Mateub 21

Danaoseb Jesuba Jerusalems ǃnâ ra ǂgâ

(Markub 11:1-11; Lukab 19:28-40; Johaneb 12:12-19)

1Tsî Jerusalemsa xu gu ge Betfages, ǀKheraǃhommi tawa ǁgoe ǃās tawa sī, ob ge Jesuba ǀgam ǁkhāǁkhāsabekha* ge sî. 2Tsîb ge ǁîkha ǃoa ge mî: “ǁNā nauǃani ǁgoe ǃās ǃnâ ǂgâ, o kho ge ôasa-i ǀkha ǀguipa ǃgaemâisa dâukisa nî hōmâ. ǁÎra xore, î tita ǃoa hā-ū re. 3Tsî khoe-i ga dî kho, o mî: ‘ǃKhūb#21:3 ǃKhūb: Tamas ka io ǀhonkhoeb. ge ǁîra ǂhâba hâ’ o-i ge ǁî-e ǁîra ǁnātimîsi nî mā kho.”

4Nēs ge kēbo-aob kēbos nî ǀoaǀoahese ge ī:

5 # Sax. 9:9; Jes. 62:11 “Sions ǀgôasa ǃoa mî re:

‘Mû, sa Gao-aob ge sa ǁga ra hā,

tsamtsiǃnâse tsî dâuki-i ai ǃgapi hâse,

dâukis di ôaro-i ai ǂnôase.’ ”

6O kha ge ǁkhāǁkhāsabekha ǃgû tsî Jesub xa kha go mîmāhe khami sī ge dī: 7Tsî kha ge dâukira ǁîb ǃoa ge ǀkhī-ū tsî ǀgapise kha ana hâ sarana ǁîra ai ge ǀgâi tsîb ge Jesuba ge ǃapa. 8Tsî kai ǂnubis khoen ge ǀgapisen ana hâ sarana daob hîab Jesuba nî hā-ūb ai gere ǁgui, ǀnîn ra haidi ǁnâuga ǃgaoǁnâ tsî tsoro hîa.#21:8 sarana daob…tsoro hîa: Nēb ge ǀnî ǀgaub Jodeǁîn gere kaise ǂansa khoe-e ǁkhoreǁhareba. 9#Psa. 118:25-26ǂNubis khoen ǁîb aisǀkhāb tsî khaosǀkhāb ai ge garu in ge ǃgari domgu ǀkha ge ǂgaiǂui: “Hosiana, Davidi Ôab ǃoa! ǀKhaeheb ge hâ ǁnāb ǃKhūb di ǀons ǃnâ ǃgoaxaba, Hosiana ǀgapiseb ǃnâ!”

10Tsî Jesub ge Jerusalems ǃnâ ǂgâ, os ge hoaraga ǃāsa ǁnātikōse ge ǀhomaxa tsî-i ge mâ-i hoa-e gere dî: “Tariba kha nēba?”

11Os ge ǂnubisa ge ǃeream: “Nēb ge Jesub, kēbo-aob Nasarets, Galileab ǃnâ ǂnôas diba.”

Tempeli di ǃanuǃanuhes

(Markub 11:15-19; Lukab 19:45-48; Johaneb 2:13-22)

12Jesub ge Tempeli ǃnâ ǂgâ tsî ǁnāpa gere ǂgana ǂharugu khoen hoana ge ǃhaeǂui. ǁÎb ge mariǂharugu-aon tāgu tsî ǂnabuǁamaxū-aon di ǂnû-aiǃnaodi tsîna ǂhāǁgui 13#Jes. 56:7; Jer. 7:11tsî ǁîn ǃoa ge mî: “Nēti i ge xoasa: ‘Ti Tempeli ge ǀgore-ommi ti nî ǂgaihe’ xawe du ge sado ǁîba ǃnari-aon di ǁhāb ase ra dī.”

14Tsîn ge ǂgī khoen tsî ǃhom hân tsîna Jesub ǃoa, Tempeli ǃnâ ge sī tsîb ge ǁîna ge ǂuruǂuru. 15Tsî danapristergu tsî Moseb ǂhanub* di ǁkhāǁkhā-aogu tsîgu ge mû, buruxan, ǁîb gere dīn, tsî ǀgôan Tempeli ǃnâ “Hosiana Davidi ôaba” ti ra ǂgai tsî mîna, o gu ge kaise ge ǀara. 16#Psa. 8:2O gu ge Jesuba ge dî: “Nē ǀgôaron ra mî ǀgauba ǁnâuts go?”

Ob ge Jesuba ge ǃeream: “Ā, Xoasa go kha tātsēs tsîna khomai tama hâ ‘ǀGôaron tsî dairan tsîn di amde xus ge ǀoasa koasa du ge hā-ūsa’ ti ra mîsa?”

