Mateub 26

Jesub ǃoagu hâ ǀapeǀhaos

(Markub 14:1-2; Lukab 22:1-2; Johaneb 11:45-53)

1Tsî Jesub ge nē xūn hoana ǁkhāǁkhātoas khaoǃgâb ge ǁkhāǁkhāsabegu* âb ǃoa ge mî: 2#Eks. 12:1-27“Hoago a ǂanse ra ge ǀgam tsēra ǀguira ǃgau hâ Pasxaǁâudīb nî tsoatsoas aiǃâ, ob ge Khoen Ôaba ǀapexūhe tsî nî ǃgâuhe.”

3ǁKhā ǁaeb ǂûb ai gu ge danapristergu tsî ǀnî ǂnomdomgu* tsîga ǀgapipristeri* Kajafab oms tawa ge ǀhao hâ i, 4tsî ǂganǃgâsib ǃnâ, mâ ǀgaub ai gu Jesuba ǃkhō tsî nî ǃgamsa gere ǀapeǀhao. 5Xawe gu ge ǁîǃnābe ge mî: “Pasxaǁâudīb di ǁaeb ai ge ge nēsa a dī ǁoa, khoen nî kaise khâikhâisen xui-ao.”

Jesub ge Betanis ǃnâ ra ǂkhauhe

(Markub 14:3-9; Johaneb 12:1-8)

6Jesub ge Betanis ǃnâ ǃomamasiba ge ūhâ i khoeb, Simonni di oms ǃnâ ge hâ i. 7#Luk. 7:37-38Tsî ǂûb ra hîa i ge tara-i hîa alabas xaparos,#26:7 Alabas xaparos: ǂKhari xaparos hîa tsaura ǀui-i ǀkha a kurusas. ǃgomǀgausa ǃgâihamoli-i xa hâǃnâhesa tani hâ-e ǂgâxa tsî ǁî-e Jesub danas ai ge ǂnâǂui. 8Xawe ǁkhāǁkhāsabegu ge nēsa mû, o gu ge kaise ǀara tsî ge dî: “Tare xū-i ǃaroma nētikō hîǀhurusa? 9ǁÎs kom nē ǃgâihamoli-e kaise ǂgui maris ai ǁamaxū tsî ǀgâsana ga mā hâo!”

10Xaweb ge Jesuba ge ǂan i tare-e gu ra ǃhoasa tsî ǁîgu ǃoa ge mî: “Tare-i ǃaroma go ǁîsa ra ǂhani? Kaise a ǃgâi tsî îsa xū-es ge go dība te. 11#Deu. 15:11ǀGâsana du ge hoaǁae sadu ǁaegu nî ūhâ, xawe du kom tita hoaǁae sadu ǀkha ūhâ tideo. 12Ti ǁkhōsa ǂhomis ǃaromas ge ǁîsa nē ǃgâihamoli-e ti soros ai go ǂnâ. 13Amase ta ra mîba go, ǃGâiǂhôas ga ǃhūbaib hoaragab ǃnâ aoǁnâhe ǃkhai-i hoa-i ai i ge nē taras di ǃgâidīb xa nî ǃhoahe, ǁîs di ǂâiǂâisensa ǃoa.”

Judab ge Jesuba ǀapexūsa ra ǀhûǀgui

(Markub 14:10-11; Lukab 22:3-6)

14Ob ge Judab Iskariotǁîb, disiǀgamǀagu di ǀguiba, danapristergu ǃoa ǃgû 15#Sax. 11:12tsî ge dî: “Sago ta ga Jesuba māǁnâo, tare-e go nî matare te?” O gu ge Judaba ǃnonadisi ǀhaiǀuri maride ge matare. 16Tsî ǁnā ǁaeba xub ge Judaba ǂhanu ǁaeba gere ôa, Jesubab nî māǁnâse.

