Malɨkɔ 7
7
Yeso ʉmɨnya ɨkɔɔ ngia yɨ Ɓayuda
(Mat 15:1-9)
1Ɓisi mʉngana, Ɓafalisayɔ ɨzɔ nʉ mikpekpe yɨ ɓapananakɨa ɓʉ mapanʉ ngiɓa ɓa꞉ʉngwa anʉ Yelusalɛma, ɓa꞉ka anambamba ʉ Yeso. 2Ɓambʉmbɨa ɓɔ mikpekpe yɨ ɓakpataka ngiɓʉ Yeso ɓi꞉nye kʉdyakaka nʉ lɨkɔndɔ lɔɔ likpulunie, iya yakusigo ɓɔ chʉkɔmʉ lɨjaɓɛ ndʉ aka ɓa꞉maiso‑ɔɔ akʉ ɨkɔɔ ngiindaɓʉ. 3Ʉna tɔ, ɛɓɔ Ɓafalisayɔ abana kʉndʉ Ɓayuda kʉ ɓuɓomu, ɓaakpata tʉkʉ ɨkɔɔ yɨ ɓɨsʉngʉɛ ngiɓʉndaɓʉ. Kʉ ɓwanɨ, ɓambakadyakaka ɓʉjaɓanenikɔmʉ lɨkɔndɔ liɗo nadɨndɨ. 4Iya ɓaatʉa akʉ izi yɨ magabʉ, pɛɛ ngia ɓaadyakaka‑ɔɔ, ɓaaɓaa‑zʉ tʉkʉ kʉjaɓanakɨa. Ɓa ɓata kʉ nʉ mapanʉ kɔmɔ maja, kʉkpatanakɨa nʉ ɨkɔɔ ngiindaɓʉ, ndʉ jaɓa lɨkɔchɔ, nʉ lizikio, nʉ lɨkɔchɔ ngila ɓa꞉lɨkyɨa nʉ muko.
5Kʉ ɓwanɨ, Ɓafalisayɔ nʉ ɓapananakɨa ɓʉ mapanʉ ɓambuɓukuo Yeso ɓɔ: « Jʉtanɨ ɓakpataka ngiɓʉsɔɔ ɓakʉdyakaka nʉ lɨkɔndɔ lɔɔ likpulunie? Iinanɨ ya kʉ di nʉ ɨkɔɔ ngia yɨ ɓakuku ngiɓʉndɛsʉ. » 6Yeso ambuɓutisio ɓɔ: « Ambʉ ɨgbɛ Ɨsaya a꞉sigo jɛnɛ ɔgɔ tʉkʉ kingono ekoo ʉndɛnʉ ɓɔ na ɓafili. Iiya ɓa꞉tɨndakɨa‑ɔɔ ɓɔ Asʉɓɨɨ akusigo ɓɔ:
‹ Ɓombi ngiɓaɓɛ ɓaanabibiso tʉkʉ akʉ moni,
ɨkyɛmɨngana mɨtʉma ngiindaɓʉ ya danga nɛmɛ,
7ya ɨsʉkʉɓwanɨ kusigo ɓɔ ɓanɛmɛ kubibiso,
jʉ mapanʉ ngikʉndaɓʉ
ka tʉkʉ mapanʉ kʉ ɓombi. ›
8Akʉ inu ya kʉ ɓwanɨ. Na꞉sɨa mapanʉ kʉ Asʉɓɨɨ sɨaa, nambuɓio tii kʉkpata tʉkʉ ika kʉ ɓombi. » 9Kija a꞉matɨa ɓata ɓɔ: « Oyi, na꞉giso mapanʉ kʉ Asʉɓɨɨ iɗo, nambumaiso tii tʉkʉ ika kʉndɛnʉ. 10Mʉsa a꞉sigo ɓɔ: ‹ Kumo ɔɔ atɔ nʉ anʉ. › Ambʉmatɨa kusigo ɓɔ: ‹ Mombi ugboseni ɨsɛ yɛmɔ inye, ɓʉmʉwa tʉkʉ waa. › 11Ɨkyɛmɨngana, inu naapanɨa ɓɔ mombi usigieni ɨsɛ, yɛmɔ inye ɓɔ ɨkyɛmɛ ngia ɛmɛ mʉkwanana nɔwɛ kunzo ɓɔ yɨnasalɨa, ya꞉nɨtanaka tʉkʉ ‹ kɔlɔbanɨ ›, iya ya kusigo ɓɔ ‹ apɛpɛ ngia ɓa꞉ʉnapɨa akʉ Asʉɓɨɨ. › 12Kija inu naamusigio ɓɔ ʉkwananakɔmʉ tii ɓata kʉsalɨa ɔɔ ɨsɛ nʉ inye. 13Kʉ ɓwanɨ, inu na꞉imo ʉpanʉ wʉ Asʉɓɨɨ tʉkʉ aka ekoo ɨkɔɔ ngia nakʉpanɨa engo. Nʉ na ɓata kʉ kʉkyɨa ɓamoni nga ɓɔmɔ ɓaja kʉndʉ ɨɓʉnanɨ. »
Ɨmanɨ yaaikiso mombi 'ukpulunie apɛɛ Asʉɓɨɨ?
