Lóka 4
4
Nketi antombigi Yéso
(Ɔna phɔtɔ Mat 4.1-11; Mkɔ 1.12-13)
1Mbusa índɔ Yéso áotóka na Yɔɔdáni n'atúmi na Měma á kanga ɓojeɗe. Měma ndɔ áɔnsɔndɔɛa ka nkanda. 2Kó, Nketi áontombaga esa nkama gena (40). Cɔ, ka ɓ'esa ndɔ bui, Yéso na nna tanda oeaga. Mbusa índɔ, nja áɔmbɛɗa. 3Nketi áongea: «Aoɓá n'onde Muna-Mokonga, sosea phɔ́ ɛtɛ nde áɓɛ mokati.» 4Yéso â gǎkɛ onsikisia te: «Ɓuku á Mokonga agie, nkpa nna tɔ oenda k'éea#Ɔna Tɔl 8.3.»
5Nketi áɔmɛɛa mosá, áonɗáphisa gǔ á mamba, mɔngɔ ímoci, áɔmɔnisa koɓoamɛ bui á ka mokonda. 6Aongea: «Nekophande kɔkɔta á koɓoamɛ nde bubui, na ɓoombia í bui. Nga, nndɔ bui ɗáɓámopi. Eme aámbé ne tɔ ogaba ka nkpa nde nekondi. 7Cɔ, aoɓá n'ogbuki muanku mosá ani, bubui áɓá tɔ akɔ.» 8Yéso â gǎkɛ onsikisia: «Ɓuku á Mokonga agie: ‹Gbúka tɔ muanku akɔ mosá á Mɔkɔta nɛkɔ Mokonga. Ɔ́mbɛɗaneɛgɛ tɔ yɛ sasakɛ#Ɔna Tɔl 6.13.›»
9Nketi â goto ɔmɛɛa mosá na Yɛusalɛ́ma, áonɗaphisa gǔ éndu á Mokonga. Áongea: «Aoɓá n'onde Muna-Mokonga ɗoni, ómaka phɔ́ ka oɗo. 10Nga, Ɓuku á Mokonga agi: ‹Ěsoseande ɓamalaéka nɛkɛ, ɓákoambɛ. 11Ɓákoambande ka njaga aɓɔ gea te, ecinji akɔ kaɓɛtɛkanɛmbɛ k'ɛ́tɛ#Ɔna Jab 91.11-12.›» 12Yéso áonsikisia te: «Ɓuku á Mokonga agi phɔtɔ: ‹Kontombɛgɛ mɔnɔ Mɔkɔta nɛkɔ Mokonga#Ɔna Tɔl 6.16.›»
13Ɓî nketi agɔɓi ye tombaga ndɔ bui, â ye tɔ onɗeketa, áoga oɓondea esa nɛngbo.
Yéso akpangi bɛɗanaga ekuma nɛkɛ ka Galiláya
(Ɔna phɔtɔ Mat 4.12-17; Mkɔ 1.14-15)
14Yéso áoja na Galiláya, ɓukpɛkpɛ á Měma á kanga ɓojeɗe n'atúmi ka měma akɛ, mbino akɛ áɔɛmba ka nji bui á ka mpɛphɛ. 15Áogoisaga k'éndu á madondanɔ ndea Ɓayúda ka nyɔngɔ á Mokonga, ɓakpa ɓɔbu ɓáonɗokomisa.
Yága á Yéso ka Najalɛ́ti
(Ɔna phɔtɔ Mat 13.53-58; Mkɔ 6.1-6)
16Mbusa á wa, áoga na Najalɛ́ti ɔma nde ɗáɓámmɔtisi. Esa á saɓáto, áongia k'éndu á madondanɔ ndea Ɓayúda ka nyɔngɔ á Mokonga ɓíndɔ ɗátú ogeaga. Mpɔ, áoma ka tanga. 17Ɓáomopha ɓuku ndea Isáya. Áoúkua ú, áodonda ɔma nde ɓáɗundu:
18«Měma á Mɔkɔta amɔgɔni,
amɔsɔmbu ka tɔ̌miaga á ɓato á ɓuyɛnɛ Mbino-Ánjá.
 phɔtɔ omoteka ka úbisa á ɓato á mekakɔ esa á juana aɓɔ
na koɗa iso á ɓakeíme-íme,
na phúia á ɓakusi ka kɔkɔɓɛ,
19na tɔ̌mia á saga á ngomi ndea Mɔkɔta#Ɔna Isa 61.1-2.»
20Wa, áoikita ɓuku ndɔ, áomopha mbɛɗanigi á k'éndu á madondanɔ ndea Ɓayúda ka nyɔngɔ á Mokonga, áoika ka phɛá aɓɔ. Ɓakpa ɓɔbu ɓáontúmia n'íso, 21Yéso áǒngoɗea ɓe: «Kesande nyɔngɔ ndɔ ɓɔɔ́ki atɔtɔkɛani.» 22Nyɔngɔ nɛkɛ áɔ̌ɓɔngɛa ɓakpa ɓɔbu ɓunde ɗáɓáɔmɔ́ka nga, ɓoabi ndɔ ɗátú á ketangaɔ. Ɓáoúsianaga: «Nna phɔ́ muna Yɔsɛ́phu aámbé?»
23Mpɔ Yéso áǒsikisia ɓoabi: «Ɗoni, ómongoɗeani phɔ́ mɛní ndee: ‹Nsaku, ósakoa sasakɔ.› Cɔ, gea phɔ́ wani nyɔngɔ ndɔ ɓɛtɔ́ɔ́ki n'ogi na Kapɛɛnaúmu nga, wani ande nji nɛkɔ.» 24«Nenóngoɗi ɗoni gea: Nna na mɔtu-nyɔngɔ ndea Mokonga mmbé ɓánsesimbɛ mɔnɔ ánjá ka nji nɛkɛ á ɓɔkɔtɛana.
