Yoáni 16
16
1Ɗénóngoɗi nndɔ ka gea, ɓókoɗeketɛmbɛ ɓeekea nɛnu. 2Nga, ɓánoɓeagande k'éndu á madondanɔ ndea Ɓayúda ka nyɔngɔ á Mokonga. Aɓande na mbenɔ nde ɓundɔ ɓánomande, ɓákanisiande gea, ɓáɔmbɛɗaneaga Mokonga. 3Ɓágeande ɓó nga, ɓákámúbi Abɛ, ɓákámoúbi phɔtɔ eme. 4Ɗénongoɗi gǎkɛ nndɔ ka gea, mbenɔ ndɔ a ye okiɗia, ɓokanisiande gea, ɗénóngoɗi ye.
Měma á kanga ɓojeɗe aɔbɛɗanaga
Ɗékénongoɗi nndɔ mosá nga, ɗétú na ɓenu. 5Kɛ̌kɛnde, nege mɔtɛ á mmbé ɗámoteki. Cɔ, ka ɓenu nna gǎkɛ omoúsia gea: ‹Oge wani?› 6Ɓotúmi gǎkɛ na ɓɔmbɛ ɓî nenóngoɗi ye nyɔngɔ ndɔɔ. 7Cɔ, nenóngoɗi gǎkɛ ɗoni gea, atú ánjá ka ɓenu négɛ. Nga, aoɓá na kége, ámbé Nengi kábikɛku mɔtɛ-anu. Cɔ, a gǎkɛ oɓá na nege, nenótekisiande yɛ. 8Ɓî abikaeka, Aěengekisiande ɓato á ka mokonda ka nyɔngɔ á ɓojeɗe, koɗoni na tena á nyɔngɔ#Ɔna Eku 24.25. 9Aěengekisiande ɓato á ka mokonda ɓojeɗe, ka nyɔngɔ nde ɓákámoɓeeki. 10Aěengekisiande ɓato á ka mokonda koɗoni, ka nyɔngɔ á gǎ ani mɔtɛ á Abɛ na ɓɔ́kɔ́mɔɔnɛku ye. 11Aěengekisiande ɓato á ka mokonda tena á nyɔngɔ, ka nyɔngɔ nde, ɓá ye teni nyɔngɔ ndea moamɛ á ka mokonda ndee.
12Ne goto na nyɔngɔ ásii ka ngoɗea anu. Ɓókó gǎkɛ ɔtɔka na ɓophiphî kɛ̌kɛnde. 13Mbenɔ nde yɛ Měma á ɗoni abikande, anɔsɔndɔɛande k'aphe á ɗoni bui. Káyɔngɛku ka kɔkɔta nɛkɛ sasakɛ, nyɔngɔ bui nde aɔ́kaeka mɔtɛ á Abɛ, a ndiu unge anɔtɔmiande. Anɔtɔmiande nyɔngɔ nde abikaeka. 14Yɛ, amoombisande nga, kema nde anɔtɔmiande, atókande ně mɔtɛ-amɔ. 15Kema bubui nde Abɛ aně, ande nɛmɔ. Ka nyɔngɔ índɔ unge ɗénongoɗi, kema nde anɔtɔmiande, atókande ně mɔtɛ-amɔ.
Tambaga ěgaiande ka maseye
16Ka mbenɔ ábɔa, ɓókómɔɔnɛku ye, cɔ, mbusa á mbenɔ ábɔa, ɓɔmɔɔnande goto.» 17Ka ɓagoigi nɛkɛ ɓáɔyɔngaga sɔsɔɓɛ aɓɔ te: «Asongoɗi: ‹ka mbenɔ ábɔa, ɓókómɔɔnɛku ye, cɔ, mbusa á mbenɔ ábɔa, ɓɔmɔɔnande goto.› Phɔtɔ ‹ka nyɔngɔ nde nege mɔtɛ Abɛ.› Kantíti á nyɔngɔ ndɔ a ɓo? 18Kantíti á nyɔngɔ nde agi: ‹Mbusa á mbenɔ ábɔa› a ɓo? Nga, ɓékéoengekisa.»
