Genesis 31
31
Jakob ge Labanna xu ra ǃhū
1Jakob ge Labanni ôagu ra “Jakob ge sage îb di ge i hoaraga xūna ge ū. Hoaraga ǃkhūsib ǁîb dib ge sage îb xūna xu ge hā” ti mî hîa ge ǁnâu. 2ǁKhātib ge Labanni tsîn ǁîb ǃoagu a aiosa tsî ǀnaib ge ī i khami ī tama ǃkhaisa ge mû. 3Ob ge ǃKhūba “Oa re sa ǁgûsi ǃhūb tsî sa ǀaokhoen ǁga. Tita ge nî hâǀkhā tsi” ti ge mîba bi.
4Ob ge Jakoba Raxels tsî Leas hâra ge ǂgai kai, ǃgarob ǃnâ ra nî ǀgoan âb tawa ǀhao-ū bise. 5Tsîb ge ǁîra ge mîba: “Tita ge saro îb ǀnaib ge ī i khami ti ǃoagu ī tama ǃkhaisa ra mû, xaweb ge ti îb di Eloba tita ǀkha hâ. 6ǁKhāti ro ge saro hoaro mâti ta ge saro îba hoaraga ǀgaib âtab ǀkha ǃoaba ǃkhaisa a ǂan. 7ǁGoasi ǀguib ge ǁîba tita gāxaǃnâ tsî ǂgui ǃnādi kōse ti sîsenamǃnâsa ge ǀkharaǀkhara. Xaweb ge Eloba ǁîb nî ǂkhôadī te ǃkhaisa mā-am tama ge i. 8Mâb ga Labanna ‘Anxa gūn tsî pirin ge nî sa sîsenamǃnâ’ ti mî ǃnās hoasan ge anxa ǁkhaoron tsî pirirona gere ôahe. Tsîb ga ‘ǂŪran#31:8 ǂŪran: ǀNî ǀkharigu ǃnâs ge nē mîsa Tō ti ra sîsenūhe. ge nî sa sîsenamǃnâ’ ti mî on ge ǂūra piriron tsî ǁkhaorona gere ôahe. 9Elob ge saro îba xu ǀgoana ū tsî tita gere mā.
10“ǀGoan ra ǀhurugu ǁaeb ǃnâ ta ge ǁhapo-i ǃnâ ǂkharapirigu hîa ra piride ǀhurugu ǂura, ǁgani tsî anxa ǃkhaisa ge mû 11Ob ge Elob di ǀhomǃgāba ‘Jakotse’ ti ge ǂgai, o ta ge ‘Nē ta ge a’ ti ge ǃeream. 12Ob ge ǀhomǃgāba ge mîba te: ‘Hoaraga ǂkharapirigu hîa ra ǀhurugu ge ǂura, ǁgani tsî a anxa. Tita ge nēsa Labanni ra mâti ûi-ū tsi ǃkhaisa ta ge mû, o ge dī. 13Tita ge ǁnā Elota Betels, ǁîs tawats ǀuisa ǂâiǂâisenxūse mâi tsî ǁîs ai ǀkhera-oli-e ǂnâǂui tsî nūsa dīs tawa satsa ge ǂhai ta. Xuige ǂhomisen re, sats ge ǃnaeǃnâ ǃhūb ǁga oasa.’ ”#Gen. 28:18-22
14O ra ge Raxels tsî Leas hâra ǁîba ge ǃeream: “Sim di îba xum nî ǀumi xū-i xare-i ge a ǀkhai. 15Tsîm kha sima ǃhaokhoen khami ǁîb xa ûi-ūhe tama hâ? Sima ǁamaxū tsîb ge ǁîba sim ǃaromab ge matarehe mari-i hoa-e ge hapu. 16Hoaraga ǃkhūsib Elob ge sim îba xu ūb ge sim tsî sim ôan di, xuige Elob go mîba tsin hoana dī.”
17Ob ge Jakoba ǁîb ôan tsî tarara tsîna ǃnain ai ǃnao, 18hoaraga ǀgoan tsî Padan-Arams ǃnâb ge hōbasen xūn tsîna ū tsî ǁîb îb, Isaki Kanaani ǃnâ hâb ǁga ge ǃgû. 19Labanni ǁîb gūna ǂkhomǃgû hâ hîas ge Raxelsa ǁgûb di omeloga ge ǃnari. 20Jakob ge Labanna doeb ra ǃkhaisa mîba tama is ǀkha ge gāxaǃnâ. 21ǁÎb ge hoaraga xūn ūb ge hâ ina ū tsî ǃnoesase ge doe. Eufratǃāba ǃgâu tsîb ge Gileadǃhūb ǁga ge ǃgû.
