nang muso hel mokol long arjapsi do aro nangyok kapochaknge aneng do.” 21Manta Jisu analiyok pulo, “Ingho si ne lamthe one-si mengpon, analisi ne ai pen nemuso.”

Jisu Tomon Kapangsam

(Mot. 8:23-27; Mrk. 4:35-41)

22Inirsi Jisu adun hel pen tilong athak arlulo, aro anang lahel yok pulo, “Langpepe haga apar chirpatne dam nang dou.” 23Anali langpe long kidam jong ako, Jisu amek jango. Iphong tomon akithe langpepe athak angjapmo aro tilong along lang pleng rang rango. Lasi anali phere meme ongo. 24Adunhel Jisu adung damsi anang pangthur damsi pulo, “Hemphu, Hemphu, halike thi hlongbo.” Jisu ingthursi tomon aro lang adulpo yok tamo; tomon hel ingsamo, aro dosit no. 25Jisu adun hel yok pulo, “Nali kikrol daklong te?” Anali asombhik hlongo aro chipheresi analidak chipujolo, “Labang arlengpo inghote? Anang than tene tomon aro langpe, anangyok mengman.”

Si-ik ajiu Kachu-u Arlengyok Jisu Kapame

(Mot. 8:28—9:1; Mrk. 5:1-20)

26Laparake anali Galili langpe kido Gerasa alongri yok wang hlengo. 27Lungle athak sunsi anang si-ik ajiu kihap arleng pochakngo. Jokha arni kiding anang pe-rik wephosi, aro anang hemlong dode manta thiri longsi kido. 28Anang Jisu yok theksi suru-wongo aro abithang Jisu akeng long otsi pulo, “Nang Arnam aghai Aso, nang ne pen pot te asal katiki aneng do? Ne nang chingduk do, neyok adai piyek.” 29Piyok pu tene Jisu anang para si-ik ajiu olesi kidam yok kithan. Aphongten anangyok si-ik chu-uh lo; anang akeng ari hirkoli ingnaksi kibi; manta anang kapamet phrot aro si-ik ajiupen ingnam ajuyok kipon. 30Jisu laparake anangyok arjulo, “Nang men pot te?” Aro anang pulo, “Ne menke apal; piyok pu tene anang arlo amokha si-ik kilut. 31Anali Jisu yok jom along padam hlonghle yok, si-ik hel chindukngo. 32Minonke inglong agora long phak ipal chopansi kido; aro si-ik hel lalong kipalut damyok Jisu yok chingduk ngo. Lasi anang lahel yok kipalut dam hawang pilo. 33Laparake arlengpo para si-ik olesi wango aro phak apal long lutdamo aro ajhak dungsi langpepe agora yok katno aro lalong para lang long jang dam plupsi thilo. 34Phak kihon arleng hel kachiplang apotmar lang dingsi kido. Lasi anali kat-katsi rongpe pen alongri dung than damo. 35Lapara arleng hel kachiplang apotmar kilang yok wang olelo aro anali Jisu adung kiwang yok ke arlengpo para si-ik kidam thek hlongo aro anang me-at ape-rik chi-iksi Jisu akung kangning theksi anali chiphere detno. 36Kithek abangke si-ik kihap arlengpo pot badi anang melo labang alam thano. 37Lapara-ke Gerasa alongri dung arleng kapheresi anali Jisu yok labang athem para tikangsi kidam yok chinduk-ngo. Lasi anang tilong athak arlusi, chirulo. 38Si-ik ajiu hel olene kidam arlengpo anang pen kidun yok chingdukngo; manta Jisu tol hrolsi pulo, 39“Nang hem yok dam phak, aro Arnam nang phan konbak tikilo ma parju dam.” Lasi damo aro konbak anang phan Jisu tikilo, rongpe dung thandam-woro.

Jairas Asope yok Panghrengo Aro Arlosope Pamelo

(Mot. 9:18-26; Mrk. 5:21-43)

40Minonke konam Jisu chirulo, rat hel anangyok chingdeno, piyok pu tene anali anang yok inghong dingsi kido. 41La amunsi Jairas amen, Arnam ahem thawang ihutpo wango. Anang Jisu akeng ari otsi anang hemlong kiwang yok chindukngo. 42Piyok pu tene anang nengkan kere-hini abo kichok, asope ihut detsi kido aro anang kithibo detno. Jisu damsi kido ako rat hel pimpro-soro lo. 43Lalong nengkan kerehini awi kiboi jong kiso arloso ihut kido aro ojha chilangsi jokha panghono, kaita anangyok pame un-eh yongo. 44Anang anang aphel aga wango aro Jisu pe apre otno, aro photsi awi kiboi jutno. 45Laparake Jisu arjulo, “Ne yok ingho te otno?” Ahuwit ta ot-eh yong pusi hoi choche yongo apot, Pitor po pulo, “Hemphu, arleng hel nangyok chikomwelsi do.” 46Manta Jisu pulo, “Inghone bak ne yok ki-ot; piyok pu tene ne para ajakong kidam, ne atot hlongo.” 47Konam arlosope, chibuti un-eh pusi chithan unsi, anang klem phlak-phlaksi wango, Jisu angot chinduksi, piyok anat anangyok ki-ot, aro pot badi jongsi kiso melo, labang alam rat ango thano. 48Anang anangyok pulo, “Ei osope, nang kikrolsi nangyok pajokngo; nengsamne damot.” 49Konam anang lam than jong si kido amun, Arnam ahem thawangpo ahem para inghone bak wangsi Jairas poyok pulo, “Nang sope thilo aro Paklang poyok jat aduk piye not.” 50Konam Jisu labang kithan arju hlongo anang pu phakngo, “Phereyek, krolnot, labangsi nang pajoknge.” 51Konam anang hem wango, Pitor po, Johon po aro Jams po aro oso pe anang pa aro anang ai aparke kai yokta anang pen palut tolte yongo. 52Anali aneng aduksi surusi kido; manta anang pulo, suruyek, piyok pu tene anang thithe yong ameksi jangdo. 53Aro anang thilo kipu theksi anali anang yok ingneksol lo. 54Manta Jisu anang ari otsi taramo, “Ei mai, thurnot,” 55Anang jiuli wang phakngo aro photsi anang ingthuro laparake anangyok penebak kicho apot kapapi yok anang adiha pilo. 56Ape-apo asombhik hlongo; manta anang kachiplang apot mar kai yokta pathan hlonghle yongo.

Currently Selected:

LUK 8: AMRI-BSI

Highlight

Copy