यूहन्ना 13

येशू आपन चेलासिके पैर धोयल्कै

1निस्तार पावन शुरु हुऐसे पहेला येशूके यी पता रहै कि यी संसारसे छोडिके आब ओकर आपन पिता-परमेश्वर लगत वापस लौटिके जैके समय आबी गेलै छे। ओकर आपन चेलासब जे यी संसारमे रहै, ओकरासिके ऊ एखनतक जेरं प्रेम कर्ते रहै, ओहिने करिके अन्तिमतक ऊ ओकरासिके पुरा तरहसे प्रेम कर्ते रहै। 2येशू आर ओकर चेलासब रातके खाना खैते रहै। शैतान पहलहैसे ही येशूके धोखा दियैके लिए सिमोनके बेटा यहूदा स्करियोतके मनमे डाली चुक्लै रहे। 3येशू यी जान्ते रहै कि परमेश्वर पिता सभे कुछु ओकर हातमे द्या देल्कै छे, आर यी कि ऊ परमेश्वरके लगतसे ऐलै छे, आर परमेश्वरे कते जैछै। 4तब येशू खानापर से उठिके आपन उप्परके कपडा खोलीके कम्मरमे लपेटल्कै।

5तब येशू एकटा गमलामे पानी ल्याके आपन चेलासिके पैर धुवे लाग्लै आर आपन कम्मरमे लपेटल कपडासे एकटा नोकरके जुगुर ओकरसिके पैर पोछे लाग्लै। 6जब ऊ सिमोन पत्रुसके लगत ऐलै ते, पत्रुस ओकरा कहैल्कै, “हे प्रभु, कि तुहें हमर पैर धोय्भ?” 7येशू ओकरा जबाब देल्कै, “हमे एखन जे करैछियै तुहें एकर मतलब नैबुझ्भैं, मगर पाछु बुझ्भैं।” 8पत्रुस ओकरा कहैल्कै, “नै प्रभु! हमे आपन पैर तोरा कहियो भी धुवैले नैदेभौं।” तब येशू ओकरा कहैल्कै, “यदि तुहें आपन पैर हमरा धुवे नैदेभैं ते, तोर हमरसंगे कोनो सम्बन्ध नैहैतौ।” 9तब सिमोन पत्रुस ओकरा कहैल्कै, “हे प्रभु! तब खाली हमर पैर नै, मगर हमर हात आर माथ भी धोय द्या।” 10येशू ओकरा जबाब देल्कै, “एकटा आदमी जे लहैल छै ओकरा खाली आपन पैरके धुवैके जरुरत छै, ओकर पुरा शरीर साफ छै। तुहेंसब सभेको शुद्ध छैं, खाली एक झनके छोडिके।” 11येशू ते जान्ते रहै कि ओकरा के धोखा करिके गिरफ्तार करैतै। सेल्याके ऊ यी बात कहैल्कै रहे कि, “तुहेंसब सभेको शुद्ध छैं, खाली एक झनके छोडिके।”

12ओकरसिके पैर धुवैके बाद येशू आपन उप्परके कपडा पिन्हीके फेर वापस जैके खाना खैले बैठ्लै। तब ऊ आपन चेलासिके कहैल्कै, “कि तुहेंसब यी बुझलहैं कि हमे तोरसिके संगे कि कैलियौ? 13तुहेंसब हमरा गुरु आर प्रभु कहैछैं, उटा तुहेंसब ठीके कहैछैं, कहिनेकी हमे तोरसिके गुरु आर प्रभु छियौ। 14अगर हमे तोरसिके गुरु आर प्रभु भ्याके तोरसिके पैर धोयलियौ छे ते तोरहौसिके एक दोसराके पैर धुविके हमर अनुकरण करना चाही। 15कहिनेकी हमे तोरासिके एकटा नमुना देखैलियौ छे, ताकी तहुँसब ओहिने करहैं जेरं हमे तोरसिके संगे कैलियौ छे। 16हमे तोरासिके सच कहैछियौ, मालिकसे बडका नोकर नैहैछै आर कोय भी सन्देशवाहक खबर भेजेवाला से बडका नैहैछै। 17आब जब कि तुहेंसब यी बातसब जानैछैं ते, ओकरा कर ताकी तुहेंसब धन्यके भ्याजहैं।”

धोखाबाज चेला यहूदा स्करियोतके बारेमे येशूके इशारा

(मत्ती २६:२०-२५; मर्कू १४:१७-२१; लूक २२:२१-२३)

18“हमे तोरसिके सभैके बारेमे यी बात नैकहैछियौ। हमे ते तोरासिमे हरेकके जानैछियौ, जकरासिके हमे चुन्लियै छे। मगर एरं इहे ल्याके हैछै ताकी धरमशास्त्रमे जे लिख्ल छै उटा बात पुरा है। यी कहैछै,

‘जे हमरसंगे खैल्कै ऊ हमरा धोखा देल्कै छे।’

19यीसब घटना घटैसे पहलहै हमे तोरासिके एकर बारेमे इहे ल्याके बताबैछियौ, ताकी यीसब घटना घटलके बाद तोरासिके पुरा विश्वास भ्याजौ कि हमे उहे छियै जकरा परमेश्वर भेजल्कै छे। 20हमे तोरासिके सच कहैछियौ, जकरा हमे पठाबैछियै, ओकरा स्वागत करेवाला हमरा स्वागत करैछै, आर हमरा स्वागत करेवाला हमरा भेजेवालाके स्वागत करैछै।”

