Genesis 30
30
1Raxels ge Jakobas ǁoraba ǁoa ǃkhaisas ge mû, o kaise ǃgâsasa suri tsî Jakoba ge mîba: “ǀGôana mā te, ǁnā tamas ka io ta ge nî ǁō.”
2Ob ge Jakoba kaise ǁîs ǀkha ǁaixa tsî ge mî: “Tita ge Elob di soasa a ū ǁoa. ǁÎb ǀguib ge sas nî ǀgamǀkhā ǃkhaisa ǁkhae hâ.”
3Os ge ǁîsa “O ǁnâi ti ǃgās, Bilhasa ū îts ǁîs ǀkha ǁomǀhao, îs ǁîsa tita ǀgôa-e ǁoraba. O ta kom ǁnā ǀgaus ai ǁîs ǃnâ-u a ǁgû kai ǁkhāo” ti ge mî. 4Tsîs ge Bilhasa ǁîs aoba ge mā tsîb ge ǁîba ǁîs ǀkha sorosise ge ǁgoe. 5ǁÎs ge ǀgamǀkhā tsî Jakoba aore ǀgôaba ge ǁoraba. 6Os ge Raxelsa “Elob ge ti ǃgâib ǃoa ǀgoraǃgâ tsî ti ǀgoresa ǁnâu-am tsî ǀgôaba go mā te” ti mî tsî ǁîba Dan#30:6 Dan: Nē ǀons ge Hebregowab di mîs ǃgâib ǃoa ǀgoraǃgâ ti hâs khami ra ǀō. ti ge ǀonǂgai. 7ǁKhawas ge Bilhasa ǀgamǀkhā tsî Jakoba ǀgamǁî ǀgôaba ge ǁoraba. 8Os ge Raxelsa “Kaise ta go ǀgaisa ǃkhamsa ti ǃgâsas ǀkha ūhâ i, xawe ta ge go dan” ti mî tsî ǁîba Naftali#30:8 Naftali: Nē ǀons ge Hebregowab di mîs ǃkham ti hâs khami ra ǀō. ti ge ǀonǂgai.
9Leas ge ǁoraǀûs hâ ǃkhaisas ge mûǂan, o ǁîs ǃgās Silpasa Jakoba taras ase ge mā. 10Tsîs ge Silpasa Jakoba aore ǀgôaba ge ǁoraba. 11Os ge Leasa “ǃGâiǃgâ ta ge go” ti mî tsî ǁîba Gad#30:11Gad: Nē ǀons ge Hebregowab ǃnâ ǃgâiǃgâ ti ra ǂâibasen. ti ge ǀonǂgai. 12Silpas ge ǁkhawa Jakoba ǀnî ǀgôaba ǁoraba 13os ge Leasa “Tarekōse ta a ǃgâiǃgâ! Nēsisa di ge hoaraga khoede ǃgâiǃgâse nî ǃgapaǀî te” ti mî tsî ǁîba Aser#30:13Aser: Nē ǀons ge Hebregowab ǃnâ ǃgâiǃgâ ti ra ǂâibasen. ti ge ǀonǂgai.
14ǃHoroǃgaoǁaeb aib ge Rubenna ǃgarob ǁga ǃgû tsî dudaimǂûna#30:14 Dudaimǂûna: Nēn ge haiǂûn ǀnamǀnamxūn ase gere sîsenūhe tsî ǁkhāti ǂûtanioǃnâsiba ra huises tsîna gere ǂgomhena. Leasa ǃgaroba xu ge hā-ūba. Os ge Raxelsa “Toxopa sa ôab go hā-ū dudaimǂûn xa au te re” ti Leas ǃoa ge mî.
15Os ge Leasa ge ǃeream: “Ti aobas ge ūxū te ǃkhais ǀkhas ǂâu tama hâ, os ti ôab go hā-ū dudaimǂûn tsîna ra ūxū te ǂgao?”
