Mateub 22
22
ǃGameǁâus xa hâ ǂkhōs*
(Lukab 14:15-24)
1Tsî ǁkhawab ge Jesuba ǂkhōde ge sîsenū, khoena Elob Gaosib xa ǁkhāǁkhās ǃaroma: 2“Gaosib ǀHommi dib ge gao-aob hîa ǁîb ôaba kai ǃgameǁâusa ra ǂhomibab khami ī. 3ǂGui ǃgôab ǁkhausaben ge ge ǁkhauǂuisa i tsî ǃgameǁâus ǁaeb ge ǀoa, ob ge gao-aoba ǁîb ǃgāga ge sîǂui, î gu ǁkhausaben hoana ǂanǂan, ǁaeb go ǀoasa, xawen ge ge ǂkhā. 4ǁNā-amagab ge ǁkhawa ǀkhara ǃgāga ge sîǂui în nēti sī mî: ‘ǃGameǁâus ge go ǂhomitoahe, ti kaukausa ǁgōgu tsî ǃgomǀgausase ra ǂgan tsâun tsîn ge go ǂāhe. Hoan ge ǂhomitoasa. ǃHaeǃhaesen î hā re!’ 5Xawen ge ǁkhausabena ǁae tama i tsî ǁîn ra dī xūn ǀkha ǀgui ge aiǃgû. ǀGui-i ge ǁî-i ǂgariǃkhais ǃoa ge ǃgû, nau-e ǁî-i ǁamaǂharuguǃkhaib ǁga, 6tsî ǀnîn ge sîǂuihe ge ǃgāna ǃkhō, ǁgaisise ǁîna sîsenū tsî ǀnîn âna ge ǃgam. 7Nēs xab ge gao-aoba kaise ǀara tsî ge ǁaixa; ob ge ǁîb toroǃkhamaoga ge sîǂui, î gu ǁnā ǃgamaona hîkākā tsî ǁîn di ǃāde ǂhubiǂui. 8Tsîb ge ǁîb ǃgān ǃoa ge mî: ‘ǃGameǁâus ge a ǂhomitoasa, xawen ge ti ǁkhausabena ǃgôasi-i tsîna anu tama hâ. 9ǁNā-amaga mâ ǁhôas, ǃganni dis hoas ǃoa ǃgû, î ǁnāpa du ga ǀhao-ū-i hoa-e ǁkhauhā.’ 10Tsîn ge ǃgāna ǃgangu ǃnâ ǂoa tsî hō ǁkhān a khoe-i hoa-e ge ǀkhī-ū, nēsi i ga ǃgâi tamas ka io tsū xawe; tsîb ge ǃgameǁâu-omma ǁkhausaben xa ge ǀoa.
11“Tsî gao-aob ge ǂgâ ǁkhausabenab nî mûse, ob ge ǀnî khoeba ge mû ǃgameǁâusa anuba tama sarana ana hâba. 12Ob ge gao-aoba ge dî bi: ‘Ti horetse, mâti-i go hā ots ǃgameǁâusa anuba tama saran ǀkha nēpa go ǂgâxa?’ Xaweb ge nē khoeba ǃeream bi tama ge i. 13#Mat. 8:12; 25:30; Luk. 13:28Tsîb ge gao-aoba ǃgāgu âb ǃoa ge mî: ‘ǁÎb ǃomkha tsî ǂaira tsîna ǃgae, î ǃaugab ǃkhaenab ǃnâ aoǂui bi, āb tsî ǁaninǁgûb tsîn ǀguin hâpa. 14ǁNā-amaga, ǂguin ge a ǂgaisa, xawe ǀoron ge a ǁhûiǂuisa.’ ”
ǁGui-aimarina* matares xa hâ dîs
(Markub 12:13-17; Lukab 20:20-26)
15Tsî gu ge Farisega gere ǀapeǀhao mâ ǀgaub ai gu nî ǁîgu dîdi ǀkha Jesuba ǃnui ǃkhaisa. 16O gu ge ǁîgu di ǀnî ǁkhāǁkhāsabegu* tsî Herodeb di saoǃgonaon#22:16 Herodeb di saoǃgonaon: Nēn ge ǂgīǂgōsi saoǃgonaon, Herodeb Kaib ǀaokhoen, (ǁkhāti 2:1 tsîna kō re) tsî ǁîb ôab Herodeb Antipab, (14:1 tawa sī kō re) din hîa ǁîb nî Jerusalems di gao-ao kai ǃkhaisa gere ǂgaona. tsîna Jesub ǃoa ge sî, în ǁîba sī dî: “ǁKhāǁkhā-aotse, ǂan ge ge a sats a ǂhauǃnâ ǃkhaisa. Sau tamasets ge Elob di amaba ra ǁkhāǁkhā. ǁKhātits ge ǀkhā-e ǁhûi tama hâ. 17O mîba ge re tare-ets ra nēs xa ǂâisa: ǂHanu i a Kaesari ǁgui-aimaride* mataresa, tamas ka io, ǂhanu tama i hâ?”
18Xaweb ge Jesuba ǁîgu di ǂkhaba ǀapede ge ǂan i tsî ge mî: “Sa ǀgamaixago! Tare xū-i ǃaroma go kha ra ǃnui te ǂgao? 19Romeǁî maris hîas ǁgui-aimarisa* ra matare-ūhesa hā ǁgau te!”
O gu ge denarsa* ge ǀkhī-ūba bi, 20tsîb ge ge dî gu: “Tari-i ai-īsib tsî ǂgaiǂamǀons tsîra ǁîs ai a ǁgâiǂuisa?”