19Yéso ɗáúbi gea, ɗáɓáokonda úsia akɛ. Kaɓondɔ áǒngoɗea ɓe: «Ɓookaɓa engekisa sɔsɔɓɛ anu, kantíti á yɔnga nde nɛyɔngi gea: ‹ka mbenɔ ábɔa, ɓókómɔɔnɛku ye, cɔ, mbusa á mbenɔ ábɔa, ɓɔmɔɔnande goto.› 20Cɔ, nenóngoɗi ɗoni gea, ɓogámande, ɓóoɓá n'oiɔ, ɓato á ka mokonda ɓâ gǎkɛ oɓá na maseye. Ɓotambagande ka měma, tambaga ndɔ ěgaiande gǎkɛ ka maseye. 21Mbenɔ nde nke áoɓá ka ɓoaé, áotambaga ka nyɔngɔ nde ɓoaé andondi. Mbenɔ nde a gǎkɛ koonja, áoɓosea tambaga ndɔ nga, ana maseye á ɓɔkɔtɛana á miki ka mokonda. 22Ɓenu gǎkɛ, kɛ̌kɛnde ɓo phɔ́tɔ otambaga. Ɓî nɛnɔɔnande goto, ɓoɓande na maseye. Maseye kau, nkpa kánóutɛku.
23Esa ndɔ, ɓókómoúsiɛku ye ka kema. Nga, nenóngoɗi ɗoni gea, Abɛ anóphande kema bubui nde ɓɔɔmɛma k'ína ani. 24Na ka kɛ̌kɛnde, ɓɔ́kɔ́mɛmimbɛ ka kema k'ína ani. Cɔ, mɛmani na ɓɔtɔande, mpɔ, ɓótúmɛ na maseye.
Yéso akíndí mokonda
25Nɛtɔ́nɔtɔ̌mi kema ndɔ bui ka mɛní, mbenɔ a gǎkɛ obika, nnde kɛ́nɔtɔmiɛgɛku ye nyɔngɔ ka mɛní, nɛnɔtɔmiagande ndiu base, nyɔngɔ ndea Abɛ. 26K'ésa ndɔ, ɓɔmɛmande Abɛ k'ína ani. Kénóngoɗi te, eme aámbé nɛmɛmande Abɛ ka phɔa anu. 27Nga, Abɛ sasakɛ anokondi, ka nyɔngɔ nde, ɓomokondi na ɓô phɔtɔ oɓeekea gea, netóki mɔtɛ á Mokonga. 28Cɔ, netótóki mɔtɛ á Abɛ, néojua ka mokonda. Kɛ̌kɛnde, netóki gǎkɛ ka mokonda, neji mɔtɛ á Abɛ.»
29Mpɔ, ɓagoigi nɛkɛ ɓáongea: «Cɔ, kɛ̌kɛnde ɔyɔngi base, kángá á yɔnga ye ka mɛní. 30Kɛ̌kɛnde, ɓeúbi gea, ooúba kema bubui, kóna siki á gea, ɓákoúsiɛgɛ. Kaɓondɔ unge ɓeɓeeki gea, ɗótóki mɔtɛ á Mokonga.» 31Yéso áǒsikisia: «Ɓoɓeeki ye tɔ? 32Cɔ, mbenɔ aobika, n'a ye tɔ ɓei, ɓî ɓenu ɓɔbu ɓophanjekanande, nkpa na nkpa mɔtɛ-akɛ, ɓóomoɗeketa sasani, ké gǎkɛ sasani nga, Abɛ a kimoci n'eme. 33Netónongoɗi nndɔ bui ka gea, ɓóɓɛ na ɓujɛjɛ ka jukana anu n'eme. Ɓotambagande ka mokonda. Cɔ, ɓáni gǎkɛ na nténdé, ne ye kíndí mokonda.»
Currently Selected:
Yoáni 16: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