17Tsîb ge Jesuba ǁîna xu ǃgû tsî Betanis ǃnâ sī tsî ǁnā ǃoesa ǁnāpa ge ǁom.

Jesub ge ǀnomahaisa ra ǀâxare

(Markub 11:12-14, 20-24)

18Tsî nautsēkam ǃnauǁgoagab Jerusalems ǃoa oagaru hîab ge Jesuba ge ǃâ. 19ǁNātib ǃgûgaru hîab ge ǀnomahaisa daob xōǀkhā mû tsî ǁîs tawa ge sī, xawe i ge ǂû-i xare-e ǁîs ai ge ǀkhai i, ǂnaregu ǀguigu ose. Ob ge Jesuba ǀnomahais ǃoa ge mî: “Tātsēs tsînas ǁkhawa ǂû-e tani tide!” Tsî ǁnātimîsis ge ge ǂnâ.

20Tsî ǁkhāǁkhāsabegu ge nēsa gu ge mûo kaise burugâ tsî ge dî: “Mâti i go hā os nē ǀnomahaisa nēti ǃhaese go ǂnâ?”

21 # Mat. 17:20; 1Kor. 13:2 Ob ge Jesuba ǁîgu ǃoa ge mî: “Amase ta ra mîba go, îganǀgē tamase go ga ǂgom, o go ge tita go nē ǀnomahais ǀkha dī khami a dī ǁkhā tsî ǁkhāti ǁnās xa ǃnāsase. ǁKhāti go ga nē ǃhommi ǃoa ‘Khâima î hurib ǃnâ uriǂgâ’ ti mî, os ge ǁnāsa nî ī. 22Tsî Elob ǃnâ go ga ǂgom, o go ge tare-i ǀgui-i ka xawe ǀgores ǃnâ go ga ǂgan-i hoa-e nî ǃkhōǃoa.”

Jesub ǁkhāsib xa hâ dîs

(Markub 11:27-33; Lukab 20:1-8)

23Tsî Jesub ge ǁkhawa Tempeli ǃoa oahā tsî ǁkhāǁkhātsoatsoa, o gu ge danapristergu tsî ǀnî ǂnomdomgu* ǁaes digu tsîga ǁîb ǃoa hā tsî ge ǂan ǂgao: “Mâpa xuts hō hâ ǁkhāsib ǀkhats nē xūna ra dī? Tari-e satsa ǁnā ǁkhāsiba go mā?”

24Ob ge Jesuba ge ǃeream gu: “Nēsi ta ga dî go dîsa go ga ǂhanuse ǃeream, o ta ge nî mîba go mâ ǁkhāsiba xu ta nēn hoana ra dīsa. 25Johaneb di ǁkhāsib, ǁāǁnâs diba mâpa xu ge hâ i, ǀHommi di Eloba xusa, tamas ka io, khoena xusa?”

O gu ge ǁîǃnābe ge mîǀîgutsoatsoa “Mâti ge kha nî ǃeream? Nēsi ge ga ‘ǀHommi di Eloba xu’ ti a ǃeream, ob ge sage ǃoa nî mî ‘O tare-i ǃaroma go kha Johaneba ge ǂgom tama hâ i?’ ti. 26Tsî ge ga ‘Khoena xu’ ti a ǃeream, o ge ge khoen nî mâti mîsa ra ǃao, khoen ge Johaneba kēbo-aose gere ǃgapaǀî xui-ao.” 27O gu ge ge ǃeream: “ǀŪ ge a, Johaneb tari-i di ǁkhāsiba xu gere ǁāǁnâsa.”

Ob ge Jesuba ǁîga ge ǃeream: “O ta tita tsîna mîba go tide mâ ǁkhāsiba xu ta nē xūn hoana ra dīsa.

ǀGam ǀgôakha xa hâ ǂkhōs*

28“Xawe tare-e go ra ǂâi nē ǂkhōs xa? Aob hîa ǀgam ǀgôakha ūhâb ge kaib ǃoa ge mî: ‘ǀGôatse, ǃgû î nētsē draibeǃhanab ǃnâ sī sîsen.’ 29Ob ge ǀgôaba ge ǃeream: ‘Hî-î, ǃgû ta tide.’ Xaweb ge ega ǂâi-unuǃgâ tsî ge ǃgû. 30ǁNās khaoǃgâb ge aoba nau ǀgôab ǃoa ǃgû tsî ǁkhās ǁkhāsa sī ge mî. Ob ge ǁîba ‘Ā ti îtse, ǃgû ta ge nî’ ti ge mî, xaweb ge ǃgû tama ge i. 31O, nē ǀgamkha xa mâ ǀgôaba ǁgûba ge ǁnâuǀnam?”

O gu ge “Kai ǀgôab” ti ge ǃeream.

