Yoáni 13
13
Yéso aosokosa ecinji á ɓagoigi nɛkɛ
1Cɔ, bíbí á jaí á Pasáka, Yéso ɗáúbi gea, mbenɔ á toka akɛ ka mokonda nde na gǎ mɔtɛ Abakɛ ajú ye tɔ. Ɗékondi ɓakpa nɛkɛ, ɓunde ɓá ka mokonda. Ɗékondi ɓakpa nɛkɛ ɓunde ɗáɓátú ka mokonda, ásikia konda aɓɔ na ka sungiaga.
2Mbenɔ nde Yéso na ɓagoigi nɛkɛ ɗáɓátú oeaga ɔgɔgɔ, Nketi ɗábisi ka měma á Yúda, muna Simɔ́ni Isikaliɔ́ta, mɔphɛ á tɔnga á Yéso. 3Yéso ɗáúbi gea, Mokonga ɗábisi kema bui ka njaga akɛ, ɗátóki mɔtɛ á Mokonga, na ajande phɔtɔ kó. 4Áǒmɛsia k'ɔ́ma á eaga, áǒphúia bɔngɔ nɛkɛ á gǔ, áɔ̌ɓɔɛa phaeka á bɔngɔ nɛngbo ka cina-kuju. 5Mbusa, áoɗukia iɓo suɓi á ɔphɛphɛ, áokpanga sokosa á ecinji á ɓagoigi nɛkɛ, áɔkɔmbɛaga ú na phaeka á bɔngɔ nde ɗátú ně ka cina-kuju.
6Akiɗi ye bíbí á Simɔ́ni Pɛ́tɛɛ, Pɛ́tɛɛ áomúsia Yéso: «Mɔkɔta, oɓɛ aámbé oomosokosa ecinji?» 7Yéso áonsikisia: «Kóúbimbɛ phɔ́ nnde neogea kɛ̌kɛnde. Oúbande ndiu mbusa.» 8Pɛ́tɛɛ â gǎkɛ ongoɗea Yéso: «Ɓɛɛndɔ, kósokosɛku tanda ecinji ani.» Yéso áongoɗea ɓe: «Aoɓá na kéosokosi, kóɓɛku ye kimoci n'eme.» 9Mpɔ, Simɔ́ni Pɛ́tɛɛ áongoɗea: «Cɔ, Mɔkɔta, komosokosɛ tɔndɔ ecinji. Ómosokosa phɔtɔ njaga na mɔ̌.» 10Yéso áongoɗea: «Nkpa nde ěsokosi, a ye tɔ na siki á sokosa ecinji akɛ. Nga, nkiki nna ye k'ɔ́ma bui. Cɔ, ɓenu, ɓókó na nkiki. Nna gǎkɛ ɓenu ɓɔbu.» 11Yéso ɗámúbi mmbé antɔngande. Kaɓondɔ unge, ɗági: «Nna ɓenu ɓɔbu ɓáunge ɓoúki nkiki.»
12Ɓî Yéso ɗágɔɓi ye sokosa á ecinji aɓɔ, â goto tɔ ɔɔ́la bɔngɔ nɛkɛ, áoika ka mɛja. Wa áǒúsia: «Ɓoúbi oengekisa kema nde negi ka phɔanu? 13Ɓogi ánjá ka ɔphana ani: ‹Ngoisigi› na ‹Mɔkɔta› nga, eme nende yɛ. 14Cɔ, kaɓɛ netónosokosi ecinji, eme ‹Ngoisigi› na ‹Mɔkɔta›, akeni ɓenu ka ɓenu ɓósokosanɛ phɔtɔ ecinji anu. 15Cɔ, nenophi mphangiɔ ndɔ gea, ɓógeɛ ɓíndɔ nenogǐí. 16Nenóngoɗi ɗoni gea, nna na mbɛɗanigi nde anyɛ́nyi mɔkɔta nɛkɛ. Nna phɔtɔ na nteki nde anyɛ́nyi mmbé anteki. 17Ɓî ɓoúbi ye nyɔngɔ ndɔ, ɓoɓande na maseye, aoɓá na ɓɔtɔtɔkisi ú.
18Nyɔngɔ nde nɛɔyɔnga nna ka ɓenu ɓɔbu. Néoɓúba ɓunde ɗɛ́sɔmbu. Akeni gǎkɛ nyɔngɔ nde a suɓi á Ɓuku á Mokonga átɔtɔkɛanɛ. ‹Nkpa nde ɓeoeaga na yɛ, aámbé ande mɓiɓia ani#Ɔna Jab 41.10.› 19Kpanga á kɛ̌kɛnde, nenóngoɗi nyɔngɔ ndɔ na kátɔtɔkeanimbɛ. Ka gea, a ye ɔtɔtɔkeana, mpɔ ɓóoɓeekea gea, EME NEƁEI. 20Nenóngoɗi ɗoni gea, nkpa nde ansesi mmbé nenteki, amosesi phɔtɔ. Nkpa nde amosesi, ansesi mmbé ɗámoteki.»
