Yoáni 6
6
Yéso aǒisa ɓǒko ɛlɛphu ɓɔku (5.000)
(Ɔna phɔtɔ Mat 14.13-21; Mkɔ 6.30-40; Lók 9.10-17)
1Mbusa índɔ, Yéso áokáia etǔ á Galiláya, nnde ɓá phɔtɔ ɔɔphana Tibɛlía. 2Usɛsɛ ángbó á ɓakpa ɓáomɓea nga, ɗáɓáɔni mphangiɔ á ketangaɔ nde ɗáɔtɔtɔkisa ka amisa á ɓato á esambɔ. 3Yéso na ɓagoigi nɛkɛ, ɓáoɓamba mamba, ɓáoika kó. 4Maseye á Pasáka ndea Ɓayúda ɗátú bíbí.
5Yéso áomesia iso, áɔɔna usɛsɛ á ɓakpa na ɓáombikia. Mpɔ, áongea Philípɔ: «Cɔ, ɓesombande eea ka isa á ɓakpa nde súwani?» 6Ɗáyɔngi ɓó ka tomba akɛ nga, ɗáoúba kema nde ageande. 7Philípɔ â gǎkɛ onsikisia: «Nanga ɓéɓá na imɔna mia iɓɛ (200), nnaɔtɔka n'asombi mokati nde nkpa na nkpa atɔande miki á gbútuka í.» 8Ka ɓagoigi nɛkɛ moci, ina akɛ Andeé, muna-amakɛ na Simɔ́ni Pɛ́tɛɛ, áongoɗea Yéso gea: 9«Moganda moci a wani. Ana mokati ɓɔku na ɓasú ɓaɓɛ. Cɔ, nndɔ a gǎkɛ kema sina ka ɓakpa ɓásii ɓende#Ɔna 2 Ɓam 4.42-44?»
10Yéso áogea: «Cɔ, óikisani ka oɗo.» (Ɔma ndɔ ɗátú phɔtɔ na manganga ásii.) Mpɔ ɓáoika, ɓǒko ɗáɓátú ɓea ɓakpa ɛlɛphu ɓɔku (5.000). 11Mpɔ, Yéso áoɓoa mokati ndɔ, áonsega Mokonga k'ɛ́mɛmi, áogaba ú ka ɓakpa nde ɗáɓátú wa. Â phɔtɔ ogea ɓó na ɓasú, nkpa na nkpa áoea ɓíndɔ akondi. 12Ɓî ɓákuti ye, Yéso áǒngoɗea ɓagoigi nɛkɛ: «Kɔngɔani due ka gea, kau kaújukanɛmbɛ.» 13Ɓáɔkɔngɔa due á mokati ɓɔku nde ɓáí, ɓáotúmisa jɔ nkama na iɓɛ (12).
14Ɓî ɓakpa ɓáɔni ye Yéso n'atɔtɔkisi ketangaɔ ndɔ, ɓáogea: «Ɗoni, mmbé ande Mɔtu-nyɔngɔ ndea Mokonga mmbé ɗákeni bika ka mokonda.» 15Ɓî Yéso ɗáúbi gea, ɓakpa ɗáɓáogea ɓábikɛ mbɛɗɛ ka bisa akɛ moamɛ ka ɓukpɛkpɛ nɛɓɔ, kaɓondɔ, â goto oɓamba mamba yɛ sasakɛ.
