Yoáni 17
17
Yéso aɔmɛma ka phɔa á ɓagoigi nɛkɛ
1Mbusa á Yéso yɔnga ɓó, áɔɛnjia na koba, áɔyɔnga ɓe: «Abɛ, mbenɔ ajú, nɗokomisa Anakɔ gea te, Anakɔ ákoɗokomisɛ. 2Nga, ɗómophi kɔkɔta gǔ á ɓakpa ɓɔbu ka gea, éɓophɛ enda á mɛyɔ, ɓunde ɗómophi. 3Enda á mɛyɔ ndɔ, ande úba akɔ gea, oɓɛ sasakɔ aámbé onde Mokonga ɗoni, na úba á Yéso Kiísito mmbé ɗónteki. 4Ɗéoɗokomisi ka mokonda ka nyɔngɔ nde, ɗɛ́gɔɓi ekuma nde ɗómopi. 5Cɔ, Abɛ, kɛ̌kɛnde, ómopa ɓoombia nde ɗétú ně bíbí akɔ mosá á conjá á mokonda.
6Ɗéúbisi ina akɔ ka ɓakpa íɓunde ɗɔ̌sɔmbu ka mokonda, ômopa. Ɓakpa ndɔ, ɗáɓátú ɓuakɔ, ômopa, ɓáoamba nyɔngɔ nɛkɔ. 7Kɛ̌kɛnde, ɓáúbi ye tɔ gea, kema bui nde ɗómopi, ɗátóki mɔtɛ-akɔ. 8Nga, ɓoabi nde ɗómopi, ɗɛ̌tɔ̌mi, ɓáoɓeekea ú. Ɓáúbi ɗoni gea, netóki mɔtɛ-akɔ. Ɓáoɓeekea gea, oɓɛ aámbé ɗómoteki.
9Ka nyɔngɔ aɓɔ unge, nɛɔkɔmɛma. Nna gǎkɛ ka nyɔngɔ á ɓakpa ɓɔbu á ka mokonda, tɔndɔ ɓunde ɗómopi, nga, ɓánde ɓakpa nɛkɔ. 10Kema nɛmɔ bui, a tɔ akɔ. Kema nɛkɔ bui, a gǎkɛ tɔ amɔ. Nena ɓoombia ka nyɔngɔ aɓɔ. 11Ké ye ka mokonda, nege mɔtɛ-akɔ, ɓɔ ɓáunge ɓá phɔ́tɔ ka mokonda. Abɛ, nto á kanga ɓojeɗe, óamba ɓɔ ka ɓukpɛkpɛ á ina akɔ. Ina ndɔ ɗómopi ka gea, ɓakpa nɛsu ɓáɓɛ kimoci, ɓíndɔ oɓɛ n'eme ɓe kimoci. 12Ɓî ɗétú kimoci na ɓɔ, ɗéǒamba ka ɓukpɛkpɛ á ina akɔ, ina ndɔ ɗómopi. Ɗéambi phɛɛ, ka ɓɔ kaɓúngɛgɛ, tɔndɔ mmbé ɗákeni áɓungɛgɛ, ka gea te, moangɔ á Ɓuku á Mokonga átɔtɔkɛanɛ#Ɔna Jab 41.10; Yoá 13.18.
13Cɔ, kɛ̌kɛnde, nege mɔtɛ-akɔ. Neyɔngi ɓó na ne phɔ́tɔ ka mokonda ka gea, maseye nɛmɔ átúmɛ suɓi aɓɔ pú! 14Eme aámbé ɗéɓophi nyɔngɔ nɛkɔ, ɓato á ka mokonda ɓáǒkangea ka nyɔngɔ nde, ɓáná ɓato á ka mokonda ɓíndɔ eme ké nto á ka mokonda. 15Kɛ́ɔmɛmi gea te, óphúiɛ ɓakpa ndɔ ka mokonda. A ndiu gea, óambɛ ɓɔ na Ntombigi#Ɔna Mat 6.13. 16Ɓáná ɓato á ka mokonda, ɓíndɔ eme ké nto á ka mokonda. 17Ósokosea ka koɗoni, nyɔngɔ nɛkɔ aunge ande ɗoni, ɓéyameɛ ka phɔa akɔ ka ɗoni. 18Ɓíndɔ ɗómoteki ka mokonda, eme ɗěteki phɔtɔ ka mokonda. 19Ka nyɔngɔ aɓɔ unge, něyamei buani k'óɓɛ, ka gea, ɓɔ phɔtɔ ɓáɓɛ ɓakpa nɛkɔ ɗoni.
Yéso aɔmɛma ka phɔa ɓunde ɓámɓeekeaeka ɓɔbu
20Ké tɔ ɔmɛma ka phɔa ɓundee, a ndiu phɔtɔ ka phɔa ɓunde ɓámoɓeekeande ka ɓeana na ɓɔphɛi nɛɓɔ. 21Nɛɔmɛma ka gea, ɓɔbu ɓáɓɛ kimoci, ɓíndɔ oɓɛ Abɛ osuɓi ani, n'eme suɓi akɔ. Nɛmɛmi phɔtɔ gea, ɓáɓɛ kimoci suɓi asu ka gea, ɓato á ka mokonda ɓáɓeekeɛ gea, oɓɛ aámbé ɗómoteki.
22Cɔ, eme, něɓophi ɓoombia nde ɗómopi ka gea, ɓáɓɛ kimoci ɓíndɔ ɓe kimoci. 23Nɛɔmɛma gea, néɓɛ suɓi aɓɔ, n'oɓɛ suɓi ani ka gea, ɓáɓɛ kimoci ɗoni. Ɓondɔ unge, ɓato á ka mokonda ɓáúbande gea, oɓɛ aámbé ɗómoteki, ǒkondi phɔtɔ ɓíndɔ omokondi. 24Abɛ, nekondi gea, ɓakpa nde omopi, ɓáikɛ ɔma nde neɓei, ka gea te, ɓáɔnɛ ɓoombia ani. Ɓoombia ndɔ aunge ɗómopi ka nyɔngɔ nde, ɗómokondi mosá á conjá á mokonda. 25Abɛ, oɓɛ nto á koɗoni, ɓato á ka mokonda ɓáká tanda kokoúba, eme ndiu aámbé ɗékoúbi. Ɓakpa nɛmɔ ɓunde ɓâ phɔtɔ oúba gea, oɓɛ aámbé ɗómoteki. 26Ɗéúbisi ina akɔ ka ɓɔ na netútuisande úbisa aɓɔ ka gea, ekondi nde oně ka phɔa ani, áɓɛ ka phɔa aɓɔ na eme sasani néɓɛ suɓi aɓɔ.»
Currently Selected:
Yoáni 17: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