(Mat 15:10-20)
14Yeso ambusoko ɓata ungbutu wʉ ɓombi. Gʉ ɛyɔ naɓɔ ɓɔ: « Inu kʉ ɓuɓomu nakeni tʉkʉ iɗo, nambupimiso moni ngika. 15Yambʉkɔmʉ nʉ ɨkyɛmɛ gʉkʉ mɨngana iya yaaʉngwa aɓei ʉ mombi yambukumunio amati angɔ, iya yakwanana nayɔ kuikiso 'ukpulunie apɛɛ Asʉɓɨɨ. Ɨkyɛmɨngana, tʉkʉ ɨkyɛmɛ ngia yaaɓʉa amati ʉ mombi iya yaamikiso 'ukpulunie apɛɛ Asʉɓɨɨ. [16Mombi ngia anʉ muchwei kɔɔ mʉkɛ, ʉkɔ moni ngikʉnanɨ!] »
17Ati ngia Yeso a꞉sɨa‑ɔɔ ungbutu wʉ ɓombi nguʉnanɨ, ɛyɔ tiga kʉtʉa andei, ɓakpataka ngiɓangɔ ɓambumuɓukuo inyi yɨ isisinio ngiinanɨ. 18Ambuɓusigio ɓɔ: « Ajʉ inu na ɓata kʉ amati ʉ ɓujangi‑jangi ɓiɛ? Ajʉ nambakapimiso ɓɔ yambʉkɔmʉ nʉ ɨkyɛmɛ gʉkʉ mɨngana iya yaakumunio amati ʉ mombi, iya yamikiso 'ukpulunie apɛɛ ʉ Asʉɓɨɨ? 19Jʉ ɨkyɛmɛ ngiinanɨ yambʉkɔmʉ kukumunio amati ʉ 'ʉtʉma, ɨkyɛmɨngana yaasa amati ʉ ɓʉa, mbise ɔngɔ yambʉsa akʉ 'ʉtaa. » Yeso i꞉nye kʉkʉnda kusigo ɓɔ idyo yɨ ɔpɛ yambʉkɔmʉ.
20Ambuɓusigio ɓata ɓɔ: « Tʉkʉ ɨkyɛmɛ ngia yaaɓʉa amati ʉ 'ʉtʉma wʉ mombi, iiya yaamikiso 'ukpulunie apɛɛ ʉ Asʉɓɨɨ. 21Itungwio yɛɛ ɓɨɓɨ kʉ iɓomu yaaɓʉa amati 'ʉtʉma wʉ mombi, iya yaamutito kʉkyɨa ɓamoni ndʉ ɨndambʉ, ndiɓo, dʉka ɓombi, 22kyɨa ɨndambʉ, taa yɨ kumbo, ɓʉɗɨa, ɓufili, kɨnda kʉ gbaɨ, imi yɛɛ ɓɨɓɨ, chwio ɓangɛ nʉ yakanaka, ɗaaka ɓangɛ nʉ moni kʉ yakanaka. 23Ɓamoni ngiɓʉnanɨ kʉ ɓuɓomu, ɓaaɓʉa tʉkʉ amati ʉ mombi, nʉ ɓaamikiso 'ukpulunie apɛɛ ʉ Asʉɓɨɨ. »
Baya ngia yɨ moi ngia ambikinye 'ʉtʉ ʉ Ɓayuda
(Mat 15:21-28)
24Iya Yeso a꞉ʉngwa nanɨ, ambʉtʉa akʉ gɨpa ʉ Tilo.#7:24 Gɨpa ʉ Tilo i꞉nye aɓei ʉ ɨkʉmbʉ yɨ Ɓayuda. Ambukumunio amati ʉ ɨkáa mɨngana ɓɔ. Ambikinye kʉkʉnda ɓɔ mombi ʉmbɨa ɓɔ a nanɨ. Tɔ, yi꞉nye pɛpɛ tʉkʉ ɓʉkaɨ ɓɔ aɓatanɨa. 25Moi mʉngana i꞉nye nʉ mwana angɔ ɔɔ moi, iya i꞉nye nʉ 'ʉtʉma wʉ abɨa. Iya a꞉kɔ nayɔ ɨsaʉ yɨ Yeso, kʉ nɨma ngiinanɨ ambʉka kʉkwa akʉ mɨtɨndɨ yangɔ. 