21यी बात कहिके येशू एकदम व्याकुल भेलै तब ऊ आपन चेलासिके बुझ्याके कहैल्कै, “हमे तोरासिके सच कहैछियौ, तोरसिमेसे हमरसंगे ख्यावाला एकझन हमरा गिरफ्तार करैके लिए हमर दुश्मनसिके सहायता कर्तै।” 22चेलासब प्रभुके यी बातके बुझे नैसकल्कै कि येशू ककर बारेमे कहैछै, आर ऊसब चकित भ्याके एक-दोसरके देखे लाग्लै। 23प्रभुके एकटा चेला जकरा ऊ बहुते प्रेम कर्ते रहै ऊ चेला येशूके बगलमे बैठ्ल रहै। 24उहे चेलाके सिमोन पत्रुस इशारा करिके कहैल्कै, “तुहीं ओकरासे पुछैं कि ऊ यी बात ककर बारेमे कहैछै।” 25ऊ चेला येशूके छातीके तरफ झुकिके ओकरासे पुछल्कै, “प्रभु, ऊ के छै जे तोरा दुश्मनसिके हातमे गिरफ्तार करवाबैले सहायता कर्तै?” 26येशू जबाब देल्कै, “जकरा हमे रोटीके टुकरा चटनीमे डुब्याके देबै, हमर कहेल आदमी उहे छै।” तब येशू रोटीके टुक्रा डुब्याके सिमोन स्करियोतके बेटा यहूदा स्करियोतके देल्कै। 27यहूदा रोटीके टुकरा लेलके बाद, येशू ओकरा कहैल्कै, “तुहें जे करेवाला छैं उटा जल्दी कर।” ऊ समयमे शैतान यहूदाके आपन वशमे कैल्कै। 28ओत्ते भोजन खैले बैठेवाला चेलासिमेसे कोय भी यी बात नै जान्ते रहै कि येशू ओकरा एरं कहिने कहैल्कै। 29कुछु चेलासब बुझल्कै कि शायद येशू ओकरा यी कहैल्कै कि पावनके लिए जे कुछु चीजके जरुरत छै उटा जल्दीसे किनिले, या गरिबसिके थोडा-बहुत द्या दहैं, कहिनेकी सभैके पैसा-कौडी राखेवाला थैली यहूदा स्करियोतके लगत ही रहते रहै। 30रोटीके टुकरा खैलके बाद यहूदा तुरन्ते ओत्तेसे बाहार निक्लीके चल गेलै। तखनी रातके समय रहै।

येशू एकटा नया आज्ञा देल्कै

31जब यहूदा ओत्तेसे बाहार चल गेलै तब येशू कहैल्कै, “आब हमे, आदमीके बेटाके महिमा प्रकट भेलै छे, आर आब परमेश्वरके महिमा ओकरद्वारा प्रकट भेलै छे। 32अगर परमेश्वर ओकरद्वारा महिमित भेल छै ते परमेश्वर आपन बेटाके महिमित बनैतै, आर ऊ उटा तुरन्ते कर्तै। 33हे हमर बेटासब, कुछु देरतक हमे तोरसिके संगमे छियौ। तकरबाद तुहेंसब हमरा खोज्भैं, जेरं हमे यहूदी आदमीसिके अगुवासिके कहैलियै रहे, हमे तोरहौसिके कहैछियौ, जते हमे जैछियै, ओत्ते तुहेंसब नैआबे सक्भैं। 34एकटा नया आज्ञा हमे तोरासिके दैछियौ: तुहेंसब एक दोसराके प्रेम कर। जेरंके हमे तोरासिसे प्रेम कैलियौ छे, तहुँसब एक दोसराके ओहिने प्रेम कर। 35यदि तुहेंसब एक दोसराके प्रेम कर्भैं ते, सभेको जानी लेतै कि, तुहेंसब हमर चेला छैं।”

पत्रुसके द्वारा येशूके इन्कार करैके विषयमे भविष्यवाणी

(मत्ती २६:३१-३५; मर्कू १४:२७-३१; लूक २२:३१-३४)

36सिमोन पत्रुस येशूके पुछल्कै, “हे प्रभु, तुहें कते जैछह?” येशू जबाब देल्कै, “हमे जते जैछियै, एखन हमर पाछु-पाछु तुहें ओत्ते नैआबे सक्भैं, मगर पाछु तुहेंसब ओत्ते ऐभैं।” 37पत्रुस येशूके कहैल्कै, “प्रभु, कहिने एखन हमे तोर पाछु-पाछु नैआबे सकैछियै? हमे तोर खातिर आपन जान दियैले भी तैय्यार छियै।” 38येशू जबाब देल्कै, “तुहें हमर खातिर आपन जान दियैके बात करैछैं? हमे तोरा सच कहैछियौ, ऐजे राती मुर्गा ऐजान दियैसे पहेला तुहें हमरा तीनबेर कहभैं कि तुहें हमरा नैचिन्हैछैं।”

Currently Selected:

यूहन्ना 13: KYVNT

Highlight

Copy