ǀUni Pasxaǃuiǂûs

(Markub 14:12-21; Lukab 22:7-13, 21-23; Johaneb 13:21-30)

17Tsî ǂguro tsēs khūkhū-e* ūhâ tama pere-i ǁâudīb dis ai gu ge Jesub ǁkhāǁkhāsabega ǁîb ǃoa hā tsî ge dî bi: “Mâpa ge kha Pasxaǃuiǂûsa nî aiǂhomiba tsi?”

18Ob ge Jesuba ǁîgu ǃoa ge mî: “ǃĀs ǃnâ go ra ǂgâ khami go ge ǀnî aoba nî mû, o ǁîba mîba: ‘ǁKhāǁkhā-aob ge ra mî: Ti ǁaeb ge go hā tsî ta ge sa oms ǃnâ ti ǁkhāǁkhāsabegu ǀkha Pasxaǃuiǂûsa nî ǁâudī.’ ”

19Tsî gu ge ǁkhāǁkhāsabega Jesub xa gu ge mîmāhe khami dī tsî Pasxaǃuiǂûsa ge aiǂhomi.

20Tsî ǃui i ge, ob ge Jesuba ǁkhāǁkhāsabegu âb ǀkha tāb ǂnamipe ge ǂnû. 21Ganupe gu ra ǂû hîab ge ǁîgu ǃoa ge mî: “Amase ta ra mîba go, ǀguib sago dib ge nî ǀapexū te.”

22Xawe kaise ǃoa tsî burugâ hâse gu ge ǁkhāǁkhāsabega ǀguiǀguibese ge dî bi: “ǃKhūtse, tita kha ǁî ta?”

23 # Psa. 41:9 Ob ge Jesuba ge ǃeream: “ǁNāb tita ǀkha nē ǃores ǃnâ ǃommi âba ra ǀharib ge nî ǀapexū te. 24Khoen Ôab ge Xoas ra mî khami nî ǁō. Xawe kaise i ge nî ǃhuriǃhurisaba ǁnā khoeb ǁîba nî ǀapexūba! ǃGâi ga hâ ǃkhais ge ǁnāti ī khoeb ga tātsēs tsîna ǃnae tama hâsa!”

25Ob ge Judab hîa Jesuba nî ǀapexūba ge dî: “ǁKhāǁkhā-aotse, amase tita kha ǁî ta?”

“Sats go ti mî” tib ge Jesuba ge ǃeream bi.

ǃKhūb di ǃAnu ǃUiǂûs

(Markub 14:22-26; Lukab 22:14-20; 1 Korinteǁîn 11:23-25)

26Tsî ǂû gu ra hîab ge Jesuba pereba ū, ganganǀgoresa dī, khôa tsî ǁkhāǁkhāsabegu âba mā tsî ge mî: “Ū î ǂû, nēs ge ti sorosa.”

27ǁNās khaoǃgâb ge ǀgabisa ū, Eloba gangan tsî ǁîga mā tsî ge mî: “Hoago ǁîsa xu ā. 28#Eks. 24:8; Jer. 31:31-34Nēb ge ti ǀaob ǀasa ǃgaeǀhaos dib, Elob tsî ǁîb khoen ǁaegu, ǂguin di ǁoren ǀûbasa ǃoa ra ǂnâxūheba. 29Amase ta ra mîba go, ǁkhawa ta nē ǂauxûiba ā tidesa, ǁnā tsēs ti Îb di Gaosib ǃnâ ta ǁîba ǀasase sago ǀkha sī nî ās kōse.”

30ǁNās khaoǃgâ gu ge ǁnaetsana-e ǁnae tsî ǀKheraǃhommi ǁga ge ǃgû.

Jesub ge Petrub xa ǀūxūhesa ra aimûǀgaru

(Markub 14:27-31; Lukab 22:31-34; Johaneb 13:36-38)

31 # Sax. 13:7 Tsîb ge Jesuba ǁîgu ǃoa ge mî: “Nē tsuxub ǃnâ go ge sago hoago nî bēxū te, Xoas nēti ra mî xui-ao: ‘Elob#26:31 Elob: Grikegowab ge tita ti ūhâ. ge ǃûi-aoba nî ǃgam on ge gūna nî ǀgaruǀgaruhe.’ 32#Mat. 28:16Xawe ǁōba xu ta ga ūkhâihes khaoǃgâ ta ge sago aiǃâ Galileab ǃoa nî ǃgû.”