Os ge Raxelsa “Sa ôab di dudaimǂûn xas ga mā te, os ge nēǃoe Jakob ǀkha a ǁom ǁkhā” ti ge ǃeream.
16Jakob ge ǁnāǃoe ǃgaroba xu oahā os ge Leasa ǃgûǃoa bi tsî ge mî: “Sats ge nēǃoe tita tawa nî ǁom, ti ôab di dudaimǂûn ama ta go ǁamaǃkhuni tsi xui-ao.” Ob ge ǁîba ǁîs ǀkha ǁnāǃoe sorosise ge ǁgoe.
17Ob ge Eloba Leas di ǀgoresa ge ǁnâu tsîs ge ǁîsa ǀgamǀkhā tsî koroǁî aore ǀgôaba Jakoba ge ǁoraba. 18Os ge Leasa “Elob ge nē ǀgôaba mādawa-ams ase go mā te, ti ǃgāsa ta ge ti aoba mā hâ i xui-ao” ti mî tsî ǁîba Isaskar#30:18 Isaskar: Nēs ge Hebregowab di khoeb ge go ǀkhupihe tamas ka io ǁnāpa i ge mādawa-am-e hâs khami ra ǀō. ti ge ǀonǂgai. 19ǁKhawas ge ǁîsa ǀgamǀkhā tsî ǃnaniǁî ǀgôaba ge ǁora. 20ǁÎs ge “Elob ge ǃgâi ǀkhaeba go mā te tsîb ge ti aoba nēsisa ǃnani ǀgôaga ta go ǁoraba bi xui-ao nî ūǃoa te” ti mî tsî Sebulon#30:20 Sebulon: Nēs ge Hebregowab di ūǃoas tamas ka io ǀkhaes khami ra ǀō. ti ge ǀonǂgai bi. 21Egas ge ǁîsa tare ǀgôas, Dina tis ge ǀonǂgaisa ge ǁora.
22Tsîb ge Eloba Raxelsa ge kōǀî. ǁÎb ge ǀgoredi âsa ge ǁnâu-am tsî ǁîs nî ǀgôana ǁora ǁkhā ǃkhais di īǁkhāsiba ge dī. 23Tsîs ge ǁîsa ǀgamǀkhā tsî aore ǀgôaba ge ǁora. Os ge “Elob ge ti ǃharaxūba tita xu go ūbe, ǀgôaba mā tes ǀkha. 24Ab ǃKhūba noxopa ǀnî ǀgôaba mā te” ti mî tsî ǁîba Josef#30:24 Josef: Nēs ge Hebregowab di ab ǀnî-e mās tsî ǁîb ge go ūbēs tsîra khami ra ǀō. ti ge ǀonǂgai.
Labanni ge Jakoba ra gāxaǃnâ
25Josefi di ǃnaes khaoǃgâb ge Labanna Jakoba ge mîba: “A ta doe î ta ti ǁgûsi ǃhūb ǃoa ǁaru. 26Ti tarara tsî ti ôan, sîsenni ǃnâ-u ta ge ǃoaǂuina mā te re, î ta doe. Aitsamats mâtikōse ta ge ǃgâise ǃoaba tsi ǃkhaisa ǂan xuige.”
27Ob ge Labanna ge ǃeream bi: “Tita ge ǃKhūb ge tita sats ǃaroma ǀkhae ǃkhaisa ra hōǃâ. 28Xuige tare-e ta nî matare tsi ǃkhaisa mî re, o ta ge ǁnāsa nî dī.”
29Ob ge Jakoba ge mî: “Sats ge mâti ta ge sîsenba tsi ǃkhais tsî mâtin sa ǀgoana ti ǃûis ǃnâ ǃgôab ǃnâ ge ǀarosen ǃkhaisa ǂan. 30Tita nî hās aiǃâts ge ūhâ i xūron ge kaise ge ǀarosen tsîb ge ǃKhūba tita ga ǃgû ǃkhai-i hoa-i ai gere ǀkhae tsi. Xui-ao i ge nēsisa go tita nî ti xūna kōǃgâ ǁaexa.”