Yéso aotamba gǔ á iɓo
(Ɔna phɔtɔ Mat 14.22-33; Mkɔ 6.45-52)
16Cɔ, ɗáɓi ye ɔgɔgɔ, ɓagoigi nɛkɛ ɓáodida na motii á etǔ. 17Kó, ɓáokambea ka koko, ka gǎ nci á na Kapɛɛnaúmu. Esa ɗágeoípha Yéso na k'édondimbɛ. 18Kɛtɛmbɔ áoɗengisa etǔ phɛɛ nga, sumbu ɗátú akpɛ. 19Mbusa á tamba á ɓɔ ka koko ɓea kilɔmɛtɛɛ ɓɔku, kaɓɛ ngianjaga (6), ɓáɔmɔna Yéso n'aotamba gǔ á iɓo ka bîmisia á koko. Mpɔ, ɓáoɓá na kɔɓɔɓɔkɔ. 20Yéso â gǎkɛ ǒngoɗea: «Ɓókóɓangɛmbɛ, eme aámbɔ!» 21Ɓî ɗáɓáokonda kambisa akɛ ka koko, kɛ̌kɛndɔ tɔ, koko â gǎkɛ odunduia ɔma nde ɗáɓágɛndɛi.
Usɛsɛ á ɓakpa ɓáonkaɓa Yéso
22Mama í, usɛsɛ á ɓakpa nde ɗáɓájigi kubi étǔ, ɓáoengekisa gea, koko ɗátú tɔ wa moci. Ɗáɓáúbi gǎkɛ gea, Yéso ɗákákǎmbi na ɓagoigi nɛkɛ suɓi í. Ɓagoigi sasaɓɔ tɔndɔ ɓáunge ɗáɓáge. 23Mpɔ, koko nengbo ásii nnde atóki ka ntanga-nji á Tibɛlía áokiɗia bíbí á ɔma nde ɗáɓáigi mokati mbusa á Mɔkɔta sega á Mokonga. 24Mbenɔ nde usɛsɛ á ɓakpa ndɔ ɗáɓáɔni gea, Yéso kaɓɛ ɓagoigi nɛkɛ, ɗáɓákátú wa, ɓáokambea ka koko ndɔ, ɓáoga onkaɓa Yéso na Kapɛɛnaúmu.
Yéso ande mokati á endisa
25Ɓî ɓándondi ye Yéso kubi á etǔ, ɓáomúsia: «Ngoisigi, mbenɔ sina nde okiɗimá koni?» 26Yéso áǒsikisia gea: «Eya, nenóngoɗi ɗoni gea, ɓoomokaɓa nga, ɗóɓoí mokati, ɓóokúta, nna ndiu gea, ɓoengekisi kantíti á mphangiɔ á ketangaɔ nde nɛtɔtɔkisi. 27Ɓɔ́kɔbɛɗanɛgɛmbɛ ka nyɔngɔ á eea nde aoújukana, áɓɛ ndiu ka nyɔngɔ á eea nde aoendisa mɛyɔ. Eea ndɔ, eme Muna-Nkpa, aámbé nenóphande nga, Abɛ Mokonga amopi kɔkɔta í.»
28Mpɔ, ɓáomúsia: «Ka bɛɗanaga ekuma ndea Mokonga, ɓegeande ɓo?» 29Yéso áǒsikisia te: «Ekuma nde Mokonga akondi ka ɓenu, ande ɓeekea á mmbé anteki.»
30Ɓâ gǎkɛ ongea: «Cɔ, mphangiɔ á ketangaɔ sina nde ɔtɔtɔkisande ka gea te, ɓɛ́ɔnɛ ú na ɓeekea akɔ? Kema sina nde ɔtɔtɔkisande? 31Ɓatatasu ɗáɓáí mána ka nkanda, ɓíndɔ ɓáɗundu suɓi á Ɓuku á Mokonga: Ɗéɓophi mokati, n'atóki na koba#Ɔna Jua 16.4; Jab 78.24 ka ea í.» 32Mpɔ Yéso áǒgea: «Nenóngoɗi ɗoni gea, nna Mósa aámbé ɗánophi mokati n'atóki na koba. Abɛ ndiu aámbé aonopha mokati á ɗoni, nnde á na koba. 33Nga, mokati ndea Mokonga aunge aotóka na koba, áǒɓopha ɓato á ka mokonda enda.» 34Ɓâ gǎkɛ ongoɗea: «Mɔkɔta, ósopha mokati ndɔ esa bubui.»