33Ob ge Petruba ge ǃeream: “Hoa khoen ga ǁnāxūǃgâ tsi, xawe ta ge tita tātsēs tsîna ǀūxū tsi tide!”

34Ob ge Jesuba Petruba ge ǃeream: “Amase ta ra mîba tsi, nē tsuxub ǂûb ǃnâ, anib nî ās aiǃâts ge ǃnona ǃnādi kōse nî ǀūxū te.”

35Ob ge Petruba ge mî: “Sats ǀkha ta ga ǁō, xawe ta ge tātsēs tsîna ǀūxū tsi tide!”

Tsî nau ǁkhāǁkhāsabegu hoagu on ge ǁkhās ǁkhāsa ge mî.

Jesub ge Getsemaneb ǃnâ ra ǀgore

(Markub 14:32-42; Lukab 22:39-46)

36ǁNās khaoǃgâb ge Jesuba ǁkhāǁkhāsabegu âb ǀkha Getsemane ti ra ǂgaihe ǃkhaib tawa hā tsî ge mî: “Nēpa go ǂnû re, tita ra ǁnāpa sī ǀgore hîa.” 37Tsîb ge Petrub tsî Sebedeub ôakha tsîga ge ūsao. ǁNā ǁaeb aib ge Jesuba ǃoab tsî ǀhūb tsîn xa ge ǃkhōhetsoatsoa. 38Tsîb ge ǁîgu ǃoa ge mî: “Ti ǀoms ge kaise ǁōb kōse ǃoa hâ. Nēpa hâ, î tita ǀkha ǂkhaikari hâ re.”

39Tsîb ge ǂkharirose aisǀkhāb ǃoa ǃgû tsî ais ǂama ǃhūb ai ǁnāǁgoe tsî ge ǀgore: “Ti Îtse, īǁkhā i kao, as nē ǀgabis tsâb disa ǃgû-īǀkhā te re. Xawe as ǁnâi sa ǂâis ǀguisa ī re, tis ose.” 40ǁNās khaoǃgâb ge Jesuba ǁkhāǁkhāsabegu âb ǃoa oahā tsî ǁom hâse ge hō gu. Ob ge Petrub ǃoa ge mî: “ǀGui iri tsîna go kha tita ǀkha ǂkhaikari a hâ ǁoa? 41ǂKhaikari hâ, î ǀgore, î go tā ǃâitsâb ǃnâ ǁnā. Gagas ge amase a māsenxa, xawes ge sorosa a ǂkhabusa xuige.”

42ǁKhawab ge ǁîga xu ǃgû tsî ge sī ǀgore: “Ti Îtse, nē ǀgabis tsâb dis ga ūbēhe ǁoa tsî ta nî hana ā sis kao, as ǁnâi sa ǂâisa ī re.” 43Tsî ǁkhawab ge ǁîgu ǃoa oahā, ob ge ǁom hâse ge hā hō gu, ǃaruǀîǀgui gu ge mûdi âga ǁkhowa-amsase ūhâ ǁoa i xui-ao.

44Tsîb ge ǃnonaǁî ǃnāsa ǁkhawa ge ǀgoreǃgû tsî ǀnaib ge ǀgore hâ i mîdi ǁkhāde ge ǀgore. 45ǁNās khaoǃgâb ge Jesuba ǁkhāǁkhāsabegu âb ǃoa hā tsî ge mî: “Ganupe go ǁomǁgoe tsî sâ hâ? Kō! Iri ge go ǀoa, Khoen Ôab nî ǁore-aon ǃomǁae māǁnâheba. 46Khâi, î ge ǃgû re. Tita nî ǀapexūb go ǀgūtoa xuige!”

