Lóka 3
3
Ekuma ndea Yoáni-Mɓatisi
(Ɔna phɔtɔ Mat 3.1-12; Mkɔ 1.1-8; Yoá 1.19-28)
1Nyɔngɔ nde ɗátú ka saga á ko nkama na ɓɔku á koɓoamɛ ndea moamɛ angbóngbó Tibɛlíɔ#3.1 Tibɛlíɔ ɗátú moamɛ angbóngbó á Ɓalɔ́ma mmbé ɗámpɛni Ogústɔ. Kaisáa, Pɔntíɔ Pilátɔ ɗátú mɔkɔta ka Yudɛ́a. Galiláya ɗátú kusi á kɔkɔta á Ɛlɔ́dɛ. Itulɛ́a na Taakɔníti ɗátú kusi á kɔkɔta á Philípɔ, muna-amakɛ na Ɛlɔ́dɛ. Abilɛ́nɛ ɗátú kusi á kɔkɔta á Lisanía. 2Anási na Kayápha ɗáɓátú ɓagbɛga á ɓatoɓeigi-phɛ́a. Ka saga ndɔ, nyɔngɔ á Mokonga áɔngɔna Yoáni muna-Jakaía ka nkanda, áoɓá mɔtu-nyɔngɔ ndea Mokonga. 3Áɔtɔmba nji bui á ka mpɛphɛ á Yɔɔdáni n'aɔ̌phɛa ɓakpa ɓe: «Kětiani tambea anu ájeɗe, ɓánoɓatisɛ, mpɔ Mokonga áímɛ ɓojeɗe nɛnu.» 4Cɔ, nnde ande tɔtɔkɛana á nyɔngɔ nde Isáya mɔtu-nyɔngɔ ndea Mokonga ɗáɗundu gea:
«Nkpa moci aoaba n'ɛsɔ akpɛ ka nkanda ɓe:
Ɓɔngisiagani aphe ndea Mɔkɔta!
Mamisani k'akɛ aphe kau, dɛ!
5Ěmbé bui ɓátúmisande.
Mamba, n'etondoo bui ɓásɛngɛande.
Ɔma nde aphe ěgbúki, ɓámamisande dɛ!
Ɔma á etia-etia, ɓáɓɔngisande.
6Kaɓondɔ, ɓakpa ɓɔbu ɓáɔnande gǎkɛ ɓoamia ndea Mokonga#Ɔna Isa 40.3-5.»
7Cɔ, usɛsɛ á ɓakpa ɓáobika mɔtɛ á Yoáni ka ɓatisa aɓɔ. Yɛ â gǎkɛ ǒngoɗea ɓe: «Ɛɓɔkɔti á kaɓokosa nde ca! Ani mmbé anoúbisi tea esúia ndea Mokonga nnde abiki? 8Tɔtɔkisani pɛ ekuma ánjá ka úbisa gea ɓokěti ye tambea anu ájeɗe. Ɓókóikiɛmbɛ égea sasanu te, tatasu ande Abalaámu#Ɔna Yoá 8.33,37,39. Cɔ, nenóngoɗi gea, Mokonga ana ɓukpɛkpɛ á gaía á ɓ'ɛtɛ nde, áomesia ɛɓɔkɔti ndea Abalaámu. 9Ɓábisi ye tɔ eoka ka ɓokû á me. Me buakɛ mmbé nnaɔgɔmbisa mbuka ánjá, ɓámbiande, ɓáomaka ka nsa.»
10Usɛsɛ á ɓakpa ɓáomúsia: «Ɓégeɛ gǎkɛ ɓo?» 11Yoáni áǒsikisia: «Nkpa nde ana ngɔ́mbɛ iɓɛ, ámophɛ mmbé nna na kau. Mmbé a gǎkɛ n'eea, ágeɛ phɔtɔ ɓó.» 12Ɓaphendisigi-manjanja, ɓâ phɔtɔ obika k'aphe á oɓatisɔ. Ɓáongea Yoáni: «Ngoisigi, ɓégeɛ nɛsu ɓo?» 13Yoáni áǒsikisia: «Ɓókophendisɛmbɛ imɔna kɔnyɛ́nya nnde ɓánósosi phendisa í.» 14Ɓato émani ɓâ phɔtɔ omúsia: «Ɓesu gǎkɛ ɓégeɛ ɓo?» Áǒsikisia ɓundɔ te: «Ɓókǒphendisɛmbɛ ɓakpa imɔna ka mbɛa. Ɓókomutɛmbɛ nkpa kema na tɔnga phɔtɔ nkpa kitɔngi á mbɛa. Endani tɔndɔ k'óphendɔ nɛnu.»
15Mpɔ ɓakpa ɓɔbu ɓunde ɗáɓáoɓondeaga kema nde atɔtɔkɛanande, ɓáoúsianaga ka měma aɓɔ ka phɔa Yoáni: «Ayo, Yoáni nna phɔ́ Kiísito?» 16Yoáni â gǎkɛ ǒsikisia ɓakpa ɓɔbu gea: «Eme neonóɓatisa nɛmɔ ka iɓo. Nkpa moci a gǎkɛ obika mbusa ani n'amɔnyɛ́nyi ka ɓukpɛkpɛ. Kékeni koɗa á ngoi á ɓiato nɛkɛ. Yɛ aámbé anóɓatisande ka Měma á kanga ɓojeɗe na ka nsa.» 17«Abɛɗi ungɔ ka njaga akɛ ka pɛca á mponga. Â gǎkɛ obisa mponga ka tɛta, â ndiu otóɓoa tɔnɛ í ka nsa nde nnaoímika.»
