Markub 10
10
Jesub ge ǃgameǀgoras xa ra ǁkhāǁkhā
(Mateub 19:1-12; Lukab 16:18)
1Tsîb ge Jesuba ǁnās khaoǃgâ Kapernaumsa xu ǂoa tsî ǃkhawagasǀkhāb Judeab dib ǁga tsî ǁnāpa xu aiǃâ Jordanǃāb di nauǃanib ǁga ge ǃgû. ǁKhawan ge ǂnubis di khoena ǁîb tawa ge ǃkhoeǀhao tsîb ge ǀnaib ra dī khami ǁîna ge ǁkhāǁkhā.
2O gu ge ǀnî Farisega Jesuba gere ǃâitsâ ǂgao. Tsî gu ge “ǂHanu-i a, aob nî taras âba xu ǀgora ǃkhaisa?” ti ge dî bi. 3Ob ge Jesuba ǁîga “Moseb ǂhanuba* mâtib nēs xa ra mîmā?” ti hâ dîs ǀkha ge ǃeream.
4 #
Deu. 24:1
O gu ge ǁîga ge ǃeream: “Moseb kom ra mā-amo, aob ǁîb di tarasa ǀgoraǂkhanisa mā tsî sîbē ǁkhā ǃkhaisa.”
5Ob ge Jesuba ge ǃeream: “Moseb ge nē ǂhanuba sago di ǃgariǂgaoxasib ǃaroma ge mā. 6#Gen. 1:27; 5:1Xawe tsoatsoasa xub ge Eloba ǁîra aob tsî taras tsîra ase ge kuru. 7#Gen. 2:24ǁNā-amagab ge khoeba ǁîb di îb tsî îs tsîra ǁnāxū tsî taras ǀkha nî ǃgaeǁarehe, 8o ra ge nî ǀgui soro. Tsî ra ge ǃaruǀî ǀgam tama, xawe ra ge a ǀgui. 9Elob ǃgaeǁare hâ-i, khoe-i xare-i xa ǀgorahe tide xui-ao.”
10Tsî oms ǃnâ gu ge ǂgâ, o gu ge Jesub ǁkhāǁkhāsabega* ǁîb goro mî xūn di ǂâibasensa ge dî. 11#Mat. 5:32; 1Kor. 7:10, 12Ob ge ǁîga ge mîba: “Taras âba ǀgoraxū tsî ga ǀnî tarasa ǃgameb hoab ge ǁîs ǃoagu go ǃgamekhôa. 12Tsî taras hîa ga ǁîs aoba ǀgoraxū#10:12 ǁÎs aoba ǀgoraxū: Romeǁî ǂhanub ge tarekhoes ǁîs di aoba ǀgoraxū ǁkhā ǃkhaisa gere mā-am, xaweb ge Jodeǁî ǂhanuba ǁnāsa ge mā-am tama hâ i. tsî ǀnî aob ǀkha ǃgames hoas ge ra ǃgamekhôa.”
Jesub ge ǀgôarona ra ǀkhae
(Mateub 19:13-15; Lukab 18:15-17)
13On ge ǀnî khoena ǁîn di ôarona ge hā-ū, Jesub nî ǁîna ǃomkha ǁgui-ai tsî ǀkhaese. Xawe gu ge ǁkhāǁkhāsabega ǁîrona ge hā-ūna ge ǃgabe. 14Tsî Jesub ge nēsab ge mû, ob ge kaise ǂkhîoǃnâ tsî ge mî: “An ǀgôarona tita ǃoa hā, î ǁîna tā ǂhani. Nēti īn dib kom Elob Gaosibao. 15ǂÂis ǃnâ nēsa ūhâ! Elob Gaosiba ga ǀgôaro-i khami ǃkhōǃoa tama i-i ge ǁîb ǃnâ amase ǂgâ tide.” 16Ob ge Jesuba ǀgôarona ǁnam tsî ǃomkha ǁgui-ai tsî ge ǀkhae.
ǃKhū hâ khoeb
(Mateub 19:16-30; Lukab 18:18-30)
17Tsî daob aib Jesuba garu hîa i ge ao-e ǁîba ǃkhoeǃoa, ǁîb aiǃâ ǃhon tsî ge dî bi: “ǃGâi ǁKhāǁkhā-aotse, tare-e ta kha nî dī ǀamo ûiba ta nî hōse?”
18Ob ge Jesuba ge ǃeream bi: “Tare-i ǃaromats ǃgâi ti ra ǂgai te? Khoe-i xare-i ge ǃgâi tama hâ, Elob ǀguib. 19#Eks. 20:13; Deu. 5:17; Eks. 20:14; Deu. 5:18; Eks. 20:16; Deu. 5:19; Eks. 20:16; Deu. 5:20; Eks. 20:12; Deu. 5:16Sats ge mîmādi ‘ǃGamts ge tide; ǃgamekhôats ge tide; ǃnarits ge tide; khoe-ets ge ǂkhabase ǂgā-am tide; gāxaǃnâts ge tide tsî sa îb tsî sa îs tsîrats ge nî ǃgôa’ ti ra mîde a ǂan.”