Jesub di ǃkhōhes

(Markub 14:43-50; Lukab 22:47-53; Johaneb 18:3-12)

47Tsî ganupeb Jesuba ra ǃhoa hîab ge Judab, disiǀgamǀa ǁkhāǁkhāsabegu di ǀguiba, kai ǂnubis hîa gôagu tsî ǃhôadi tsîn ǀkha ǁâtanisen hâs xa ǁnūhe hâse ge hā. ǁÎgu ge danapristergu tsî ǀnî ǂnomdomgu xa ge sîhe. 48ǀNaib ge Judaba ǁîna ǁgauǁgau-e ge mā hâ i: “ǁNāb, ǁoas ǀkha ta ga tawedeb ge ǁîba, ǁîba go ge nî ǃkhō” ti.

49Tsîb ge Judaba ǂhanuse Jesub ǃoa ǃgû tsî “Tawede tsi ta ra, ǁKhāǁkhā-aotse!” ti mî tsî ge ǁoatawede bi.

50Ob ge Jesuba ǁîb ǃoa ge mî: “Ti horetse, ǁî-ets go hāba-e dī re!”

On ge hā tsî Jesuba ǃkhō tsî ǃkhōsis ǃnâ ge ū. 51Tsî Jesub ǀkha hâgu di ǀguib ge gôab âba ǂgaeǂui tsî ǀgapipristeri di ǃgāb ǂgaesa ge ǁhāǁnâ. 52Ob ge Jesuba ǁîb ǃoa ge mî: “Sa gôaba ǃkhais âb ǃnâ ǂgā-oa. Gôab ǀkha ra ǃgam-i hoa-i ge gôab xa nî ǃgamhe. 53ǂAn tama go ǁnâi hâ, ti Îb ai ta ǀoadisidi ǀhomǃgān di huiba, sage ǁkhaebas ǃaroma ǂgan ǁkhāsa, tsîb ǁkhāti ǁnātimîsi ǁîna nî sîǀkhīsa? 54Xawe nēsa ta ga dī, os ge nē xūn nî ī ti ra mî Xoasa dīǀoaǀoahe tide.”

55 # Luk. 19:47; 21:37 Ob ge Jesuba ǂnubis khoen ǃoa ge mî: “Tare-i ǃaroma du kha ǁkhōǁkhōsa tsūdī-ao-e ra ǃkhō khami gôagu tsî ǃhôadi tsîna ūhâse tita nî ǃkhōse go ǀkhī? Mâ tsēs hoasa ta ge Tempeli ǃnâ gere ǁkhāǁkhā, xawe tare xū-i ǃaroma du kha ǃkhō te tama ge hâ i? 56Nēn hoan ge kēbo-aogu gere Xoas ǃnâ mîn nî dīǀoaǀoahese ge ī.”

ǁNā ǁaeb ai gu ge hoaraga ǁkhāǁkhāsabega Jesuba ǁnāxū tsî ge ǃkhoeni.

Jesub ra ǀapemāǃnans aiǃâ ǂhai

(Markub 14:53-65; Lukab 22:54-55, 63-71; Johaneb 18:13-14, 19-24)

57On ge ǁnān hîa Jesuba ge ǃkhōna ǀgapipristeri, Kajafab oms ǁga ge ǃgû-ū bi, Moseb ǂhanub* di ǁkhāǁkhā-aogu tsî ǀnî ǂnomdomgu tsîn ǀhao hâpa. 58ǁKhā ǁaeb aib ge Petruba ǃnūseba xu ge sao, ǀgapipristeri î-ommi di omǂnamib kōse. Ob ge ǂgâ tsî Tempeli di ǃûi-aogu ǀkha sī ǂnû tsî ge ǃâu, îb mû taren hoan Jesub ǀkha ra īsa. 59Tsî gu ge danapristergu tsî hoaraga ǀapemāǃnans tsîna ǂhumi ǃkhō-am-e Jesub ǃoagu gere ôa, î gu ǁnā ǀgaub ai ǃgam bi ǁkhā. 60ǂGui ǀhûǀguitimî-aon hîa Jesub xan ǂhumi ǀhûǀguisa mā ǁkhā ti ge mîna gu ge hō, xawe i ge ǀgui khami ī ǃkhō-am-i tsîna ge ǀkhai i. ǀUnis ai kha ge ǀgam khoekha ǂoaxa 61#Jhn. 2:19tsî ge mî: “Nē mâ khoeb ge ge mî: ‘Tita ge Elob Tempela khôaǁnâ tsî ǃnona tsēdi ǃnâ nî ǂnubikhâi.’ ”