Ob ge Jesuba ǁîga ge ǁguiǃāba: “Amase ta ra mîba go, ǁgui-aimariǃkhōǃoa-aon* tsî ǀai-aon ge sago xa aiǃâ Elob Gaosib ǃnâ nî ǂgâ. 32#Luk. 3:12; 7:29-30Johaneb ǁĀǁnâ-aob ge hāb geo ǂhanu-aisib daoba ge ǁgau go tsî go ge ǂgom bi tama ge i, xawen ge ǁgui-aimariǃkhōǃoa-aon tsî ǀai-aon tsîna ge ǂgom bi. Mâtin ǁîna ra ǂgom ǃkhaisa go ge mû, xawes tsîna go ge ǂgom tama i tsî ǁoren âgo ǀkha ge aiǃgû.

Draibeǃhanab di ǁamaǀkhupi-aogu xa hâ ǂkhōs

(Markub 12:1-12; Lukab 20:9-19)

33“Nē ǂkhōsa ǃgâ re: ǃGaroǃāǀhonkhoeb ge ge hâ i, draibeǃhanaba ǂgā tsî ge omǂnamiba. ǁÎb ge draibeǀāǃnâ-āsa khao tsî ǃkhēǂgō-omma ge om. ǁNās khaoǃgâb ge draibeǃhanaba ǁamaǀkhupi-aogu ai ǀkhupiǂui tsî ǀkhara ǃhūb ǁga ge doe. 34Tsî ǃgaos di ǁaeb aib ge ǀhonkhoeba ǃgāgu âba ge sî, îb ǁîb ǃâs, ǃgaos disa ǀhaoǀhaobahe. 35Xawe gu ge ǁamaǀkhupi-aoga ǃgāga ǃkhō, ǀguiba ǂnau, ǀguiba ǃgam tsî nauba ge ǀuiǁhom. 36Ob ge ǀhonkhoeba ǁkhawa ǂguros xa ǃnāsa ǃgāna ge sî, ǁîb di ǃâsa sī nî ǀhaoǀhaose, xawe gu ge ǁamaǀkhupi-aoga ǁkhā ǀgaus ai ǁîn tsîna ge sîsenū. 37ǀUnis aib ge ǀhonkhoeba ǁîb ôaba ge sî, ǁîba gu ǀnîsi nî ǃaoǃgâ ti ǂâi tsî. 38Xawe gu ge ǀhonkhoeb ôaba gu ge mûǃgoaxa, o ǁîǃnābe ge mîǀîgu: ‘ǁNāb ge nē draibeǃhanab ǀumi-aoba ǃgoaxa. A ge ǃgam bi, î ge nē ǃhanaba sage dise ūbasen!’ 39Tsî gu ge ǃkhō tsî draibeǃhanaba xu aoǂui tsî ge ǃgam bi.”

40Ob ge Jesuba ge dî: “Draibeǃhanab ǀhonkhoeb ga oahā, o tare-eb nî ǁnā ǂkhaba ǁamaǀkhupi-aogu ǀkha dī, ti go ra ǂâi?”

41O gu ge ǁîga ge ǃeream: “Amase, ǁîb ge ǁnā ǂkhaba ǁamaǀkhupi-aoga kaise ǁgai ǀgaub ai ǃgam tsî draibeǃhanaba ǀkhara khoen hîa ǁîb ǃâsa ǃgaos ǁaeb ai nî mā bin ai nî ǀkhupiǂui.”

42 # Psa. 118:22-23 Ob ge Jesuba ǁîga ge dî: “Tātsēs tsîna go nēsa Xoas ǃnâ khomai tama?

“ ‘ǂNubi-aogu xa ge ǂharahe ǀuis

ge ge ǁhôaǀui kai;

ǃKhūb ge nēsa ge dī;

tsîs ge ǁîsa sada mûǁae a buruburuxa!’

43“Nēs ǀkha ta ra ǂâibasens ge, Elob Gaosib ge sago xu ūbēhe tsî ǁnā khoen hîa ǂhanu ǂûna ǁnāpa xu nî dīna nî māhe.” [44Nē ǀuis ai ra ǁnā-i hoa-i ge nî ǂkhū tsî ǁnā-ais ka khoe-i hoa-es ge nî ǂkhūǂkhū.]#21:44 Nē ǁaraǃās ge ǁîgu a ǀoro Grike xoaǁguigu tamas ka io ǀoro ǂnûiǃkhunidi ǃnâ a ǀkhai.

45Tsî danapristergu tsî Farisegu* tsîn ge Jesub di ǂkhōde ǁnâu, o gu ge Jesub ǁîgu xa ra ǃhoa ǃkhaisa ge ǁnâuǃā. 46O gu ge ge dītsâ ǁîba ǃkhōsa, xawe gu ge ǂnubis khoen hîa Jesuba kēbo-aose gere ǃgapaǀîn xa ge ǃao.

Currently Selected:

Mateub 21: KKG20

Highlight

Copy