KEJADIN 15
15
Perpadanen Dibata ras Abram
1Kenca kejadin si ndai kerina, i bas sada pengenehenen, reh kata TUHAN man Abram nina, “Ola kam mbiar Abram. Aku ngampang-ampangi kam, janah mbelin kal upahndu Kubereken.”
2Tapi erjabap Abram nina, “TUHAN si Mada Kuasa, kai gunana upah si iberekenNdu ateNdu man bangku e, adi labo lit anakku? Si Elieser kalak Damaskus e ngenca si ngalo tading-tadingenku! 3La lit iberekenNdu anak kupupus, janah erkiteken si e, sekalak i bas budakku me enggo jadi si ngalo tading-tadingenku!”
4Jenari reh ka kata TUHAN man bana nina, “Labo Elieser si ngalo tading-tadingenndu, tapi anak ipupusndu sendiri nge.” 5Ibabai TUHAN Abram ndarat janah nina, “Tarelah ku langit, cubaken beligai bintang-bintang ah; bagi buena bintang-bintang e, bage me pagi teremna sinursurndu.” #Rom 4:18; Heb 11:12
6Tek Abram man TUHAN, janah erkiteken kinitekenna e ialoken TUHAN ia selaku kalak benar. #Rom 4:3; Gal 3:6; Jak 2:23
7Jenari nina ka TUHAN, “Aku me TUHAN, si mabai kam ndarat i Ur-Babilon nari, gelah Kubereken taneh enda jadi sikerajangenndu.”
8Tapi nungkun Abram, “TUHAN si Mada Kuasa, kuga pemetehku maka taneh enda si kerajangenku denggo?”
9Nina TUHAN, “Baba man bangku sada lembu beru-beru, sada kambing beru-beru, sada biri-biri beruna, kerina umur telu tahun, bage pe sada ndukur, ras sada nderapati si nguda denga.” 10Ibaba Abram rubia-rubia ndai man TUHAN. Kenca ikeret-duakenna, itamakenna petingtang keret-keret rubia-rubia ndai i bas dua baris. Tapi ndukur ras nderapati la ikeret-duakenna. 11Perik-perik si man daging cinep i babo bangke rubia-rubia e, tapi igurba Abram.
12Sanga matawari nandangi sundut, tertunduh me Abram janah badeh kal pertunduhna; kenca bage gelap si mehantu reh man bana. #Jop 4:13,14 13Nina TUHAN man Abram, “Sinursurndu jadi perlajang denggo i negeri kalak; jadi budak pagi ia i je, janah mesui kal atena ibahan kalak 400 tahun dekahna. #Kel 1:1-14; Perb 7:6 14Tapi Kuukum pagi bangsa si mperbudaksa janah asum ia ndarat i bas negeri kalak e nari, melala mekelek ibabana kebayaken. #Kel 12:40-41; Perb 7:7 15Kerna dirindu sendiri, cawir metua me kam pagi, mate alu dame jenari ikuburken. 16Kenca empat kesusuren pagi maka sinursurndu mulih ku jenda, sabap langa pagi kupelawes kalak Amori adi langa kin seh jahatna janah patut iukum.”
17Kenca enggo sundut matawari, wari pe enggo gelap, teridah me cimber tempa i bas dapur nari, bage pe tendang gara mentas arah kelang-kelang tektek daging rubia-rubia ndai.
18I bas ingan e me TUHAN erbahan perpadanen ras Abram nina, “Erpadan Aku mereken taneh enda kerina man sinursurndu mulai i bas perbalengen Mesir nari seh ku Lau Eprat, #Perb 7:5 19termasuk kerina taneh kalak Keni, Kenas, Katmon, 20Heti, Peris, Repaim, 21Amori, Kanaan, Girgasi bage pe taneh kalak Jebusi.”
Currently Selected:
KEJADIN 15: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