62Ob ge ǀgapipristera khâi tsî Jesuba ge dî: “Tare-ets nē ǂgā-amdi ai a mî ǁkhā?” 63Xaweb ge Jesuba ǃnōs ǀguisa ge hî. Ob ge ǀgapipristera ǁkhawa ǁîb ǃoa ge mî: “Ûitsama Elob di ǀons ǃnâ ta ge tita ra ǂgaoǀkhā tsi îts mîba da, isets satsa a Xristu,* Elob Ôa ǃkhaisa.”

64 # Dan. 7:13 Ob ge Jesuba ge ǃeream bi: “Sats go mî. Xawe ta hoado ra mîba, nēsisa xu du ge Khoen Ôaba amǀkhāb ǁôab Hoaǀgaixab dib tawab ǂnôase tsî ǀhommi ǃâudi aib ǃgoaxase nî mû!”

65 # Lev. 24:16 Ob ge ǀgapipristera sarab âba ǀkhau tsî ge ǃau: “Eloǃkhāǃkhā-aotse! Amase da ǃaruǀî ǀhûǀguitimî-aona ǂhâba tama, hoadu go ǁnâu ǁîb di ǃkhāǃkhāsa xui-ao! 66Sado mâti du ra mî?”

On ge ge ǃau: “ǀHapixa a! Ab ǃgamhe!”

67 # Jes. 50:6 On ge Jesub ais ǃnâ ǂāra tsî gere ǂnau bi. Tsî ǀnîn ǁapu bi tsî 68“Sats kom a kēbo-ao-o, Xristutse! Mîba da, tari-i go ǂnau tsi ǃkhaisa?” ti gere mî.

Petrub ge Jesuba ra ǀūxū

(Markub 14:66-72; Lukab 22:56-62; Johaneb 18:15-18, 25-27)

69Tsî ganupeb Petruba ǃauga omǂnamib ǃnâ ǂnôa hîas ge ǀgapipristeri ǃgādi di ǀguisa ǁîb tawa hā tsî ge mîǀî bi: “Sats tsîn kom Jesub, Galileaǁîb ǀkha go hâ io.”

70Xaweb ge Petruba ǁnāpa ge hâ in hoan aiǃâ ǀūxū tsî ge mî: “Amase ta ge nē du ra ǃhoan hoana a ǀū.” 71Tsî egab Petruba omǂnamib di dao-ams ai ra sī hîas ge ǀnî ǃgāsa mûǃā bi tsî ǁnāpa ge ǀgūse mâ i khoen ǃoa ge mî: “Nē khoeb ge Jesub, Nasaretǁîb ǀkha go hâ i.”

72ǁKhawab ge Petruba Jesuba ǀūxū tsî nē ǃnāsa nūs ǀkha “Amase ta ra nū, tita ge ǁnā khoeba a ǀū” ti ge mî.

73Tsî ǁaero-e ī tsîn ge ǀnî khoen hîa ǁnāpa ge mâ ina Petrub ǃoa hā tsî ge mî: “Sa ǃhoaǀgauba xu da ge a ǂan sats a Galileaǁî tsî amase ǁîn di ǀgui ǃkhaisa.”

74Ob ge Petruba ge mî: “Elob ǃnâ ta ra nū, ǀū ta a khoeb ge ǁnāba.” Tsî ǁnātimîsib ge aniba ge ā. 75Tsî kaise ǃhaeseb ge Petruba Jesub ge mî hâ i mîde ge ǂâihō: “Anib nî ās aiǃâts ge ǃnona ǃnāde nî ǀūxū te.” Tsîb ge kaise tsûsase ra āse ge ǂoa.

Currently Selected:

Mateub 26: KKG20

Highlight

Copy