21O gu ge “Kaesari” ti ge ǃeream.
Ob ge Jesuba ge mî: “O Kaesara ǁîb di-e mā, î Eloba ǁîb di-e mā.”
22Tsî Jesub di ǃereamǀgaub ge kaise ge burugâ kai gu tsî gu ge ǁnāpa xu ge ūbēsen.
ǁŌba xu khâis xa hâ dîs
(Markub 12:18-27; Lukab 20:27-40)
23 #
ǃNǃkh. 23:8
Tsî ǁnā tsēs ǁkhās ai gu ge ǀnî Sadusega Jesub ǃoa hā tsî ge mî, khoe-i ǁōba xu a khâi ǁoa ǃkhaisa. 24#Deu. 25:5O gu ge ge mî: “ǁKhāǁkhā-aotse, Moseb ge ge xoaba da: ‘ǀGôao aob ga ǁō, ob ge ǁîb di ǃgâsaba ǃoatarasa ǃgame tsî ǀgôana ǃgâsaba nî hōba.’ 25O ǁnāpa gu ge hû ǃgâsaga ge hâ i. Tsî hoagu xa kaib ge ǃgame tsî ǀgôaose ge ǁō, ob ge ǀgamǁî kai ǃgâsaba ǁō ge ǃgâsab ǃoatarasa ge ǃgame. 26Nē ǀgamǁî kaib tsîn ge ǀgôaose ge ǁō tsîs ge ǃoatarasa ǁîba ra sao ǃgâsab xa ge ǃgamehe tsî ǁkhā ǀgaub ai i ge hûǁî ǃgâsab kōse ge aiǃgû. 27Tsîs ge ǃoataras tsîna ge ǁō. 28O mîba ge re, ǁō hân di khâitsēs ai, ǁîsa tarib di taras a? Hoa hû ǃgâsagu ge ǃgame si hâ i xui-ao.”
29Ob ge Jesuba ge ǃeream gu: “Sago ǃgomsib ge, Xoasa go ge a ǀū tsî Elob di ǀgaib tsîna ǂan tama hâ. 30#Gā-ai.Sa. 5:5ǁŌ hân khâis ǃnân ge ǃgame tide xawen ge ǁîna ǀhomǃgān khami nî ī. 31Xawe ǁō hân di khâis xa go kha ǁnâi khomai tama hâ Elob ge sago ǃoa 32#Eks. 3:6‘Tita ge Abrahammi, Isaki tsî Jakob tsîgu di Elota’ ti mîsa? ǁÎb ge ǁō hân di Elo tama, xaweb ge a ûitsaman di.”
33Tsî ǂnubis ge Jesub ǁkhāǁkhāsa a ǁnâu, on ge kaise ge burugâ.
ǁÎs a kai mîmās
(Markub 12:28-34; Lukab 10:25-28)
34Tsî Jesub ge ǁîb ǃereams ǀkha Sadusegu amde ǂganam ǃkhaisa gu ge ǁnâu, o gu ge Farisega ge ǀhaoǀhaosen. 35#Luk. 10:25-28Tsîb ge ǁîgu di ǀguib, ǂhanuǂansabeb hîa Moseb ǂhanuba* ǂoaǂamsase ge ǂan iba Jesuba sao ra dîs ǀkha gere ǃâitsâ: 36“ǁKhāǁkhā-aotse, mâsa ǁnâi ǁîs a kai mîmāsa ǂHanub ǃnâ?”
37 #
Deu. 6:5
Ob ge Jesuba ge ǃeream: “ ‘ǃKhūb sa Elobats ge sa ǂgaob, ǀoms tsî ǁnâuǃāb hoab ǀkha nî ǀnam.’ 38Nēs ge ǁîs a ǂguro tsî kaise ǂhâǂhâsa mîmāsa. 39#Lev. 19:18Tsî ǁîs ǀgamǁî kai tsî ǁnās ǁkhās xase a ǂhâǂhâsa mîmās ge: ‘Sa ǀgūkhoe-ets ge sats ǁkhāts khami nî ǀnam.’ 40Nē ǀgam mîmāra ǃnâ i ge hoaraga Moseb ǂhanub tsî kēbo-aogu di ǁkhāǁkhādi tsîna ǃkhōǂgāsa.”
Xristub* xa hâ dîs
(Markub 12:35-37; Lukab 20:41-44)
41Ganupe gu Farisega Jesub tawa ǀhao hâ hîab ge ge dî gu: 42“Tare-e go Xristub xa ra ǂâi? Tari-i di ôaba?”
O gu ge “ǁÎb ge a Davidi ôa” ti ge ǃeream.
43Ob ge Jesuba ge dî gu: “O tare xū-i ǃaromab Davida, ǃAnu Gagab xa ǂgaeǂguihe hâse ǁîba ‘ǃKhūtse’ ti gere ǂgai? Davidi ra mî xui-ao:
44 #
Psa. 110:1
“ ‘ǃKhūb ge ti ǃKhūb ǃoa ge mî:
Ti amǀkhāb ǁôab ai ǂnû,
sa khākhoena ta nî
sa ǂaira ǃnaka dīs kōse.’
45Tsî Davidi ga ǁîba ‘ǃKhūb’ ti ǂgaio, mâtib kha Xristuba a Davidi ôa ǁkhā?
46“Khoe-i xare-i ge Jesuba ge ǃeream ǁoa tsî ǁnā ǁaeba xu ǃaruǀî xū-i tsîna dî bi tama ge i.”
Currently Selected:
Mateub 22: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
