Yoáni 11
11
Lajálɔ aku
1Nkpa moci ɗátú osamba ka Bɛtanía ina akɛ Lajálɔ. Malía na áwákɛ Maatá ɗáɓáiki ka nji ndɔɔ. 2(Malía ímbe, aámbé ɗánsǐ Mɔkɔta na nkoki k'ecinji, áɔkɔmbɛa ú na sekamɔ̌ akɛ. Muna-amakɛ Lajálɔ aámbé ɗátú osamba.) 3Ɓáwákɛ ɓaɓɛ ndɔ, ɓáonteka nkpa kuɓî Yéso aɔ ka ngoɗeakɛ te: «Mɔkɔta, dakɔ ékondi aosamba.» 4Ɓî Yéso aɔ́ki mbino ndɔ, áogea: «Ngobo ndɔ kánkúsɛku Lajálɔ. A tɔ ka phangia á ɓoombia ndea Mokonga na ɗokomisa á Muna-Mokonga ka phɔa nyɔngɔ ndɔɔ.»
5Yéso ɗáekondi: Maatá, na áwákɛ na Lajálɔ. 6Cɔ, mbenɔ nde ɗáɔ́ki gea Lajálɔ aosamba, Yéso â goto oika k'ésa iɓɛ ka nji nde ɗátú kau. 7Mpɔ, áǒngoɗea ɓagoigi nɛkɛ gea: «Ɓéjeni goto na Yudɛ́a.»
8Wa, ɓagoigi ɓáongea: «Ngoisigi, nna tɔ ka ɓ'esa nde unge Ɓayúda ɓátúokaɓa mowa akɔ n'ɛtɛ? Cɔ, o goto oja ko?» 9Yéso áǒsikisia: «Esa moci nna na mbenɔ nkama na iɓɛ (12)? Aoɓá nkpa n'aotamba n'esa, káɓɛ́tɛ́kanɛ ka nyɔngɔ nde, aɔɔna owanga á ka mokonda ndee. 10Nkpa a gǎkɛ otamba kǐpha, áɔɓɛtɛkana, ka nyɔngɔ nde owanga nna suɓi akɛ.»
11Mbusa á Yéso yɔnga á ɓó, áotútuisa gea: «Dasu á ekondi a ka tɔ̌. Nege gǎkɛ onjujukisa.» 12Ɓagoigi nɛkɛ ɓáongea: «Mɔkɔta, aoɓá n'atú ka tɔ̌, aamande.» 13Ande gea te, Yéso ɗáɔyɔnga nyɔngɔ á kukuwa ndea Lajálɔ. Ɓagoigi ɓâ ndiu okanisia te, a tɔ ɔyɔnga nyɔngɔ á tɔ̌. 14Mpɔ, Yéso áǒngoɗea base gea: «Lajálɔ aku. 15Ne gǎkɛ na maseye ka nyɔngɔ anu nga, kétú ɓei mbenɔ á kukuwa akɛ. Kaɓondɔ, ɓomoɓeekeande phɛɛ. Cɔ, ɓégɛni ye tɔ kuɓî aɔ.» 16Mpɔ, Tɔmá, mmbɔ ɓáɔmɔphana Mphase, áǒngoɗea ɓagoigi ɓunɛngbo te: «Ɓesu, ɓégɛni phɔtɔ ka gea, ɓékuwɛ na Mɔkɔta nɛsu.»
Yéso aǒjujukisa ɓakpa ka kukuwa na endisa aɓɔ
17Ka kiɗia á Yéso, áondonda Lajálɔ n'agi esa gena suɓi á bóta. 18Bɛtanía ɗátú bíbí na Yɛusalɛ́ma, ɗangamana á ɓei ɗátú ɓea kilɔmɛ́tɛɛ isaɔ. 19Ɓayúda ɓásii, ɗáɓábiki mɔtɛ á Maatá na Malía k'aphe á oiɔ á muna-amaɓɔ.