18Ɓondɔ unge Yoáni ɗátú ɔ̌phɛaga ɓakpa mɔngɔ ásii Nyɔngɔ Ánjá ndea Mokonga. 19Mbusa, Yoáni áomphekeaga Moamɛ Ɛlɔ́dɛ ka nyɔngɔ nde ɗámukí Ɛlɔdía, nka muna-amakɛ phɔtɔ na ka nyɔngɔ ájeɗe-jeɗe nde ɗági. 20Gǔ índɔ, Ɛlɔ́dɛ â goto ogea ɓojeɗe, áommakea Yoáni ka mekakɔ.
Ɓatisa á Yéso
(Ɔna phɔtɔ Mat 3.13-17; Mkɔ 1.9-11)
21Mbusa á Yoáni ɓatisa á ɓakpa ɓɔbu ɓunde ɗáɓátú wa, â phɔtɔ omɓatisa Yéso. Cɔ, ɓî Yéso ɗáɔmɛma, koba áokoɗokana, 22Měma á kanga ɓojeɗe áodida gǔ akɛ n'aǒphangisia ɓea mboe. Ɛsɔ áɔɔ́kɛkana n'atóki na koba, áogea: «Ɔɓɛ, onde miki nɛmɔ ékondi. Nena maseye ka phɔakɔ#Ɔna Jab 2.7; Isa 42.1.»
Ina á ɓato á k'ékombo ndea Yéso
(Ɔna phɔtɔ Mat 1.1-17)
23Yéso ɗátú na ɓasaga ɓea nkama isaɔ (30) ɓî akpangi ekuma nɛkɛ. Ɓakpa ɗáɓáoúba te, ande Muna Yɔsɛ́phu, mmbɔ muna Ɛlí, 24mmbɔ muna Matáti, mmbɔ muna Láwi, mmbɔ muna Mɛ́lki, mmbɔ muna Yána, mmbɔ muna Yɔsɛ́phu, 25mmbɔ muna Matatía, mmbɔ muna Amɔ́si, mmbɔ muna Naúmu, mmbɔ muna Ɛsíli, mmbɔ muna Nágɛ, 26mmbɔ muna Máti, mmbɔ muna Matatía, mmbɔ muna Simɛ́i, mmbɔ muna Yɔsɛ́ki, mmbɔ muna Yɔ́da, 27mmbɔ muna Yɔána, mmbɔ muna Lɛ́sa, mmbɔ muna Jɛubabɛ́li, mmbɔ muna Saltiɛ́li, mmbɔ muna Nɛ́i, 28mmbɔ muna Mɛ́lki, mmbɔ muna Ádi, mmbɔ muna Kɔsámu, mmbɔ muna Ɛlmadámu, mmbɔ muna Ɛ́li, 29mmbɔ muna Yɔsúa, mmbɔ muna Ɛliɛjɛ́ɛ, mmbɔ muna Yɔímu, mmbɔ muna Matáti, mmbɔ muna Láwi, 30mmbɔ muna Simɛɔ́ni, mmbɔ muna Yúda, mmbɔ muna Yɔsɛ́phu, mmbɔ muna Yɔnámu, mmbɔ muna Ɛliakímu, 31mmbɔ muna Mɛlɛ́a, mmbɔ muna Mɛ́na, mmbɔ muna Matáta, mmbɔ muna Natáni, mmbɔ muna Daúdi, 32mmbɔ muna Yɛ́sɛ, mmbɔ muna Ɔbɛ́di, mmbɔ muna Boáji, mmbɔ muna Salmɔ́ni, mmbɔ muna Nasɔ́ni, 33mmbɔ muna Aminadábu, mmbɔ muna Adimíni, mmbɔ muna Aáni, mmbɔ muna Ɛsilɔ́ni, mmbɔ muna Pɛlɛ́si, mmbɔ muna Yúda, 34mmbɔ muna Yakɔ́ɓɔ, mmbɔ muna Isáka, mmbɔ muna Abalaámu, mmbɔ muna Tɛ́la, mmbɔ muna Naɔ́li, 35mmbɔ muna Sɛlúgu, mmbɔ muna Lɛ́u, mmbɔ muna Pɛlɛ́gi, mmbɔ muna Ɛbɛ́li, mmbɔ muna Sɛ́la, 36mmbɔ muna Kainána, mmbɔ muna Aluphakisádi, mmbɔ muna Sɛ́mu, mmbɔ muna Nɔ́a, mmbɔ muna Lamɛ́ki, 37mmbɔ muna Mɛtusɛ́la, mmbɔ muna Ɛnɔ́ki, mmbɔ muna Yaɛɛ́di, mmbɔ muna Maalɛ́li, mmbɔ muna Kainána, 38mmbɔ muna Ɛnɔ́si, mmbɔ muna Sɛ́ti, mmbɔ muna Adámu, mmbé ɓa Mokonga.
Currently Selected:
Lóka 3: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