35Mpɔ, Yéso áɔ̌tɔmia ɓe: «Nende Mokati á endisa. Mmbé amobikíí, kákuwɛku tanda na nja na mmbé amoɓeeki, kákuwɛku tanda n'ɛnyɔta. 36Ɗénóngoɗi gǎkɛ nndɔ: Nanga ɓɔmɔɔni ye, ɓókóomoɓeekea. 37Ɓakpa ɓɔbu ɓunde Abɛ amopi, ɓámobikiande. Mmbé amobikíí kémɓeɛgɛku tanda. 38Nga, ɓî nedidi ka toka na koba, nna ka tɔtɔkisa á mɔphɛ nɛmɔ, a ndiu ka tɔtɔkisa á mɔphɛ á mmbé ɗámoteki. 39Mɔphɛ á mmbé ɗámoteki ande gea te, kémɓungisɛmbɛ mɔnɔ ka ɓunde ɗámopi. Nénjujukisɛ ndiu ka kukuwa k'ésa á sungiaga á mokonda. 40Cɔ, mɔphɛ á Abɛ a ɓe: Mmbé aɔmɔna Muna-Mokonga na ɓeekea akɛ, áɓɛ na enda á mɛyɔ na nenjujukisande k'ésa á sungiaga á mokonda.»
41Cɔ, Ɓayúda ɓáɔngɔngɔnɛaga Yéso ka nyɔngɔ nde ɗági: «Nende mokati nde atóki na koba.» 42Ɓáɔyɔnga gea: «Nga Yéso aámbé, muna-Yɔsɛ́phu na Malía. Cɔ, kɛ̌kɛnde agi, atóki na koba ka ɓo?» 43Yéso áǒsikisia te: «Ɓɔ́kɔngɔngɔnɛgɛmbɛ sɔsɔɓɛ anu. 44Nna na nkpa nde aɔtɔka n'abiki mɔtɛ-amɔ, Abɛ mmbé amoteki na kámɔphani. Na eme, nenjujukisaeka ka kukuwa esa á sungiaga á mokonda. 45Cɔ, ɓaɔtu-nyɔngɔ ndea Mokonga ɗáɓáɗundu ɓe: ‹Mokonga aámbé aegoisagande ɓakpa ɓɔbu#Ɔna Isa 54.13.› Nkpa buakɛ mmbé aɔ́ki nyɔngɔ ndea Abɛ na ɓɔphɛi nɛkɛ, aámbé abikande mɔtɛ-amɔ. 46Ka ɓakpa kámɔnimbɛ mɔnɔ Abɛ, na nna tɔndɔ mmbé atóki mɔtɛ á Mokonga, yɛ tɔ aámbé amɔni Abɛ. 47Eya, nenóngoɗi ɗoni gea, mmbé aɓeeki, ana enda á mɛyɔ.
48Eme nende mokati á endisa. 49Ɓatatanu ɗáɓáí mána ka nkanda, ɓâ gǎkɛ okuwa. 50Cɔ, mokati nde atóki na koba, nkpa nde aoea ú, kákuwɛku. 51Nende mokati á endisa, nnde atóki na koba. Aoɓá nkpa n'aí ka mokati ndɔ, aendande mɛyɔ. Mokati ndɔ, ande kesuku ani, nnde něgabeande ɓato á ka mokonda ka gea, ɓáɓɛ na enda.»
52Kaɓondɔ, Ɓayúda ɓáokpanga púa ngǔngu aɓɔ phɛɛ. Ɓáoúsianaga: «Mogaa nde aɔtɔka opha asu kesuku akɛ gea, ɓéeɛ ka ɓo?» 53Yéso áǒgea: «Nenóngoɗi ɗoni gea, aoɓá na ɓókóí kesuku á Muna-Nkpa na noa magia akɛ, ɓókóɓɛku na enda. 54Mmbé aoea kesuku ani na noa á magia ani, ana enda á mɛyɔ, na nenjujukisande ka kukuwa esa á sungiaga á mokonda. 55Nga, kesuku ani ande eea á ɗoni, na magia ani ande kema á onoa á ɗoni. 56Mmbé aoea kesuku ani na noa á magia ani, eme neiki suɓi akɛ na yɛ aiki suɓi ani.
