Yoáni 12
12
Malía aɗuki nkoki k'écinji á Yéso
(Ɔna phɔtɔ Mat 26.6-13; Mkɔ 14.39)
1Esa ngianjaga (6) mosá á jaí á Pasáka, Yéso ɗáge na Bɛtanía#Ɔna Mkɔ 11.1, ka nji nde Lajálɔ, mmbé ɗánjujúkisi ka kukuwa ɗátú kau. 2Kó, ɗáɓáɔ́mbi kakɛ eea á ɔgɔgɔ, Maatá áɔ̌únaneaga ka mɛja. Lajálɔ ɗátú ka ɓakpa nde ɗáɓáigi kimoci na Yéso. 3Malía â gǎkɛ ɔbɛɗa ngbanda á nkoki moci nnde ɓáɓɔngisigi ánjá na maya nde ɓáɔɔphana Nadɔ esombi í n'ákpɛ. Áosia ú k'écinji á Yéso, áɔkɔmbɛa ú na sekamɔ̌ akɛ#Ɔna Lók 7.37-38. Endu áotúma na su á nkoki.
4Mpɔ, ka ɓagoigi ndea Yéso, ina akɛ Yúda Isikaliɔ́ta, mmbé antɔngande Yéso, áogea, 5«Ka nyɔngɔ éke nde ɓékésombisi nkoki nde ka imɔna mia isaɔ (300) na gabea á ɓaúki?» 6Ɗákáyɔngi gǎkɛ ɓó ka nyɔngɔ á ngomi á ɓaúki, ɗátú ndiu ka nyɔngɔ nde ɗátú nkukuɓa. Yɛ, aámbé ɗáokumbaga njombi á imɔna, na bɛɗa kau ka phɔakɛ sasakɛ. 7Mpɔ, Yéso â gǎkɛ ogea: «Nɗeketani nke ndɔ caa! Nga, agi ɓó ka ɓɔngisiaga esa á úmba ani.» 8Ɓoɓande na ɓaúki esa bui, eme gǎkɛ, kéɓɛku na ɓenu esa bui.
Maca á mowa á Lajálɔ
9Cɔ, usɛsɛ ángbó á Ɓayúda ɓáɔɔ́ka gea, Yéso ɗátú na Bɛtanía. Kaɓondɔ, ɓáoga kó, nna tɔndɔ ka nyɔngɔ á Yéso, ɗátú gǎkɛ phɔtɔ ka nyɔngɔ á ɔna ka Lajálɔ, mmbé Yéso ɗánjujúkisi ka kukuwa. 10Ɓagbɛga á ɓatoɓeigi-phɛ́a, ɓâ phɔtɔ obisa moangɔ á mowa á Lajálɔ. 11Nga, Ɓayúda ɓásii ɗáɓěɗu ka nyɔngɔ á Lajálɔ, ɓáomɓeekea Yéso.
Yéso angí ka Yɛusalɛ́ma
(Ɔna Mat 21.1-11; Mkɔ 11.1-11; Lók 19.28-40)
12Mama í, usɛsɛ ángbó á ɓakpa ɓunde ɗáɓákiɗi ka jaí á Pasáka ɓáɔɔ́ka gea, Yéso aobika na Yɛusalɛ́ma. 13Ɓâ gǎkɛ ɔbɛɗa kasa á mbia, ɓáoga omɓondeaga ka ngba, na ɓáɔyɔnga k'ɛ́sɔ akpɛ te: «Obebɔ ka Mokonga! Ambe Mokonga ábisɛ njaga akɛ gǔ á mmbé abiki k'ína á Mɔkɔta! Mokonga ábisɛ njaga akɛ gǔ á moamɛ ndea Ɓaisilaɛ́li#Ɔna Jab 118.25-26; Mat 21.9!»
14Wa, Yéso áondonda miki á mponda, áokambea gǔ akɛ, ɓíndɔ ɗáɓáɗundu suɓi á Ɓuku á Mokonga gea:
15«Ɓato á ka Sayúni, ɓókóɓangɛmbɛ!
Moamɛ nɛnu abiki,
Akǎmbi gǔ á miki á mponda#Ɔna Jak 9.9.»
16Ɓagoigi nɛkɛ ɗáɓákáengekisi phɔ́ kema ndɔ. Ɓî Mokonga ɗántáisi gǎkɛ Yéso ka ɓoombia, mpɔ ɓáokanisia nyɔngɔ nde ɗáɓáɗundu ka phɔakɛ, n'índe ɓakpa ɓásii ɗáɓátɔtɔkisi ka phɔakɛ.
