KEJADIN 16
16
Hagar ras Ismael
1Sarai, ndehara Abram, la lit anak ipupusna. Tapi lit sekalak singuda-nguda budak Sarai, Hagar gelarna, ia kalak Mesir. 2E maka nina Sarai man Abram, “Ietehndu maka la ibereken TUHAN aku mupus; dage medemlah kam ras budakku ah, ntah mawen banci ipupusna man bangku sada anak.” Payo iakap Abram kai si ikataken Sarai ndeharana. 3Jenari iberekenna Hagar man Abram. (Kejadin enda terjadi kenca Abram enggo 10 tahun ringan i Kanaan.) 4E maka ersada kula me Abram ras Hagar, kenca bage mehuli kula Hagar. Tapi kenca enggo ieteh Hagar maka enggo mehuli kulana, jadi sombong ia, lanai iergakenna Sarai.
5Erkiteken si e nina Sarai man Abram, “Kam nge si salah maka Hagar megombang man bangku. Kubereken ia man bandu, tapi kenca itehna maka mehuli kulana lanai iergaina aku. TUHAN lah si jadi hakim i bas kita, ntah ise kita ersalah.”
6Erjabap Abram nina, “Budakndu kap ia. Kam erkuasa man bana e maka kuga akapndu mehuli bage ban.” Jenari tuhu-tuhu mesui kal ate Hagar ibahan Sarai, seh maka kiam ia i bas Sarai nari.
7Ijumpai malekat TUHAN si Hagar deher sada ulu lau i padang pasir dalan ku Sur, 8janah nina, “Hagar, budak Sarai, i janari kam e ndai, janah ku ja atendu?” Erjabap Hagar nina, “Aku kiam nadingken tuanku Sarai.”
9Nina malekat ndai, “Mulihlah man bana, janah tetaplah kam jadi budakna. 10Nterem pagi kubahan sinursurndu, seh maka la lit kalak si ngasup meligaisa. 11Ipupusndu pagi sada anak dilaki, bahan denggo gelarna Ismael, erkiteken enggo ibegiken TUHAN pingko-pingkondu ras kiniseranndu. 12Tapi anakndu e denggo bali ras kelede si meliar; kerina kalak ilawanna janah kerina kalak ngelawan ia. Ia serap nggeluh i bas kerina kade-kadena nari.”
13Nina Hagar i bas ukurna, “Tuhu-tuhu kin enggo kuidah Dibata, si mperdiateken aku?” E maka igelarina Dibata ndai “El Roi, Dibata si mperdiateken aku”. 14Erkiteken si enda me maka igelari kalak sumur ndai, “Sumur Dibata Si Nggeluh si enggo mperdiateken aku.” Inganna kelang-kelang Kades ras Beret.
15E maka ipupus si Hagar sekalak anak dilaki. Bapa anak ndai e me Abram, janah ibahanna gelar anakna e Ismael. #Gal 4:22 16Tupung si e umur Abram 86 tahun.
Currently Selected:
KEJADIN 16: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