Yéso aɔtɔmia gea Yúda antɔngande
(Ɔna phɔtɔ Mat 26.20-25; Mkɔ 14.17-21; Lók 22.21-23)
21Mbusa á yɔnga ɓó, Yéso áotambaga ka měma mpɔ, áɔyɔnga base gea: «Nenóngoɗi ɗoni gea, ka ɓenu moci, amɔtɔngande.» 22Ɓagoigi ɓâ gǎkɛ ɔɛnjianaga, kángá á engekisa á nkpa nde Yéso ɗáɔyɔnga ka phɔa akɛ.
23Ka ɓagoigi moci, mmbé Yéso ɗánkondi ɗáiki bíbí akɛ ka mbenɔ á eaga. 24Simɔ́ni Pɛ́tɛɛ áonɗua ngoigi ndɔ ka gea ámúsiɛ phɔ́ Yéso te: «Mɔkɔta, nkpa ndɔ ande ani?» 25Ngoigi ndɔ, áǒpháia kuɓî Yéso aɔ, áomúsia: «Mɔkɔta, anima mmbɔ?»
26Yéso áonsikisia: «Mmbé nemophande gbútuka á mokati nde neoubia ka ɔphɛphɛ, yɛ aámbɔ.» Mpɔ, áoɓoa gbútuka á mokati ndɔ, áomopha Yúda, muna Simɔ́ni Isikaliɔ́ta. 27Yúda áɔbɛɗa gbútuka á mokati ndɔ, mpɔ Sɛtáni áongia suɓi akɛ. Yéso áongoɗea: «Cɔ, kamisaga tɔtɔkisa á kema nde oogea ógeɛ.» 28Nna na ka ɓɔ moci, ka ɓunde ɗáɓátú na ɓɔ ka mɛja mmbé ɗáúbi ka nyɔngɔ á kema sina nde Yéso ɗángoɗi ɓo. 29Ɓî Yúda aámbé ɗáoambaga imɔna, ɓagoigi ɓuangbo ɓáokanisia te, Yéso ɗángoɗi ágɛ sombɛ kema nde akeni ka jaí, kaɓɛ nnde akeni phɔtɔ ka opha á ɓaúki. 30Cɔ, ɓî Yúda ɗábɛɗi ye gbútuka á mokati ndɔ, áojuana. Wandɔ, esa áoipha.
Ɛɔphi á kɛ̌kɛ
31Mbusa á juana á Yúda, Yéso áogea: «Cɔ, kɛ̌kɛnde, ɓoombia á Muna-Nkpa, aɔnɛkani. Ɓoombia ndea Mokonga aɔnɛkani ka yɛ. 32Aoɓá ɓoombia ndea Mokonga na ɗáɔnɛkani ka yɛ, ɓoombia nɛkɛ aɔnɛkanande phɔtɔ ka Mokonga. Ageande ú kángá á iphia. 33Ɓaniki amɔ, ne ye goto tɔ na ɓenu wani ka mbenɔ ábɔa. Ɓomokaɓande. Nenóngoɗi tɔ ɓíndɔ ɗéengoɗi Ɓayúda, ɓɔ́kɔ́ɔtɔka na ɓoge k'ɔ́ma nde nege. 34Nenophi ɛɔphi á kɛ̌kɛ: kondanagani. Ɓindɔ eme ɗénokondi, ɓenu kondanagani phɔtɔ ɓó. 35Aoɓá na ɓokondanigi, ɓakpa ɓɔbu ɓáúbande gea, ɓonde ɓagoigi nɛmɔ.»
Yéso aɔtɔmia gea Pɛ́tɛɛ angánande
(Ɔna phɔtɔ Mat 26.31-35; Mkɔ 14.27-31; Lók 22.31-34)
36Simɔ́ni Pɛ́tɛɛ áomúsia: «Mɔkɔta, oma oga wani?» Yéso áonsikisia: «Kɔ́ɔtɔka na ɔmoɓi kuɓî neoga kɛ̌kɛnde. Omoɓeande ndiu mbusa.» 37Pɛ́tɛɛ áongoɗea te: «Mɔkɔta, ka nyɔngɔ éke kɛ́ɔtɔka ɓeá akɔ kɛ̌kɛnde? Nga, neɓeeki kukuwa ka nyɔngɔ akɔ.» 38Mpɔ, Yéso áonsikisia: «Oɓeeki kukuwa ka nyɔngɔ ani ɗoni? Nekongoɗi ɗoni gea, omonganande mɔngɔ isaɔ, mosá á ɔsa á kɔkɔ.»
Currently Selected:
Yoáni 13: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