20Cɔ, ɓî Maatá ɗáɔ́ki gea, Yéso abiki, áoga omɓondeaga. Malía â gǎkɛ ojiga k'éndu. 21Maatá áongoɗea Yéso: «Mɔkɔta, atúoɓá na ɗótú wani, ámbé muna-ayi káku. 22Cɔ, kɛ̌kɛnde ne gǎkɛ oúba gea, kema bui nde ɔmmɛmande Mokonga, Mokonga akophande.» 23Yéso áongoɗea: «Muna-amakɔ ajujukande ka kukuwa.» 24Maatá áongoɗea: «Neoúba gea, ajujukande ka kukuwa, k'ésa á sungiaga á mokonda ka mbenɔ nde ɓasí ɓájujukande ka kukuwa.»
25Mpɔ, Yéso áongoɗea te: «Nende Jujúka ka kukuwa na enda. Mmbé amoɓeeki, aendande nanga ákuwa. 26Nkpa buakɛ mmbé aoenda, n'amoɓeeki, kákuwɛku tanda. Cɔ, oɓeeki nndɔ?» 27Maatá áongea: «Eya Mɔkɔta, eme neɓeeki gea, onde Kiísito, Muna-Mokonga, mmbé abikande ka mokonda.»
Yéso aogáma
28Mbusa á Maatá yɔnga ɓó, áoga ɔmɔphana áwákɛ Malía, áongoɗea ka kɔsɔ-kɔsɔ gea: «Ngoisigi akiɗi, aɔkɔɔphana.» 29Ɓî Malía aɔ́ki ye ɓó, áomá, áɔcɔcɔka kuɓî Yéso aɔ. 30Wa, Yéso ɗátú phɔ́tɔ ka ngba, kuɓî Maatá ɗáge omɓondeaga. 31Ɓî Malía ɗábutukani ye, Ɓayúda nde ɗáɓátú k'éndu wa ka nyɔngɔ á oiɔ, ɓáomɓea. Ɓáokanisia gea, age ogáma ka bóta.
32Ɓî Malía ɗájú ye ɔma nde Yéso aɔ, áɔmɔna, áogua k'écinji akɛ, áongea: «Mɔkɔta, atúoɓá n'otú wani, ámbé muna-mma kátóku.» 33Ɓî, Yéso ɗámɔni Malía n'aogáma, Ɓayúda ɓunde ɗáɓábiki kimoci na ɓɔ na ɓá phɔtɔ ogáma. Áoɓá na měma á oiɔ phɛɛ na agatana ka měma. 34Yéso áǒɓúsia te: «Ɓotómúmbi wani?» Ɓáonsikisia te: «Mɔkɔta, bika, ɔ́ɔnɛ.» 35Yéso áogáma. 36Mpɔ, Ɓayúda ɓáogea: «Cɔ, ɔnani ɓî ɗánkondi Lajálɔ.» 37Ɓakpa ɓunɛngbo sɔsɔɓɛ aɓɔ, ɓâ gǎkɛ ogea: «Yɛ ímbe ɗákoɗi iso á keíme-íme, ɗákátɔki phɔ́ imisia gea, Lajálɔ kakuwɛ?»
Yéso anjujúkisi Lajálɔ ka kukuwa
38Cɔ, Yéso â goto oɓá na měma á oiɔ, áoga ka bóta. Bóta kau ɗátú okanga nnde ɗáɓáɗaki kúbú í n'ɛtɛ angbóngbó#Ɔna Mat 27.60; Mkɔ 15.46; Lók 24.2. 39Yéso áogea: «Cɔ, phúiani ɛtɛ.» Maatá, áwákɛ na mmbé aku, áongea: «Mɔkɔta, a ye tɔ koumba. Nga, a ye esa gena ɓî ɓámúmbɛ.» 40Yéso áongea: «Kétóogi aoɓá n'oɓeeki, ɔɔnande ɓoombia ndea Mokonga?» 41Mpɔ, ɓâ gǎkɛ otiɓa ɛtɛ. Yéso áɔɔnjia na koba, áɔmɛma gea: «Abɛ, neosegi nga, ɔɔmɔɔ́ka. 42Eme, neoúba gea, ɔɔmɔɔ́ka esa bui. Nɛyɔngi gǎkɛ ɓó, ka nyɔngɔ á ɓakpa nde ɓámotimbi, ka gea ɓáúbɛ gea te, oɓɛ aámbé ɗómoteki.» 43Mbusa á yɔnga akɛ ɓó, áɔyɔnga n'ɛsɔ akpɛ gea: «Lajálɔ ca! Juana!» 44Yɛ nkú, áojuana na ɓámɓóege na phaeka á bɔngɔ k'écinji, ka njaga, phɔtɔ na ka keongi akɛ. Mpɔ, Yéso áǒsosea: «Nkóɗágani, ɓónɗeketɛ ágɛ nɛkɛ.»