17Cɔ, usɛsɛ á ɓakpa nde ɗáɓátú na Yéso mbenɔ nde ɗámɔphani Lajálɔ suɓi á bóta ka jujúkisa akɛ sɔsɔɓɛ á ɓasí, ɓɔ ɓáunge ɗáɓáɔtɔmiaga nnde ɗáɓáɔni. 18Kaɓondɔ unge, usɛsɛ á ɓakpa ɗáɓábiki omɓondeaga, ka nyɔngɔ nde ɓakpa ɗáɓáɔ́ki gea, yɛ aámbé ɗátɔtɔkisi mphangiɔ á ketangaɔ ndɔɔ. 19Ɓaphaisáyɔ ɓâ gǎkɛ ɔyɔngaga sɔsɔɓɛ aɓɔ gea: «Cɔ, ɓɔɔni? Ɓéké ye ɔtɔka ka kema nga, ɓakpa ɓɔbu ɓámɓi.»
Ɓagiíki ɓáonkaɓa Yéso
20Cɔ, ka Ɓagiíki#12.20 Ɓagiíki: Ɓakpa ɓunde ɗáɓábiki ka jaí á Pasáka nde, ɗáɓákátú tɔ Ɓayúda. Ɗáɓátú ye tɔ ka mɔɔmba á Ɓayúda nga ɗáɓáɓeeki esomba nɛɓɔ. ɗáɓátú sɔsɔɓɛ á ɓunde ɗáɓábiki ka Yɛusalɛ́ma, k'aphe á ɗokomisa á Mokonga, ka mbenɔ á jaí á Pasáka. 21Ɓɔ, ɓáɔnsɛkɛɗɛa Philípɔ, nto á Bɛtɛsaída á ka Galiláya. Ɓáongea: «Mɔkɔta, ɓekondi ɓɛ́mɔnɛ Yéso.» 22Philípɔ áoga ongoɗea Andeé, mpɔ ɓɔbu ɓaɓɛ ɓáoga ongoɗea Yéso. 23Yéso áǒsikisia te: «Cɔ, mbenɔ ajú ye tɔ, nnde Mokonga anɗokomisande Muna-Nkpa. 24Nenóngoɗi ɗoni gea, mbuka á nganɔ a tɔ ojiga sasakɛ ámbé kágumbɛ ka oɗo na phoa. A ye gǎkɛ ogua ka oɗo na phoa, áɔgɔmbisa mbuka ásii. 25Nkpa nde akondi amba á enda akɛ, aɓúngisande. Mmbé gǎkɛ aokangea enda akɛ ka mokonda nde, aámbaeka enda ndɔ mɛyɔ. 26Kaɓɛ nkpa n'akondi bɛɗaneagani ambe ámoɓeɛ. Ɔma nde ne ɓei, aunge mbɛɗanigi nɛmɔ aɓande phɔtɔ. Abɛ anɗokomisande mmbé aɔmɔbɛɗaneaga.
Yéso aɔyɔnga nyɔngɔ á kukuwa akɛ
27Cɔ, kɛ̌kɛnde měma ani aágátani. Neyɔngande kema sina? Neyɔngande, Abɛ, komoɗeketeɛmbɛ ka tambaga á mbenɔ ndee. A ndiu ka nyɔngɔ índɔ unge nebiki kau ka mbenɔ ndee. 28Abɛ, ɗokomisa ina akɔ.» Mpɔ, ɛsɔ áɔɔ́kɛkana n'atóki na koba gea te: «Ne yé ɗokomisi na neɗokomisande goto.» 29Usɛsɛ á ɓakpa ɓunde ɗáɓátú wa, ɓî ɓáɔ́ki ye ɛsɔ ndɔ, ɓáogea: «Ande ɓáoka á mbua.» Ɓunɛngbo ɓáogea: «Malaéka aámbé ɗáyɔngigi na yɛ.»
30Yéso â gǎkɛ ǒsikisia: «Nna ka nyɔngɔ ani unge ɛsɔ ndɔ aɔ́kɛkani, a ndiu ka nyɔngɔ anu. 31Kɛ̌kɛnde unge Mokonga atenande nyɔngɔ á ka mokonda. Kɛ̌kɛnde, amɓeagande phɔtɔ moamɛ á ka mokonda ndee. 32Eme gǎkɛ, mbenɔ nde ɓámotáisande ka mokonda nde, něɓoteande ɓakpa ɓɔbu.» 33Yéso ɗáyɔngi ɓó ka úbisa á etéte á kukuwa nde akuwande.