20Ob ge nē khoeba ge ǃeream: “ǁKhāǁkhā-aotse, ti ǂkhamsisa xu ta ge nē mîmādi hoade ra ǁnâuǀnam.”
21Ob ge Jesuba nē khoeba ǂōrisase kō tsî ǀnam bi tsî ǁîb ǃoa ge mî: “ǀGui xū-i ǀgui-ets ge ra ǃnubu. ǃGû, îts ūts hâ hoaraga xūna sī ǁamaxū. Îts marisa ǀgâsana mā, ots ge ǁuiba ǀhommi ǃnâ nî ǁguiribahe. Tsî ǁnās khaoǃgâ hā, îts tita sao.” 22Nēsab ge ǁnâu, ob ge nē khoeba ǃoa hâ ais ǀkha tsî tsûaǂgao rase ge ǃgûbē, kaiseb ge ǃkhū hâ i xui-ao.
23Ob ge Jesuba hoa ǀkhāgu ai kō tsî ǁîb ǁkhāǁkhāsabegu ǃoa ge mî: “Kaise i ge ǃkhū hâ khoena nî ǃgomba Elob Gaosib ǃnâ ǂgâsa!” 24ǁKhāǁkhāsabegu ge nē gu go ǁnâun xa kaise ge ǃhuri. Ob ge Jesuba ǁîga ge mîba: “Kaise i ge ǃkhū hâ khoena nî ǃgomba Elob Gaosib ǃnâ ǂgâsa! 25Kaise i ge ǃnaiba nî supuba nali ās ǃnā-u ǃkharusa, ǃkhū hâ khoe-e Elob Gaosib ǃnâ ǂgâs xa.”
26O gu ge ǁkhāǁkhāsabega kaise ge ǃhuri. Tsî gu ge ǁîǃnābe ge mîǀîgu: “O tari-e ǁnâi nî orehe?”
27Ob ge Jesuba ǁîga kō tsî ge mî: “Nēs ge khoena a īǁoasaba, xawe Elob tawas ose. Hoa xūn Elob tawa a īǁkhā xui-ao.”
28Ob ge Petruba ge ǃeream: “Sige kom ū ge hâ hoaraga xūna ǁnāxū tsî satsa ge sao-o.”
29Ob ge Jesuba ge ǃeream gu: “Amase ta ra mîba go ǁî-i di oms, ǃgâsan, ǁgûra, ôasan tamas ka io ūn hâ xūna ga tita tsî ǃGâiǂhôas ǃaroma ǁnāxū-i hoa-i, 30ge ǂanǂansase nî mādawa-amhe. ǁÎn ge kaidisi ǃnādi kōse omdi, ǃgâsan, ǁgûdi tsî ūn ge hâ i xūna nē hâ ǁaeb ǃnâ nî ǃkhōǃoa, xawe nēn hoana ǃgôaǃgondi ǀkha. Tsî ǃgoaxaǁaeb ǃnâ nēn hoan tawa ǀamo ûiba nî ǀarobahe. 31Xawe ǂguin hîa nētsē ǂguron ge nî ǀuni tsî ǁnān hîa a ǀunin ge nî ǂguro.”
Jesub ge ǃnonaǁî ǃnāsa ǁîb ǁōb xa ra ǃhoa
(Mateub 20:17-19; Lukab 18:31-34)
32ǁKhāǁkhāsabegu ge kaise ge buru Jesub xa aimâbahe hâse gu ge Jerusalems ǁga ǃgûǃapao. ǁKhātin ge ǁîba ge saogaru i khoen tsîna kaise ge ǃao. ǁKhawab ge Jesuba disiǀgamǀa ǁkhāǁkhāsabegu âba ǀguri hâse ǂgaiǂui tsî ǁîb ǀkha nî ī xūna ge mîba:
33“Mû, Jerusalems ǃoa ta ge ra ǃgû, tsîb ge Khoen Ôaba danapristergu tsî Moseb ǂhanub di ǁkhāǁkhā-aogu* di ǃomǁae nî māǁnâhe. ǁÎgu ge ǁîba ǁōǁkharaba ǁgui-ai tsî Jodeǁî taman* ǃomǁae nî māǁnâ. 34Tsîn ge ǁîba ǃhō tsî nî ǂara-ai. Xawe ǃnonaǁî tsēs aib ge ǁōba xu ûib ǃoa nî khâi.”
Jakobub tsî Johaneb tsîkha di ǂgans
(Mateub 20:20-28)
35O kha ge Sebedeub ôakha, Jakobub tsî Johaneb hâkha Jesub ǃoa hā tsî ge mî: “ǁKhāǁkhā-aotse, sats nî dība khom ǃkhaisa khom ra ǂgao ǂgansa khom ge ūhâ.”