Ɓakɔta á Ɓayúda ɓáonca Yéso ka mowa akɛ
(Ɔna phɔtɔ Mat 26.1-5; Mkɔ 14.1-2; Lók 22.1-2)
45Cɔ, Ɓayúda ɓásii sɔsɔɓɛ á ɓunde ɗáɓábiki mɔtɛ á Malía, ɗáɓámɓeeki Yéso ka nyɔngɔ á ɔna kema nde ɗági. 46Ɓunɛngbo ɓâ gǎkɛ oga ɔ̌tɔmia Ɓaphaisáyɔ, nyɔngɔ á kema nde Yéso ɗági. 47Mpɔ, ɓagbɛga á ɓatobeigi-phɛ́a, na Ɓaphaisáyɔ, ɓáodondana ka ntua ángbó á tena á nyɔngɔ ɓáogea: «Ɓî mogáa nde aɔtɔtɔkisa ketangaɔ ásii ɓende, ɓegeande ɓo? 48Aoɓá na ɓenɗú tɔ ɓó, ámbé ɓakpa ɓɔbu, ɓámɓeekeande. Mpɔ, ɓaamɛ ndea Ɓalɔ́ma, ɓábikande kotúkatúka endu ndea Mokonga nɛsu na ekuna nɛsu.»
49Ka ɓɔ moci gǎkɛ, ina akɛ Kayápha, mmbé ɗátú ngbɛga á ɓatoɓeigi-phɛ́a ka saga ndɔ, áǒgea: «Ɓenu, ɓókóoengekisa ka kema! 50Ɓókóoúba gea, aánjá ka ɓenu gea, nkpa moci ákuwɛ ka nyɔngɔ á ɓakpa, kángá á túkatúka ekuna bui.» 51Ɗáká gǎkɛ ɔyɔnga ɓó ka kanisia akɛ sasakɛ nga, ɓî ɗátú ngbɛga á ɓatoɓeigi-phɛ́a ka saga ndɔ, ɗáɔɔ́tɔa nyɔngɔ gea, Yéso aámbé akuiaeka ekuna ndea Ɓayúda. 52Nna tɔndɔ ka nyɔngɔ á ekuna, ɗátú phɔtɔ ka nyɔngɔ á dondanisaga ɓana-Mokonga ɓɔbu kimoci, ɓunde ɗáɓáphanjekani.
53Cɔ, kpanga á esa ndɔ, ɓakɔta á Ɓayúda ɓáobisa moangɔ á kusa á Yéso. 54Kaɓondɔ unge, Yéso ɗáká ye otamba base sɔsɔɓɛ á Ɓayúda. Â gǎkɛ oga na Ɛphulaímu, ntanga-nji nde ɗátú bíbí á nkanda. Áoika kó na ɓagoigi nɛkɛ.
55Ɓî jaí á Pasáka ndea Ɓayúda ɗátú bíbí, ɓakpa ɓásii á ka nji ɗanga-ɗanga ɓáotáia na Yɛusalɛ́ma k'aphe á sokosea á měma aɓɔ. 56Ɗáɓáonkáɓa Yéso, ɓáɔyɔngaga sɔsɔɓɛ aɓɔ suɓi éndu ndea Mokonga ɓe: «Kanisia anu a ɓo? Abikande ka jaí nde?» 57Wandɔ, ɓagbɛga á ɓatoɓeigi-phɛ́a, na Ɓaphaisáyɔ, ɓáǒsosea ɓakpa gea: «Kaɓɛ nkpa n'aúbi ɓî Yéso aɔ, ásɔtɔ̌miɛ ka gea ɓándungɛ.»
Currently Selected:
Yoáni 11: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