25Eya, ka saga ndea Elía, ɓake á kekusa ɗáɓáɓiki phɛɛ ka Isilaɛ́li. Mbua ɗákáɔɔka ka ɓasaga ɓasaɔ na gbutuka. Monganya áogua ka mokonda bui#Ɔna 1 Ɓam 17.1. 26Nna na ka ɓɔ nde Mokonga ɗánteki Elía mɔtɛ-akɛ, â tɔ onteka mɔtɛ á nke á kekusa ɓa ka Jaɛpáta, nji á Sidɔ́na#Ɔna 1 Ɓam 17.8-16. 27Ka saga á Ɛlísa mɔtu-nyɔngɔ ndea Mokonga, ɓato á sǔ ɗáɓáɓiki suɓi á Ɓaisilaɛ́li. Nna na ka ɓɔ mmbé ɗáami, na nna tɔndɔ Namáni, nto á ka Sulía#Ɔna 2 Ɓam 5.1-14.»
28Ɓî ɓáɔ́ki ye ɓó, ɓɔbu ɓáɔɓɛa phɛɛ suɓi éndu á madondanɔ ndea Ɓayúda ka nyɔngɔ á Mokonga. 29Ɓáǒmesia, ɓáonjuanisa Yéso ka ngba á ntanga-nji, ɓáontáisa gǔ á mamba nde ɗáɓáphɛ̌ki Najalɛ́ti kau, ka gea ɓántingisiɛ ka ěmbé. 30Yɛ â gǎkɛ ǒsoɗokana, áoga nɛkɛ.
Amisa á nto á kukuwa á ɓansombo
(Ɔna phɔtɔ Mkɔ 1.21-28)
31Mpɔ, Yéso áodida ka ntanga-nji moci á ka Galiláya nnde ɓáɔɔphana Kapɛɛnaúmu. Áǒgoisaga ɓakpa k'ésa á saɓáto. 32Ɓɔ, ɓáotangaaga phɛɛ, nga goisaga nɛkɛ ɗátú na kɔkɔta kau. 33Cɔ, nkpa moci ɗátú k'éndu á madondanɔ ndea Ɓayúda ka nyɔngɔ á Mokonga, ɓansombo na ɓámbɛɗi. Aokoga akpɛ. 34«Hoo! Yéso ɓa Najalɛ́ti ekende ɓeogi ně? Obiki kosótindisa? Neokoúba, onde Nto á kanga ɓojeɗe ndea Mokonga.» 35Yéso áǒkea ɓansombo: «Kɔ́ɓani! Juanani ka nkpa ndee!» Mpɔ, ɓansombo ɓáontenea nkpa ndɔ ka oɗo gbu! Mosá á ɓakpa ɓɔbu. Ɓansombo ɓáontóka. Kema kangeɛ nkpa ndɔɔ. 36Ɓakpa ɓɔbu ɓáoyayama, ɓáoúsianaga: «Ogiɓóo! Nyɔngɔ sina nde? Mogáa nde ěɓǐgi ɓansombo? Nna kɔkɔta akpɛ unge? Ɓansombo ɓátóki ka nyama á nkpa ɓende?» 37Ɓondɔ unge ɓoombia á Yéso, áondanda ka nji ndɔ bui.
Yéso aǒamisa ɓato á esambɔ
(Ɔna phɔtɔ Mat 8.14-17; Mkɔ 1.29-34)
38Yéso ajúani ye k'éndu á madondanɔ ndea Ɓayúda ka nyɔngɔ á Mokonga, áoga k'éndu ndea Simɔ́ni. Ama-nkakɛ na Simɔ́ni ɗátú na jónga akpɛ. Ɓáɔmmɛma Yéso, ágeɛ ka kema ka phɔakɛ. 39Cɔ, Yéso áɔgɔtɔma gǔ akɛ, áokeea jónga, jónga ndɔ áosia. Kɛ̌kɛndɔ, nke ndɔ áoama, áoúnanaga ka ɓɔ.
40Ka gǎ á maní, ɓakpa ɓáombikia Yéso na ɓasambi ɗanga-ɗanga. Áǒbisia njaga moci-moci, áǒamisa. 41Ɓansombo ɓâ phɔtɔ ojuana ɓásii na ɓáokoga: «Onde Muna-Mokonga!» Yɛ, â ndiu ǒkeea, áǒdakanisa, ka nyɔngɔ nde, ɗáɓáúbi gea, Yéso ande Kiísito.
Yéso aɔphɛa suɓi éndu á madondanɔ ndea Ɓayúda ka nyɔngɔ á Mokonga
(Ɔna phɔtɔ Mkɔ 1.35-39)
42Ka koɗokanaga á esa, Yéso áoga ka nkanda. Ɓakpa ɓásii ɓâ gǎkɛ onkaɓa, ɓáondonda, ɓáongea: «Kósoɗeketɛmbɛ.» 43Â gǎkɛ ǒgea: «Mokonga amoteki gea, nɛ́tɔ̌miɛgɛ phɔtɔ Mbino-Ánjá á koɓoamɛ nɛkɛ ka nji nɛngbo.» 44Mpɔ, Yéso áotútuisa ɓɔphɛi á Mbino-Ánjá k'éndu á madondanɔ ndea Ɓayúda ka nyɔngɔ á Mokonga bui ndea ka Yudɛ́a.
Currently Selected:
Lóka 4: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