36Ob ge Jesuba tare-e kha ra ǂgao ǃkhaisa ge dî kha. 37O kha ge ge mî: “Mā-am khom re sa ǂkhaisib ǃnâts ga ǂgâo, sa xōǀkhā ǃgôasib di ǃharos ǃnâ ǂnûsa, ǀguiba sa amǀkhāb ai tsî nauba sa ǁareǀkhāb ai.”#10:37 Amǀkhāb…ǁare: Kaise ǀgaisa khoen ge ǁîn di gaosib ǃnâ gao-aob ân di ǁareǀkhāb tsî amǀkhāb ai gere ǂnû.
38Ob ge Jesuba ǁîkha ge ǃeream: “Tare-e kho ra ǂgan ǃkhaisa ǂan kho a? Xare tita ra ā ǀgabisa ā ǁkhā kho nî? Tamas ka io māsen kho ra tita ǁāǁnâ-ūhe hâ tsâb di ǁāǁnâs ǀkha ǁāǁnâhesa?”
39O kha ge “Ā, māsen khom ge ra” ti ge ǃeream.
Ob ge Jesuba ge ǃeream: “Amase kho ge tita nî ā ǀgabisa ā ǁkhā tsî ti ǁāǁnâs ǀkha ǁāǁnâhe ǁkhā. 40Xawe ti tama ta kom tari-i nî ti amǀkhāb tamas ka io ǁareǀkhāb ai ǂnû ǃkhaisa nî mî ta. Elob ǀguib kom ǁîb ǁnāsa ǂhomiba hâna ǁhûiǂui hâo.”
41Tsî nau disigu ge nēsa ǁnâu, o gu ge kaise Jakobub tsî Johaneb hâkha ai ge ǀara. 42#Luk. 22:25-26Ob ge Jesuba ǁîga ǂgaiǀhao tsî ge mîba: “Sago kom gaose ra ǂgaiǂnûiǀkhāsen Jodeǁîgu, kaise khoen âga ra ǃhaemagu hâ ǃkhaisa ǂano. Tsî ǁîgu di ǂamai gu ǁkhāti ǀgapi ǂgaeǂgui-aogu, ǁîgu ǃnaka hâ khoen ǂamai ǀgaiba ra sîsenǂuiga hâsa. 43#Mat. 23:11; Mrk. 9:35; Luk. 22:26Xawe sago tā ǁnāti ī re. Sago xu ga ǂgaeǂgui-ao ǂgaob hoab ge nî hoan di ǃoaba-ao kai. 44Tsî ǂguro ǂgaots ka ots ge nî hoan di khobo kai. 45Khoen Ôab kom ǃoabahe nîse hā tamao, xawe nauna nî ǃoabase tsî ûib âb ǀkha ǂguina nî orese.”#10:45 Orese: Grikegowab ge ǀnî ǃnādi ai xawe hoaǁae tama, khobo-i tamas ka io ǃkhōsabe-i di ǁamaǂuimaris ti ra ǂâibasen.
Jesub ge ǂgī Bartimeuba ra ǂgauǂgau
(Mateub 20:29-34; Lukab 18:35-43)
46Tsî gu ge Jesub tsî ǁîb di ǁkhāǁkhāsabegu tsîga Jerixos ǃnâ ge sī. ǁNāpa xu gu ge aiǃâb ǁga ǃkharu on ge kai ǂnubis khoena ǁîga ge sao. Ob ge daob xōǀkhā Bartimeub ti ǀon hâ ǂgī ǀkhope-aob, Timeub ôaba ge ǂnôa i.
47Tsî Jesub Nasaretǁîb a ǃkhaisab ge ǁnâu, ob ge ǃgari dommi ǀkha ge ǂgaitsoatsoa: “Jesutse, Davidi Ôatse,#10:47 Davidi Ôatse: Jodeǁîn ge Xristuba* Gao-aob Davidi omsa xu hâ khoeb ase gere ǃgapaǀî tsî nēs ǃaroma Davidi Ôatse ti gere ǂgaiǀî bi. ǀkhomxa te re!”
48“ǃNō!” tin ge ǀnî khoena ge ǃkhâi bi.
Ob ge ǃaruǀîǀgui ǃgarise “Davidi Ôatse, ǀkhomxa te re” ti ge ǂgai.
49Ob ge Jesuba mâ tsî “ǁÎba ǂgaihāba te re” ti ge mî.
Tsîn ge ǂgī khoeba ǂgaihā tsî ge mî: “ǂGaoba ūhâ! Khâimâ, ǁîb ra ǂgai tsi xuige.” 50Anaǂamsarab âba aoǁgui tsîb ge Bartimeuba ǁnātimîsi Jesub tawa ge sī.
51Ob ge Jesuba “Tare-e ta nî dība tsi ǃkhaisats kha ra ǂgao?” ti ge dî bi.
Ob ge “ǁKhāǁkhā-aotse, mû ǂgao ta ge ra!” ti ge ǃeream bi.
52Ob ge Jesuba ge ǃeream bi: “ǃGû re. Sa ǂgoms ge go ǂgauǂgau tsi.”
ǁNātimîsib ge mûtsoatsoa tsî Jesuba ǁîb ǃgûs ǃnâ ge sao.
Currently Selected:
Markub 10: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