34Cɔ, usɛsɛ á ɓakpa ndɔ, ɓáonsikisia ɓe: «Ɓuku ɛ́ɔphi asongoɗi gea: ‹Kiísito aendande mɛyɔ.› Cɔ, ɔyɔngi gea, ɓántáisande Muna-Nkpa ka ɓo? Muna-Nkpa ndɔ, ande ani?» 35Yéso áǒngoɗea: «Owanga a phɔ́tɔ sɔsɔɓɛ anu ka mbenɔ ábɔa. Tambani ɓî ɓo phɔ́tɔ na owanga, ka gea, kaiphiɔ kanódondɛmbɛ kángá á ɓá na mosenda í. Nga, nkpa nde aotamba ka kaiphiɔ, nnaoúba ɔma nde aoga. 36Cɔ, ɓî owanga a phɔ́tɔ sɔsɔɓɛ anu, ɓeekeani tɔ wa ka gea, ɓóɓɛ ɓakpa ndea owanga ndɔɔ.»
Mbusa á yɔnga akɛ ɓó, Yéso áoga, áɔ̌sɔmɛana ɗanga na usɛsɛ á ɓakpa ndɔɔ.
Ɓayúda ɓákámɓeeki Yéso
37Nanga ɓî Yéso ɗátɔtɔkisi ketangaɔ ásii mosá aɓɔ, ɗáɓákámɓeeki. 38Ɗáɓági ɓó ka gea, nyɔngɔ nde Isáya mɔtu-nyɔngɔ ndea Mokonga ɗáyɔngi gea:
«Mɔkɔta, ani mmbé aɓeeki ɓoabi nɛsu?
Ani mmbé, Mɔkɔta amphangi ɓukpɛkpɛ nɛkɛ#Ɔna Isa 53.1?»
39Isáya ɗáyɔngi phɔtɔ, ka nyɔngɔ éke nde ɓakpa nde ɗáɓákátɔki ɓeekea,
40ɗáebisi ɓakeíme-íme,
â phɔtɔ obisa měma aɓɔ akpɛ
ka gea, ɓákaɔnaphɛmbɛ,
ɓákaúbaphɛmbɛ.
Ka nyɔngɔ índɔ unge Mokonga ɗági gea,
ɓákaepháiɛmbɛ kuɓî nɛɔ,
ka gea te, néamisɛ.#Ɔna Isa 6.9
41Isáya ɗáyɔngi ɓó nga, ɗáɔni ɓoombia ndea Yéso, áɔyɔnga gǔ akɛ. 42Nanga ɓó, ɓakɔta á Ɓayúda ɓásii, ɗáɓámɓeeki Yéso. Ɗáɓáeɓangi gǎkɛ Ɓaphaisáyɔ. Kaɓondɔ unge, ɗáɓákáyɔngi base ka gea, Ɓaphaisáyɔ ɓákáeɓeɛgɛmbɛ k'éndu á madondanɔ ndea Ɓayúda ka nyɔngɔ á Mokonga. 43Nga, ɓakɔta ndɔ ɗáɓáokonda obebɔ ndea ɓakpa, kɔnyɛ́nya nnde atóki ka Mokonga.
Tena á nyɔngɔ ka ɓeana na nyɔngɔ ndea Yéso
44Cɔ, Yéso ɗáengoɗi ɓakpa k'ɛ́sɔ akpɛ gea: «Nkpa nde amoɓeeki, kámoɓeeki tɔndɔ eme, amɓeeki phɔtɔ mmbé amoteki. 45Mmbé amɔɔni, amɔni phɔtɔ mmbé amoteki.
46Eme, nebiki ɓea owanga ka mokonda. Mmbé amoɓeeki, káikɛku ka keiphe. 47Kaɓɛ nkpa n'aɔ́ki ɓɔphɛi nɛmɔ na káambi, nna gǎkɛ eme aámbé netenande nyɔngɔ nɛkɛ. Nga, ɗébiki ka amisa á ɓato á ka mokonda, nna ka tena á nyɔngɔ nɛɓɔ. 48Nkpa nde amoyé, na nnaoɓeekea nyɔngɔ nɛmɔ ɓátenaeka nyɔngɔ nɛkɛ akpɛ. Nyɔngɔ nde ɗéyɔngi aunge, atenaeka nyɔngɔ akpɛ k'ésa á sungiaga á mokonda. 49Kɛ́yɔngi ka kɔkɔta nɛmɔ. Abɛ, mmbé amoteki, aámbé amososi ndiu nyɔngɔ bui nde akeni nɛ́tɔ̌miɛ ɓakpa, na goisaga aɓɔ ně. 50Neoúba gea, nyɔngɔ ndɔ amososi, aunge aǒɓopha ɓakpa enda á mɛyɔ. Ne gǎkɛ tɔ ɔyɔnga ɓíndɔ Abɛ amososi.»
Currently Selected:
Yoáni 12: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
