Yoáni 5
5
Yéso anamisi nkpa moci esa á saɓáto
1Mbusa índɔ, Yéso áoga na Yɛusalɛ́ma ka jaí moci ndea Ɓayúda. 2Cɔ, na Yɛusalɛ́ma, bíbí á kǐo nde ɓáɔɔphana kǐo á ɓamɔgɔgɔ, ɗátú na ntogɔ moci nnde ɗáɓátúɔɔphana ka Kiɛbulanía Bɛtɛsaída. Kó, ɗáɓáphɛ̌ki mɔɛɓa ɓɔku, á ngeɔ. 3Ɓasambi ɓásii, ɗáɓáɗe suɓi á mɔɛɓa ndɔɔ. Ande gea, ɓakeíme-íme, ɓaɗɔti, ɓaphɛ́phi-écinji na njaga. [Ɗáɓáoɓondeaga gea ɓáémisɛgɛ iɓo 4nga, Malaéka ndea Mɔkɔta ɗáodida ka mbenɔ moci ka ntogɔ ndɔ, áoémisaga iɓo. Nsambi nde ɗáodida k'ama mosá-mosá suɓi á iɓo nde aoémanaga, ɗáoama ka kukuwa nɛkɛ, nanga áɓá kukuwa sina.]
5Cɔ, nkpa moci ɗátú wa, n'aɗe n'esambɔ ɓasaga nkama isaɔ na ngianjaga isaɔ (38). 6Ɓî Yéso amɔni n'aɗe, n'aengekisi gea, asambi ka ɓasaga ɓásii, áomúsia: «Cɔ, okondi óamɛ?» 7Nto á esambɔ áonsikisia gea: «Mɔkɔta, kéna nkpa nde aomoguisa suɓi á ntogɔ mbenɔ nde ɓáoemisaga iɓo nga, mbenɔ nde eme neobika, nkpa ɓaangbo áoguia mosá ani.» 8Yéso â gǎkɛ ongea: «Má, bɛɗa kɛsɛ nɛkɔ, ótambɛ!» 9Mɔngɔ moci, nkpa ndɔ áoama, áobɛɗa kɛsɛ nɛkɛ, áotamba. Cɔ, esa kau ɗátú gǎkɛ esa á saɓáto. 10Kaɓondɔ, ɓakɔta ndea Ɓayúda, ɓáongea nkpa ndɔ ɗáɓánamisi gea: «Caa! Kesande, ande saɓáto. Kókeni kumba á kɛsɛ nɛkɔ#Ɔna Yɛɛ 17.21; Nɛɛ 13.19.» 11Yɛ â gǎkɛ ǒsikisia: «Mmbé atómoamisi, yɛ aámbé amogi: ‹Bɛɗa kɛsɛ nɛkɔ, ótambɛ.›» 12Mpɔ, Ɓayúda ndɔ ɓáomúsia: «Ani mmbé atóongoɗi: ‹Bɛɗa kɛsɛ nɛkɔ, ótambɛ?›» 13Nkpa ndɔ ɗákámúbi gǎkɛ mmbé anamisi nga, Yéso ɗándǐ k'íso á usɛsɛ á ɓakpa ɓunde ɗáɓátú wa.
14Mbusa í, Yéso â goto ondonda nami ndɔ suɓi éndu á Mokonga, áongea: «Cɔ, oami, kogeɛmbɛ ye ɓojeɗe ka ɓánga te, kema ájeɗe phɛɛ kaokiɗianeɛmbɛ.» 15Mpɔ, nkpa ndɔ áoga, áɔ̌tɔmia ɓakɔta ndea Ɓayúda gea, Yéso aámbé ɗánamisi. 16Kaɓondɔ, Ɓayúda ɓáontambisaga Yéso nga, ɗábɛɗanigi nndɔ esa á saɓáto. 17Yéso â gǎkɛ ǒsikisia te: «Abɛ aɔbɛɗanaga esa bui, n'eme ne phɔtɔ ɔbɛɗanaga.» 18Ka nyɔngɔ á ɓoabi ndɔ, ɓakɔta ndea Ɓayúda ɓáonkaɓa phɛɛ gea ɓámowɛ nga, ɗákáɓúni tɔndɔ ɛɔphi á Saɓáto, ɗáyɔngi phɔtɔ gea, Mokonga ande Abakɛ, áǒkengeanisa na yɛ.
Muna-Mokonga ana kɔkɔta
19Yéso â goto osikia yɔnga, áǒngoɗea ɓe: «Nenóngoɗi ɗoni: Miki, nnaɔtɔka n'agi ka kema ka yɛ sasakɛ, a tɔ ogea nnde áɔmɔna Abakɛ n'aogea nga, kema bui nde Abɛ aogea, aunge Miki a phɔtɔ ogea ú. 20Nga, Abɛ ankondi Miki, aunge aomphangia kema bui nde yɛ sasakɛ aogea. Yɛ, amphangiande phɔtɔ kema ángbó kɔnyɛ́nya nnde ka gea te, ɓótangaɛgɛ. 21Nga, a tɔ ɓíndɔ Abɛ aǒjujukisa ɓasí ka kukuwa na endisa aɓɔ goto, a phɔtɔ ɓó unge Anakɛ aonendisa nkpa buakɛ mmbé akondi endisa akɛ. 22Nna ye na ka nkpa nde Abɛ aotena nyɔngɔ nɛkɛ. Yɛ, amophi ndiu Anakɛ kɔkɔta bui á tena á nyɔngɔ 23ka gea, ɓakpa ɓɔbu ɓánɗokomisɛ Miki ɓíndɔ ɓáonɗokomisa Abakɛ. Cɔ, mmbé nnaonɗokomisa Miki, nna phɔtɔ onɗokomisa Abakɛ mmbé anteki.