31Ob ge Labanna Jakoba “Tare-e ta nî matare tsi?” ti ge dî.
Ob ge Jakoba ge ǃeream bi: “Tita ge matare-e ǂgao tama hâ, xawets ga sao ra ǃkhaisa ta nî dīsa mā-am te, o ta ge sa ǀgoana a kōǃgâba tsi ǁkhā: 32A ta sa ǀgoan hoan ǃnâ ǃgû tsî hoaraga ǁgani tsî ǂura gūn tsî mâ ǂnū ǁkhao-i hoa-i tsî pirin ǃnâ ga hâ ǁgani tsî ǂurana khaiǂui re tsîs ge ǁnāsa nî ti matare. 33ǁNā ǀgaus aits ge ǃgoaxaǁaeb ǃnâ mâtikōse ta a ǂhauǃnâ-ū tsi ǃkhaisa sats ge mā te mataresats ga hā kō, o a ǂan ǁkhā. Mâts ga ti ǃharas ǃnâ hā hō ǁgani tamas ka io ǂura tama piri-i tsî ǂnū tama gū-i tsîn hoanats ge satsa xu ta ǃnari hâse a ǃgapaǀî ǁkhā.”
34Ob ge Labanna “Ā, o a-i mîts go khami ī re” ti ge ǃeream. 35Xaweb ge ǁîba ǁnā tsēs ǂûs ai anxa tamas ka io ǂūra aore pirigu tsî hoaraga ǁgani tamas ka io ǂura tamas ka io ǃuri ǃkhairona ǁîdi ai ūhâ piridi tsî ǁkhāti hoaraga ǂnū gūn tsîna khaiǂui tsî ǁîb ôagu ǃereams ǃnâ ge mā. 36Tsîb ge ǁîba Jakoba xu ǃnona tsēdi ǃnūsib kōse ǀgoan âb ǀkha ge bē. Tsîb ge Jakoba nau ge ǃgau ǀammi Labanni ǀgoan diba ge ǃûi.
37Ob ge Jakoba ǃam ǁnâugu ǃnona kai haidi diga ū tsî ǀnî ǁûga gere ǂgaeǁnâǀkhā, ǃuri ǁgaraga gu nî ūhâs kōse. 38Tsîb ge nē ǁnâuga ǀgoan aiǃâ, ǁîn di āǃnâǁgorogu ǃnâ gere ǁgui, ǀgoan gere āǃgûǀkhīn kao ǀhurugu xui-ao. 39Pirin ga nē ǁnâugu aiǃâ ǀhurugu o di ge piride ǂura, tsî ǁgani ǂkhampirirona gere ôa.
40ǁKhātib ge Jakoba pirina gūna xu ǀgorasase ūhâ tsî ǁîn aide ǂura tsî ǂnū ǀgoan Labanni din di ǀkhāb ǁga gere ǃoa kai. Nē ǀgaus aib ge ǁîba ǁîb di ǂhunuma ǀgoana ge omkhâi xaweb ge ǁîna Labanni dina xu ǃkharagase gere ūhâ.
41ǂUru tsî ǀgaisa ǀgoan ga ǀhurugu ob ge Jakoba ǁnâuga āǃnâǁgorogu ǃnâ gere ǁgui în ǁîna nē ǁnâugu tawa ǀhurugu. 42Xaweb ge ǁîba ǂkhabusa ǀgoan ga hā āo, ǁnâuga ge ǁgui tama hâ i, tsîn ge ǁnā ǂkhabusana ge Labanni di ǀgoa i tsî ǀgaisana Jakob di. 43Nē ǀgaus aib ge Jakoba ge ǃkhūǁî kai. ǁÎb ge ǂgui ǀgoan, ǃgān, ǃnain tsî dâukina ge ūhâ i.
Currently Selected:
Genesis 30: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