Labanni ge Jakoba ra ǃgôaǃgon
22ǃNona tsēdi khaoǃgâb ge Labanna Jakob ge ǃhū ǃkhaisa ge ǁnâu. 23Ob ge khoegu âba ū tsî hû tsēde ge ǃgôaǃgon bi, Gileadǃhomǀkharib ǃnâb ge sī hō bis kōse. 24ǁNā tsuxub ǃnâb ge Eloba Labanna ǁhapos ǃnâ ǂhai tsî ge mîba: “ǃÛisen re Jakob ǃoaguts ǃgâi tamas ka io tsūse ǃhoa tide ǃkhaisa.” 25Jakob ge ǁîb hâǃkhaiba ǃhommi ai ge ǂnaumâi hâ i tsîb ge Labanna khoen âb ǀkha ǁîb di hâǃkhaiba Gileadǃhomǀkharib ǃnâ ge ǂnaumâi.
26Tsîb ge Labanna Jakoba ge dî: “Tare-i ǃaromats tita ǁnāti gāxaǃnâ tsî ti ôara torob di ǃkhōsaben khami go ūbē? 27Tare-i ǃaromats ǂganǃgâsasib ǃnâ tita xu go duni? Mîba tets ga hâ, o ta kom ǃkhomǃkharurus tsî harps ǀōb di ǃgâiaǂgaob tsî tsanadi ǀkha ga ǁnū tsi hâo. 28Xawets ge ti ǁnuriǀgôan tsî ti ôara tsîna ta nî tawedeǁnāxū ǃkhais tsîna mā-am te tama go i. Gâre xū-ets ge go dī! 29Satsa ǂkhôadīs di ǀgaiba ta ūhâ, xaweb ge sa îb di Eloba ǁanǃoe sats ǃoagu ta ǃgâi tamas ka io tsūse ǃhoa tidese go ǃkhâikhom te. 30Kaisets goro sa ǁgûsi ǃhūb ǃoa ǁarusa ǁkhore ǃkhaisa ta ge a ǂan, o tare-ets go ti omeloga ǁnâi ǃnariba?”
31Ob ge Jakoba ǀuiǁgûba “Tita ge sa ôarats nî ūxū te khami tsâ tsî goro ǃao. 32Xawe sa omelogu ǃnās xasa, nēpa i kom khoe-i ǁîga ǃnari hâ-e ga hâo, ǁî-i ge ǁōb ǃoa nî ǀgoraǃgâhe. Xuige sida mâ hîa kō îts sa ka xū-i hoa-e ū” ti ge ǃeream. Nēsab ge mî ob ge Jakoba ge ǀū i, Raxels ǁgûb di omeloga ǃnari hâ ǃkhaisa.
33Labanni ge Jakob, Leas tsî ǃgāra di tentdi ǃnâb ge ôa xawe ǁîb di omeloga ǁnāpa hō tama i, ob ge Raxels tentoms ǁga ge ǃgû. 34Raxels ge nē omeloga ū tsî ǃnaisals di ǁgaru-i ǃnâ ǂgā tsî ge ǂnû-ai. Tsîb ge Labanna hoaraga tentoms ǃnâb ge kaise ǂōrisase ôa xawe ge hō tama i. 35Os ge Raxelsa ǁgûba ge mîba: “Tā toxopa khâi tama ta hâ ǃkhais ǃaroma ǁaixa-ū te re, ǁkhâǀaesenna ta ūhâ xuige.” Ob ge Labanna ôa tsî ǁîb di omeloga hō tama ge i.
36Ob ge Jakoba ge ǂkhîoǃnâ. Tsîb ge ǁaixa hâse Labanna ge dî: “Tare-e ta tsūdī hâ? Mâ ǂhanu-i, ǁî-e ta ǃûǂam hâ xui-aots go ǃgôaǃgon te-ets kha satsa ūhâ? 37Hoaraga tentdi ǃnâts go ôa, o tare-i sa omǃnāb di-i hîa a sa-ets go hō? Nēpa sa khoegu tsî ti khoegu tsîn di mûǁae ūǂui î gu mû tsî sakhom xab tariba ǂhanu ǃkhaisa ǀgoraǃgâ re. 38Tita ge ǀgamdisi kurigu ǁaeba sats ǀkha ge hâ i. Nē ǁaeb ǃnâ di ge sa gūdi tsî piridi tsîna ge ǂkham tama hâ i. ǁKhāti ta ge sa ǀgoana xu bai-i tamas ka io ǂkharapiri-i tsîna ge ǂû tama hâ i. 39Mâ ǃnās ǀgoa-i ga ǃguru-i xa ǃgamhes hoasa ta kom tita ǁnā ǂoaǃnâs ǃereamsa gere ūo. Tsî ta ge tita ǁnās ǃnâ ta ǀhapio ǃkhaisa ta nî ǁgause ǁîna sa ǁga tani tama hâ i? Tsîts kom satsa ǁkhāti mâ xū-i hîa ga tsēa tamas ka io tsuxub ǃnâ ǃnarihe-i hoa-e ta nî mā-oa tsi ǃkhaisa gere ǂgaoǀkhā teo. 40ǂGui ǃnāde ta ge tsēa ǀgammi xa tsî tsuxub ǃnâ ǃkhaib xa gere dītoahe, tsîs ge ǂoms tsîna gere bēxū te. 41Nēs ge sats ǀkha ta ge hâ i hoaraga ǀgamdisi kurigu ge ī i ǀgausa. Disihakaǀa kuriga ta ge satsa sa ǀgam ǀgôara ǃaroma ge sîsenba, tsî ǃnani kuriga sa ǀgoan ǃaroma. Xawets ge ǁnās tsîn ǃnâ disi ǃnādi kōse ti hōdawasa ge ǀkharaǀkhara. 42Ti îkha, Abrahammi tsî Isaki di Elob ga tita ǀkha hâ tama hâ, ots ge satsa ǀnai tita ǀkhaiǃomse ga sî-oa hâ. Xaweb ge Eloba tita gere tsâ ǃgommi tsî sîsenni dī ta gereb tsîna ge mû tsîb ge ǁîba ǁanǃoes ǃnâ ǁîb di ǀgoraǃgâsa go dī.”