26Moi ngiinanɨ ambikinye 'ʉtʉ ʉ Ɓayuda. Ndaɓʉ i꞉nye akʉ gɨpa ʉ Foinika amati ʉ ɨkʉmbʉ yɨ Silia. Ambʉndɨanɨa Yeso ɓɔ uiso ɓaka 'ʉtʉma wʉ abɨa ngua wi꞉nye amati ʉ mwana angɔ. 27Ɨkyɛmɨngana, Yeso ambumusigio ɓɔ: « Sɨa ɓana ɓumotoko‑zʉ pɛɛ, jʉ yɨkwananakɔmʉ kʉchɨka idyo ngia yɨ ɓana, ɓambuigisio ɓɨmva. » 28Moi ngiinanɨ ambumutisio ɓɔ: « Ya ndʉ ananɨ Makʉasɛmɛ. Ɨkyɛmɨngana, ɓɨmva ɓaadya ɓadudu ɓʉ idyo ngia yaaɓwanakɨa ɓana ɛsɨ ʉ mɛza kʉ dyanɨ. » 29Yeso ambumusigio ɓɔ: « Aka ekoo ʉ moni ngikʉnanɨ wʉyakaa, sa, jʉ 'ʉtʉma wʉ abɨa wʉ꞉ɓʉa mwana asɔɔ ɓʉanɨ. » 30Iya moi ngiinanɨ a꞉tʉa nayɔ andɔngɔ, a꞉gbʉka mwana angɔ ɓʉkwaɨ tʉkʉ ɓʉ dɨɨ, 'ʉtʉma wʉ abɨa wʉ꞉mʉɓʉeni ɓʉaa.
Yeso uhiiso mombi ngia ambikinye kɔ
31Kija Yeso a꞉ʉngwa akʉ gɨpa ʉ Tilo, ambʉɓaa tiga akʉ gɨpa ʉ Sɨdɔna. A꞉ɓaa 'upi akʉ gɨpa ʉ Dekapoli ambʉɓʉya tiga akʉ yapuu yɨ Galilaya. 32Tiga nani, ɓambʉmɨkyɨa nʉ mombi mʉngana ngia ambikinye kɔ nʉ i꞉nye puo moni kʉ gbaɨ, ɓambʉmʉndɨanɨa ɓɔ ʉmʉnapɨa ɓaka lɨkɔndɔ ekoo angɔ. 33Yeso ambʉʉngwa nayɔ ati ʉ ungbutu wʉ ɓombi, ɓambʉsɨngana nayɔ anambamba, ambumusingo ɓakpɛngbɛ akʉ muchwei, ambutoko mukoi akʉ lɨkɔndɔ ngilangɔ, ambumuɓoto ʉɗaɗa. 34Mbise ɔngɔ, ambʉtɨna waja ekoo ʉ ɓisi, ambufukuo ɓʉ fukaa, ambusigio gue ngiinanɨ ɓɔ: « Ɛfata! » Inyi yɛngɔ ɓɔ « Gananakɨa! » 35Tʉkʉ nɨma ngiinanɨ, muchwei kʉ gue ngiinanɨ kambʉgananakɨa, kija ʉɗaɗa wambumuɓununio. Ambufaniso yaka tʉkʉ ɓʉ ngbɛlɛ ngbɛlɛ. 36Yeso ambʉɓʉgbʉma ɓɔ ɓɔɔɓɨakɔmʉ mombi gʉkʉ mʉngana moni ngikʉnanɨ. Ʉna tɔ, ɛyɔ i꞉nye kʉgbʉma ɓɔ ɓɔɔɓɨakɔmʉ mombi ɨsaʉ ngiinanɨ, ɛɓɔ ɓombi ngiɓʉnanɨ ɓambuɓio kʉnanzaniso ɨsaʉ yɛngɔ tiga nʉpɛɛ nadɨndɨ. 37Moni kʉ muɓomu ngika a꞉kyɨa, ka꞉mbangɨa ɓombi nadɨndɨ. Ɓambusigo ɓɔ: « Aakyɨa moni kʉ muɓomu tʉkʉ muɗo! Ambuhiiso ɓombi ngiɓa ɓa꞉dɨkpanakɨa muchwei kʉfaniso kʉnɨkɔ, nʉ ɓombi ngiɓa ɓambakayaka kufaniso kʉyaka. »
Currently Selected:
Malɨkɔ 7: BudKoya
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