24Eya, nenóngoɗi ɗoni gea, mmbé aɔɔ́ka nyɔngɔ nɛmɔ na ɓeekea á mmbé amoteki, ana enda á mɛyɔ. Ɓákátenɛku nyɔngɔ nɛkɛ akpɛ nga, atingi ye kukuwa, áoɓá na enda. 25Eya, nenóngoɗi ɗoni gea, mbenɔ aobika, n'a ye biki, ɓasí ɓáɔ́kande ɛsɔ á Muna-Mokonga, na ɓunde ɓáɔ́kande ɛsɔ ndɔ, ɓáendande.
26Nga, a tɔ ɓíndɔ Abɛ ande cina á enda akɛ sasakɛ, amophi phɔtɔ Miki cina á enda ka yɛ sasakɛ. 27Amophi phɔtɔ Miki kɔkɔta á tena á nyɔngɔ, ka nyɔngɔ nde ande Muna-Nkpa. 28Ɓókótangaɛgɛmbɛ nyɔngɔ ndee: Mbenɔ aobika, nnde ɓasí ɓɔbu ɓunde ɓá suɓi á bóta ɓáɔ́kande ɛsɔ akɛ, 29mpɔ, ɓáojuana suɓi í. Ɓunde ɗáɓági ánjá, ɓáojujuka, ɓáoɓá na enda. Ɓunde ɗáɓági gǎkɛ ájeɗe, ɓáojujuka, ka tena nyɔngɔ nɛɓɔ akpɛ#Ɔna Dan 12.2.
30Kɛ́ɔtɔka na nɛtɔtɔkisi ka kema k'éme sasani. Ne tɔ otena nyɔngɔ ɓíndɔ Mokonga aomososea. Neotena nyɔngɔ ɗoni nga, kéokaɓa tɔtɔkisa á mɔphɛ nɛmɔ, tɔndɔ mɔphɛ á mmbé amoteki.
Ɓaɗigimisi á kɔkɔta ndea Yéso
31Aoɓá na neɗigimisi nyɔngɔ nɛmɔ eme sasani, nyɔngɔ nde nɛɔyɔnga káɓɛku á ɗoni. 32Cɔ, a gǎkɛ na nkpa ɓaangbo mmbé aɗigimisi nyɔngɔ nɛmɔ, na eme neoúba gea, nyɔngɔ nde yɛ aɗigimisi ka phɔani ande ɗoni. 33Nga, ɗóɓǒteki ɓakpa mɔtɛ á Yoáni-Mɓatisi, na yɛ, â gǎkɛ oɗigimisa nyɔngɔ á ɗoni. 34Cɔ, eme kéna siki á nkpa á ka mokonda nde ka ɗigimisa á nyɔngɔ nɛmɔ. Nɛyɔngi gǎkɛ tɔ nnde ka gea, ɓóamɛ ka měma.
35Cɔ, Yoáni-Mɓatisi ɗátú ɓea ɔbɛa nde aoola na bɛnya. Ɓô ndiu oɓeekea ika na maseye ka mbenɔ ábɔa ka owanga ndɔ. 36Nyɔngɔ nɛmɔ nde ɓáɗigimisi a gǎkɛ ángbó phɛɛ kɔnyɛ́nya nnde á Yoáni-Mɓatisi. Ekuma nde Abɛ Mokonga amopi ka tɔtɔkisa í, ekuma ndɔ tɔ unge aomoɗigimisa gea, yɛ aámbé amoteki. 37Cɔ, Abɛ, mmbé amoteki, yɛ sasakɛ a phɔtɔ omoɗigimisa. Ɓɔ́kɔ́ɔ́kimbɛ mɔnɔ tanda ɛsɔ akɛ na ɔna á keongi akɛ. 38Nyɔngɔ nɛkɛ nnaoika suɓi anu ka nyɔngɔ nde, ɓókóomɓeekea mmbé anteki. 39Ɓɔɔcɔca Ɓuku á Mokonga nga, ɓookanisia te, suɓi í, ana nyɔngɔ á enda á mɛyɔ. Cɔ, Ɓuku ndɔ ungɔ atooɗigimisa nyɔngɔ ani. 40Nanga áɓá ɓó, ɓókókondi gǎkɛ bikia ani ka ɓá na enda.
41Kéokaɓa ɓoombia ka ɓakpa. 42Cɔ, nenoúbi gǎkɛ. Ɓenu sasanu ɓókó n'ekondi ndea Mokonga suɓi anu. 43Ɗébiki k'ína á Abɛ, ɓókómosesi. Aoɓá nkpa n'abiki gǎkɛ k'ína akɛ sasakɛ, ɓonseseande! 44Ɓenu íɓunde ɓookonda éɗokomisa ɓenu ka ɓenu, ɓókókaɓɛ ndiu ɓoombia nde atóki ka Mokonga sasakɛ, ɓɔtɔkande ɓeekea ɓo? 45Ɓókokanisiɛmbɛ gea, nɛnɔ́tɔngaeka mosá á Abɛ. Mósa, mmbé ɓoseɓei ɛɔphi nɛkɛ, aámbé anɔ́tɔngande#Ɔna Tɔl 31.26-27. 46Kaɓɛ na ɓotómɓeeki Mósa, ámbé ɓomoɓeeki phɔtɔ nga, yɛ ɗáɗundu ka phɔani#Ɔna Tɔl 18.15. 47Aoɓá na ɓókóɓeeki nyɔngɔ nde yɛ ɗáɗundu, ɓoɓeekeande gǎkɛ nyɔngɔ ínɛmɔ ɓo?»
Currently Selected:
Yoáni 5: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