Labanni tsî Jakob hâkha ǁaegu hâ ǃgaeǀhaos
43Ob ge Labanna Jakoba ge ǃeream: “Nē ǂkham khoera ti ôa, ǁîra ôana ti, nē ǀgoana ti ti i ge ī. Hoaraga xūn hîats ra mûn ge a ti. Tare-i ǃaroma ta ǁîra tsî ǁîra ge ǁora ǀgôana nî ǂkhôadī? 44ǀKhī î khom ǁnâi sakhoma ǃgaeǀhaosa dī re, îs sakhom tawa ǀhûǀguitimî-i ase ī.”
45Ob ge Jakoba ǀuisa ū tsî ǂgōse ge mâi, ǂâiǂâisenxūse. 46Tsîb ge khoegu âba ge mîba î gu ǀuide ǀhaoǀhao tsî ǁîdi ǀkha ǃnarosa dī. Tsî gu ge ǁnā ǀuiǃnaros xōǀkhā ǂkhari ǂûǁaresa ge ūhâ. 47Ob ge Labanna nē ǃkhaiba Jegar Sahaduta#31:47 Jegar Sahaduta: Nē ǀons ge Aramiagowab ǃnâ sada ra ǂâiǂâiǃnâ ǃnaros ti ra ǂâibasen. ti ge ǀonǂgai tsîb ge Jakoba nē ǃkhaiba Galed#31:47 Galed: Nē ǀons ge Hebregowab ǃnâ sada ra ǂâiǂâiǃnâ ǃnaros ti ra ǂâibasen. ti ge ǀonǂgai. 48Tsîb ge Labanna Jakoba ge mîba: “Nē ǀuiǃnaros ge sakhoma ǂâiǂâiǃnâxūs ase nî ība.” ǁNā-amagas ge Galed ti ge ǀonǂgaihe. 49Tsîb ge Labanna ǃaruǀî “Ab ǃKhūba ǃkharagaguse khom ga hâ ǁaeb ai mûs âba hoakhom ai ūhâ” ti ge mî. Tsîs ge nē ǃkhaisa ǁnāpa xu ǁkhāti Mispa#31:49 Mispa: Nēs ge Hebregowab di mîs ǁÎba xu ra ǃûihe ǃkhaib ti hâs khami ra ǀō. tis tsîna gere ǂgaihe. 50ǃAruǀîb ge Labanna aiǃgû tsî ge mî: “Ti ôarats ga khoedīǁoa tamas ka io ǀnî tara-e ǃgame, tita ǀū hîa xawets ge ǂâis ǃnâ nî ūhâ, Elob ra kō khom ǃkhaisa. 51Nēra ge ǀuiǃnaros tsî ǀuib sakhom ǁaegu ta go mâib tsîra. 52Tsî ra ge nē ǀuiǃnaros tsî ǂâiǂâisenǀuis tsîra hoara ǂâiǂâiǃnâxūse nî ī. Tita ge tātsēs tsîna ǁîs nau ǀkhāb ai satsa nî ǁnāǂamse ǃkharu tide tsîts ge ǁkhāti sats tsîna ǁnāpa-u ǃkharu tide, tita nî ǁnāǂamse. 53Ab Abrahammi di Elob tsî Nahori di Eloba#31:53 Abrahammi…Nahori di Eloba: Abrahammi ge Jakob di ǁnaosaba tsî Nahori ge Labanni di ǁnaosaba. sakhom ǁaegu ǂhanuǂhanu-aose ī.”
Tsîb ge Jakoba ǁîb îb, Isaki gere ǃoaba Elob aiǃâ ge nū, mîmâis âbab nî ǃkhōǀgaipe ǃkhaisa. 54ǁÎb ge ǁguiba-e ǁnā ǃhommi ai ǁguiba tsî khoegu âba ǂûǁares ǃoa ge ǁkhau. Tsî gu ge ǁîga ǂûtoa gu ge o hoaraga tsuxuba ǃhommi ai ge hâ. 55Nautsēkam ǃnauǁgoagab ge Labanna ǁnurisan tsî ôasara tsîna ǁoatawedeǁnāxū tsî ge ǁaru.
Currently Selected:
Genesis 31: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