57Abɛ mmbé amoteki ana enda, na enda ani atóki ka yɛ. A phɔtɔ ɓó ka mmbé aoea kesuku ani, aɓande na enda ka nyɔngɔ ani. 58Cɔ, ɔ́nani mokati nde ɗátóki na koba. Nna ɓíndɔ ɓatatanu ɗáɓáí ɓáokuwa. Mmbé a gǎkɛ oea mokati nde, aendande mɛyɔ.» 59Ɗáyɔngi nndɔ ɓî ɗátú ogoisaga k'éndu á madondanɔ ndea Ɓayúda ka nyɔngɔ á Mokonga ka Kapɛɛnaúmu.
Nyɔngɔ nde aoendisa mɛyɔ
60Mbusa á ɔ́ka á nyɔngɔ ndɔ, ka ɓagoigi nɛkɛ ɓásii ɓáogea: «Yɔnga nde aákpɛ. Ani mmbé aɔtɔka n'aɓeeki ú?» 61Ɓî Yéso aúbi ye gea, ɓagoigi nɛkɛ ɓáɔngɔngɔnɛaga ka nyɔngɔ ndɔ, áǒgea: «Nyɔngɔ ndɔ anóphi ngǎka? 62Cɔ, aɓande ɓo aoɓá na ɓɔɔmɔɔna eme, Muna-Nkpa na neotáia ɔma nde ɗétú mosá? 63Měma á kanga ɓojeɗe aunge aoendisa. Nga, nkpa sasakɛ nnaɔtɔka ka kema. Nyɔngɔ nde ɗénóngoɗi, ande á Měma na anóphande enda. 64Nyɔngɔ ndɔ gǎkɛ ungɔ ɓunɛngbo sɔsɔɓɛ anu ɓánáoɓeekea.» Nga, Yéso ɗáeɓúbi kpanga á kala ɓunde ɗáɓákáɓeeki, na mmbé antɔngande. 65Mpɔ, Yéso â goto ǒgea: «Ka nyɔngɔ índɔ unge ɗénóngoɗi gea, nkpa nnaɔtɔka n'amobikíí aoɓá Abɛ n'akámophi aphe.»
66Kpanga á mbenɔ ndɔ, ka ɓagoigi nɛkɛ ɓásii ɓáǒjujia na ɗeketa á tamba kimoci na yɛ. 67Mpɔ, Yéso áǒɓúsia ɓagoigi nkama na ɓaɓɛ (12): «Ɓenu phɔtɔ, ɓookonda ɓógɛ?» 68Simɔ́ni Pɛ́tɛɛ â gǎkɛ onsikisia: «Cɔ, Mɔkɔta, ɓegande mɔtɛ á ani? Nga, ona nyɔngɔ á endisa á mɛyɔ. 69Ɓeɓeeki ú na úba í gea, onde Nto á kanga ɓojeɗe ndea Mokonga#Ɔna Mat 16.16; Mkɔ 8.29; Lók 9.20.» 70Yéso áǒsikisia: «Ɗékénɔsɔmbu phɔ́ ɓenu Nkama na ɓaɓɛ (12), nanga moci sɔsɔɓɛ anu ande nketi?» 71Ɗáɔyɔnga ka phɔa á Yúda muna Simɔ́ni Isikaliɔ́ta. Nanga ɗátú sɔsɔɓɛ á ɓagoigi nkama na ɓaɓɛ (12), yɛ aámbé antɔngaeka.
Currently Selected:
Yoáni 6: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
